މިހާރު ދުވާލުގެ ވަގުތުގައިވެސް އެމީހުންނަށް ބިރުވެރި އަޑުތައް އިވެން ފަށައިފިއެވެ. ކޮންމެ ތަނަކުންވެސް، ކޮންމެ ވަގުތަކުވެސް ފޮތުގެ ނާމާންކަން އެ ދެމީހުންގެ ފަހަތުން އުޅޭހެން ހީވިއެވެ. އެމީހުން މަސައްކަތްކުރީ ފޮތް ނައްތާލާށެވެ. ނަމަވެސް އެ ފޮތް ނައްތާލެވޭކަށް ނެތެވެ. ފޮތް ނައްތާލަން މަސައްކަތް ކުރިއަސް، އެއަށްވުރެ ބޮޑު ނާމާންކަމެއް އެމީހުންނަށް ކުރިމަތިވެދާނެކަމުގެ ބިރުވެރިކަން އޮތެވެ. ފޮތުގެ ކޮންމެ ސަފްހާއެއްގައިވާ އަކުރުތަކުން އެ ދެމީހުންގެ ސިކުނޑިއަށް ވަދެ، އެތެރެއިން ބިރުވެރިކަން ފަތުރަމުންދާ ކަހަލައެވެ.
ރޭގަނޑު އެ ދެމީހުންނަށް ނިދޭކަށް ނެތެވެ. ނިދުނީމާ ފެންނަނީވެސް ބިރުވެރި ހުވަފެންތަކެވެ. ހުވަފެންތަކުގައި އެ ފޮތުގެ ވާހަކައިގައިވާ ޝައިޠާނީ ރޫހުތައް އެމީހުންގެ ފަހަތުން ދުވާތަން ފެނެއެވެ. ބައެއް ފަހަރު ފެނުނު ހުވަފެންތަކުގެ ސަބަބުން ސިހިފައި ހޭލެވި، މުޅި ހަށިގަނޑުން ދާހިއްލާ، ތުރުތުރުއަޅައިގަނެއެވެ.
އަޝްރަފާ އަމީނާއަށް ތިބީ ނިދިފައެވެ. ބިރުވެރި އަޑުތަކުގެ ސަބަބުން އަޝްރަފް އާއި އަމީނާއަށް ނިދިފައި އޮތީ މަދު ގަޑިއެއްހާ އިރަށެވެ. ކުއްލިއަކަށް ގޭގެ ދޮރުގައި ބާރަށް ތަޅައިގަތް އަޑު އިވިގެން ދިޔައެވެ. ދެމީހުންވެސް ސިހިފައި އެނދުން ތެދުވިއެވެ. އެއީ މެންދަމުގެ ވަގުތެވެ.
"އަޝްރަފް... އެއީ ކާކު؟" އަމީނާގެ އަޑު ތުރުތުރުއަޅައެވެ. އަޝްރަފް މަޑުމަޑުން ގޮސް ދޮރުގެ ކައިރިއަށް ގޮސް ބަލާލިއެވެ. ދޮރުން ބޭރުގައި އެއްވެސް މީހެއް ނެތެވެ. ވަށައިގެންވީ ހަމަހިމޭންކަން ބިރުވެރިކަން އިތުރަށް ބޮޑުވިއެވެ.
ނަމަވެސް އެ އަޑުތައް ހުއްޓައެއް ނުލައެވެ. މިހާރު އިވެނީ ދޮރުގައި ތަޅާ އަޑާއެކު، ކޮންމެވެސް މީހަކު މަޑުމަޑުން ރޮމުންދާ އަޑެވެ. އެ އަޑު އައީ އެ ދެމީހުންގެ ގޭގެ ތެރެއިންނެވެ. އަމީނާ އަޝްރަފްގެ އަތުގައި ހިފާ ބާރުކޮށްލިއެވެ. އެ ފޮތުގެ ނާމާންކަން ދެމީހުންގެ ހަޔާތުން ދުވަހަކުވެސް ނުފިލާނެކަން އެމީހުންނަށް ޔަގީންވިއެވެ. ފޮތުގެ އަސަރު އެމީހުންގެ މައްޗަށް މާ ބޮޑަށް ބާރުފޯރުވާފައިވާކަން އެ ދެމީހުންނަށް އިހުސާސްވިއެވެ. އެމީހުންގެ ލޯމަތިން ސިފަތައް ފެންނަން ފަށައިފިއެވެ. އެއީ ފޮތުގައިވާ ބިރުވެރި ރޫހުތަކުގެ ސިފަތަކެވެ. މި ބިރުވެރިކަމުން ސަލާމަތްވެވޭނެ ގޮތެއް އެ ދެމީހުންނަށް ފެންނާކަށް ނެތެވެ.
"އަޝްރަފް... އަހަރެންނަށް އިހުސާސްކުރެވޭ... އެ ފޮތް އަހަރެމެންނާ ވަރަށް ގާތަށް އަންނަކަން... އެއީ ހަމައެކަނި ފޮތެއް ނޫން... އެއީ ދިރިހުރި އެއްޗެއް" އަމީނާގެ އަޑު ތުރުތުރުއަޅައެވެ.
ކުއްލިއަކަށް، ކޮޓަރީގެ ދޮރު ހުޅުވިގެން ދިޔައެވެ. އެ ދޮރުން ފެނުނު މަންޒަރުން އެ ދެމީހުންގެ ބިރުން ހުއްޓުނު ކަހަލައެވެ. ފޮތުގެ ތެރޭގައި ހުރި ބިރުވެރި ރޫޙުގެ ސިފައެއް ސާފުކޮށް ފެންނަން ފަށައިފިއެވެ. އެއީ މުޅި ހަށިގަނޑު ކަޅު، ދިގު، ހިމަ ރޫޙެކެވެ. ދެ ލޯ ވަނީ ރަތް ކުލައިގައެވެ. އަތުގެ އިނގިލިތައް ދިގެވެ. އެ ރޫޙު މަޑުމަޑުން އެ ދެމީހުންނާ ދިމާލަށް ކައިރިވަމުން ދިޔައެވެ.
"ތިޔަ ދެމީހުން އަހަރެންގެ އަތްދަށުވެއްޖެ... މި ބިރުވެރިކަމުން ތިޔަ ދެމީހުންނަށް ސަލާމަތެއް ނުވެވޭނެ..." ރޫޙުގެ އަޑު އިވެމުން ދިޔައެވެ.
އެ ދެމީހުންގެ އެއްވެސް ކަމެއް ނުކުރެވޭނެކަން، އަޝްރަފްއަށް އިހުސާސްވިއެވެ. އެމީހުންގެ ހަޔާތް ނިމުމަކަށް އަންނަން ކައިރިވެއްޖެކަން އޭނާ ހިތަށް ޤަބޫލުކުރެވުނެވެ.
ރޫޙު އެނދާ ވަރަށް ގާތްކޮށްލިއެވެ. އޭގެ ދިގު ހިމަ އިނގިލިތައް އަޝްރަފްގެ ކޮނޑުގައި ބީހިލިއެވެ. އެވަގުތު އޭނާގެ ހަށިގަނޑުން ހަކަތަ ފިލައިގެން ދިޔަ ކަހަލައެވެ. އަމީނާ ރޮމުން އަޝްރަފްގެ އަތުގައި ބާރަށް ހިފައިލިއެވެ.
"ދެން މިކަމުން މިންޖުވާނެ ގޮތެއް ނެތް... ތިޔަ ދެމީހުންގެ ނިމުން މިއޮތީ ފެށިފައި..." ރޫޙު ބުނި ބަސްތަކުން އެ ދެމީހުންގެ ހިތް ފަޅައިގެންދާ ކަހަލައެވެ.
ކުއްލިއަކަށް، ކޮޓަރީގެ ހުރިހާ ބޮކިތަކެއް ނިވި، މުޅި ތަންގަނޑު އަނދިރީގެ ތެރެއަށް ގެއްލިއްޖެއެވެ. އެ އަނދިރިކަމުގެ ތެރެއިން، ރޫޙުގެ ރަތް ލޯ ދިއްލިފައި ހުއްޓެވެ. އަމީނާ އާއި އަޝްރަފްގެ އަޑު ނުނިކުމެ ތިއްބެވެ. އެނގިފައިވަނީ، އެމީހުންގެ މައްޗަށް އަންނަން އުޅޭ ހާދިސާއަކީ މުޅިން އާ ހާދިސާއެއްކަމާއި، އެއިން ސަލާމަތްވެވޭނެ އެއްވެސް ފުރުސަތެއް ނެތްކަމެވެ.
މުޅި ކޮޓަރި ތެރެއަށް ވެރިވެފައިވާ އަނދިރިކަމުގެ ތެރެއިން، ފެންނަމުން ދިޔައީ ހަމައެކަނި އެ ރޫޙުގެ ރަތް ދެ ލޯއެވެ. އެ ލޯތަކުން ނުކުންނަ އަލިކަމުން، ކޮޓަރީގެ ވަށައިގެން ހިނގާ ކަންތައްތައް މާ ބޮޑަށް ބިރުވެރިކޮށް ދައްކުވައިދިނެވެ. އަޝްރަފް އާއި އަމީނާގެ ހަށިގަނޑު ގަދައަށް ތުރުތުރުއަޅަމުން ދިޔައިރު، އެކަކު އަނެކަކުގެ އަތުގައި ބާރަށް ހިފަހައްޓައިގެން ތިއްބެވެ. އެމީހުންގެ ކަންފަތްދޮށުގައި ބިރުވެރި އަޑުތަކެއް އިވެން ފެށިއެވެ. ބައެއް ފަހަރު ކުޑަކުދިން ހެމުންދާ އަޑެވެ. އަނެއްބައި ފަހަރު މަޑުމަޑުން ބޮޑެތި ފިރިހެނުން ހެމުންދާ އަޑުތަކެވެ.
"ތިޔަ ދެމީހުން ދެން އަހަރެން ދޫކޮށެއް ނުލާނަން... ތިޔަ ދެމީހުން އަހަރެންގެ ބާރުގެ ދަށުވެއްޖެ!" ރޫޙުގެ އަޑު، އެ ދެމީހުންގެ ބިރުވެރިކަން އިތުރުކޮށްލިއެވެ. އެ އަޑު އައީ އެ ދެމީހުންގެ ވަށައިގެން ކަހަލައެވެ. ކުއްލިއަކަށް، އެ ދެމީހުންގެ ފައިތިލަ އާއި ދިމާލުން އެއްޗެއް ދަމާލި ކަހަލައެވެ. ދެމީހުންވެސް ބިރުން ހަޅޭއްލަވައިގަތެވެ. ނަމަވެސް އެ އަޑުތައް ނުކުތުމާއެކު، އަނެއްކާވެސް މުޅި ތަނަށް ހަމަހިމޭންކަން ވެރިވިއެވެ.
އަޝްރަފް މަސައްކަތްކުރީ، އޭނާގެ ފޯނުގެ އަލިކަމުން އެ ރޫޙު ހޯދާށެވެ. ނަމަވެސް ފޯނު ހިފާލެވުނު ވަގުތު، ފޯނު މުޅިން ނިވިގެން ދިޔައެވެ. އެ ވަގުތު، އަމީނާގެ އިސްތަށިގަނޑުގައި އެއްޗެއް ބީހިލިކަހަލަ އިހުސާސެއް ކުރެވުނެވެ. އަދި އޭނާގެ ކަންފަތް ދޮށުގައި މަޑުމަޑުން ފިސާރި ނާމާންކަމާއެކު ރޫޙު ވާހަކަ ދައްކައިލިއެވެ.
"ނުގަބޫލުކުރަނީތަ؟" ރޫޙު ސުވާލުކުރިއެވެ.
މުޅި ކޮޓަރި ތެރޭގައި ހޫނުމިން ދަށްވީއެވެ. ދެމީހުންގެ ނޭވާ ބެދުނު ކަހަލައެވެ. އެމީހުންގެ ލޮލުން ފެންނަން ފެށީ، އެމީހުންނަށް ކުރިމަތިވެފައިވާ ގޮތް ނުވަތަ މަންޒަރުތަކެވެ. އެ ދެމީހުންނަށް ކުރިމަތިވެފައިވަނީ، އެމީހުން ދުވަހަކުވެސް ހުވަފެނުންވެސް ނުދެކޭފަދަ ބިރުވެރި ހާދިސާއެކެވެ. އެ ފޮތުގެ ބާރުން އެމީހުންގެ ހަޔާތް މުޅިން ބަދަލުވެ، އެމީހުންގެ ނިމުން ކައިރިވެފައިވާކަން އެ ދެމީހުންނަށް ޔަގީންވިއެވެ.
ރޫޙު ސުވާލުކުރިތާ ހިނދުކޮޅެއް ނުވަނީސް، މުޅި ކޮޓަރީގެ އަނދިރިކަން އިތުރަށް ގަދަވެ، ދެމީހުންގެ ވަށައިގެން ދޫނިތަކެއް އުދުހިގަތް ކަހަލަ ގަދަ ވަޔެއްގެ އަޑު އިވެން ފެށިއެވެ. އަމީނާ ހަޅޭއްލެވޭތޯ މަސައްކަތްކުރިއެވެ. އަޝްރަފް އޭނާގެ އަތުގައި ހިފާ ބާރުކޮށްލިއިރު، އޭނާގެ ހަށިގަނޑުވެސް ވަނީ ފިނިވެފައެވެ. ރޫޙުގެ ރަތް ދެ ލޯ މާބޮޑަށް ދިއްލިގެން އައިސް، އެ ދެމީހުންގެ މޫނަށް އަލިއެޅުނެވެ.
"އަހަރެން މިތާ މިހިފަހައްޓާފައި މިހުރީ ތިޔަ ދެމީހުންނާ ހުރިގުޅުމެއްގެ ސަބަބުން... ތިޔަ ފޮތް ހުޅުވާލުމުން، ތިޔަ ދެމީހުންނަށް ދުވަހަކުވެސް ނުފިލާނެ ބޮޑު މުސީބާތަކަށް އަހަރެން ގެނެސްފީމު" ރޫޙުގެ އަޑު މާ ބޮޑަށް ގަދަވެ، ކަންފަތް ދޮށުން އިވެން ފެށިއެވެ.
ކުއްލިއަކަށް، އަޝްރަފްއަށް އިހުސާސްވީ އޭނާގެ ކަރުގައި ދިގު ހިމަ އިނގިލިތަކެއް ބީހިލިތަނެވެ. އޭނާގެ ނޭވާ ހުއްޓި، ކަރުން އަޑެއް ނުނިކުތެވެ. އަމީނާގެ ދެލޮލުން ކަރުނަ ފައިބައިގެން ދިޔައިރު، އޭނާގެ ހިތް ވަނީ ބިރުން ފުރިފައެވެ. އެމީހުންގެ ވަށައިގެން އެ ރޫޙު އުދުހެމުންދާ ކަހަލަ އިހުސާސެއް ކުރެވެން ފެށިއެވެ. ކޮޓަރީގެ ތެރޭގައި ހުރި ތަކެތި ތެޅިގަންނަން ފެށިއިރު، މީގެ ކުރިން ނުފެންނަ ވަރުގެ އަލިފާނުގެ އަލިކަމެއް ކޮޓަރީގެ އެކި ދިމަދިމާއިން ފެންނަން ފަށައިފިއެވެ.
"ދެން މީހަކަށް އެހީތެރިވާން ނާދެވޭނެ... ތިޔަ ދެމީހުންގެ ނިމުން މިއޮތީ ކަށަވަރުވެފައި." ރޫޙުގެ އަޑު މުޅި ކޮޓަރީގައި ގުގުމާލިއެވެ.
އަޝްރަފް އާއި އަމީނާ އެނދުގައި ބިރުން ތިއްބައި، އެ ދެމީހުންގެ ދެމެދުން ފޮތް އޭގެ އަމިއްލައަށް ހުޅުވިގެން، އޭގެ ތެރެއިން ގަދަ ރަތް ކުލައިގެ އަލިކަމެއް ފޮތުން ނުކުންނަން ފެށިއެވެ. އެ އަލިކަން ގަދަވަމުން ގަދަވަމުން ދިޔައިރު، ކޮޓަރީގެ ތެރޭގައިވާ ހުރިހާ އެއްޗެއް ދަޅައެޅުމާއެކު ނުބައި ވަހެއް ފެތުރިގެން ދިޔައެވެ. އެ އަލިކަމުގެ ތެރެއިން، ފޮތުގެ ތެރޭގައި ކުރަހާފައިވާ އެތައް ބިރުވެރި ރޫޙުތަކެއްގެ ސިފަތައް ފެންނަން ފެށިއެވެ.
އެ ދެމީހުންގެ ލޮލުން ފެންނަން ފެށީ ހަމައެކަނި ބިރުވެރިކަމާއި، މާޔޫސްކަމެވެ. ބަހެއް ބުނުމަށްވެސް ނުކުޅެދި، އަޑެއް ލައްވާލުމަށްވެސް ނުކުޅެދިފައިވާ އެ ދެމީހުންގެ ހިތް ވަނީ މި ބިރުވެރި ހާދިސާ އާއި ހެދި މަރުވެފައެވެ. އެމީހުންގެ ދުވަހަކުވެސް ނުދެކޭފަދަ ނިމުމެއް ކައިރިވެފައިވާކަން އެމީހުންނަށް ޔަގީންވިއެވެ. އެ ފޮތް ހުޅުވާލުމުން އެމީހުންގެ ހަޔާތަށް މިވަރުގެ ބޮޑު ނާމާންކަމެއް ވެރިވެދާނެ ކަމަށް އެ ދެމީހުން ހިއެއް ނުކުރެއެވެ.
އެމީހުންގެ ކިބައިން ހަޔާތުގެ ހުރިހާ އުންމީދެއް ކެނޑި، އެހިނދުކުރެވުނު ހަމައެކަނި ފިކުރަކީ މަރުގެ ފިކުރެވެ. އެ ބިރުވެރި ރޫޙުތަކުގެ ތެރެއިން، އެންމެ ބޮޑު އަދި އެންމެ ބިރުވެރި ރޫޙެއް އެ ދެމީހުންގެ ގާތަށް ޖެހިލިއެވެ. އެ ރޫޙުގެ ލޮލުގައި ވަނީ ނުބައިކަމާއި ބަދަލު ހިފުމުގެ އަލިކަމެކެވެ. އެ ރޫޙުގެ ފަރާތުން ކޮޓަރީގެ ތެރެއަށް ފެތުރިގެން ދިޔައީ އިންސާނަކަށް ތަހައްމަލު ކުރަން ދަތި ވަހެކެވެ.
އަޝްރަފް އާއި އަމީނާ ލޯމަރާލިއެވެ. އެ ދެމީހުންގެ ދުނިޔެ ނިމުމަކަށް އަންނަނީ ކަމަށް އެމީހުންނަށް އިހުސާސް ކުރެވުނެވެ. އަދި އެ ދެމީހުންގެ ހިތްތައް ބާރުބާރަށް ތެޅިގަތެވެ. އެހެންނަމަވެސް އެހެން ކަންތައްތައް ހިނގަން ފެށީ އެދެމީހުން ހީކުރި ގޮތަކަށް ނޫނެވެ. ފޮތުން ނުކުމެގެން އައި އަލިކަން މަޑުޖެހި، މަޑުމަޑުން ފަނޑުވާން ފެށިއެވެ. ކޮޓަރީގެ ތެރެއަށް ފެތުރިފައިވާ ނުބައި ވަސްވެސް ކުޑަވެގެން ދިޔައެވެ. އެހިނދު، ބިރުން ތުރުތުރުއަޅަމުން ދިޔަ އަޝްރަފް އާއި އަމީނާ މަޑުމަޑުން ލޯހުޅުވާލިއެވެ.
ފޮތުގެ ތެރެއިން ނުކުތް ބިރުވެރި ރޫޙުތައް މަޑުމަޑުން ފޮތުގެ ތެރެއަށް ދެމިގަންނަމުން ދިޔައެވެ. އަދި ފޮތުގެ މައްޗަށް ވެރިވެފައިވާ ރަތްކުލައިގެ އަލިކަންވެސް ކުޑަވެ، ހީނަރުވަމުން ދިޔައެވެ. މި ހުރިހާ ކަމެއް ހިނގަމުން ދިޔައިރު، އަޝްރަފް އާއި އަމީނާގެ ހިތުގައި އުފެދުނީ ހައިރާންކަމާއި، ވަރުގަދަ ސުވާލެކެވެ. ކީއްވެ ހެއްޔެވެ؟ މި ހުރިހާ ކަމެއް މަޑުޖެހުނީ ކީއްހެއްޔެވެ؟ އެއްވެސް ޖަވާބެއް ނެތި، ދެމީހުން އެކަކު އަނެކަކަށް ބަލާލިއެވެ. ކޮޓަރީގެ ތެރޭގައި އަނެއްކާވެސް ވެރިވެފައިވަނީ އަނދިރިކަމެވެ. ހުރިހާ ކަމެއް ނިމުމަކަށް އައީ ބާވައެވެ؟ ނުވަތަ މިއީ އިތުރު ބިރުވެރިކަމެއްގެ ފެށުން ބާވައެވެ؟.
= ނުނިމޭ =
