ޝައުފާން އެތަނުން ދާން ދުއްވައިގަތެވެ. ނަމަވެސް އަޝްރަފް ދާކަށް ބޭނުމެއް ނޫނެވެ. އޭނާގެ ސިކުނޑީގައި އެނބުރެމުން ދިޔައީ ޝާއިރާގެ ހަނދާންތަކެވެ. މި ހުރިހާ ކަމެއްގެ ފަހަތުގައި ޝާއިރާ ހުންނާނެކަން އަޝްރަފްއަށް ހީވިއެވެ. ޝައުފާން ދިއުމުން އަޝްރަފް ކޮޓަރިއަށް ވަދެ އެނދުގައި އިށީދެލިއެވެ. ކޮޓަރީގެ ތެރޭގައި ހަމަހިމޭންކަން ވެރިވެފައިވިއެވެ.
"އެޝައުފާން ނުބެހޭ ކަންތަކާ ބެހެނީ ކީއްވެ. ބުނޭ އަނގަގަދަވެގެން ނޫޅޭށޭ" ކުއްލިއަކަށް ޝާއިރާ އެކޮޓަރި ތެރެއިން ފެނުނެވެ.
އޭނާގެ އަޑުގައި ހިމެނުނީ އާދަޔާ ޚިލާފު ހަރުކަށިކަމެވެ. ޝާއިރާގެ ހަށިގަނޑު ހުރީ ފަނޑު ހުދުކުލައެއްގައެވެ. އޭނާގެ ދެލޯ ހުރީ ރަތްވެފައެވެ. އަޝްރަފް ހަމަ އެއްވެސް ބަހެއް ނުބުނެ ހަމަޖެހިލައިގެން އިނެވެ.
"ޝާއިރާ، ތިހެން ހަދަނީ ކީއްވެ؟ ކީއްވެ މީސްމީހުންނަށް އުނދަގޫކުރަނީ؟" އަޝްރަފް މަޑުމަޑުން ވާހަކަ ދައްކަން ފެށިއެވެ. އޭނާގެ އަޑުގައި ހުރީ ބިރެއް ނޫނެވެ. ބަދަލުގައި ހަމަޖެހުމާއި ކަންބޮޑުވުމުގެ ރާގެކެވެ.
"އަހަރެންނަށް ނުކެރޭނެ މިތަނުން ދާކަށް. އަހަރެންނަށް ބޭނުންވަނީ އަހަރެންގެ ހައްގު" ޝާއިރާ އަޝްރަފްއާ ކައިރިވެލަމުން ހިތާމަވެރިކަމާއެކު ބަލާލިއެވެ.
"އެނގޭ ޝާއިރާ. އަހަރެންނަށް އެނގޭ. ބުނޭ އަހަރެންނަށް އެހީތެރިވެވޭނެ ކަމެއް އޮތް ނަމަ" އަޝްރަފް އެނދުމަތީގައި އިނދެ އޭނާގެ އަތްތިލަ މަތީގައި ޝާއިރާގެ އަތްތިލަ ބޭއްވިއެވެ.
ޝާއިރާ، އަޝްރަފްއަށް ބަލާލަމުން ދެލޯ ރީތިކޮށް ހުޅުވާލިއެވެ. "އަހަރެންގެ އާއިލާ މަރާލީ މިރަށު މީހެއްގެ ގާތް މީހެއް. އެމީހުންގެ ސަބަބުން މިވަނީ އަހަރެން މިތަނުގައި ހައްޔަރުވެފަ. އެމީހުންނަށް އަދަބު ނުލިބެނީސް އަހަރެންނަށް ހަމަޖެހުމެއް ނުލިބޭނެ" ޝާއިރާ ރޮމުން ދިޔައެވެ. އަޝްރަފް، ޝާއިރާގެ އަތުގައި ހިފަހައްޓާލަމުން، އޭނާ ހަމަޖައްސަން މަސައްކަތްކުރިއެވެ.
"ޝާއިރާ، އެމީހުން ކާކުކަން ބުނެދީ. އަހަރެން އެހީވާނަން. އަހަރެން މީހުންނާ ވާހަކަ ދައްކާނަން. ކޮންމެ ގޮތަކުން ވިޔަސް އަހަރެން ތި ހައްގު ހޯދައިދޭނަން" އަޝްރަފްގެ އަޑުގައި ހުރީ އާދަޔާ ޚިލާފު ހިތްވަރެކެވެ. އޭނާގެ ހިތުގައި ބިރުވެރިކަމަށްވުރެ ބޮޑަށް ޝާއިރާއަށް ދިމާވި ހާދިސާއާމެދު ހަމްދަރުދީ އުފެދިފައިވާކަން ޝާއިރާއަށް އިހުސާސްވިއެވެ.
ޝާއިރާގެ ރަތް ދެލޮލުން ފައިބަމުންދިޔަ ލޭގެ ކަރުނަތައް ހުއްޓި މޫނުމަތިން ކޮންމެވެސް ވަރެއްގެ ހަމަޖެހުމެއް ފެންނަން ފެށިއެވެ.
"ނައުފަލްގެ ބޭބެ، ނާޒިމް... އަދި އޭނާގެ އަންހެނުން ފާތިމަތާއި، ނަޒީރާ. އެމީހުން އަހަރެންގެ ފަހަތުން އުޅުނީ. އެކަން އެނގުމުން އަހަރެން އެމީހުންނާއި ދިމާކުރިން" އަޝްރަފްގެ މޫނުމަތިން ޝޮކެއް ލިބުނު ކަހަލަ ގޮތެއް ފެނިގެން ދިޔައެވެ.
ފަތިސްވަންދެން އަޝްރަފަށް ނިންޖެއް ނުލިބުނެވެ. ޝާއިރާގެ ވާހަކަތައް އޭނާގެ ކަންފަތުގައި ގުގުމާލިއެވެ. މިއީ ތެދެއްކަމަށް އަޝްރަފްގެ ހިތް ބުނަމުން ދިޔައެވެ. އޭނާއަށް އިހުސާސްވީ ޝާއިރާގެ ހިތްދަތިކަމާއި އިންސާފަށް އެދި ކުރާ މަސައްކަތެވެ. ފަތިސްވެ، އިރުގެ އަލިކަން ކޮޓަރިއަށް ވަދެގެން ދިޔައިރުވެސް، އަޝްރަފްގެ ހިތުގައި އޮތީ ޝާއިރާއަށް ހައްގު ހޯދައިދިނުމުގެ އަޒުމެވެ.
އަޝްރަފް ކޮޓަރިން ނުކުމެ، ނާޒިމްގެ ގެއަށް ދިޔުމަށް ނިންމިއެވެ. އޭނާއަށް ނާޒިމްމެންނާ ވާހަކަ ދައްކަން ޖެހެއެވެ. ނަމަވެސް އެގޮތަށް ނުވެއްޖެނަމަ، އޭނާގެ ހިތުގައިވާ ޝައްކު ނާޒިމްމެންނަށް އިހުސާސްވެދާނެތީ، ވަރަށް ފަރުވާތެރިކަމާއެކު ވާހަކަ ދައްކަން ޖެހޭނެކަން އަޝްރަފަށް އެނގެއެވެ. އަޝްރަފް ނާޒިމްގެ ގެއަށް ދިޔައިރު، ނާޒިމްމެން ދެމަފިރިން އުޅެއެވެ.
ނާޒިމްގެ މޫނުމަތިން ކުޑަ ވަގުތުކޮޅަކަށް ނުތަނަވަސްކަމެއް ފެނުނެވެ. ނަމަވެސް އެއީ ވަގުތީ ކަމެކެވެ. "އަޝްރަފް، އާދޭ، ވަދޭ. ކިހިނެއްތަ މިއަދު މިހާ ހެނދުނާ؟" ނާޒިމް ހިނިތުންވެލަމުން ބުންޏެވެ. ފާތިމަތުވެސް ވަރަށް އޯގާތެރިކަމާއެކު އަޝްރަފަށް ހެނދުނުގެ ނާސްތާ ހަދައިދިނެވެ.
"މިރަށު ބަޔަކު ފަންޑިތަ ހަދައޭ ކިޔާ އަޑު އިވިގެން މިއައީ. އަނެއްކާ މިގޭ މީހުންތަ" އަޝްރަފް ހޭންފެށިއެވެ.
"އަހަރެމެން ކީއްކުރަން އެކަހަލަ ކަންތައް ކުރަންވީ. އެއީ ވަރަށް ގޯސްކަމެއް" ނާޒިމް ޖަވާބު ދިނެވެ.
އަޝްރަފް ގޭތެރެއަށް ވަދެ، ސޯފާގައި ހަމަޖެހިލިއެވެ. ނާޒިމްމެންގެ ވާހަކަތައް އޭނާގެ ހިތަށް އެއްގޮތަކަށްވެސް ގަބޫލެއް ނުކުރެވުނެވެ. އެމީހުންގެ ވާހަކަތަކުގައި އެތައް ހީލަތްތެރިކަމެއް އެކުލެވިފައި ހުރިކަން އަޝްރަފަށް ސާފުވިއެވެ. ކޮންމެވެސް ކަމެއް ހިނގައިގެން އުޅޭކަން އަޝްރަފަށް ޔަގީންވިއެވެ.
މުޅި ދުވަހު އަޝްރަފް ހޭދަކުރީ ޝާއިރާގެ ވާހަކަތަކާއި، ނާޒިމްމެން ދެއްކި ވާހަކަތައް އަޅައިކިޔައި، އެ ދެމެދުގައި ހުރި ތަފާތުތަކަށް ވިސްނާށެވެ. އިރުއޮއްސި އަނދިރިވުމާއެކު، ކޮޓަރީގެ މާހައުލު އަނެއްކާވެސް ބަދަލުވެގެން ދިޔައެވެ. އަޝްރަފް އެނދުގައި ޝާއިރާ އަންނާނެ ކަމުގެ އިންތިޒާރުގައި އޮތެވެ. އޭނާގެ ހިތް ތެޅެމުން ދިޔައީ ބާރަށެވެ. މިފަހަރު އޭނާގެ ހިތުގައި ބިރެއް ނެތެވެ. ބަދަލުގައި، ޝާއިރާއަށް ދިމާވި ހިތާމަވެރިކަމުގެ ހަގީގަތް ހޯދައި، އިންސާފު ހޯދައިދިނުމުގެ އަޒުމެވެ.
ކޮޓަރީގެ ދޮރުމަތީގައި މަޑުމަޑުން ހީލުމުގެ އަޑެއް އިވުނެވެ. އަޝްރަފް ބަލައިލިއިރު، ޝާއިރާ ދޮރުމަތީގައި ހުއްޓިލައިގެން ހުރީ އޭނާގެ ކުރީގެ ހާލަތުގައެވެ. ފަނޑު ހުދުކުލައެއްގައި، ރަތްވެފައިވާ ދެލޮލާއެކުއެވެ. ނަމަވެސް، އޭނާގެ މޫނުމަތިން ފެންނަމުން ދިޔައީ ހިތްދަތިކަމެއްގެ އިތުރަށް އުންމީދުގެ އަލިކަމެވެ.
"ޝާއިރާ..." އަޝްރަފް މަޑުމަޑުން ގޮވާލިއެވެ.
"ކިހިނެއްވީ؟ އިތުރު އެއްޗެއް ބުނެދޭންވީތަ؟" ޝާއިރާ މަޑުމަޑުން އަޝްރަފްއާ ކައިރިވެލަމުން، އެނދުގައި އިށީނދެލިއެވެ.
"އެމީހުން އަހަރެންގެ ފަހަތުން އެއުޅުނީ. އެއީ ވަރަށް ނުރައްކާތެރި ބަޔެއް. އެމީހުންގެ ވަރަށް ބޮޑު ސިއްރެއް އެނގިއްޖެ. އެ ސިއްރު ހާމަވިޔަ ނުދިނުމަށްޓަކައި އެމީހުން އެއުޅެނީ" ޝާއިރާގެ އަޑު މަޑުމަޑުން ބުނެލިއެވެ.
ޝާއިރާގެ މޫނުމަތިން ފެންނަމުން ދިޔަ އުންމީދުގެ އަލިކަން ގަދަވެލިއެވެ. އޭނާގެ ހަށިގަނޑުން ފަނޑު އަލިކަމެއް ދޫކޮށްލިތަން އަޝްރަފްއަށް ފެނުނެވެ.
"އަޝްރަފް... އެމީހުން ވަރަށް ނުރައްކާތެރި. އެމީހުންނަށް ތިކަން އެނގިއްޖެނަމަ ދޫކޮށްނުލާނެ" ޝާއިރާގެ ދެ ލޮލުން ބިރުވެރިކަމުގެ އަސަރެއް ފެނުނެވެ.
އެވަގުތު ކުއްލިއަކަށް ގެއިން ބޭރުން ބޮޑު އަޑެއް އިވިގެން ދިޔައެވެ. ދޮރެއް ހަލާކުކޮށްލި ކަހަލަ އަޑެކެވެ. އަޝްރަފްގެ މުޅި ހަށިގަނޑަށް ބިރުވެރިކަން ވަނެވެ. އެމީހުން އަންނަނީއެވެ. މިހެން ހުއްޓައި، ކޮޓަރީގެ ދޮރު ބާރަށް ހުޅުވައި ތިން ހަތަރު މީހުން އެތެރެއަށް ވަދެއްޖެއެވެ. އެމީހުންގެ މޫނުމަތިން ފެންނަމުން ދިޔައީ ވަރަށް ބޮޑު ނުބައިކަމާއި، ލާނެތްކަމެވެ. އެމީހުންގެ އަތުގައި ހުރީ ދިގު ވަޅިއާއި، އެހެނިހެން ބިރުވެރި ހަތިޔާރެވެ.
އަޝްރަފް ވަގުތުން ތެދުވެ، އެމީހުންނަށް ފުރަގަސްދީ ދުއްވައިގަތީއެވެ. ގެއިން ބޭރަށް ނުކުތްއިރުވެސް އެމީހުން އޭނާގެ ފަހަތުން އައެވެ. އަޝްރަފްއަށް ހީވީ ބިރުވެރިކަމުގެ މިރޭގެ ފެށުމަކީ ހަމައެކަނި މިއީ ކަމުގައެވެ. އޭނާގެ ދިރިއުޅުން ބަދަލުކޮށްލާނެ ބޮޑު ރޭގަނޑެއްގެ ފެށުމެވެ. ކޮންމެ ވަގުތަކުވެސް އެމީހުން އޭނާ އަތުލައިގަންނަ ހެން ހީވިއެވެ.
ބޮޑު ގަހެއްގެ ފަހަތަށް ވަދެ އަޝްރަފް ފުން ނޭވާއެއް ދޫކޮއްލިއެވެ. ގަސްތަކުގެ ތެރެއިން އެމީހުން އޭނާ ހޯދަމުން ދިޔަ އަޑު އިވެމުން ދިޔައެވެ. އަޝްރަފްގެ މުޅި ހަށިގަނޑު ތުރުތުރު އަޅަމުން ދިޔައެވެ. އެވަގުތު އޭނާގެ ސިކުނޑިއަށް ޝާއިރާގެ ވާހަކަ އައެވެ. އެމީހުން ވަރަށް ނުރައްކާތެރިވާނެ ކަމަށެވެ.
= ނުނިމޭ =
