އާއިލީ ބައްދަލުވުންތަކުގައާއި، ރައްޓެހިންނާއެކު ކޮފީ މޭޒުދޮށުގައި ސިއްހަތާ ބެހޭގޮތުން ވާހަކަދެކެވޭއިރު، އަހަރެމެންގެ ތެރެއިން ބަޔަކަށް މިފަދަ ރާގަކަށް ބުނާ އަޑު އިވިދާނެއެވެ. "އަހަރެންގެ ކާފަ މުޅި އުމުރުދުވަހު ސިނގިރެޓު ބުޔެވެ. އެކަމަކު އުމުރުން 90 އަހަރާއި ގާތްވިއިރުވެސް ފުއްޕާމޭގެ ބައްޔެއް ނުޖެހޭ. ސިނގިރޭޓަކީ އެ ބުނާހާ ނުރައްކާތެރި އެއްޗެއް ނޫންކަންނޭގެއެވެ!"
މިއީ ވަރަށް ހިތްހަމަޖައްސައިދޭ، އަދި ސިނގިރޭޓު ބުއިމުގެ އާދަ ދޫކޮށްލަން ބޭނުންނުވާ މީހުންނަށް ދެއްކޭ ވަރަށް ވަރުގަދަ ނުކުތާއެކެވެ. ނަމަވެސް، މިއީ ހަގީގަތެއް ހެއްޔެވެ؟ ނުވަތަ މިއީ އަހަރެމެންގެ ސިކުނޑިން އަހަރެމެންނަށް އޮޅުވާލާ އޮޅުވާލުމެއް ހެއްޔެވެ؟ ސައިންސާއި ބޭސްވެރިކަމުގެ ހޯދުންތަކުން މި ސުވާލަށް ދެނީ މުޅިން ތަފާތު ޖަވާބެކެވެ.
ދިގު މުއްދަތަކަށް ސިނގިރޭޓު ބޮއެގެންވެސް ދިގު އުމުރެއް ކަޑައްތުކުރާ މީހުން އުޅެއެވެ. އެކަމަކު އެއީ ސިނގިރޭޓު ރައްކާތެރި އެއްޗަކަށް ވުމެއް ނޫނެވެ. އެއީ އެމީހުން ނަސީބުގަދަ ބަޔަކަށް ވުމަށްވެސް ވެދާނެއެވެ. ކާފަގެ ނަސީބަށް ބުރަވެ، އަމިއްލަ ސިއްހަތު ނުރައްކަލުގެ ތެރެއަށް ދޫކޮށްލުމަކީ ކިހާ ބިރުވެރި ކަމެއްކަން ދެނެގަތުމަށް، ކުޑަ މިސާލަކަށް ބަލައިލަމާ ހިނގާށެވެ.
ދުރުގައި ބަހައްޓާފައި ހުރި ކުޑަކުޑަ ތައްޓެއްގެ ތެރެއަށް، 100 ޓެނިސް ބޯޅަ އެއްފަހަރާ އުކާލާ މަންޒަރު ސިފަކޮށްލަމާ ހެއްޔެވެ. ވާނީ ކިހިނެއް ހެއްޔެވެ؟ ގިނަ ބޯޅަތައް ބޭރަށް ބޫސްލާފައި ދާނެއެވެ. ބައެއް ބޯޅަ ތަޅުންގަނޑުގައި ޖެހިފައި ކޮޅުކޮޅުމައްޗަށް ދާނެއެވެ. ނަމަވެސް، ދިމާވި އިއްތިފާގަކުން ނުވަތަ ނަސީބަކުން، އޭގެ ތެރެއިން އެންމެ ބޯޅައެއް ނުވަތަ ދެ ބޯޅައެއް ސީދާ އެ ކުޑަ ތަށީގެ ތެރެއަށް ވެއްޓިދާނެއެވެ.
މި މިސާލުގައި، އެ އުކާލި ބޯޅަތަކަކީ ސިނގިރޭޓު ބޯ މީހުންނެވެ. އަދި އެ ތައްޓަކީ އެއްވެސް ބޮޑު ބައްޔެއްނެތި އުމުރުން 80 ނުވަތަ 90 އަހަރަށް ވާސިލުވުމެވެ. ކޮޓަރިއަށް ވަންނަ މީހަކަށް ހަމައެކަނި ތަށީގެ ތެރޭގައި އޮތް ބޯޅަ ފެނިފައި، މި ތައްޓަށް ބޯޅަ އެޅުމަކީ ވަރަށް ފަސޭހަ ކަމެކޭ ބުނެފިނަމަ، ތަޅުންގަނޑު މަތީގައި ބުރައިގެން ގޮސްފައި ހުރި އެތައް ސަތޭކަ ބޯޅައަކަށް އެމީހާ އެވަނީ ކަނުވެފައެވެ. ސިނގިރޭޓު ބޯ އުމުރުން ދުވަސްވީ މީހުންނަށް ބަލައިގެން އަމިއްލަ ނަފްސަށް އުޒުރުދައްކާއިރު، އަހަރެމެންނަށް މި ކުރެވެނީ ހަމަ އެ ކަމެވެ. ތަށީގައި އޮތް އެންމެ ބޯޅައަކަށް ބަލާފައި، ބަލީގެ ދާނުގައި މަރުވެދިޔަ އެތައް މިލިއަން މީހުންގެ މަތިން އަހަރެމެން ހަނދާން ނައްތާލަނީއެވެ.
މި މައްސަލައާއި ގުޅޭގޮތުން ހަދާފައިވާ ތަހުޤީޤުތަކަށާއި ކަމުގެ މާހިރުންގެ ޚިޔާލާއި ނިންމުންތަކަށް އަލިއަޅުވާލާނަމެވެ.
ނަފްސާނީ އިލްމުގައި މިކަމަށް ކިޔަނީ "ސަވައިވަރ ބަޔަސް" ނުވަތަ ސަލާމަތްވި މީހުންނަށް އެކަނި ބަލައިގެން ނިންމުންތައް ނިންމުމުގެ ކުށްހީއެވެ. އަހަރެމެންގެ ލޮލަށް ފެންނަން ހުންނަނީ، އުމުރުން 90 އަހަރުވެފައިވާ، ފެންނަ ފެނުމަށް ފިސާރި ސިއްހަތުހެޔޮކޮށް ހުންނަ ސިނގިރޭޓު ބޮއެއުޅުނު ކާފައެވެ. ނަމަވެސް، ހަމަ އެ އުމުރުގައި، ހާޓް އެޓޭކެއް ޖެހިގެން ނުވަތަ ފުއްޕާމޭގެ ކެންސަރުގައި އުމުރުން 50 ނުވަތަ 60 އަހަރުގައި ދުނިޔެ ދޫކުރި މިލިއަނުން މީހުން މިއަދު އަހަރެމެންގެ ކުރިމައްޗަކު ނެތެވެ. އެމީހުންގެ ދުލުން އެމީހުންގެ ވޭނީ މާޒީ ކިޔައިދޭކަށް މިއަދަކު ނެތެވެ. މީގެ ސަބަބުން، ސިނގިރޭޓުގެ ނުރައްކާތެރިކަން އަހަރެމެންގެ ހިތްތަކަށް ވަޒަންކުރެވެނީ މުޅިން ގޯސްކޮށެވެ.
އުފެދޭ ސުވާލަކީ، އެ ތަށީގެ ތެރެއަށް ވެއްޓުނު ބޯޅައަށް ވީ ކިހިނެއް ހެއްޔެވެ؟ އެ ކާފަ 70 އަހަރު ވަންދެން ސިނގިރޭޓު ބުއި އިރުވެސް ހަށިގަނޑު ސަލާމަތުން ހުރީ ކީއްވެގެން ހެއްޔެވެ؟
މި ސުވާލުގެ ޖަވާބު ހޯދުމަށް 2015 ވަނަ އަހަރު ޔުނިވަރސިޓީ އޮފް ކެލިފޯނިއާ (UCLA) އަދި ޔުނިވަރސިޓީ އޮފް ސަދަން ކެލިފޯނިއާ (USC) ގެ ސައިންސްވެރިން ހާއްސަ ދިރާސާއެއް ކުރިއެވެ. އެމީހުން ދިރާސާކުރީ ސިނގިރޭޓު ބޮއެގެންވެސް ދިގު މުއްދަތަކަށް ދިރިތިބި މީހުންގެ ހަށިގަނޑެވެ. ހޯދުންތަކުން އެނގުނު ގޮތުގައި، އެމީހުންނަކީ ހަމައެކަނި "ނަސީބުގަދަ" ބައެއް ނޫނެވެ. އެމީހުންގެ ޑީ.އެން.އޭގެ އޮނިގަނޑު އާދައިގެ އިންސާނުންނާ މުޅިން ތަފާތެވެ.
މި ދިރާސާގައި އިސްކޮށް މަސައްކަތްކުރި ޑރ. މޯގަން ލެވީން ފާހަގަކޮށްފައިވެއެވެ. "މިފަދަ ދިގު އުމުރެއްގައި ތިބި ސިނގިރޭޓު ބޯ މީހުންގެ ހަށިގަނޑުގައި ހާއްސަ ޖެނެޓިކް މާކަރުތަކެއް (SNPs) ހުރެއެވެ. މީގެ ސަބަބުން އެމީހުންގެ ސެލްތަކަށް ލިބޭ ގެއްލުންތައް އަމިއްލައަށް މަރާމާތުކުރުމުގެ ބާރު، އާދައިގެ މީހުންނަށްވުރެ އެތައް ގުނައެއް ވަރުގަދަވެފައިވެއެވެ."
ސިނގިރޭޓުގެ ދުމުން އާދައިގެ މީހެއްގެ ހަށިގަނޑުގެ ސެލްތައް ހަލާކުކޮށް، ކެންސަރަށް މަގުފަހިކުރުވާއިރު، މި ބުނާ "ޖެނެޓިކް ލޮޓަރީ" ކާމިޔާބުކޮށްފައިވާ މީހުންގެ ހަށިގަނޑުގައި، ގެއްލުންވާ ސެލްތައް ވަގުތުން މަރާމާތުކޮށްދޭ "ސިއްރު ސިފައިންގެ ލަޝްކަރެއް" ވެއެވެ. އެހެންކަމުން، އެމީހުން ސަލާމަތްވީ ސިނގިރޭޓަކީ ރައްކާތެރި އެއްޗަކަށް ވުމުންނެއް ނޫނެވެ. އެމީހުންގެ ހަށިގަނޑުގައި އުފެދުމުގައި ﷲ ލައްވާފައިވާ ދިފާއީ ނިޒާމެއްގެ ސަބަބުންނެވެ. މި ބާރަކީ އާދައިގެ 99 އިންސައްތައިގެ އިންސާނުންނަށް ލިބިގެންވާ ނިޢުމަތެއް ނޫނެވެ.
ޒަމާންތަކެއްވަންދެން ސިނގިރޭޓު ބޯ މީހުންގެ ވާހަކައިގައި އޮންނަ އަނެއް ބޮޑު ކުށްހީއަކީ، ދިރިހުރުމަކީ ސިއްހަތު ސަލާމަތުން ހުރުން ކަމަށް ދެކޭ ދެކުމެވެ.
އެމެރިކާގެ "ނޭޝަނަލް ހެލްތު އެންޑް ނިއުޓްރިޝަން އެގްޒަމިނޭޝަން ސާވޭ" (NHANES III) ގެ މައުލޫމާތުތަކަށް ބަލާއިރު، އުމުރުން 80 އަހަރުން މަތީގެ ސިނގިރޭޓު ބޯ މީހުންގެ ބޭރުފުށުން ބޮޑެތިބަލިތަކުގެ ޝިކާރައަކަށްވެފައި ނެތްނަމަވެސް، އޭގެ ތެރެއިން ގިނަ މީހުންގެ ހަށިގަނޑު ވަނީ އެތެރެއިން ހަލާކުވެފައެވެ. ސިނގިރޭޓުގެ ދުމުން ފުއްޕާމޭގެ ކުދި ވައިކޮތަޅުތައް (Alveoli) ދާއިމީކޮށް ހަލާކުކޮށްލުމުގެ ސަބަބުން ޖެހޭ "ސީ.އޯ.ޕީ.ޑީ" (COPD) ފަދަ ނޭވާލާ ނިޒާމުގެ ބަލިތައް އެމީހުންނަށް ތަހައްމަލުކުރަން ޖެހެއެވެ.
އާދެ، ކާފަ 85 އަހަރަށް ބޮޑު ބައްޔެއް ނުޖެހި ދިރިހުރެދާނެއެވެ. ނަމަވެސް އުމުރުގެ ފަހު އަހަރުތަށް ހޭދަކުރަންޖެހެނީ ކުޑަކުޑަ ހިނގާލުމަކުންވެސް މާނޭވާލެވޭ ހާލުގައެވެ. ލޭ ހޮޅިތައް ބެދުމުގެ ސަބަބުން އުނަގަނޑާއި ފައިގެ ރިހުންތަކާއެކުގައެވެ. އާދައިގެ ރޯގާތަކުންވެސް ހަށިގަނޑު އެއްކޮށް ބަލިކޮށްލައެވެ. ހާޓްއެޓޭކާއި ސްޓްރޯކްގެ ރިސްކް ބޮޑުވެ އެކަމުގެ މާޔޫސްކަންވެސް އިތުރުވެގެންދެއެވެ. ދިރިހުރުމަކީ އުފާވެރި، މިނިވަން ދިރިއުޅުމެއް އުޅުމެއް ނޫނެވެ. ފަހު ދުވަސްތަށް ވެގެންދަނީ ނުހަނު ގިނަ ތަކުލީފުތަކުން ފުރިފައިވާ ދުވަސްތަކަކަށެވެ.
ނިންމުން: އިސްތިސްނާ އަކަށް ހަޔާތް ގުރުބާން ނުކުރައްވާށެވެ!
އަމިއްލަ ލޮބުވެތި ސިއްހަތާއި ހަށިގަނޑަކީ ނަސީބު ދިމާވާގޮތް ބަލަން ކުޅޭ ލޮޓަރީ ޓިކެޓަކަށް ނަހައްދަވާށެވެ.
ސައިންސްގެ ނިންމުން ސާފެވެ. އަހަރެމެންނަކަށް އަހަރެމެންގެ ޑީއެންއޭގެ ނިޒާމެއް (Genetic Code) އަމިއްލައަކަށް ނުއުފެއްދޭނެއެވެ. އެކަމުގެ ޤާބިލްކަމެއް އިންސާނުންނަށް ލިބިފައެއްނެތެވެ. އަދި އަހަރެމެންނަކީ އެ ބުނާ މަދު ނަސީބުވެރިންގެ ތެރެއިން މީހެއް ކަމުގެ އެއްވެސް ޔަޤީންކަމެއްވެސް ނެތެވެ. އެހެންކަމުން، އެންމެ ބުއްދިވެރި ގޮތަކީ ނަސީބަށް ދޫކޮށްލުމުގެ ބަދަލުގައި، ސިނގިރޭޓާއި ދުންފަތުގެ އިސްތިޢުމާލުކުރުމާ މުޅިން ދުރަށްޖެހި، ސާފު ސިއްހަތެއްގައި ދިރިއުޅުން ކުރިއަށް ގެންދިއުންނޫންތޯއެވެ.
ހަމައެއާއެކު، އިސްލާމްދީނުގައި އަހަރެމެންގެ ހަށިގަނޑާއި ސިއްހަތަކީ މާތް الله އަހަރެމެންނާ ހަވާލުކުރައްވާފައިވާ ބޮޑު އަމާނާތެކެވެ. އެހެންކަމުން، އެކަލާނގެ ދެއްވި މި އަގުބޮޑު ނިއުމަތް ރައްކާތެރިކޮށް، އަމިއްލަ އަތްތަކުން އަމިއްލަ ނަފްސު ހަލާކުގެ ތެރެއަށް އެއްލައިނުލުމަކީ ދީނީގޮތުންވެސް އަހަރެމެންގެ މައްޗަށް އޮތް ބޮޑު މަސްއޫލިއްޔަތެކެވެ. ވީމާ، އަމިއްލަ ނަފްސަށް ގަސްތުގައި ގެއްލުންދިނުމާ ދުރަށްޖެހި، މާތް الله ދެއްވި ހަށިގަނޑުގެ އަމާނާތަށް ރައްކާތެރިވުމަށްޓަކައިވެސް، މި ނުރައްކާތެރި އާދަ ދޫކޮށްލަން މިއަދު އަޒުމް ކަނޑައަޅަމާ ހިނގާށެވެ.
މައުލޫމާތު: ޔޫސީއެލްއޭ ހެލްތް ނިވްސް، ސީޑީސީ، ދަ ޖަރނަލް އޮފް ޖެރޮންޓޮލޮޖީ
