އިންސާނަކަށް ވީތީ އަޅުގަނޑުމެންގެ ތެރެއިން ކޮންމެ މީހަކީވެސް އިޙްތިރާމާއި ޤަދަރު ލިބެންޖެހޭނެ މީހެކެވެ. ނަމަވެސް، މިއަދުގެ މުޖުތަމަޢުގައި ފެންނަމުންދާ އެންމެ ހިތާމަވެރި އެއް ކަމަކީ، ކަމެއްގެ ހަޤީޤަތް ބެލުމެއް ނެތް ގޮތުގައި، އަނެކުންނާ މެދު ގޯސް ގޮތްގޮތަށް ވިސްނައި، އެމީހުން ނިކަމެތިކޮށްލުމެވެ. މިއީ ހަމައެކަނި އިޖުތިމާޢީ މައްސަލައެއް ނޫނެވެ. މިއީ އުފާވެރި ދިރިއުޅުމަކަށް އޮތް އެންމެ ބޮޑު ހުރަހެވެ.
ހަޤީޤަތް ނުބަލާ ގޮތް ނިންމުމަކީ ކޮންކަހަލަ ކަމެއް؟
ކަމެއްގެ އަސްލު ނޭނގި ހުރެ، މީހެއްގެ ބޭރުފުށަށް ނުވަތަ އިވޭ އަޑަކަށް ބިނާކޮށް ގޮތް ނިންމުމަކީ އިންސާފުން އެއްކިބާވެފައިވާ، އަދި އިސްލާމީ ރީތި އަޚުލާޤާ ޚިލާފު ކަމެކެވެ. މިއީ އަނެކާގެ ނަފްސާނީ ހަމަޖެހުން ގެއްލުވާލައި، މުޖުތަމަޢުގައި ފިތުނަ ފަސާދަ އުފެދުމަށް މަގުފަހިވާ ވަރަށް ނުރައްކާތެރި އާދައެކެވެ.
މީގެ ސަބަބުން ލިބޭ ގެއްލުންތައް
- ގުޅުންތައް ހީނަރުވުން: އާއިލާ އާއި ރަހުމަތްތެރިންގެ މެދުގައި އޮންނަ އިތުބާރު ގެއްލި، ގުޅުންތައް ކެނޑިގެންދެއެވެ.
- ނަފްސާނީ ބަލިމަޑުކަން: ދޮގު އިލްޒާމްތަކާއި ނިކަމެތިކަން ލިބޭ މީހާ ކަންބޮޑުވުމާއި (anxiety) އަދި މާޔޫސްކަމުގެ (depression) ތެރެއަށް ވެއްޓެއެވެ.
- ދޮގު މަޢުލޫމާތު ފެތުރުން: ހަޤީޤަތް ނުބަލާ ދައްކާ ވާހަކައިގެ ސަބަބުން މީހެއްގެ މުޅި ދިރިއުޅުން ހަލާކުވެދާނެއެވެ.
މިކަމުން ދުރުހެލިވުމުން ލިބޭ ފައިދާ
އަނެކުންނާ މެދު ގޯސްކޮށް ގޮތް ނުނިންމާ މީހަކަށް ވުމުން، ތިމާގެ ހިތަށް ބަޔާންކުރަން ނޭނގޭ ފަދަ ހަމަޖެހުމެއް ލިބެއެވެ. މީހުންގެ މެދުގައި އިތުބާރު ބޮޑުވެ، އެންމެން ގުޅިގެން އުޅޭ އުފާވެރި މުޖުތަމަޢެއް ބިނާވެއެވެ. އަދި އެންމެ މުހިންމު ކަމަކީ، އަނެކާގެ ޙައްޤަށް އަރައިގަތުމުން ސަލާމަތްވެ، މާތްﷲގެ ރުހުން ލިބުމެވެ.
ރަނގަޅު ކުރުމަށް ނުވަތަ މިކަން ނުކުރުމަށް ކުރެވިދާނެ 7 ކަމެއް
- ކަމެއް އިވުމުން ތަޙުޤީޤުކުރުން: އެއްވެސް ވާހަކައެއް ގަބޫލުކުރުމުގެ ކުރިން އޭގެ ސައްހަކަން ކަށަވަރުކުރާށެވެ.
- އަނެކާގެ މަޤާމުގައި ހުރެ ވިސްނުން: "އަހަންނަށް މިހެން ދިމާވިނަމަ ކުރެވޭނީ ކޮން އިހުސާސެއްބާއޭ" ހިތަށް އަރުވާށެވެ.
- އަވަސް އަރުވާލައިގެން ގޮތް ނުނިންމުން: ކަމެއް ފެންނައިރަށް ނުވަތަ އިވޭ އިރަށް ހުކުމް ނުޖަހާށެވެ.
- ހެޔޮވިސްނުން އިސްކުރުން: އަބަދުވެސް އަނެކާއާ މެދު ރަނގަޅު ގޮތުގައި ހީކުރާށެވެ.
- ދޫ ރައްކާތެރިކުރުން: ނޭނގޭ ކަންކަމުގައި ވާހަކަ ނުދައްކާ ހަނު ހުރުން އިސްކުރާށެވެ.
- އަމިއްލަ ނަފްސަށް ބެލުން: އަނެކުންގެ އައިބު ހޯދުމުގެ ބަދަލުގައި އަމިއްލަ އިސްލާހަށް މަސައްކަތްކުރާށެވެ.
- މާފުކުރުމުގެ ސިފަ އަށަގެންނެވުން: މީހަކަށް ކުށެއް ކުރެވިފައިވީނަމަވެސް، އެމީހާ ނިކަމެތި ކުރުމުގެ ބަދަލުގައި ނަސޭހަތްދީ މާފުކުރާށެވެ.
ޓިޕްސް އަދި ސްޓްރެޓެޖީސް
- ސްޓޮޕް - ތިންކް - ރިއެކްޓް: ކަމެއް އިވުމުން ވަގުތުން ރައްދު ނުދީ، މަޑުޖެހިލާ ފުންކޮށް ވިސްނުމަށްފަހު އަމަލުކުރާށެވެ.
- ސީދާ ސުވާލުކުރުން: މީހަކާ ބެހޭގޮތުން ޝައްކެއް އުފެދިއްޖެނަމަ، އެމީހާ ނުހުންނަ ތަނުގައި ވާހަކަ ދެއްކުމުގެ ބަދަލުގައި އެމީހަކާ ސީދާ ބައްދަލުކޮށް އޮޅުންފިލުވާށެވެ.
- މީސްމީޑިއާ ބޭނުންކުރުމުގައި ސަމާލުވުން: ފެންނަ ކޮންމެ ޕޯސްޓަކީ ހަޤީޤަތް ކަމަށް ނިންމައި ކޮމެންޓް ނުކުރާށެވެ.
އުފާވެރި ދިރިއުޅުމަކީ އެކަކު އަނެކަކަށް އިޙްތިރާމްކޮށް، އަޅާލައި، އަދި ކަންކަމުގެ ހަޤީޤަތް ބަލައިގެން އުޅުމެވެ. އަނެކާ ނިކަމެތިކޮށްގެން ތިމާއަށް ލިބޭނެ އެއްވެސް މޮޅެއް ނެތެވެ. ވީމާ، ހިތްތައް ސާފުކޮށް، ހަޤީޤަތުގެ މައްޗަށް ބިނާވެފައިވާ ގުޅުންތަކެއް ބިނާކުރުމަށް އަޒުމް ކަނޑައަޅަމާ ހިނގާށެވެ.
އެޑިޓަރުގެ ނޯޓް: މިއީ ސޯޝަލް އިމޯޝަނަލް އިންޓެލިޖެންސް ކޯޗެއް އަދި ގައިޑަންސް އެންޑް ކައުންސެލަރ އެއްގެ ގޮތުގައި މަސައްކަތްކުރައްވާ ސަމާ އިބްރާހީމް ދީދީ "ޒީޓައިމްސް" އަށް ހަދިޔާ ކޮށްފައިވާ ލިޔުމެކެވެ. މި ލިޔުމުގެ ބޭނުމަކީ ކިޔުންތެރިންނަށް ދިރިއުޅުމުގެ ހުނަރުތަކާއި ހަރުދަނާ ބަދަހި ގުޅުންތަކެއް ދެމެހެއްޓުމަށް ކުރެވިދާނެ ކަންތައްތަކުގެ މަޢުލޫމާތު ހިއްސާކުރުމެވެ.
