ބޯފޮޅި ދުވަހަކީ، ރާއްޖޭގައި ކުރީޒަމާނުގައި ފާހަގަކުރި ދުވަހެއްކަމުގައި ބުނެވެއެވެ. މި ދުވަހުގެ އެންމެ ޚާއްޞަ ކަމަކަށް ވެފައި އޮންނަނީ ތަންކޮޅެއް ބޯކޮށް ފިހާ ފޮޅިއެއް އެ ދުވަހު ތައްޔާރުކުރާ ކަމެވެ. ހަގީގަތުގައި ބޯފޮޅި ދުވަހަކީ އެންމެ ދުވަހެއްގެ ގޮތުގައި ފާހަގަކުރާ ދުވަހެއް ނޫނެވެ. ބޯފޮޅި ފިހާ ހަތަރު ދުވަހެއް ހިޖުރީ އަހަރުގެ ތެރޭގައި އަންނަ ކަމަށް ވެއެވެ. މިއީ ދިވެހި ސަގާފީ ކަލަންޑަރުގައި ކުރިން ފާހަގަކުރި، އަލުން ދިރުމެއް ގެނެވިދާނެ ދުވަހެކެވެ.
ބޯފޮޅި އަކީ ރަސްކަމުގެ ދަރުބާރުން ފެށިގެން އެކި ދަރަޖައިގެ ބޭފުޅުންނަށް ރަސްމީ ގޮތުން ދެއްވަމުން ގެންދިޔަ އެއްޗެކެވެ. ރާއްޖޭގައި ފާހަގަކުރި ބޯފޮޅި ދުވަސްތަކަކީ، ޖުމާދިލްއާޚިރު މަހު 29 ވަނަ ދުވަހާއި، ޝަޢުބާން މަހު 14 ވަނަ ދުވަހާއި، އެމަހުގެ 29 ވަނަ ދުވަހާއި، ޙައްޖު މަހުގެ 8 ވަނަ ދުވަހެވެ. މި ދުވަސްތަކަކީ އިންތިޒާރުކުރެވޭ މީރު ބަދަލެއް ގޭގެ ކެއުމަށް އަންނަ ދުވަސް ދުވަހެވެ.
ބޯފޮޅި ދުވަހުގެ ޚާއްޞަ ކަމަކީ ބޯފޮޅި ފިހެގެން އެކައި ހެދުމެވެ. އެޒަމާނުގައި ކޮންމެ ގެއެއްގައި ވެސް މަރުވެ ގޮސްފައިވާ ތިމާގެ މީހުންނަށް ބޯފޮޅި ދުވަހު ޞަލަވާތް ފާޠިހާ ކިޔަވާ ހަދާކަމަށްވެއެވެ. އަދި ތިމާގެ މީހުންނަށާއި އަވައްޓެރީންނަށް ބޯފޮޅި ބަހައެވެ.
މިފަދަ ދުވަސްދުވަހު ބަދަލުކުރެވޭ ތަށިބަރިތަކުން ދިވެހީންގެ އެއްބައިވަންތަކަން ދޭހަވެއެވެ. މީހަކު ގިނަ ދުވަހު ބަލިވެ އުޅޭނަމަ، ބަލިތަނެއްގެ މަތީގައި ސާފު ފޮތިގަނޑެއް އަޅައި ފޮތިމަތީ ބޯފޮޅިއަތުރައި ފަގީރުންނަށް އެ ބޯފޮޅިތައް ބަހައި ހަދާކަމަށްވެއެވެ. މިއީ، ބަހާނެ މިންވަރު ދެނެގަތުމަށް ކުރާ ކަމެއްކަމަށްވެއެވެ. ބޯފޮޅިއަކީ، މި ޒަމާނުގައި ފިހާރަތަކުގައި ވިއްކަން ހަދާފައި ހުންނަ ފޮޅިއަށްވުރެ މީރު ދިވެހިވަންތަ ފޮޅިއެކެވެ. މި ފޮޅި ތައްޔާރުކުރާގޮތް ތިރީގައި ހިމަނާލާނަމެވެ.
ބޯފޮޅި ތައްޔާރުކުރާނެ ގޮތް
އާދައިގެ ސައިޒެއްގެ ގަބުޅިއެއް ހޯދައި، އޭގެ ފެން ތައްޓަކަށް އަޅައި ފަހުން ބޭނުންކުރަން ބަހައްޓާށެވެ. އެއަށްފަހު، ގަބުޅިން ހުނިގާނާށެވެ. މި ޒަމާނުގައި ނަމަ، ސަމުސަލަކުން ހެވާތައް ނަގައި މިކްސަރަކުން ހިމުންކުރަން ބެހެއްޓިދާނެއެވެ. ދެން، ކުރިން ފެނުލާފައި ހުރި ލާއްސެއްގެ ހަނޑުލާއި ގަނބުޅި ހުންޏާ އެއްކޮށް ފުނޑާށެވެ. ނުވަތަ މިކްސަރަކުން ހިމުން ކުރާށެވެ. ދިޔާ ކުރަން ބޭނުންކުރާ ނަމަ، ފެނަކަށް ބޭނުންކުރާނީ ގަބުޅިން ނެގި ފެނެވެ. ނުވަތަ ހުވަނދުމަލުގެ ފެނެވެ. މާފެނެވެ.
ބޯފޮޅީގެ ފޮނިކަން ނުކުންނަނީ އެއަށް އަޅާ ހަކުރުގެ ސަބަބުންނެވެ. ހަކުރަކަށް ބޭނުންކުރާނީ ބައި ޖޯޑު ދޯބުރާލި ހަކުރެވެ. ދެން ދެތިން މޭޒުމަތީ ސަމުސާ ދިވެހި ހަކުރެވެ. މިތަކެތީގެ ތެރެއަށް އެއް ކުކުޅުބިސް އަޅައި، ހަކުރުތައް ގިރެންދެން ގިރާނީއެވެ.
ބޯފޮޅި ފިހަން އިހު ޒަމާނުގައި ބޭނުންކުރަނީ ރަތުލޯ ތަވައެކެވެ. އާދައިގެ ތަވައިގައި ވެސް ފިހެވޭނެއެވެ. ބޯފޮޅި އެޅުމުގެ ކުރިން ތަވާގައި ހާކަން ކިރުފެލި ހުނި އަޅާފައި އޮންނަ ބޮނޑިއެއް ގެންގުޅޭނެއެވެ. ގިރާފައި ހުރި ކުކުޅުބިސް ތައްޓެއްގައި މި ބޮނޑި ޖައްސައި ތަވާގެ މަތީގައި އުނގުޅާލާނީއެވެ. ދެން ޖޯޑަކުން ނުވަތަ އުނދުޅިއަކުން، ހޫނު ތަވާގެ މައްޗަށް ބޭނުންވާ ބޮޑުމިނަކަށް ގިރާފައި ހުރި ފުށްގަނޑު އަޅައި ފިހާނީއެވެ. އެއް ފަރާތް ރަނގަޅަށް ފިހެވުމުން ފުށުން ޖަހައި އަނެއް ފަރާތް ފިހާނީއެވެ.
އިހުގައި ފޮޅި ފިހަނީ ތުނިކޮށް ހަދާފައި ހުންނަ ފުޅަފިކޮޅަކުންނެވެ. ލަކުޑިން ތުނިކޮށް މަށައިގެން ހަދާފައި ހުންނަ ދޭފަތް ވައްތަރުގެ ފޮޅިފިހާ ދޭފަތް ވެސް ގެންގުޅެއެވެ. އިހުގައި ފޮޅިކަނީ ހުހަށެވެ. ދިވެހި ހަކުރުގައި ޖަހައިގެން ނުވަތަ ދިވެހި ހަކުރު އުނގުޅައިގެން ފޮޅިކައެއް ނޫޅެއެވެ.
މައުލޫމާތު ނަގާފައިވަނީ: މުހައްމަދު އަމީނުގެ ކަރުނައާއި ނުލާ ކެއްކުން 2 ވަނަ ބައި، ހަސަން ހަމީދުގެ މަޒުމޫނު ފޮތް
