ހެނދުނު އަޝްރަފް އަށް ހޭލެވުނީ ދޮރުގައި މީހަކު ޓަކި ޖަހާއަޑަށެވެ. އަޝްރަފް މަޑުމަޑުން ލޯ ހުޅުވާލިއެވެ. ވަށައިގެން ހޯދައިލިއެވެ. ކޮޓަރީގެ ކުޑަދޮރުން އިރުގެ އަލިކަން އައިސް އަލިކުރަމުން ދިޔައެވެ. ގަޑިން އަށެއް ޖަހަނީއެވެ. ކޮޓަރީގެ އެއްވެސް ދިމާލަކުން ޝާއިރާއެއް ފެންނާކަށް ނެތެވެ. ރޭގައި ހިނގި ކަންތައްތައް ހަނދާނަށް އައިސް އަޝްރަފް ހާސްވިއެވެ. ހިތް އަނެއްކާވެސް ބާރަށް ތެޅެން ފެށިއެވެ. ނަމަވެސް ޝާއިރާއަކީ އިންސާނެއް ނޫންކަން ހިތަށް އެރުމުން ހަމަޖެހުމުގެ ނޭވާއެއް ލިއެވެ. އަޝްރަފް ކޮޓަރިން ނިކުމެގެން ގޮސް ސިޓިންގރޫމްގެ ދޮރު ހުޅުވިއެވެ. ކުރިމަތީގައި ހުރީ ޝައުފާންއެވެ.
"ކޮބާ އަދިވެސް ނިދަނީތަ" އަޝްރަފް ފެނުމާއި އެކު ޝައުފާން ސުވާލު ކުރިއެވެ.
"މާގަދައަށް ނިދުނީ" އަޝްރަފް ޖަވާބު ދިނެވެ.
ޝައުފާންގެ ފަރާތުން އެއްވެސް ސުވާލެއް ނާދެއެވެ. ނަމަވެސް، އޭނާގެ މޫނުމަތިން ފެންނަމުންދިޔަ މާޔޫސްކަމާއި ދެރަވެފައިވާ ކަމުގެ އަސަރު އަޝްރަފް އަށް ފާހަގަވިއެވެ. ޝައުފާންގެ އެ ހިމޭންކަން އަޝްރަފްގެ ހިތަށް އިތުރު ސުވާލުތަކެއް ގެނުވިއެވެ. ކޮންމެވެސް ކަމެއް ހިނގައިފައިވާކަމަށް ހީވިއެވެ.
ޝައުފާން، ކިހިނެއްވީ؟" އަޝްރަފް މަޑުމަޑުން އަހާލިއެވެ."
ޝައުފާން ހިމޭނުން ހުރެ، އަޝްރަފްގެ ދެލޮލަށް ބަލާލިއެވެ. އޭނާގެ ނަޒަރުގައި ހިތްދަތިކަމާއި ކަންބޮޑުވުން އެކުލެވިފައިވިއެވެ.
"އަޝްރަފް... ވަރަށް ބޮޑު ކަމެއް ވެއްޖެ" ޝައުފާންގެ އަޑު ތުރުތުރުލާން ފެށިއެވެ.
އަޝްރަފްގެ ހިތުގައި އުފެދުނު ކަންބޮޑުވުން އިތުރަށް ބޮޑުވެގެން ދިޔައެވެ. ޝައުފާންގެ ބަސްތަކުންނާއި އޭނާގެ އަޑުގައި ހުރި ތުރުތުރުލުމުން، މިއީ އާދައިގެ ކަމެއް ނޫންކަން އަޝްރަފް އަށް ޔަގީންވިއެވެ.
"ކޮންކަމެއް ޝައުފާން؟ ކިޔައިދީބަލަ. އަހަރެންނަށް އެހީވެވޭނެ އެއްވެސް ކަމެއްވޭތޯ ބަލާނަން" އަޝްރަފް މަޑުމަޑުން ޝައުފާންގެ ކޮނޑުގައި ހިފާލަމުން ބުނެލިއެވެ.
"މިކަން ހަމަ އަހަރެންނަށް ގަބޫލެއް ނުކުރެވޭނެ. ހީކުރިގޮތަކާ މުޅިން ހިލާފު ކަމެއް އެހެން ނިމިގެން ދިޔައީ" ޝައުފާން އިސްޖަހާލިއެވެ. އޭނާގެ ދެލޮލުން ކަރުނަ ފައިބަން ފެށިއެވެ.
"ޝައުފާން، ކޮންމެ ކަމެއްވިޔަސް ހިތްވަރު ކުރަންވާނެ. އެއްވެސް ކަމަކާ މާޔޫސްވެ، ދެރަވެގެން ނުވާނެ. ކިޔައިދީބަލަ، ކޮންކަމެއްތަވީ" އަޝްރަފް އޭނާގެ ކައިރިއަށް ޖެހިލަމުން ހިތްވަރުދޭ ރާގެއްގައި ވާހަކަ ދައްކަން ފެށިއެވެ.
"ރޭގައި އަހަރެމެންގެ ގެ ކައިރީގައި މީހަކު މަރުވެފައި އޮތް. ނަމަވެސް މިހާރު އޭނަގެ ޖަނާޒާގެ ކަންތައް ނިންމާފައި މިއައީ" ޝައުފާން ކިޔައިދޭން ފެށިއެވެ.
"މަރުވެފައި އޮތް؟ ކާކު؟" އަޝްރަފް އަށް ހީވީ އޭނާގެ ކަންފަތަށް ގަބޫލުކުރަން ދަތި ވާހަކައެއް އިވުނުހެންނެވެ. ހިތުގެ ތެޅުން އަވަސްވެ، ދެލޯ ބޮޑުކޮށްލަމުން ޝައުފާންއަށް ބަލައިލިއެވެ.
"އެއީ ހަމަ އަހަރެންނަށް ގަބޫލުކުރަންވެސް ވަރަށް ދަތި ކަމެއް. އަހަރެންގެ ގާތް އެކުވެރިޔާ ރަޒީނާ. ރޭގައި އޭނާ މަރުވެފައި އޮއްވައި ފެނުނީ" ޝައުފާން އިސްޖަހާލިއެވެ.
ޝައުފާންގެ އަޑުގައި ހުރި ހިތާމަވެރިކަން އަޝްރަފް އަށް އިހުސާސްވިއެވެ. ރަޒީނާ އަކީ އަޝްރަފް ވެސް ދަންނަ މީހެކެވެ. އޭނާގެ ހިތަށް ބޮޑު ހައިރާންކަމެއް ވެރިވިއެވެ.
"ރަޒީނާ؟ ކިހިނެއްވީ؟ އޭނާ މަރުވީ ކިހިނެއް؟" އަޝްރަފްގެ އަޑަށް ކަންބޮޑުވުމާއެކު އަހާލިއެވެ.
"އޭނާ މަރުވެފައި އޮއްވާ ފެނުނީ އޭނާގެ ގޭގެ ފުރާޅުމަތިން. އެކަމަކު ހީވަނީ އެއީ އާދައިގެ މަރެއް ނޫންހެން" ޝައުފާން ބުނެލިއެވެ.
"ގަސްތުގައި ކުރި ކަމެއް؟ ޝައުފާން ތިބުނަނީ ރަޒީނާ މަރާލީ ކަމަށްތަ؟" އަޝްރަފް އަށް ވެސް ގަބޫލެއް ނުކުރެވުނެވެ.
"އާނ. މިއީ ވަރަށް ނުރައްކާތެރި ކަމެއް. މިހުރިހާ ދުވަހު އަހަރެމެންގެ ތެރޭގައި އުޅުނު މީހަކު މިގޮތަށް މަރުވީކަން ގަބޫލުކުރަން ވަރަށް އުނދަގޫ" ޝައުފާން ބޯޖަހާލިއެވެ. އޭނާގެ ދެލޮލުން ކަރުނަ ފައިބަމުން ދިޔައިރު، އަޑު ބެދިފައިވާ ގޮތަކަށް ބުނެލިއެވެ.
"އަހަރެން ވަރަށް ދެރަވޭ ޝައުފާން. ރަޒީނާއަކީ އަހަރެންނަށްވެސް ވަރަށް ހެޔޮކޮށް އުޅުނު ކުއްޖެއް. މިކަހަލަ ކަމެއް ވެދާނެ ކަމަކަށް ދުވަހަކުވެސް ހިތަކަށް ނާރާ" އަޝްރަފްއަށް އިތުރަށް ވާހަކަ ދެއްކޭ ގޮތެއް ނުވިއެވެ. އޭނާގެ ހިތުގައި އުފެދުނު ބިރުވެރިކަމާއި ހިތާމަވެރިކަން އޭނާގެ މޫނުމަތިން ފެންނަން ހުއްޓެވެ. އޭނާ މަޑުމަޑުން ޝައުފާންގެ ކޮނޑުގައި ފިރުމާލަމުން، ހިތްވަރުދިނުމުގެ ގޮތުން ބަލައިލިއެވެ.
އަހަރެމެންނަށް މިހާރު ހަމަ އެނގޭ އެއްވެސް ކަމެއް ނެތް. އެކަމަކު އަހަރެން ހިތަށް އަރަނީ، ކޮންމެވެސް ނޭނގޭ ސިއްރެއް މިކަމާ ގުޅިފައިވާނެއޭ" ޝައުފާން ދުރަށް ބަލަހައްޓައިގެން ހުރެ ބުނެލިއެވެ.
"ސިއްރެއް؟ ކޮންކަހަލަ ސިއްރެއް؟" އަޝްރަފް ސުވާލުކުރިއެވެ.
ހިތުގައި އުފެދުނު ސުވާލުތައް ހާމަކުރަން ނޭނގުނެވެ.
"ރަޒީނާއަކީ މަޑުމައިތިރި، މީސްތަކުންނާ ގުޅިގެން އުޅުނު ކުއްޖެއް. އެއްވެސް މީހަކާ ދެކޮޅުވެރިވެގެން އުޅޭ ކުއްޖެއް ނޫން. އޭނާއަށް މިކަހަލަ ނުރައްކަލެއް ކުރިމަތިވީ ކީއްވެކަމެއް އަހަރެންނަކަށް ނުވިސްނު" ޝައުފާން ދެއަތުން މޫނު ފޮރުވާލަމުން ގިސްލެވެން ފެށިއެވެ.
"ރަޒީނާ މަރުވިއިރު، އޭނާގެ ގާތުން ބައެއް ކަންކަން ފެނިފައިވާ ކަމަށް ވާހަކަ ދެކެވެމުންދޭ. އެގޮތުން އޭނާގެ އަތުގައި ވަރަށް ބޮޑަށް ހާނިކަވެފައި ހުރި ކަމަށް ބުނޭ. އަދި އޭނާގެ ހަށިގަނޑުގައިވެސް ތަފާތު ޒަޚަމްތައް ހުރި ކަމަށް ވާހަކަ ދެކެވެމުން ދަނީ" ޝައުފާންގެ އަޑު ތުރުތުރުލަމުން ދިޔައެވެ.
"އަހަރެންނަށް ހީވަނީ މިއީ ކޮންމެވެސް ވަރަކަށް ބަދަލު ހިފުމުގެ އަމަލެއްހެން. އެކަމަކު ކާކު، ކީއްވެކަމެއް ހަމަ ނޭނގުނު" ޝައުފާން ޖަވާބު ދިނެވެ.
މި ވާހަކަތަކުން އަޝްރަފްގެ ހިތަށް ބޮޑު ނުތަނަވަސްކަމެއް ވެރިވިއެވެ. އޭނާގެ ހިތުގައި ރަޒީނާއަށްޓަކައި ހަމްދަރުދީ އުފެދުނެވެ.
"އެކަމަކު، ޝައުފާން. ކީއްވެ ތިބުނަނީ ބަދަލުހިފުމުގެ އަމަލެއް ކަމަށް ތިހީކުރަނީ ކީއްވެ؟ ރަޒީނާއަކީ އެފަދަ ދެކޮޅުވެރިކަމެއްގައި އުޅޭނެ ކުއްޖެއް ނޫނޭ" އަޝްރަފް ސުވާލުކުރިއެވެ.
"އެއީ މަރުވެފައި އޮއްވާ ފެނުނު ހާލަތު. އަދި ހަށިގަނޑުގައި ހުރި ޒަޚަމްތައް. މިކަންކަމުން ހަމަ ހީވަނީ ގަސްތުގައި ކުރި ކަމެއްހެން" ޝައުފާން އަނެއްކާވެސް އިސްޖަހާލިއެވެ.
އެވަގުތު ކޮޓަރީގެ ދޮރު ތެޅިގަތް އަޑުއިވުނެވެ. ދެމީހުން އެއްފަހަރާ ދޮރާ ދިމާލަށް ބަލާލެވުނެވެ. ޝައުފާންގެ ހަށިގަނޑުން ހީބިހި ނަގައިގެން ދިޔައެވެ.
އެއީ ހަމައެކަނި ވައިގެ ސަބަބުން ދޮރު ތެޅިގަތީ ކަމަށް ހީވި ނަމަވެސް، އެމީހުންގެ ހިތުގެ އެންމެ އަޑިން ބިރުވެރިކަމެއް ފާޅުވާން ފެށިއެވެ.
ޝައުފާން ވާހަކަ ދައްކާކަށް ނުކެރުނެވެ. އޭނާ ހަމައެކަނި އިޝާރާތުން ދޮރާ ދިމާލަށް ބަލާލިއެވެ. އެވަގުތު ކުއްލިއަކަށް ސިޓިންގރޫމްގެ ފާރުގައި ހުރި ގަޑި ވެއްޓުނެވެ. ގަޑި ތަޅައިގެން ދިޔަ އަޑާއެކު ދެމީހުންވެސް ސިއްސައިގެން ދިޔައެވެ.
އެއީ ވައިގެ ސަބަބުން ވާކަމެއް ނޫން!" ޝައުފާން ރޮމުން ކަހަލަ ގޮތަކަށް ބުންޏެވެ. "
އަޝްރަފް އޭނާގެ ދެލޯ ބޮޑުކޮށްލަމުން ސިޓިންގރޫމްގެ ހަތަރުފަރާތަށް ބަލާލިއެވެ. މުޅި ތަން ފެންނަން އޮތީ ހުސްކޮށެވެ. އެއްވެސް މީހެއް ނުވަތަ އެއްވެސް އެއްޗެއް ފެންނާކަށް ނެތެވެ.
"އަހަރެންނަށް ނޭނގެ. އަހަރެންނަށް ހީވަނީ އެއީ ހަމައެކަނި އެއްޗެއް ވެއްޓުނު އަޑުކަމަށް" ޝައުފާން މަސައްކަތްކުރީ ހިތްވަރުލައިގެން ވާހަކަ ދައްކާށެވެ.
އެވަގުތު، ދޮރުގެ ބިއްލޫރިގަނޑުން ބޭރުން ކޮންމެވެސް ނޭނގޭ އެއްޗެއް ހުރަސްކޮށްލި ކަމުގެ ހިޔަނި ފެނިގެން ދިޔައެވެ. އެއީ އާދައިގެ ހިޔަންޏެއް ނޫނެވެ. ކޮންމެވެސް ގަދަފަދަ، ނުބައި ބާރެއް ހިނގައިފައި ދިޔަ ކަހަލަ ހިޔަންޏެކެވެ.
= ނުނިމޭ =
