"ރާނިޔާ ގެއަށް ހިނގައްޖެ." ނަރުސް ކުއްޖާ ބުންޏެވެ.
މި ލިބުނު ވަގުތުކޮޅު މިހާއަވަހަށް ނިމިދާނެކަމަކަށް އޭނާ ހިއެއް ނުކުރެއެވެ. ފާޑެއްގެ މާޔޫސްކަމެއް އޭނާގެ ހިތަށް ވެރިވިއެވެ. ކުއްލިއަކަށް އޭނާގެ ލޮލުގައި އަޅައިގަތީ ރާނިޔާގެ އެނދުގައި އޮތް ފައިލެކެވެ. އޭނާ ފައިލު ނަގާ ބަލާލިއެވެ. ސްޓްރޯކެއް ޖެހިގެން ވާގިނެތިފައިވާ ރާނިޔާގެ މަންމަގެ ލިޔުންތައް އޭނާ ބެލިއެވެ. ފަހަރަކުގަނޑެއް ވަކިވަކިން ކިޔެވެ. އެންމެ ފަހުން ފައިލު ހިފައިގެން ނިކުތެވެ.
އަޔާން އޮފީހުގައި އުޅެން ޖެހުނީ ވަރަށް އަވަދިނެތިއެވެ. ލިބުނު ކުޑަކުޑަ ވަގުތުކޮޅެއްގައި އޭނާ އައިސް އޭނާގެ ޚާއްސަ ކޮޓަރީގެ ގޮނޑީގައި އިށީނެވެ. ފޯނުކޮށްލާ ކޮފީއެއް ގެންނަން ބުނެ ގޮނޑީގައި ލެނގިލިއެވެ. ހަމަ އެވަގުތު އޭނާގެ ލޮލުގައި ރާނިޔާގެ ފައިލް އަޅައިގަތެވެ. އޭނާ އެ ފައިލް ނެގިއެވެ. އަދި ލޯމަރާލިއެވެ. ރާނިޔާގެ ފުން ޚިޔާލުތަކަށް ގެނބިގެން ދިޔައެވެ.
އަޔާން ތެދުވެ އަވަސް އަވަހަށް ފައިލް ހިފައިގެން ބޭރަށް ނިކުތެވެ. ކޮފީ ގެނައި ދައްތަވެސް ހުރީ އަޔާންގެ މިޢަމަލުން ހައިރާންވެފައެވެ. އޭނާ ވެހިކަލަށް އަރާ ދުއްވާލިއެވެ. އިރު އޮއްސުމުގެ އަސަރުތައް ދުނިޔެއަށް ވެރިކުރަމުން ދަނީއެވެ. ޖައްވުގައި ވަނީ ގުދުރަތީ ރީތިކަމާއި ހިމޭންކަމުގެ އަސަރުތަކެވެ.
ވެހިކަލުން ފޭބުމާއެކު އަޔާން ރާނިޔާގެ ގޭގެ ދޮރުމަތީ މަޑުކޮށްލިއެވެ. ދެން ގޯތިތެރެއިން ހިނގާފައި ގޮސް ގޭގެ ދޮރުމަތީގައި މަޑުކޮށްލިއެވެ. ވަރަށް އާދައިގެ ނިކަމެތި ގެއެކެވެ. ފަޅުކަމާއި ވީރާނާކަން ނޫން އެހެން މަންޒަރެއް އެގެއަކުން ނުފެނެއެވެ.
"އައްސަލާމް އަލައިކުމް." އަޔާން ސަލާން ގޮވާލިއެވެ.
ގޭތެރެއިން ޖަވާބެއް ނާދެއެވެ. އަޔާން އެ ގެއަށް ވަންނަން ބޭނުންވިއެވެ. މަޑުމަޑުން ގޭތެރެއަށް ވަނެވެ. ތަރުފާލިގަނޑެއް އަޅާފައިވާ ފެންޑާއެކެވެ. ފެންޑާގައި ދެ ގޮނޑި ހުއްޓެވެ. ކިތަންމެ ކުޑަނަމަވެސް ސާފެވެ. ފާރުގައި ރާނިޔާގެ މަންމައާއި ބައްޕައާއިއެކު ނަގާފައިވާ ފޮޓޯގަނޑެއް ހުއްޓެވެ.
"އަވަހަށް ހުސްކޮށްލާ. ބައިވަރު ބޭސް ކާއިރު ރަނގަޅު އެއްޗެއް ކެވޭތޯ ބަލަންވާނެ." ޖެހިގެން ހުރި ކޮޓަރިއާއި ދިމާއިން ރާނިޔާގެ އަޑުއިވުނެވެ.
އަޔާން އަޑުއައި ދިމާއަށް ދިޔައެވެ. އާދައިގެ ލަކުޑި ދޮރު ހުރީ ހުޅުވާފައެވެ. ކޮޓަރީގައި ތިބީ ރާނިޔާގެ ދެމައިންނެވެ. އަޔާން ސިއްރު ސިއްރުން ރާނިޔާއަށް ބަލާލިއެވެ. ކުޑަ ކޮޓަރިއެއްގައި ހުރި އެނދެއްގައި ރާނިޔާގެ މަންމަ ސަހީމާ އޮތެވެ. ސަހީމާގެ އެއްފަޅި ވަނީ ވާގިނެތިފައެވެ. މާބޮޑު ހަރަކާތެއް ނުކުރެވެއެވެ. ރާނިޔާއަށްޓަކައި ފަޚްރުވެރިވުމާއި ޝުކުރުވެރިވުން ސަހީމާގެ ލޮލުން ފާޅުވޭވޭ ހުއްޓެވެ. ސަމްސަލަކުން މަންމައަށް ބަތްކޮޅެއް ކާންދެވޭތޯ ރާނިޔާ މަސައްކަތް ކުރަނީއެވެ. އެ ޒުވާން އަންހެން ކުއްޖާގެ މޫނުގައި ވަނީ ވަރުބަލިކަމުގެ އަސަރެވެ.
"އައްސަލާމް އަލައިކުމް." އަޔާން އަނެއްކާވެސް ސަލާން ގޮވާލިއެވެ.
ރާނިޔާ ދިޔައީ ސިއްސައިގެންނެވެ. އޭނާ އަޔާނަށް ބަލާލިއެވެ. ހައިރާންކަމާއިއެކު ކޮޅަށް ތެދުވިއެވެ. އަދި އަޔާނާއި ދިމާއަށް އައެވެ. އަޔާން އަތުގައި އޮތް ފައިލު ދައްކާލިއެވެ. އަދި ފައިލު ރާނިޔާއަށް ދިއްކޮށްލިއެވެ.
"ވަރަށް ބޮޑަށް ޝުކުރިއްޔާ." ރާނިޔާ ފަރިގޮތަކަށް ބުނެލިއެވެ.
" ކިތަންމެ އަވަހަކަށް އުޅުނަސް ތިމާގެ މުހިންމު ސާމާނު ހަމަތޯ ބަލާލަންވާނެ." ބުނާނެ އިތުރު އެއްޗެއް ނޭނގިގެން އަޔާން ބުންޏެވެ.
"ފައިލު ނެތްކަމެއްވެސް އަދި ނޭނގެ. މަންމަގެ ކަންކަން ބެލެހެއްޓުން މިއަދު ވަރަށް މުހިއްމު ވެފައިވާތީ... ހިންގަވާ ގޯތިތެރެއަށް. އަޅުގަނޑު އެބައަންނަން ކޮފީއެއް ހިފައިގެން." ރާނިޔާ ގޯތިތެރެއަށް ދާން އިޝާރާތް ކުރަމުން ނިކުތެވެ.
ފަހަތުން އަޔާން އަންނަމުންދެއެވެ. ރާނިޔާ ނިކުތީ ގޯތިތެރޭގައި ހުރި އުނދޯއްޔާއި ދިމާއަށެވެ. ދެން އުނދޯލި ދައްކާލާފައި އިށީންނަން ބުންޏެވެ. އަޔާން ބަސްއަހާ ސްކޫލް ކުއްޖެއް ފަދައިން ގޮސް އެ އުނދޯލީގައި އިށީނެވެ. ރާނިޔާ ބަދިގެއަށްވަދެ ކޮފީއެއް ހެދިއެވެ. އަދި ކޮފީތަށި އަޔާނަށް ދިއްކޮށްލިއެވެ.
"މިވަގުތު އަޅުގަނޑަށް ދެވޭނީ މިފަދަ އެއްޗެއް. ވެދެއްވި އެހީތެރިކަމަށް ޝުކުރު ދަންނަވާނެ ގޮތެއްވެސް ނޭނގެ." ރާނިޔާ ހިނިތުންވެލިއެވެ.
" މިއީ މި ޔުނިފޯމު އަޅައިގެން ތިބޭ ކޮންމެ މީހަކުވެސް ކަންތައް ކުރާނެގޮތް." އަޔާން ހިނިތުންވެލިއެވެ. ދެން އުނދޯލީގެ ކޮޅަކަށް ޖެހިލިއެވެ. އަދި ރާނިޔާވެސް އުނދޯލީގައި އިށީންނަށް ތަން ދައްކާލަމުން އެކަމަށް އިޝާރާތް ކޮށްލިއެވެ.
ރާނިޔާ ޖެހިލުންވެ ހުރެ އުނދޯލީގައި އިށީނެވެ. އެކަކު އަނެކަކަށް ދައްކާނެ މާބޮޑު ވާހަކައެއް ނެތެވެ. ރާނިޔާ ހާސްވެގެން ދެއަތް ދެއަތާއި ކުޅެލަ ކުޅެލަ ހުއްޓެވެ. އެންމެފަހުން އަޔާން ފޯނުނެގިއެވެ. އަދި ރާނިޔާގެ ނަންބަރު ޖަހަން ފޯނު ދިއްކޮށްލިއެވެ. ރާނިޔާ އަޔާނަށް ބަލަން ހުއްޓެވެ. ރާނިޔާ އެ ފޯނުގައި ނުހިފުމުން ރާނިޔާގެ އަތުގައި އޮތް ފޯނު އަޔާން ޖަހައިގަތެވެ. އަދި އަޔާންގެ ފޯނު ނަންބަރު ޖަހާލާ އަޔާންގެ ނަމުގައި ސޭވް ކޮށްލިއެވެ. ދެން އެނަންބަރަށް ކޯލްކުރިއެވެ.
"ރާނީ.." އަޔާން އެ ނަންބަރު ފޯނުގައި ސޭވް ކުރަމުން ބުންޏެވެ.
"ރާނީ.. އަހަރެން ކިޔާނީ ރާނީ. އެންމެ ރަނގަޅުތަ؟.. ރާނިޔާމިސް." އަޔާން ބުންޏެވެ.
"ރާނީއަކީ ކުއީން. އަޅުގަނޑުމެންނަށް ތިކަހަލަ ނަމެއްވެސް ނުގުޅޭ." ރާނިޔާ ހިނިތުންވެލިއެވެ.
"ރާނީ.. އަހަރެން މިހުރީ ރާނީއާއެކު. ކަމެއް ޖެހިއްޖެއްޔާ ގުޅާ.. ހެޔޮ ކިތަންމެ ދަންވަރަކަސް." އަޔާން ތެދުވަމުން ބުންޏެވެ.
އަޔާން ދެތިން ފިޔަވަޅު އަޅާފައި ހުއްޓުނެވެ. އަދި ރާނިޔާއާއި ދިމާއަށް އެނބުރުނެވެ. ދެން ކުއްލި ހަރަކާތަކުން ރާނިޔާގެ ބޮލުގައި އިން ހުޅި ނައްޓާލިއެވެ. އަދި ހިނިތުންވެލާފައި ހިނގައިގަތެވެ. ރާނިޔާގެ ދިގު އިސްތަށިގަނޑު ހާމައަށް ދޫކޮށްލެވިއްޖެއެވެ.
"މިހާރޭ ރީތީ.." ކާރާ ދިމާއަށް ދަމުން އަޔާން ގޮވާލިއެވެ. ރާނިޔާ ލަދުގަތެވެ. އޭގެ ހުރިހާ އަސަރެއް އެ މޫނުން ފެންނަން ހުއްޓެވެ. އެކަމާ އަޔާން ހުރީ އުފަލުންނެވެ.
"މިރޭ ކާނީ މިގެއިން." އަޔާން ކާރަށް އަރަމުން ގޮވާލިއެވެ.
ރާނިޔާ ބޯޖަހާލިއެވެ. އަތުގެ އިޝާރާތުން ނުވައެއް ޖަހާއިރަށޭ ބުންޏެވެ. އަޔާން އެއްބަސްވުމުގެ ގޮތުން އަތުން "ބެސްޓް" ވާނޭ އިޝާރާތް ދައްކާލިއެވެ. އޭނާ ކާރަށް އަރާ ދުއްވާލިއެވެ. ރާނިޔާ ކާރު ގޮސް އޮބާލަންދެން ބަލަން ހުއްޓެވެ.
އަޔާނަށް ގެއަށް ނުދެވެނީސް ކޯލެއް އައެވެ. އޭނާ ބާރުބާރަށް ދުއްވާފައި އަތިރިމައްޗަށް ދިޔައެވެ. އަދި ފުރަން ތައްޔާރަށް އޮތް ކޯސްޓްގާޑަށް އެރިއެވެ. ރީތިކޮށް އޮތް މޫސުން ގޯސްވަމުންދާކަމުގެ އަސަރުތައް ދަނީ ފެންނަމުންނެވެ. ބޯވިލާތަކުން ހަތަރު އުދަރެސް ދަނީ ބައްދަމުންނެވެ.
" އިސްދޫ އާއި ދިމާ ބޭރުގައި އެ ލޯންޗް އޮތީ." ޒަމީރު އޮޅުން ފިލުވައިދިނެވެ.
" ވަރަށް އަވަސް ކުރަންވާނެ. މޫސުންވެސް ފެންނަނީ ގޯސްކޮށް" އަޔާން ބުންޏެވެ.
ނުނިމޭ.
