އަޝްރަފް އާއި އަމީނާ އެނދުގައި ބިރުން ތިބެފައި މަޑުމަޑުން ލޯހުޅުވާލި ހިނދު، ކޮޓަރީގެ ތެރެއަށް ވެރިވެފައިވާ އަނދިރިކަމުގެ ތެރެއިން ފޮތް ފެންނަން ފެށިއެވެ. ފޮތުގެ މަތީގައި ވެރިވެފައިވާ ރަތްކުލައިގެ އަލިކަން މުޅިން ނެތިގޮސް، ފޮތް އޮތީ އާދައިގެ ހާލަތުގައެވެ. ނަމަވެސް، ދެމީހުންގެ ހިތުގައި ބިރުވެރިކަމުގެ އަސަރުތައް ހުއްޓެވެ. ނުބައިވަސްވެސް ފިލައިގެން ދިޔައިރު، ކޮޓަރީގައި ހުރި ތަކެއްޗަށް އައިސްފައިވާ ހަރަކާތްތައް މަޑުޖެހި، ހުރިހާ އެއްޗެއް ހުރީ އާދައިގެ ހާލަތުގައެވެ.
އެ ދެމީހުން މަޑުމަޑުން އެނދުން ފައިބައި، ފޮތާ ދިމާއަށް ހިނގައިގަތީ ވަރަށް ބޮޑު ސަމާލުކަމަކާއެކުއެވެ. އެ ފޮތަކީ އެމީހުންގެ ދިރިއުޅުމަށް މިވަރުގެ ބިރުވެރި ނާމާންކަމެއް ގެނެސްދީފައިވާ އެއްޗެއްކަން އެމީހުން ދުވަހަކުވެސް ހިއެއްނުކުރެއެވެ. ފޮތާ ގާތްވުމުން، އަޝްރަފް ފޮތަށް ބަލާލިއެވެ. ފޮތުގެ މަތީގައި ވަނީ ބިރުވެރި ސިފަތައް ކުރަހާފައެވެ. އެފޮތް ނައްތާލަން އެދެމީހުންނަށް ވަރަށް ބޮޑަށް ބޭނުންވިއެވެ. އެފޮތް ނައްތާނުލައިފިނަމަ، ދެމީހުންގެ ދިރިއުޅުން މިފަދަ ނާމާންކަމެއްގައި އަބަދަށް ހުންންނާނެކަމަށް ހީވިއެވެ.
އަޝްރަފް މަޑުމަޑުން ފޮތުގައި އަތްލިއިރު، އޭނާގެ ހަށިގަނޑު ހީކަރުވާލިއެވެ. ފޮތުން ކުޑަ ހޫނުކަމެއް ދިޔައީ އިހުސާސްވަމުންނެވެ. އޭނާ ފޮތް ނަގާ، ކޮޓަރީގެ ދޮރާ ދިމާއަށް ހިނގައިގަތެވެ. އަމީނާވެސް ބިރުން، އޭނާގެ ފަހަތުން ދިޔައެވެ. އެމީހުން ބޭނުންވީ އެފޮތް ވަޅުލާ ނުވަތަ އެންމެ ދުރުތަނަކަށް އެއްލާލާށެވެ.
ދޮރު ހުޅުވާލުމާއެކު، ހީކަރުވާފަދަ ފިނި ވަޔެއް ކޮޓަރީގެ ތެރެއަށް ވަދެގެން އައެވެ. އެއާއެކު އަޝްރަފްގެ އަތުން ފޮތް ވެއްޓުނެވެ. ފޮތް ބިންމައްޗަށް ވެއްޓުމާއެކު، އޭގެ ތެރެއިން އަނެއްކާވެސް ރަތްކުލައިގެ އަލިކަމެއް ނުކުންނަން ފެށިއެވެ. ނަމަވެސް މިފަހަރުގެ އަލިކަން ކުރިއަށްވުރެ ގަދަވެ، ކޮޓަރީގެ ތެރެއަށް ފެތުރިގެން ދިޔަ އަލިކަމުގެ ތެރެއިން ކުރިން ފެނުނު ރޫޙުތައް އަނެއްކާވެސް ފެންނަން ފެށިއެވެ. އެ ރޫޙުތައް ފެނުމާއެކު އަޝްރަފް އާއި އަމީނާ ހަޅޭލަވައިގަތެވެ. އެމީހުންގެ ދުނިޔެ ނިމުމަކަށް އަންނަނީ ކަމަށް ކަށަވަރުވިއެވެ.
ފޮތުން ނުކުތް ރަތްކުލައިގެ އަލިކަން ކޮޓަރީގެ ހަތަރުފާރުގައި ޖެހި، ކޮޓަރި މުޅިން ރަތް ކުލައަށް ބަދަލުވެގެން ދިޔައެވެ. ކުރިން ހަމައެކަނި ފޮތުގެ ތެރޭގައި ފެންނަން ހުރި ބިރުވެރި ރޫޙުތައް މިހާރު ވަނީ މުޅި ކޮޓަރި ތެރެއަށް ފެތުރި، އަޝްރަފް އާއި އަމީނާގެ ވަށައިގެން ޖަމާވެފައެވެ. އެ ރޫޙުތަކުގެ ލޮލުގައިވާ ނުބައިކަމުގެ އަލިކަން، އަނދިރިކަމުގެ ތެރޭގައި ވިދަމުން ދިޔައެވެ.
ކޮޓަރީގެ ތެރޭގައި ފެތުރިފައިވާ ނުބައިވަސް ގަދަވެ، ނޭވާލާންވެސް ދަތިވާ ހާލަތަކަށް ދެމީހުން ވެއްޓުނެވެ. އެމީހުންގެ ހަށިގަނޑު ގަނޑުވެ، ހަމަހިމޭންވެފައިވާ ހިނދު، އެމީހުންގެ ލޮލުން ކަރުނަ ފައިބަމުން ދިޔައީ ބިރުވެރިކަމާއި، މާޔޫސްކަމުގެ ސަބަބުންނެވެ. އެމީހުންގެ ތެޅެމުން ދިޔަ ހިތްތަކަށް އިހުސާސް ކުރެވުނީ ފިނިކަމެވެ. ބަހެއް ބުނުމަށް ނުވަތަ އަޑެއް ލައްވާލުމަށްވެސް ނުކުޅެދި، އެ ދެމީހުންނަށް ކުރެވުނީ ހަމައެކަނި ފޮތުން ނުކުތް އެންމެ ބޮޑު ރޫޙު އެމީހުންނާ ދިމާއަށް އަތް ދިއްކޮށްލާ މަންޒަރު ބެލުމެވެ. އެ ރޫޙުގެ އަތުގައި ވަނީ ދިގު، ބޮޑު ނިޔަފަތިތަކެކެވެ.
އަޝްރަފް އާއި އަމީނާ އެކަކު އަނެކަކުގެ އަތުގައި ބާރަށް ހިފަހައްޓާލިއެވެ. މުޅި ކޮޓަރީގެ ތެރެއަށް ބިރުވެރި ރޫޙުތަކުގެ އަޑުތަކެއް ފެތުރިގެން ދިޔައީ، އެމީހުންގެ ބިރު އިތުރަށް ގަދަވާގޮތަށެވެ. ދެމީހުންނަށް އުންމީދެއް ނެތެވެ. މިހާރު ހަމައެކަނި ބޭނުންވަނީ މި ބިރުވެރި ނިމުން އަވަހަށް ނިމިގެން ދާށެވެ.
އެންމެ ބޮޑު ރޫޙު، އޭގެ ދިގު ނިޔަފަތިތައް ނުކުމެފައިވާ އަތް، އަޝްރަފް އާއި އަމީނާ ދިމާއަށް ދިއްކޮށްލުމާއެކު، ދެމީހުންގެ ދިރިއުޅުން ނިމުމަކަށް އަންނަހެން ހީވިއެވެ. ނޭވާލާންވެސް ނުކުޅެދިފައިވާ އެ ދެމީހުންގެ ލޮލުގައިވަނީ ހަމައެކަނި ބިރުވެރިކަމާއި، މާޔޫސްކަމެވެ. ރޫޙުތަކުގެ ބިރުވެރި ހިނިތުންވުން އެމީހުންނަށް ފެންނަމުން ދިޔައިރު، ކޮޓަރީގެ ތެރޭގައި އެ ފެތުރިފައިވާ ނުބައި ވަސް އިތުރަށް ގަދަވެގެން ދިޔައެވެ.
އަޝްރަފް އާއި އަމީނާގެ ގާތަށް ޖެހިފައި ތިބި ރޫޙުތައް އެއްފަހަރާ ފަހަތަށް ޖެހި، ވައިގެ ތެރެއަށް ގެއްލިގެން ދިޔައީއެވެ. ފޮތުގެ ތެރެއިން ނުކުތް ރަތްކުލައިގެ ގަދަ އަލިކަންވެސް މަޑުމަޑުން ކުޑަވެ، ފޮތް އޭގެ އަމިއްލައަށް ބަންދުވެގެން ދިޔައީއެވެ. ކޮޓަރީގެ ތެރެއަށް ފެތުރިފައިވާ ނުބައި ވަސް ފިލައިގެން ދިޔައިރު، ކޮޓަރީގައި ހުރި ތަކެތި އަނެއްކާވެސް އާދައިގެ ހާލަތަކަށް އައެވެ. ކޮޓަރީގެ ތެރެއަށް އަނެއްކާވެސް ވެރިވެފައިވަނީ އަނދިރިކަމާއި ހަމަހިމޭންކަމެވެ. އަޝްރަފް އާއި އަމީނާ އެކަކު އަނެކަކުގެ މޫނަށް ބަލާލިއިރު، އެމީހުންގެ ލޮލުގައިވަނީ ހައިރާންކަމާއި، މިހިނގާދިޔަ ހާދިސާގެ އަސަރުން ލިބިފައިވާ ބިރުވެރިކަމެވެ.
ފިނި ހޫނު ކަމެއް އިހުސާސް ކުރެވެމުން ދިޔައިރު، އެމީހުންނަށް ލިބިފައިވާ ބިރުވެރިކަން އަދިވެސް އެނދުގައި އެ ދެމީހުންނާއެކު ހުރި ކަހަލައެވެ. އެފޮތް ބިމުން ނަގަން އަޝްރަފް ހިނގައިގަތުމުން، އޭނާގެ ހިތް އަނެއްކާވެސް ބާރުބާރަށް ތެޅިގަތެވެ. ނަމަވެސް، ފޮތާ ދިމާއަށް ދިޔަ ވަރަކަށް، ކުއްލިއަކަށް ކޮޓަރީގެ ދޮރު ހުޅުވިގެން ދިޔައީ ބާރު އަޑަކާއެކުއެވެ. އެ އަޑާއެކު އަޝްރަފް ސިހިފައި ފޮތާ ދުރަށް ޖެހިލިއެވެ. ދޮރުގެ ބޭރުގައިވާ ހިމޭން މާހައުލަށް ބަލާލިއިރު، އެއްވެސް މީހަކު ފެންނާކަށް ނެތެވެ. މިއީ ހަމަ އެކަނި ނިމުންބާވައެވެ؟ ނުވަތަ މިއީ އިތުރު ބިރުވެރިކަމެއްގެ ފެށުންބާވައެވެ؟ އެމީހުންގެ ހިތުގައި މި ސުވާލުތައް ހުއްޓެވެ.
އަޝްރަފް އާއި އަމީނާ އެކަކު އަނެކަކަށް ބަލާލިއެވެ. އެމީހުންގެ މޫނުމަތިން ފެންނަމުން ދިޔައީ ބިރުވެރިކަމުގެ އަސަރުތަކެވެ. ކޮޓަރީގެ ދޮރު ހުޅުވިފައި ހުރި ނަމަވެސް، ބޭރުން އެއްވެސް އަޑެއް ނީވެއެވެ. ހަމަހިމޭންކަން ވެރިވެފައިވާ މާހައުލަކަށް ދޮރު ހުޅުވިފައިވަނީއެވެ. ދެމީހުން މަޑުމަޑުން ދޮރާ ދިމާއަށް ހިނގައިގަތެވެ. އަޝްރަފް ސަމާލުކަމާއެކު ބޭރަށް ބަލާލިއެވެ. ގަސްތަކުގެ ފަތްތައް ވައިގައި ހެލިފެލިވާ އަޑު ފިޔަވައި އެއްވެސް އަޑެއް ނީވެއެވެ.
އަޝްރަފް މަޑުމަޑުން ދޮރު ލައްޕާލުމަށްފަހު ފޮތާ ދިމާއަށް ބަލާލިއެވެ. ބިމުގައި އޮތް އެ ފޮތް ފެނުމުން އޭނާގެ ހިތް އަނެއްކާވެސް ބާރުބާރަށް ތެޅިގަތެވެ.
"އަޝްރަފް، މި ފޮތް މިހާރު ނައްތާލަން ޖެހޭނެ. މި ފޮތް އޮވެއްޖެނަމަ އަހަރެމެންނަށް ދުވަހަކުވެސް ހަމަޖެހުމެއް ނުލިބޭނެ" އަމީނާވެސް ބިރުން ހުރެ ބުނެލިއެވެ.
"އާނ، އަމީނާ. މި ފޮތް މިހާރު މިތާ އޮވެގެން ނުވާނެ. އެހެންނޫނީ މި ހުރިހާ ބިރުވެރިކަމެއް އަބަދަށްޓަކައި އަހަރެމެންނާއެކު ވެގެންދާނެ" އަޝްރަފް އޭނާގެ ވާހަކައަށް އެއްބަސްވިއެވެ.
އަޝްރަފް ބިރުން ހުރެ ފޮތް ނެގިއެވެ. އެ ފޮތުން އަދިވެސް ކުޑަ ހޫނުކަމެއް އިހުސާސްވަމުން ދިޔައެވެ. ދެމީހުންވެސް ނިންމީ ފޮތް ގޯތިތެރޭގައިވާ ބިމެއްގައި ވަޅުލާށެވެ. އެގޮތަށް ކަންތައް ކުރުމުން މި ހުރިހާ ކަމެއް ނިމުމަކަށް އަންނާނެ ކަމަށް އެމީހުން އުންމީދު ކުރިއެވެ.
ދެމީހުން ގެއިން ބޭރަށް ނުކުމެ، ފޮތް ވަޅުލުމަށްޓަކައި ވަޅެއް ކޮންނަން ފެށިއެވެ. އަނދިރިކަމުގެ ތެރޭގައި ހަމަހިމޭންކަން ވެރިވެފައިވާ އިރު، ގަސްތަކުގެ ހިމޭން ވައިގެ އަޑު ފިޔަވައި އެހެން އެއްވެސް އަޑެއް ނީވެއެވެ. ވަޅުކޮނެ ނިމުމުން، އަޝްރަފް ފޮތް އެ ވަޅަށް ލިއެވެ. އެވަގުތު ކުއްލިއަކަށް ފޮތުން ގަދަ ރަތް ކުލައިގެ އަލިކަމެއް ނުކުމެ، މުޅި ސަރަހައްދު ދިއްލާލިއެވެ. އަދި ބިރުވެރި ހިނިތުންވުމެއްގެ އަޑެއް ވަށައިގެން ފެތުރިގެން ދިޔައެވެ. ދެމީހުން ސިހިފައި ފަހަތަށް ޖެހިލިއެވެ.
ފޮތުން ނުކުތް ރަތް އަލިކަން ގަދަވެގެން ދިޔައިރު، އެ އަލިކަމުގެ ސަބަބުން ދެމީހުންގެ ލޮލަށް ފެނުމަށް އަސަރު ކުރިއެވެ. ވަށައިގެން ފެތުރިފައިވާ ބިރުވެރި ހުނުމުގެ އަޑުތައް އިތުރަށް ގަދަވެ، ކަންފަތަށް އުނދަގޫވިއެވެ. މުޅި ސަރަހައްދު ގުގުމައިގެން ދިޔައެވެ. އެ ވަޅުގައި އޮތް ފޮތް، ކުއްލިއަކަށް މައްޗަށް އެރައި، އެ ދެމީހުންގެ މަތީގައި ވައިގެ ތެރޭގައި އެނބުރެން ފެށިއެވެ.
އެ ރަތް އަލިކަމުގެ ތެރެއިން، ކުރިންވެސް ފެނިފައިވާ ބިރުވެރި ރޫޙުތައް އަނެއްކާވެސް ފެންނަން ފެށިއެވެ. މިފަހަރު އެ ރޫޙުތައް ފެނުނީ ކުރިއަށްވުރެ ގިނައިންނެވެ. އަދި އިތުރަށް ބިރުވެރި ސިފަތަކަށެވެ. އެ ރޫޙުތަކުގެ ނުބައިކަން އެމީހުންގެ ވަށައިގެން ފެތުރިގެން ދިޔައިރު، ދެމީހުންނަށް ނޭވާހިފެހެއްޓުނެވެ.
ފޮތުގެ ތެރެއިން ނުކުތް އެންމެ ބޮޑު ރޫޙު އެ ދެމީހުންނާ ދިމާއަށް ޖެހިލިއެވެ. އެ ރޫޙުގެ ލޮލުގައިވަނީ އިންތިހާއަށް ނުބައިކަމާއި ބަދަލުހިފުމުގެ އަލިކަމެކެވެ. ފޮތް ހުޅުވިފައި ހުރި ހިނދު، އޭގެ ތެރެއިން ގަދަ ކަޅުކުލައިގެ އަލިކަމެއް ނުކުތުމާއެކު، އެ އަލިކަން މުޅި ގޯތިތެރެއަށް ވެރިވެގަތެވެ. އަދި އެ އަލިކަމުގެ ތެރެއިން ގަދަ ބާރަކުން އަޝްރަފް އާއި އަމީނާ ފޮތާ ދިމާއަށް ދަމައިގަންނަން ފެށިއެވެ.
އެމީހުންނަށް ދިމާވި މި ހާދިސާގެ ސަބަބުން އެއްވެސް އުންމީދެއް ނެތި، ހަމައެކަނި ކުރެވުނީ ހަށިގަނޑު ކުނޑިކުނޑިވެގެންދާހެން އިހުސާސްވުމެވެ.
ގޯތިތެރެއަށް އަނެއްކާވެސް ނުބައި، ބިރުވެރި ހަމަހިމޭންކަމެއް ވެރިވެގަތެވެ. އެންމެ ސިކުންތުކޮޅެއް ކުރިން ހިނގާދިޔަ ހާދިސާގެ އަސަރުން މުޅި ގަސްގަހާގެހިވެސް ހުއްޓިފައިވާހެން ހީވިއެވެ. ވަޅުލަން ކޮނެފައި އޮތް ވަޅަށް ބަލާލިއިރު، ފޮތުގެ އެއްވެސް ނިޝާނެއް ނެތެވެ. ހަމައެކަނި ފެންނަން ހުރީ ވެއްޔެވެ.
އެދުވަހުން ފެށިގެން އެ ގެއިން ބިރުވެރި އަޑެއް މަދުން ނަމަވެސް ނީވެއެވެ. ގޯތިތެރޭގައި ހުރި ގަސްތަކުގެ ފަތްތައްވެސް އެކަމުގެ އަސަރުން މަރުވެ، ވަށައިގެންވާ މާހައުލަށް މޮޅިވެރިކަމެއް ވަނީ ގެނެސްފައެވެ. ރޭގަނޑުވުމުން އެ ގޯތިތެރެއިން ބިރުވެރި ނޭނގޭ އަޑުތައް އިވެން ފެށިއެވެ. ބައެއްފަހަރު، ހަމަހިމޭންކަމުގެ ތެރެއިން އަޝްރަފް އާއި އަމީނާގެ ނަން ކިޔާ އަޑުތައްވެސް އިވެއެވެ. ފޮތުގެ ވާހަކައިގެ ހަގީގަތް އެއްވެސް މީހަކަށް އެނގިފައެއް ނުވެއެވެ. އެ ފޮތުގެ ވާހަކަ ވީ އެއްވެސް މީހަކަށް ނޭނގޭ ސިއްރަކަށެވެ. މިގޮތުން އެ ގެއާއި، އެ ހާދިސާ ވެގެން ދިޔައީ ސިއްރުތަކާއި، ބިރުވެރިކަމުގެ ތަނަކަށެވެ.
އެގޭގެ ތެރެއިން ރޭގަނޑު އަޑުއިވޭ ބިރުވެރި އަޑުތައް ކައިރި ހިސާބުގެ ގެތަކަށްވެސް ދިޔައީ ފެތުރެމުންނެވެ. އެފަދަ ބިރުވެރިކަމެއްގެ ސަބަބުން، އެ ހިސާބުގެ މަގުތަކުން ރޭގަނޑު ދަތުރުކުރާ މީހުންވެސް މަދުވެގެން ދިޔައެވެ.
= ނުނިމޭ =
