ކޮޓަރީގެ ދޮރުމަތީގައި ހުރި ކަޅު ދުންގަނޑު މަޑުމަޑުން ގަދަވަމުން އައިސް، މުޅި ކޮޓަރިއަށް ފެތުރިގަތެވެ. އެ ދުންގަނޑުގެ ތެރެއިން ބިރުވެރި ސޫރައެއް ފާޅުވެ، އަޝްރަފާ ދިމާއަށް ހިނގައިގަތެވެ. އެ ސޫރައިގެ ދެލޯ ރަތްވެ، ބިރުވެރި އަޑުގަދަ ހީނލުމެއް ހީނލިއެވެ. އެހިނދު މުޅި ކޮޓަރި އަނދިރިވެ، ބިރުވެރި އަޑުތައް ގަދަވެގެން ދިޔައެވެ. ދެން އޭގެ ފަހުން އެ ކޮޓަރިން އަޑު އިވުނީ ހަމައެކަނި ހީނލުމުގެ އަޑުތަކެވެ.
އެ ހިނިތުންވުމުގެ އަޑު، ކޮޓަރީގެ ހުރިހާ ދިމާލަކުން އިވެމުން ދިޔައިރު، ކޮޓަރީގެ މެދަށް ޖަމާވެފައިވާ ކަޅު ދުންގަނޑު މަޑުމަޑުން ފިލައިގެން ދާން ފެށިއެވެ.
ކޮޓަރިތެރެއަށް ވެރިވެފައިވަނީ ހަމަހިމޭންކަމެކެވެ. އެކަމަކު އަޝްރަފްގެ ހިތް އޮތީ ބިރުން ތެޅިތެޅިއެވެ. އޭނާގެ ހަށިގަނޑު ހަރަކާތްކުރުމުގެ ބާރެއް ނެތެވެ. ބޭނުންވެފައިވަނީ މި ތަނުން ދުރަށް ދެވޭނެ ގޮތެއް ހޯދުމަށެވެ. އަނދިރީގެ ތެރެއިން ސިފައެއްގެ ހަރަކާތްތަކެއް ފެންނަން ފެށިއެވެ. މަޑުމަޑުން އެ ހަރަކާތްތައް އަޝްރަފް އޮތް އެނދާ ދިމާއަށް އަންނަން ފެށިއެވެ. އެއީ ޝާއިރާއެވެ.
ޝާއިރާ މަޑުމަޑުން އަޝްރަފް އޮތް އެނދާ ދިމާއަށް ހިނގައިގަތެވެ. އަޝްރަފްގެ ކައިރިއަށް އައިސް ހުއްޓި، މޫނުމަތީގައި އަތް ޖައްސާލަމުން ޝާއިރާ ބުންޏެވެ.
"އަހަރެން ލޯބިވާ ކަމަށް ގަބޫލުނުކޮށްފިނަމަ ވާނީ މިހެން. ދެން ދުވަހަކުވެސް އަހަރެން އަޝްރަފް ދޫކޮށްފައި ނުދާނަން" އޭނާގެ ހީނލުމުގެ އަޑު މުޅި ކޮޓަރީގައި ގުގުމާލިއެވެ.
އެ ހީނލުމުގެ ތެރެއިން ފެންނަމުންދިޔައީ ބިރުވެރިކަމާއި، ހިތާމަވެރި ކުލަވަރެވެ. އެ އަޑުން އަޝްރަފްގެ ހަށިގަނޑުގެ ކޮންމެ ނާރެއް ތެޅިގަތް ކަހަލައެވެ.
"މިހާރު އަހަރެން ހުރީ ދުވަހަކުވެސް ވަކިނުވާނެ ދާއިމީ ލޯބިވެރިއެއްގެ ގޮތުގައި. އަހަރެންގެ ލޯބިން ތިބެން ބޭނުންވަނީ އަބަދުވެސް ކައިރީގައި" އަޝްރަފްގެ ކަންފަތްދޮށަށް ޝާއިރާ ޖެހިލާ، ލޯބީގެ ބަސްތައް ގުގުމާލިއެވެ. ނަމަވެސް އެއީ ލޯބީގެ ބަސްތަކަށްވުރެ ބިރުވެރި އިންޒާރުތަކެއް ފަދައެވެ. ފެންނަމުންދިޔައީ ލޯތްބެއް ނޫނެވެ. އެއީ ބިރުވެރި ކަމަކަށް ބަދަލުވެފައިވާ ލޯތްބެކެވެ. އަޝްރަފަށް ދެން ސަލާމަތްވުމެއް ނެތެވެ. އޭނާގެ ހަޔާތް ޝާއިރާގެ އަތްމަތީގައި އޮތީ އެއްކޮށް ބަނދެވިފައެވެ.
ހަގީގަތުގައި، އަޝްރަފްއަށް އޮތީ ދެ ގޮތެވެ. ޝާއިރާގެ ލޯބި ގަބޫލުކުރުން ނުވަތަ އެ ލޯތްބަށް ދެކޮޅު ހެދުމެވެ. އެކަމަކު ޝާއިރާގެ ހީނލުމަކާއެކު، އަބަދުވެސް އޮތީ އެއް ނިމުމެއް ކަނޑައަޅާފައެވެ. އޭނާ ދެކެ ލޯބިވާ ކަމަށް ގަބޫލު ނުކޮށްފިނަމަ، އަޝްރަފް އޭނާގެ އަތްދަށުން ދުވަހަކުވެސް ސަލާމަތް ނުވާނެއެވެ. އެނދުމަތީގައި އޮވެ، އޭނާގެ ދިރިހުރުމަށް އައިސްފައިވާ މި ބިރުވެރި ނިމުން އަޝްރަފްއަށް އިހުސާސްވަމުން ދިޔައެވެ.
ޝާއިރާ މަޑުމަޑުން އަޝްރަފްގެ ކައިރީގައި އިށީނދެ، އަޝްރަފްގެ އަތުގައި ހިފާލިއެވެ. އެއަތުގެ ފިނިކަމުން އަޝްރަފްގެ މުޅި ހަށިގަނޑު ހީބިހި ނަގައިގެން ދިޔައެވެ. ލޯބިވެރިއެއްގެ ފިނި އަތެއްގެ ބަދަލުގައި، އެއީ ގަބުރެއްގެ އަތްކަމުގައި އަޝްރަފްއަށް ހީވިއެވެ.
"އަހަރެން ހިފާލީމަ އަބަދުވެސް ހަށިގަނޑަށް މިކަހަލަ ތުރުތުރެއް އަރާނެ. މިއީ އަހަރެންގެ ލޯބި، ހިތުގައި ބިންވަޅު ނެގިފައިވާކަމުގެ ހެއްކެއް" ޝާއިރާ ބުނެލީ މަޑުމަޑުންނެވެ.
ކޮޓަރީގެ އެއްފަރާތުން އިވެމުންދިޔަ ގަޑީގެ އަޑު ފިޔަވައި އެއްވެސް އަޑެއް ނީވެއެވެ. އެކަމަކު އަޝްރަފްއަށް އިހުސާސްވަމުންދިޔައީ އޭނާގެ ނިމުން ކައިރިވަމުންދާ ކަމެވެ. ޝާއިރާގެ ލޯތްބަކީ، އޭނާގެ ހަޔާތް ނިމުމަކަށް ގެނެސް، އޭނާ ދާއިމަށް އެއް ތަނެއްގައި ބަންދުކޮށްލާނެ ލޯތްބެކެވެ. ދެން އޮތީ ހަމައެކަނި ޝާއިރާގެ ބިރުވެރި ލޯބި ގަބޫލުކޮށް، ދުވަހަކުވެސް ނުނިމޭނެ މި ހިތާމަވެރި ދިރިއުޅުމެއް ފެށުމެވެ.
އަޝްރަފްއަށް ހީވީ އޭނާގެ ހަށިގަނޑުގައި ހުރި ހުރިހާ ލޭފޮދެއް ފިނިވެ، ގަނޑުވެގެން ދިޔަހެންނެވެ. ޝާއިރާގެ ލޮލަށް ބަލާލުމުން، ފެނުނީ ލޯތްބަށްވުރެ ބޮޑަށް އަނދިރިކަމާއި، ވަކިނުކުރެވޭ އާދަޔާޚިލާފު އެއްޗެއްގެ އަސަރުތަކެވެ. އެހެންނަމަވެސް ދުލުން ބަހެއް ބޭރުކުރަން ބޭނުންވިޔަސް، އެއްވެސް އަޑެއް ނުނިކުތެވެ. ހަށިގަނޑު، އޭނާގެ ބާރުގެ ދަށުން ނެއްޓިއްޖެހެން ހީވިއެވެ.
ޝާއިރާ މަޑުމަޑުން ހީލިއެވެ. އެ ހީލުމުގައި ވަނީ އަނދިރި ދުނިޔެއެއްގެ ސިއްރުތައް ފޮރުވާލެވިފައިވާ ކަހަލަ ގޮތެކެވެ.
"އަޝްރަފް... ކަލޭ ދުވަހަކުވެސް ނުދާނެ. އަހަރެންގެ ލޯބި ކަލޭ ބަންދުކޮށްލާނެ. ދާއިމަށް!" ޝާއިރާގެ އަޑު އިވެން ފެށީ، ކޮޓަރީގެ ހަތަރުފަރާތުންވެސް އެއްފަހަރާ ކަހަލަ ގޮތަކަށެވެ. އަޝްރަފްގެ ހިތުގެ ތެޅުން އަވަސްވިއެވެ. އޭނާގެ ހަށިގަނޑުގެ ކޮންމެ ނާރަކަށްވެސް ބިރުވެރިކަން ފެތުރިގެން ދިޔައެވެ. ޝާއިރާގެ އަތުގައި ދަގަނޑުގެ ވަކިތަކެއް ހުރިކަމަށް އަޝްރަފްއަށް ހީވިއެވެ. ދުވެ ފިލަން ބޭނުންވިޔަސް، އޭނާއަށް ތެދުވެވޭގޮތެއް ނުވިއެވެ. އޭނާގެ ފައިތިލަ ބިންމަތީގައި ހަރުލާފައި ހުރިހެން ހީވިއެވެ. ޝާއިރާގެ އަތުގެ ފިނިކަން، އަޝްރަފްގެ ކޯތާފަތްމައްޗަށް އިހުސާސްވިއެވެ.
ދެލޯ ބޮޑުކޮށްލައިގެން ޝާއިރާގެ މޫނަށް ބަލާލުމުން، ފެނުނީ ހީލަމުން ދިޔަ ބިރުވެރި މޫނެކެވެ. ޝާއިރާގެ ހަށިގަނޑުން ނުބައި ވަހެއް ދުވަން ފެށިއެވެ. ގަބުރުގެ ވަސް ކަހަލައެވެ. ދެން އުޅޭނީ މި އަނދިރި، ބިރުވެރި ލޯތްބާއެކު ދާއިމަށްތޯ އޭނާގެ ހިތަށް އެރިއެވެ.
އެންމެ އުނދަގޫ ކަމަކީ، ޝާއިރާގެ ހޫނެއްނެތް އަތް އަދިވެސް އަޝްރަފްގެ އަތުގައި ހިފާލައިގެން ހުރިކަމެވެ. އެ އަތުން ވަކިވެވޭނެ ގޮތެއް އޭނާއަށް ފެންނަން ނެތީއެވެ.
"އަޝްރަފް... ދެން އަހަރެމެން ދެމީހުން ވާނީ ދާއިމަށް އެކުގަ" ޝާއިރާގެ ބިރުވެރި ހީނލުން ގަދަވެ، އެ އަޑު އޭނާގެ ކަންފަތުގައި ގުގުމާލިއެވެ.
ޝާއިރާގެ ބިރުވެރި ހީނލުން އިތުރަށް ގަދަވެ، އޭނާގެ ދެލޯ ރަތްކުލައަކަށް ބަދަލުވާން ފެށިއެވެ. އޭނާ އަޝްރަފްއާ ކައިރިވެލިއެވެ.
"އެކުގައޭ ދެން މި އުޅެނީ. މި އަނދިރި ދުނިޔޭގައި..." ޝާއިރާގެ އަޑު އިވުނީ އެތައް ބަޔެއްގެ އަޑު އެކުވެފައިވާހެންނެވެ. އެ އަޑުން އަޝްރަފްގެ ހިތް ތެޅިގަތެވެ.
އޭނާގެ ހިތް ބޭރުވެދާނެހެން ހީވިއެވެ. މިހުރިހާ ކަމަކީ ހުވަފެނެއް ކަމަށް ވެއްޖެނަމަ، ކިހާ ރަނގަޅުހޭ އަޝްރަފްގެ ހިތަށް އެރިއެވެ. އަޝްރަފްގެ ފަޔަށް ބާރުލެވޭތޯ މަސައްކަތްކުރިއެވެ. ނަމަވެސް، ފައިތިލަ ބިންމަތީގައި ހަރުލާފައި ހުރި ކަހަލައެވެ.
މަޑުމަޑުން ކުރިއަށް ޖެހިލަމުން، ޝާއިރާ އެންމެފަހުން ގޮތް ދޫކޮށް އަޝްރަފްގެ ގާތުގައި އިށީނެވެ. އަދި އޭނަގެ ލޯބި ގަބޫލުކޮއްދިނުމަށް އާދޭސް ކުރަމުން ދިޔައެވެ.
"އަހަރެން ހުވާ ކުރަން، އަހަރެން ލޯބިވާނަން. އަހަންނަށް މަޢާފުކޮށްދީ" ޝާއިރާ އާދޭސް ކުރަމުން ދިޔައިރު، އަޝްރަފްގެ ހިތްހަމަޖެހުމުގެ ހިނިތުންވުން އޭނަގެ ތުންފަތަށް ވެރިވިއެވެ.
އެރޭގެ އަނދިރިކަމުގެ ތެރޭގައި، ޝާއިރާގެ އަޑު ކެނޑި، ދެން ފެނުނީ ހިތްވަރެއް ނެތް ކަމެކެވެ.
އަޝްރަފް އޭނަގެ އަތުން ޝާއިރާގެ އަތުގައި ހިފާލަމުން، ފުން ނޭވާއެއް ލިއެވެ.
"މާފުކުރާނަން، ޝާއިރާ. އަހަރެން ހަމަ ކޮންމެ ދުވަހަކުވެސް ތި އިންތިޒާރުގައި ހުންނާނަން. ދެން ތިހެން ހިތާމަކުރާނެ ކަމެއް ނެތް" އަޝްރަފްގެ އަޑުގައި ހިތްވަރު ދިނުމުގެ ރާގެއް ހުއްޓެވެ. ޝާއިރާ މަޑުމަޑުން ބޯ ޖަހާލިއިރު، އޭނަގެ ހިތުގެ ތެރޭގައި އޮތީ ބިރާއި ނުތަނަވަސްކަމުގެ އިޙްސާސެކެވެ. ކުރިއަށް އޮތް ދިރިއުޅުމާމެދު އޭނަގެ ހިތުގައި ސުވާލުތައް އުފެދެން ފެށިއެވެ.
= ނުނިމޭ =
