ފަތިސްވެ، އިރުގެ އަލިކަން ކޮޓަރިއަށް ވަންއިރުވެސް އަމީނާ އޮތީ ހަމަ ނުނިދައެވެ. ޖިންނި ބުނި ބަސްތައް އޭނާގެ ކަންފަތުގައި ގުގުމާލިއެވެ. ދޮންއާދަނު މިފޮތިގަނޑު ބޭނުންކުރަން މަސައްކަތްކުރީ ކީއްކުރަން ބާވައެވެ؟ އޭނާ ހުރި ހާލަތަކީ ކޮބައިބާވައެވެ؟ ސުވާލުތައް އޭނާގެ ސިކުނޑިއަށް ބާރުބޮޑުކުރަމުން ދިޔައެވެ. އަމީނާ އެނދުން ތެދުވެ ކޮޓަރީގައި ހުރި ގޮނޑިއެއްގައި އިށީނެވެ. ކުއްލިއަކަށް އަމީނާއަށް އިވުނީ ޖިންނި ވާހަކަ ދައްކާ އަޑެވެ.
"މި ފޮތިގަނޑަކީ ވަރަށް ބާރުގަދަ އެއްޗެއް. ދޮންއާދަނު މަސައްކަތްކުރީ މި ފޮތިގަނޑު ބޭނުންކޮށްގެން އޭނާގެ ފުރާނަ ސަލާމަތްކުރަން ނުވަތަ އޭނާ ހައްޔަރުކުރި ބާރުތަކުން މިންޖުވާން. ނަމަވެސް އޭނާއަށް ކާމިޔާބެއް ނުވި" ޖިންނި ލަސްލަހުން ވާހަކަ ދެއްކިއެވެ.
"އެކަމަކު ކަލެއަށް މިކަން ކުރެވޭނެކަމަށް ބުނީމެއްނު؟" އަމީނާގެ ހަށިގަނޑު ތުރުތުރު އަޅާލިއެވެ.
އަމީނާ ބިރުވެރިކަމާއެކު އަހާލިއެވެ. "އަނދިރި ދުނިޔެއަށް. އެތަނަށް ވަދެވޭނީ ކިހިނެއް؟. އަދި އެތަނަކީ ކޮންތަނެއް؟"
"އެއީ ޖިންނީންގެ ދުނިޔޭގެ އެންމެ ފުނުގައިވާ ތަނެއް. އެއީ އިންސާނުންނަށް ވަދެވޭނެ ތަނެއް ނޫން. ނަމަވެސް، ދޮންއާދަނު ބޭނުންކުރި ބާރުތަކުގެ ސަބަބުން މިހާރު ކަލެއަށް އެތަނަށް ވަދެވިދާނެ. މި ފޮތިގަނޑުގައި އެތަނަށް ވަނުމަށް ބޭނުންވާ ކަންތަކާއި، ބޭނުންވާ ހުރިހާ މަޢުލޫމާތެއް އެބަހުރި. ނަމަވެސް އެއީ ވަރަށް ނުރައްކާތެރި ދަތުރެއް. އެތަނަށް ވަންނަ މީހުންނަށް ދިމާވާނެ ކަންކަމަށް ކަލޭ ތައްޔާރުވާން ޖެހޭނެ" ޖިންނި އިންޒާރު ދިނެވެ.
"މާދަމާ ރޭގެ މެންދަމުން އަލިވެލަން ފަށާ ވަގުތު. ކަލޭގެ ކޮޓަރީގެ ތެރޭގައި. ފޮތިގަނޑު ކައިރީގައި. އަބަދުވެސް ހަނދާން ބަހައްޓާތި. ކަލޭ އެކަނި ނުވާނެ" ޖިންނި އިރުޝާދު ދިނެވެ.
ޖިންނީގެ އަޑު ކެނޑުނެވެ. އަމީނާގެ ހިތުގައި ބިރުވެރިކަމާއެކު އުއްމީދުގެ އަލިކަމެއް ފާޅުވިއެވެ. އޭނާ މޭޒުމަތީގައި އޮތް ފޮތިގަނޑަށާއި ނޯޓުފޮތަށް ބަލާލިއެވެ. މާދަމާ ރެއަށް ތައްޔާރުވުމަށްޓަކައި އޭނާ ނިދަން އޮށޯތެވެ. އޭނާގެ ދިރިއުޅުމުގެ އެންމެ ބިރުވެރި ދަތުރުގެ ދެވަނަ މަރުހަލާއަށް އޭނާ ހުރީ ތައްޔާރަށެވެ.
މާދަމާ ރޭގެ އަނދިރިކަމަށް އިންތިޒާރުކުރަމުން ދިޔައިރު އަމީނާގެ ހިތް އޮތީ ހާސްކަމުން ފުރިފައެވެ. ނަމަވެސް، ދޮންއާދަނުގެ މައްސަލަ ހައްލުކުރުމުގެ އަޒުމު އޭނާގެ ހިތުގައި ވަރުގަދަވެފައި ހުއްޓެވެ. މުޅި ދުވަސް ހޭދަކުރީ މިކަމަށްޓަކައި ހިތްވަރު އެއްކޮށް، މާނަ ނޭނގޭ ކުރެހުންތަކުގެ ސިއްރު ހޯދުމުގެ ޚިޔާލުގައެވެ. ރޭގަނޑު ވުމުން، އަނދިރިކަމުން ދުނިޔެ ވަށާލައިފިއެވެ.
ނުރައްކާތެރި އެރޭގެ މެންދަމު އައިސްޖެހުނީއެވެ. އަމީނާ އޭނާގެ ކޮޓަރީގައި އޮތް ފޮތިގަނޑާއި ދޮންއާދަނުގެ ނޯޓުފޮތް މޭޒުމަތީގައި ބާއްވާލައިގެން އިނެވެ. ކޮޓަރީގެ ތެރެއަށް ފިނިކަމެއް ވަދެގަތުމާއެކު އޭނާގެ ހިތް ތެޅިގަތެވެ. ޖިންނި އޭނާއާ އެކުވާކަން ވަގުތުން އިޙްސާސްވިއެވެ. އަމީނާ ނޯޓުފޮތް ހުޅުވާލިއިރު އެތެރޭގައި ހުރި ލިޔުމާއި ކުރެހުންތައް އޭނާއަށް ސާފުކޮށް ފެނުނެވެ. އޭނާ ފުން ނޭވައެއް ލަމުން، ތުރުތުރުއަޅަމުން ދިޔަ އަޑަކުން ލިޔުންތައް ކިޔަން ފެށިއެވެ.
ފޮތުގައި ކޮންމެ އަކުރެއް ކިޔާ ކޮންމެ ފަހަރަކު ކޮޓަރީގެ ތެރޭގައި އާދަޔާޚިލާފު ބަދަލުތަކެއް އަންނަން ފެށިއެވެ. ފޮތިގަނޑުން ކަޅުކުލައިގެ ދުންތަކެއް ނިކުމެ، ކޮޓަރީގެ ތެރޭގައި ފެތުރިގަތެވެ. ކޮޓަރީގެ ބިތްތަކާއި ފުރާޅު ފެށީ ވިރިގަންނަން ކަހަލަ ގޮތަކަށެވެ. މުޅިތަން އަނދިރިކަމެއްގެ ތެރެއަށް ގެއްލިގެން ދިޔަ ކަހަލައެވެ. ބިރުވެރި އަޑުތަކެއް ކޮޓަރީގެ ކޮންމެ ކަނަކުން އިވެން ފެށިއެވެ. ވައިގެ ތެރެއިން ނުފެންނަ އަތްތަކެއް އޭނާގެ ހަށިގަނޑުގައި ހިފާލިހެން ހީވިއެވެ.
އަމީނާގެ ހިތް ބާރަށް ތެޅެމުން ދިޔައިރު، އޭނާގެ ނޭވާ ބަންދުވާން ކައިރިވި ކަހަލައެވެ. ނަމަވެސް އޭނާ އެލިޔުން ކިޔުން ހުއްޓާނުލިއެވެ. ކުއްލިއަކަށް މުޅި ކޮޓަރި އަނދިރިވެގެން ދިޔަ ކަހަލައެވެ. ދެލޯ މަރާލެވުނެވެ. އަނެއްކާވެސް ދެލޯ ހުޅުވާލިއިރު އޭނާ ހުރީ މުޅިން ތަފާތު ތަނެއްގައެވެ.
އެއީ 'އަނދިރި ދުނިޔެ'އެވެ. އަމީނާގެ ވަށައިގެން އޮތީ މުޅިން އަނދިރިކަމެވެ. އެއްވެސް އަލިކަމެއް ނެތެވެ. ބިރުވެރި، ކުނި ވަސްތަކެއް ނުކުމެމުންދިޔައެވެ. ވައިގައި ފެތުރިފައި ހުރީ މަރުވެފައިވާ ފުރާނަތަކުގެ ވަސްކަމަށް އޭނާއަށް ހީވިއެވެ. އުޑުމަތި ފެންނަނީ ކަޅު ކުލައިގެ ބޯ ވިލާތަކުން ފުރިފައެވެ. އެވިލާތަކުގެ ތެރެއިން ރަތްކުލައިގެ އަލިތަކެއް ވިދަމުންދިޔައެވެ. އެއީ ތަރިތަކެއް ނޫނެވެ. އެއީ ހީލަތްތެރި، ބިރުވެރި ލޯތަކެއްހެން އޭނާއަށް ހީވިއެވެ. ބިންގަނޑު އޮތީ ހިކި ގަސްތަކުން ފުރިފައެވެ. އެ ގަސްތަކުގައި އެއްވެސް ފަތެއް ނެތެވެ.
"މިހާރު ކަލެއަށް އާދެވިއްޖެ. މިތަނަކީ ކަލެއަށް ފެންނަހާ ފަސޭހަ ތަނެއް ނޫން" އޭނާގެ ކަންފަތުގައި ޖިންނީގެ ހިމޭން އަޑު ގުގުމާލިއެވެ.
ޖިންނީގެ ބަސްތަކުން އަމީނާއަށް ހިތްވަރެއް ލިބުނެވެ. ނަމަވެސް މިތަނަކީ އިންސާނަކަށް ކެތްކުރެވޭނެ ތަނެއް ނޫންކަން އޭނާއަށް ވަގުތުން އެނގުނެވެ. ކޮންމެ ފިޔަވަޅަކާއެކު ބިރުވެރިކަން އިތުރުވަމުންދިޔައެވެ. އޭނާ ހިނގައިގަތީ މަގެއްގެ ތެރެއިންނެވެ. އޭނާގެ މި ބިރުވެރި ދަތުރުގެ ތިންވަނަ މަރުހަލާ މިއީ ކަމުގައި އޭނާ ހިތަށް އެރިއެވެ.
އެ "އަނދިރި ދުނިޔޭ"ގައި އޭނާ ކޮންމެ ފިޔަވަޅެއް އަޅާ ކޮންމެ ފަހަރަކު ފައިދަށުން އިވެނީ މަރުވެފައިވާ ފުރާނަތަކުގެ ވޭނުގެ އަޑުކަހަލައެވެ. ބިންގަނޑު އޮތީ ހަރުވެފައިވާ ކައްޓާއި ހިރަފުހުން ފުރިފައެވެ. ވައިގެ ތެރޭގައި ފިނިކަމަކާއެކު ރުއިމުގެ އަޑުތަކެއް ފެތުރިފައިވެއެވެ. އޭނާގެ ވަށައިގެން ކަޅު ހިޔަނިތަކެއް އެކި ދިމަދިމާއަށް ދުވެ، އަލިފާނުގެ ދަގަނޑުތަކެއްހެން ހުރި ގަސްތަކުގެ މަތިން ފާޅުވެފަ އަނެއްކާވެސް ގެއްލިގެންދެއެވެ.
އަމީނާގެ ހިތުގައި ބިރު އުފެދެމުންދިޔައެވެ. މިއީ އޭނާ ދުވަހަކުވެސް ދެކެފައިނުވާ ބިރުވެރި ތަނެކެވެ. ކުއްލިއަކަށް އޭނާއަށް ހީވީ އޭނާގެ މަންމައާއި ބައްޕަގެ އަޑު އިވުނު ހެންނެވެ. އެ ދެމީހުން އޭނާއަށް ގޮވާލައި، އެހީތެރިކަމަށް އެދޭހެންނެވެ. އޭނާގެ ހިތް ހުއްޓުނުކަހަލައެވެ.
"މިއީ ހަގީގަތެއް ނޫން. މިއީ މިތަނުގެ ބާރުތަކުން ކަލެއަށް ދައްކާ ހީލަތްތެރި މަންޒަރުތަކެއް. ކަލޭގެ ހިތްވަރު ދޫނުކުރާތި. ހިތް ވަރުގަދަކޮށް ހިފަހައްޓާ"
ޖިންނީގެ ބަސްތަކުން އަމީނާގެ ހިތްވަރު އަލުން އާލާވިއެވެ. އޭނާ ދެލޯ މަރާލައި ފުން ނޭވައެއް ލިއެވެ.
ވަގުތު ފާއިތުވަމުންދިޔަ ވަރަކަށް، އަމީނާއަށް ހީވީ އެއްވެސް ދިމާލަކަށް ނުދެވޭހެންނެވެ. ނަމަވެސް، ކުއްލިއަކަށް އޭނާއަށް އިހުސާސްވީ ކުރިއަށް ފިނިކަމުގެ ބަދަލުގައި ކުޑަ ހޫނުކަމެއް ފެތުރިގެން އަންނަހެންނެވެ. އެހޫނުކަން އައި ދިމާއަށް އޭނާ ހިނގައިގަތެވެ. ކޮންމެ ފިޔަވަޅަކާއެކު ހޫނުކަން އިތުރުވަމުން ދިޔައެވެ.
"ފުރަތަމަ ކަމަކަށް، ފޮތިގަނޑު އަޅާ. ދެން ނޯޓުފޮތުގައިވާ ލިޔުން ކިޔާ. ނަމަވެސް ވަރަށް ސަމާލުވާންވާނެ. އެލިޔުން ކިޔާ ގަޑީގައި އެ ބާރުތައް ކަލެއާ ދެކޮޅަށް ހަމަލާ ދޭން މަސައްކަތްކުރާނެ. ކަލޭގެ ހިތްވަރު ދޫކޮށްފިނަމަ، ކަލެއަށްވެސް ދޮންއާދަނަށް ދިމާވި ހާލަތު ދިމާވެދާނެ. އެކަމަކު ހަނދާން ބަހައްޓާތި" ޖިންނި އިންޒާރު ދިނެވެ.
އަމީނާގެ ހިތުގައި ބިރުވެރިކަން އުފެދިގެން ދިޔައެވެ. ދޮންއާދަނަށް ދިމާވި ހާލަތަކީ މުޅި ރަށު ތެރެއަށް ފެތުރިފައިވާ ބިރުވެރި ވާހަކައެކެވެ. ދޮންއާދަނަކީ އެއްރޭ ގޭގައި ހުއްޓާ ގޮތް ނޭނގޭ ގޮތަކަށް މަރުވެ ދިޔަ މީހެކެވެ. އޭނާ މަރުވީ ކޮން ސަބަބަކާ ހެދިކަންވެސް އަދި ހޯދިފައިނުވެއެވެ. އޭނާއަށް ދިމާވި ގޮތް ނޭނގިފައިވާތީ، އެވާހަކަ އެހުމުން ކޮންމެ މީހެއްގެ ހަށިގަނޑު ތުރުތު އަޅައެވެ.
އެހެން ނަމަވެސް އެކަމަށް އަމީނާ އެއްބަސްވިއެވެ. ނަމަވެސް އެއްބަސްވުމާއެކު އަމީނާގެ ހިތަށް ބިރުވެރިކަމެއް ވެރިގެންފިއެވެ. ނޯޓުފޮތުގައިވާ ލިޔުން ކިޔުމަށްފަހު ދޮންއާދަނުގެ ހާލު އިނގޭނެ ކަމަށް ޖިންނި ބުނެފައިވާތީ، މިކަން ނުކޮށް ހުރެވޭނެ ގޮތެއް ނެތެވެ. ނަމަވެސް، މިކަން ފެށުމުގެ ކުރިން އަމީނާގެ ފިރިމީހާ އަޝްރަފް އާއި ވާހަކަ ދައްކާ މަޝްވަރާ ކުރަން ބޭނުމެވެ. ނަމަވެސް މިކަމުގެ އެއްވެސް ޚަބަރެއް ރަށުތެރެއަށް ފެތުރޭކަށްވެސް ބޭނުމެއް ނޫނެވެ.
ބިރުވެރި އުދާސްތަކާއި ވިސްނުންތަކާ އެކު އަމީނާ ނިދިފައި އޮއްވައި، ހެނދުނު އަމީނާއަށް ހޭލެވުނީ އަޝްރަފް އައިސް ކޮލުގައި މަޑުމަޑުން ކޮއްޓާލީމައެވެ. މަޑުމަޑުން ލޯ ހުޅުވާލުމަށްފަހު ފުރަތަމަވެސް އަމީނާގެ ނަޒަރު ހުއްޓުނީ ފާރުގައި ހަރުކޮށްފައި ހުރި ގަޑިއަށެވެ.
"އޯހް. އަށެއް ޖެހީ. ވަރަށް ލަސްވެއްޖެ. ކީއްވެ ކުރިން ނުގޮވީ؟" އަމީނާ އަޝްރަފަށް ބަލާލަމުން ބުނެލިއެވެ. އަމީނާގެ އަޑުގައި ހުރީ ނިދީގެ އަސަރުތަކެވެ. އެހެން ނަމަވެސް ހިތުގެ އެއްކަނެއްގައި ރޭގެ ބިރުވެރިކަމުގެ ހަނދާންތައް ހުއްޓެވެ.
އަޝްރަފް މަޑުމަޑުން ހިނިތުންވެލިއެވެ. "ގޮވަން އުޅުނިން ވަރަށް ކުރިން. ވަރަށް އަރާމުގައި ނިދާފައި އޮތީމަ ހިތަށްއެރީ ގޮވާނީ ފަހުންނޭ" އަޝްރަފް ބުނެލިއެވެ.
އަމީނާގެ ހިތުގައި ރޭގެ އެއްބަސްވުމުގެ ހަނދާން ހުއްޓެވެ. ދޮންއާދަނުގެ މައްސަލަ ހައްލުކުރުމަށްޓަކައި އެ ޖިންނިއާ އެއްބަސްވުމުން، އޭނާގެ ހިތް ވަނީ ކަންބޮޑުވުމުން ފުރިފައެވެ. ނޯޓުފޮތުގައިވާ ލިޔުން ކިޔުމަށްފަހު ދޮންއާދަނުގެ ހާލު އިނގޭނެ ކަމަށް ޖިންނި ބުނެފައިވާތީ، އޭނާގެ ކުރިމަތީގައި އޮތީ ބިރުވެރި މަސައްކަތެކެވެ. އެކަން އަޝްރަފްއާ ހިއްސާކުރާނެ ގޮތަކާ މެދު އޭނާ ވިސްނަން ފެށިއެވެ.
ދުވަހުގެ ކަންކަން ކުރިއަށް ގެންދާއިރުވެސް، އަމީނާގެ ހިތް އޮތީ އެއްވެސް ހިތްހަމަޖެހުމަކާ ނުލައެވެ. އޭނާގެ ޚިޔާލުތައް ދިޔައީ ރޭގެ ހާދިސާއާއި، ކުރިމަތިލާންޖެހޭ ކަމާ ދޭތެރެއަށެވެ. އަޝްރަފްއަށް އަމީނާގެ މޫނުމަތިން ކަންބޮޑުވުމުގެ އަސަރުތައް ފެނިގެން ދިޔައެވެ.
"ކިހިނެއްވީ؟ ވަރަށް ނުތަނަވަސްކަން ފެނޭ މޫނުމަތިން؟" އަޝްރަފް އަމީނާގެ ކޮނޑުގައި ހިފާލަމުން ސުވާލުކުރިއެވެ.
އަޝްރަފްގެ ސުވާލާއެކު އަމީނާގެ ހިތް ތެޅިގަތެވެ. އެއްބަސްވުމުގެ ވާހަކަ ބުނެދޭނެގޮތެއް އަމީނާއަކަށް ނޭނގެއެވެ. އެކަން ރަށުތެރެއަށް ފެތުރިއްޖެނަމަ ވާނެ ގޮތަކާމެދު އަމީނާ ވަރަށް ބިރުގަނެއެވެ. ސިއްރުން ވާހަކަ ދެއްކުމަށްޓަކައި އެކަހެރި ވަގުތެއް ބޭނުންވާކަމަށް އަމީނާ ބުނެލިއެވެ.
= ނުނިމޭ =
