އަޝްރަފްގެ ދެލޮލުގައި ވަނީ ނުތަނަވަސްކަމާއި ބިރުވެރިކަމެވެ. އޭނާ އެއްވެސް ވާހަކައެއް ނުދައްކައެވެ. ޝާއިރާ ތަށި ފުރާލައި އަޝްރަފްގެ ކުރިމަތީގައި ބެހެއްޓިއެވެ.
"އަޝްރަފް، ކިހިނެއްވީ؟ ކީއްވެ ތިހާ ބިރުން ހުންނަނީ؟" ޝާއިރާ މަޑުމަޑުން އަހާލިއެވެ.
"ދެން ކޮންއިރަކުން ކައިވެނީގެ ކަންތަކާ އުޅޭނީ" ޝާއިރާ އަހަލިއެވެ.
"ކިހިނެއް އަހަރެން ޖިންނިއަކާ ކައިވެނި ކުރާނީ" އަޝްރަފް ބުނެލިއެވެ.
"އެކަން އަހަރެން ހަމަޖައްސާނަން. ބަޔަކަށް ނޭނގޭނެއެއްނު. އަދި މިރަށަށް ދިމާވެގެން އުޅޭކަންތަކުން ސަލާމަތްވެސް ވާނެ" ޝާއިރާ އިތުރަށް ބުނެލިއެވެ.
އަޝްރަފް ބިރުން ތުރުތުރުއަޅަމުން ދިޔައިރު، އޭނާގެ ސިކުނޑީގައި އެކި ހިޔާލުތައް އެނބުރެމުން ދިޔައެވެ. ރަށުގެ ސަލާމަތަށްޓަކައި ދިރިއުޅުން ޤުރުބާން ކުރަންޖެހުނީއެވެ.
ޖިންނިއަކާ ކައިވެނިކުރުމުގެ ޚިޔާލާއެކު ހިތަށް ވެރިވެފައިވަނީ ވަރަށް ބޮޑު ބިރުވެރިކަމަކާއެކުއެވެ. މިކަމުގެ ނަތީޖާ ކިހިނެއް ވެގެންދާނެކަމެއް ނޭނގެއެވެ.
އަޝްރަފް މަޑުމަޑުން ބޯޖަހާލިއެވެ. އޭނާގެ ހިތް ފުނޑުފުނޑުވެފައިވީ ނަމަވެސް، ރަށުގެ މުސްތަޤްބަލް އޭނާގެ އަތްމަތީގައި އޮތްކަން ހަނދާންކުރިއެވެ.
"އެކަމަކު... މިއީ ކިހިނެއް ވެދާނެ ކަމެއްބާ؟ މުޅި އުމުރަށް މިކަން ސިއްރު ކުރެވޭނެތަ؟" އަޝްރަފްގެ އަޑުގައި ވަނީ ހާސްކަމެވެ.
"އަހަރެންނަށްވެސް އެނގޭ މިއީ ފަސޭހަ ކަމެއް ނޫންކަން. އެކަމަކު އަހަރެންނަށް ޔަޤީން، މިއީ ރަށުގެ ހުރިހާ މީސްތަކުން ސަލާމަތް ކުރެވޭނެ ހަމައެކަނި ގޮތްކަން. އެ ސިއްރު ގެނެސްދިން ނުރައްކާ އަހަރެންނަށް ދައްކާލުމުން، އެހެން އެއްވެސް އިޚްތިޔާރެއް ނެތްކަން އެނގުނު." ޝާއިރާ އަޝްރަފްގެ ކޮނޑުގައި ހިފާލަމުން ބުންޏެވެ. ޝާއިރާގެ މޫނުމަތިން ފެންނަމުން ދިޔައީ ވަރުގަދަ އަޒުމެއްގެ ސިފައެވެ.
ދެމީހުން ދެން މަޝްވަރާކުރީ ކައިވެނީގެ ކަންތައްތައް ހިންގާނެ ގޮތަކާމެދުގައެވެ. ކޮންމެ ގޮތެއް ވިޔަސް ރަށުގެ މީހުންނަށް އެނގޭނެއެވެ. ނަމަވެސް އެމީހުންނަށް އެ ކައިވެނީގެ ހަޤީޤީ މަޤްސަދު ހާމަވެގެން ހިނގައިދާނެ ކަމަށް ބިރުގަތެވެ. ރަށުގެ މީހުންގެ ހިތްތަކުގައި ބިރުވެރިކަމާއި ކަންބޮޑުވުން އުފެދިދާނެއެވެ.
"އަހަރެންގެ އާއިލާގެ މީހުންނަށް ނާދެވުނޭ ބުނާނަން. ދެން އަޝްރަފްގެ ރައްޓެހިންކޮޅެއް ގެނޭ" ޝާއިރާ ބުނެލިއެވެ.
އަޝްރަފްއަށް މި ނިންމުން ވަރަށް ހިތްދަތިވިއެވެ. އޭނާގެ ދިރިއުޅުމުގެ އެންމެ މުހިންމު ދުވަހު، އޭނާގެ އާއިލާގެ މީހުންނަށް ނާދެވުމަކީ ބޮޑު ކަމެކެވެ. އެހެނަސް ޝާއިރާގެ ބަސްތަކުން އޭނާ ހަމަޖެހުނެވެ. ރަށުގެ ސަލާމަތަށްޓަކައި ކުރެވޭ ކަމެއް ކަމަށް ޤަބޫލުކުރިއެވެ.
ހުކުރުވިލޭރެއަށް އިރު އޮއްސުނުއިރު އަޝްރަފް އާއި ޝާއިރާ ކައިވެނީގެ ކަންތައް ކުރިއަށް ދިޔައީ އެގޭ ގޯތިތެރޭގައެވެ. މޫސުން ރަނގަޅުވެފައިވާ ރެއަކަށް ވުމުން ގިނަ ބަޔަކު ބޭރަށް ނިކުމެ، ކައިވެނީގެ ހަފްލާގައި ބައިވެރިވިއެވެ. ހަފްލާއަށް ދިޔަ މީހުންނަށް އަޝްރަފްގެ އަނބިމީހާ ފެނުނީ އަލަށެވެ. އެމީހުން ނިންމީ އަދި އަޝްރަފްވެސް ބުނީ އެއީ ރަށުން ބޭރު ކުއްޖެއް ކަމަށެވެ. ނަމަވެސް އޭނާގެ ހިތުގެ އެންމެ ފުންމިނުގައި، އޭނާ ދެކެމުންދިޔައީ މި ގުޅުމުގެ ފަހަތުގައިވާ ސިއްރާއި، ރަށަށް ކުރިމަތިވެފައިވާ ނުރައްކަލުގެ ބިރުވެރި މަންޒަރުތަކެވެ. އެހެންނަމަވެސް، އެ ދެމީހުންގެ ހިތުގައި ހިފެހެއްޓިފައިވާ ބޮޑު ސިއްރުގެ ހަޤީޤަތް އެނގެނީ އެދެމީހުންނަށް އެކަންޏެވެ. މި ކައިވެނި އޮތީ ރަށުގެ އުންމީދުތަކަށްޓަކައެވެ. އަދި ކުރިއަށް އޮތްތަނުގައި އެމީހުންނަށް ކުރިމަތިވާނެ ގޮންޖެހުންތަކާ ކުރިމަތިލުމަށް އެމީހުން ތައްޔާރުވެފައި ތިއްބެވެ.
އަޝްރަފްއަށް ނިދިފައި އޮއްވައި ހޭލެވުނީ ހޫނުވެގެންނެވެ. މަޑުމަޑުން ލޯ ހުޅުވައިލިއިރު ގާތުގައި ޝާއިރާ އިނެވެ.
"ކިހިނެއްވީ. ކީއްވެ ހޭލާ ތިއިނީ" އަޝްރަފް ޝާއިރާގެ އަތުގައި ހިފައިލިއެވެ.
"ވިސްނެނީ. ހަމަ ވިސްނެނީ. އަހަރެން މިވާހަކަ ދައްކާނެ ގޮތަކާމެދު" ޝާއިރާ ޖަވާބު ދިނެވެ.
"ކޮންވާހަކައެއް. ބުނެބަލަ" އަޝްރަފް ހާސްވިއެވެ.
"މިރަށަށް މިދިމާވެގެން އުޅޭގޮތުގެ ވާހަކަ. އެއީ މީހެއްގެ އަމިއްލަ އެދުމަކަށް ކުރި ކަންތަކަކުން ދިމާވިކަމެއް. އަހަރެންގެ އާއިލާގެ ގިނަ މީހުންވެސް މަރުވެދިޔައީ. އަހަރެންގެ އާއިލާގެ މީހުންގެ ކުށެއް ނެތް" ޝާއިރާ ރޮވެން ފެށުނެވެ.
"އަޝްރަފް ޝާއިރާ ގާތަށް ޖެހިލަމުން އޭނާގެ ބުރަކަށީގައި މަޑުމަޑުން ފިރުމާލިއެވެ. "ޝާއިރާ، ބުނެބަލަ. ކިހިނެއްވީ ކަމެއް ނުބުނެވޭތަ. ރޮއެގެން ކަންކަން ހައްލެއް ނުވާނެ. ހިތްހަމަޖައްސާލާފައި ކިޔައިދީ. އަހަރެން ހުރީ ތިކަންތަކުގައި އެހީވާން ތައްޔާރަށް" އަޝްރަފް ބުނެލިއެވެ.
"އެއީ ދޮންއާދަނު އޭނަގެ އަމިއްލަ އެދުމަށް މިރަށު މީހަކަށް ހެދި ސިހުރެއް. އެކަން ސިއްރު ކޮއްގެން އުޅުނީ. ދޮންއާދަނު ބޭނުންކުރާ ޖިންނިއަށް ކިޔަނީ އޭނާ" ޝާއިރާ އިތުރަށް ކިޔައިދޭން ފެށިއެވެ. ޝާއިރާގެ އަޑުގައި ރޮވިފައިވާ އަސަރުތައް ހުއްޓެވެ.
"މިހުރިހާ ދުވަހުވެސް އޭނާ މަސައްކަތް ކުރަމުން ދިޔައީ މިރަށުގެ ބާރު އޭނާގެ ބާރުގެ ދަށަށް ގެންދަން. ވަޅުގަނޑުން އެއްޗެއް ނެގުމުން، އެތަނުގެ ސިއްރުތައް ހާމަވެ، ރަށަށް ދެމުންދިޔަ ހިމާޔަތް ކެނޑުނީ. އެހިސާބުން، ދޮންއާދަނު އޭނާގެ ޖިންނި 'އޭނާ' ބޭނުންކޮށްގެން، ރަށުގެ މައްޗަށް ވަރަށް ނުބައި ސިހުރެއް ހެދީ. އެ ސިހުރުގެ ސަބަބުން މިރަށުގައި މިހާރު މިހުރިހާ ކަމެއް ދިމާވެ، މީހުން މަރުވަމުންދަނީ. އޭނާ ބޭނުންވަނީ ރަށުގެ ހުރިހާ ބާރެއް އޭނާގެ ދަށަށް ގެންނަން، އަދި އޭނާގެ ބަސް ނާހާ މީހުން ނައްތާލަން" ޝާއިރާ ކިޔައިދެމުން ދިޔައެވެ.
"ދޮންއާދަނު؟ އެއީ ވަރަށް ނުބައި މީހެއްކަން އަޑުއަހަން. އެކަމަކު މިހާ ބޮޑު ކަމެއް ކުރާނެ ކަމަކަށް ހިއެއް ނުކުރަން" އަޝްރަފްގެ މޫނުމަތިން ފެނުނީ ބިރާއި، ނުތަނަވަސްކަމެވެ.
"އެއީ އަހަރެންނަށްވެސް ސާފުކޮށް އެނގޭ ކަމެއް ނޫން. ބައްޕަ ކިޔައިދިން ގޮތުގައި، އެކަން ކުރީ ވަރަށް ބޮޑު ގޯހެއް ހަދައިގެން. އޭނާއަށް އެނގިގެން ނޫންކަމަށްވެސް ވެދާނެ. އެއީ ދޮންއާދަނުގެ ފުށުން ޖެހުނު ކަމެއްކަން. ދޮންއާދަނު މިރަށަށް މިކުރާ ސިހުރު ހުއްޓުވަން ކުރިންވެސް ބައެއް މީހުން މަސައްކަތްކުރި. އެކަމަކު އެންމެން މަރުވީ" ޝާއިރާ ރޮމުން ވާހަކަ ދެއްކިއެވެ.
"ދެން މިރަށަށް އެކަހަލަ ކަމެއް ނުވާނެ. އެކަން އަހަރެންނަށް ޔަގީން. ދެން އަހަރެން އުޅެން ބޭނުންވަނީ ވަރަށް އުފަލުން އަޝްރަފްގެ އަންބެއްގެ ގޮތުގައި. އެކަމަކުވެސް އެނގޭ ޖިންނިއަކާ އިންސާނަކާ އެކީ އުޅުމަކީ ފަސޭހަ ކަމަކަށް ނުވާނެކަން" ޝާއިރާ އަޝްރަފްގެ ގާތަށް ޖެހިލިއެވެ.
"އެއީ ކީއްވެ" އަޝްރަފް ސުވާލު ކޮއްލިއެވެ.
"އެއީ އެބުނާ ޖިންނި "އޭނާ" މަރުވީ. ދެން އެއްވެސް ޖިންނިއެއްގެ ފަރާތުން އެއްވެސް ގެއްލުމެއް ނުވާނެ. އަހަރެންގެ އާއިލާގެ މަރުނުވެ ތިބި މީހުން މިރަށް ހިމާޔަތް ކުރާނެ" ޝާއިރާ ބުނެލިއެވެ.
"ދެން އަހަރެންނަށް އިތުރަށް މާޔޫސްވާކަށް ނުޖެހޭނެ. އަހަރެންގެ ހަޔާތުގައި އެންމެން ގެއްލިފައިވާއިރު، އަޝްރަފް ވަނީ އަހަރެންނަށް ލިބިފައި. އަހަރެން މިހުރީ ކައިރީގައި ދުވަހަކުވެސް ނުދާނެކަމަށް ވަޢުދުވެފައި" ޝާއިރާގެ ވާހަކަތަކުން އަޝްރަފްގެ ހިތަށް ކޮންމެވެސް ވަރެއްގެ ހަމަޖެހުމެއް ލިބުނެވެ.
"އަހަރެންވެސް ވަރަށް ލޯބިވޭ. ދެން އަހަރުމެން ދެމީހުންނަށް ކުރިމަތިވާ ކޮންމެ ދަތިކަމަކަށްވެސް އެއްބަޔެއްގެ ގޮތުގައި ކުރިމަތިލާނީ" އެ ދެމީހުންގެ ހިތުގައި އުންމީދާއި ލޯބީގެ އާ ރޫހެއް ދިރުން ފެށިއެވެ. ޝާއިރާ އަޝްރަފްގެ ހަށިގަނޑުގައި ބައްދާލިއެވެ.
ހަމައެކަނި އިންސާނުންގެ ބާރުން މިފަދަ ކަންކަން ހުއްޓުވުމަކީ ފަސޭހަ ކަމެއް ނޫނެވެ. އިތުރަށް ޔަގީންވީ ޝާއިރާގެ އާއިލާގެ ބާރުތަކުގެ މުހިންމުކަމެވެ.
ދުވަސްތައް ފާއިތުވެ، މަސްތައް ފާއިތުވެގެން ދިޔައިރު، ރަށަށް އައިސްފައިވާ ނުބައި އަސަރުތައް މަޑުމަޑުން ފިލައިގެން ދިޔައެވެ. އެ ރަށަށް އަލުން އުފާވެރިކަމާއި އަމާންކަން ލިބުނެވެ. ދޮންއާދަނުގެ ސިހުރުގެ އަސަރުން ސަލާމަތްވެ، އެ ރަށުގެ މީހުން އަލުން އުފަލުން ދިރިއުޅެން ފެށިއެވެ. ޝާއިރާގެ އާއިލާގެ މީހުން، ރަށުގެ ހިމާޔަތަށް އަބަދުވެސް ހާޒިރުވެ ތިބި ނަމަވެސް، އެމީހުންގެ ބާރުތަކުގެ ބޭނުންކުރަން ޖެހުމުގެ ބަދަލުގައި، ރަށުގައި އަމާންކަން ގާއިމުކުރުމަށް އެހީތެރިވެދިނެވެ.
އަޝްރަފް އާއި ޝާއިރާގެ ގުޅުން ދުވަހެއް ދުވަހަކަށް ދިޔައީ އިތުރަށް ބަދަހިވަމުންނެވެ. އެމީހުންގެ ހަޔާތަށް އެއްވެސް ބިރުވެރިކަމެއް ކުރިމަތިނުވިއެވެ. އެ ދެމީހުންނަކީ އުފަލުން ދިރިއުޅޭ ނަމޫނާ ދެމަފިރިއަކަށް ވެގެން ދިޔައެވެ. ރަށުގެ މީހުންގެ ހިތުގައި އުންމީދުގެ އަލިކަން އަބަދުވެސް ދިއްލިފައި ހުންނާނެކަމުގެ ޔަގީންކަން ލިބުނެވެ. އެ ދެމީހުން ދުވަހަކުވެސް ނުދާނެކަމަށް ވައުދުވިއެވެ.
= ނިމުނީ =
