އެމެރިކާއާއި އިޒްރޭލު ގުޅިގެން އީރާނަށް އިއްޔެގެ ވަގުތެއްގައި ދިން ހަމަލާތަކުގައި އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަވެފައިވާކަން އީރާނުން ރަސްމީކޮށް އިއުލާންކުރީ މިއަދުގެ ވަގުތެއްގައެވެ.
އީރާނުގެ ޤައުމީ ޓީވީއިން ގެނެސްދިން ހިތާމަވެރި އިންޓަވިއުގައި ވަނީ ޚާމަނާއީ އަވަހާރަވެފައިވާކަން ރަސްމީކޮށް އިއުލާންކޮށްފައެވެ. އެޤައުމުގެ މަގުތަކަށް ނުކުމެ ގިނަބަޔަކު ހިތާމަފާޅުކުރަމުން އަންނައިރު އީރާނުން ބުނެފައިވަނީ ޚާމަނާއީ އަވަހާރަކޮށްލުމުގެ ބަދަލު ހިތިކޮށް ހިފާނެކަމަށެވެ. އަދި އީރާނުން ވަނީ ބަދަލުގައި ދެމުންދާ ހަމަލާތައް އިތުރަށް ވަރުގަދަކޮށްފައެވެ.
ޚާމަނާއީ އަވަހާރަވީ އުމުރުން 86 އަހަރުގައެވެ. ޚާމަނާއީގެ ދަރިކަނބަލުންނާއި ދަނބިދަރިކަލުންނާއި ކާފަ ދަރިކަލުންވެސް ވަނީ މިހަމަލާތަކުގައި ޝަހީދުވެފައެވެ. އަދި އެޤައުމުގެ އިންގިލާބީ ލަޝްކަރުގެ ވެރިޔާ ޖެނެރަލް މުހައްމައު ޕަކްޕޫރް އާއި އިސް މުޝީރު އަލީ ޝަމްޚާއީ ވެސް ވަނީ އަވަހާރަވެފައެވެ.
އާޔަތުﷲ ޚާމަނާއީ:
ޚާމަނާއީ އުފަންވެވަޑައިގަތީ 1939 ވަނަ އަހަރުގެ އޭޕްރީލްމަހުގެ 19 ވަނަ ދުވަހުގައެވެ. އީރާނުގެ ރޫހީ ލީޑަރުގެ ގޮތުގައި ޚާމަނާއީ މަސައްކަތްކުރައްވަން ފެއްޓެވީ 1989 ވަނަ އަހަރުގައެވެ. އީރާނުގެ ރޫހީ ލީޑަރަކީ އެ ޤައުމުގެ ސަރުކާރުގެ މައްޗަށް ފަހުބަސް ވިދާޅުވުމުގެ ބާރު ލިބިފައިވާ ފަރާތެވެ.
ޚާމަނާއީ ފާހަގަކުރެވިފައިވަނީ އީރާނުގެ ރަސްކަމުގެ ނިޒާމު ބަލިކަށިވަމުންދިޔައިރު މުޒާހަރާތައް އިންތިޒާމުކޮށް އިންގިލާބީ އެޖެންޑާއަށް ތާއީދު ހޯއްދެވުމަށް ފާޅުގައި މަސައްކަތްކުރެއްވި ބޭފުޅެއްގެ ގޮތުގައެވެ. ޚާމަނާއީ ވަނީ ޑިފެންސް މިނިސްޓަރުގެ ނައިބުގެ މަޤާމާއި މަޖިލިސް މެންބަރުކަންވެސް ކުރައްވާފައެވެ.
1989 ވަނަ އަހަރު އީރާނުގެ މަޖިލީހުން އެންމެ މަތީ ލީޑަރަކަށް ޚާމަނާއީ އައްޔަންކުރިއިރު، ސިޔާސީ ނިޒާމުގެ އެންމެ މަތީ މަޤާމު ރަސްމީކޮށް ލިބުނީ އެޤައުމުގެ ޤާނޫނު އަސާސީ އިސްލާހުކުރުމުންނެވެ.
އެމެރިކާއާއި ދެކޮޅު ވަރުގަދަ ސިޔާސަތެއް ގެންގުޅުއްވި
ޚާމަނާއީ ފާހަގަކުރެވިފައިވަނީ މަޑުމަޑުން ބާރުތައް ވަރުގަދަ ކުރައްވަމުންގޮސް އެމެރިކާއާއި އިޒްރޭލުން ޖެހިލުންވި ވަރުގަދަ ލީޑަރެއްގެ ގޮތުގައެވެ. ސަރަހައްދީ އިއްތިހާދުތައް ފުޅާކޮށް އެމެރިކާގެ ނުފޫޒާއި ދެކޮޅުކަން ހާމަކުރައްވައި ވަރުގަދަ ޚާރިޖީ ސިޔާސަތުތަކެއް ޚާމަނާއީ ގެންގުޅުއްވިއެވެ.
ޚާމަނާއީ އަވަހާރަކޮށްލުމަށް އެމެރިކާއާއި އިޒްރޭލުން ރާވަމުންދިޔަކަން އެނގިވަޑައިގެން ހުންނެވިއިރުވެސް ފަހުވަގުތާއި ހަމައަށްވެސް ހުންނެވީ ސާބިތުކަންމަތީގައެވެ. ރައްކާތެރި ހިސާބަކަށް ވަޑައިގެން ފިއްލެވުމަށް މަސައްކަތެއް ނުކުރައްވައެވެ. ޚާމަނާއީ ވަނި އީރާނުގެ ގިނަބައެއްގެ ލޯތްބާއި އިތުބާރު ހޯއްދަވާފައެވެ. ޚާމަނާއީ އަވަހާރަވުމުގެ ހިތާމައިގައި ޤައުމީ ޓީވީއިން އާންމުކުރި މެސެޖުންވެސް އެކަން ސާބިތުވެއެވެ.
ވޭތުވެދިޔަ 24 ގަޑިއިރު ތެރޭގައި އެމެރިކާއާއި އިޒްރޭލު ގުޅިގެން އީރާނުގެ 24 ޕްރިވިންސަކަށް ވަރުގަދަ ހަމަލާތަކެއް ދީފައިވާއިރު މި ހަމަލާތަކުގައި 200 އަށްވުރެ ގިނަ މީހުން ޝަހީދުވެ އެތައްބަޔަކު ވަނީ ޒަޚަމްވެފައެވެ. މީގެތެރޭގައި ގިނަ އަދަދެއްގެ ކުޑަކުދިންވެސް ހިމެނެއެވެ.
އީރާނަށް ދިން ހަމަލާތަކުގެ ބަދަލުގައި އީރާނުން ދަނީ އިޒްރޭލާއި އެމެރިކާއަށް އަމާޒުކޮށް މިސައިލް ހަމަލާތައް ދެމުންނެވެ. މިގޮތުން އިޒްރޭލުގެ ވެރިރަށް ޓެލްއަވީވަށް ވަނީ ހައިޕާސޮނިކް މިސައިލް ބޭނުންކޮށްގެން ވަރުގަދަ ހަމަލާތަކެއް ދީފައެވެ. އީރާނުން ހުއްޓުމެއް ނެތި ދެމުންދާ ހަމަލާތަކަށް ބިރުން އެތައް މިލިއަން މީހުން ރައްކާތެރިކަން ހޯދަމުންދަނީ އިޒްރޭލުގެ ބިންގަރާސްތަކުގައެވެ. އީރާނުގެ ހަމަލާތަކުގެ ސަބަބުން ރޯވި އަލިފާންގަނޑު ނިއްވާލުމަކީ އިޒްރޭލަށް ފަސޭހަކަމަކަށް ނުވިއެވެ. ޓެލްއަވީވުގެ ބޮޑު ސަރަހައްދެއް މިހަމަލާތަކުގެ ސަބަބުން ސުންނާފަތިވެފައިވާކަމަށް ރިޕޯޓުތައް ވަނީ ބުނެފައެވެ.
އަދި އެމެރިކާގެ އަސްކަރީ މަރުކަޒުތަކަށް އަމާޒުކޮށް އީރާނުން ދެމުންދާ ހަމަލާތައް ޤަތަރު، ކުވެއިތު، ބަހްރެއިން އަދި ސައުދީ އަރަބިއްޔާ އަށް ވެސް ވަނީ އަމާޒުވެފައެވެ. މި ހަމަލާތަކުގެ ސަބަބުން މެދުއިރުމަތީގެ ގިނަ ޤައުމުތަކުގެ ވައިގެ ސަރަހައްދުތައް ބަންދުކޮށް އެތައްހާސްބަޔަކު ވަނީ އެއާޕޯޓުތަކުގައި ތާށިވެފައެވެ. ގިނަ އަދަދެއްގެ ފުލައިޓުތައް ކެންސަލްވެ ވައިގެ ދަތުރުފަރުތަކަށް ވަނީ ހުއްޓުމެއް އައިސްފައެވެ.
ޚާމަނާއީ އަވަހާރަކޮށްލުމާއި ގުޅިގެން އީރާންގެ ހިންގުން ވަގުތީގޮތުން ހަވާލުކޮށްފައިވަނީ ރައީސް މަހްމޫދު ޕެޚެޝްކިއަން އާއި ދެއޮފިޝަލުން ހިމެނޭގޮތަށް ވަގުތީ ކޮމިޓީއަކާއެވެ. ޚާމަނާއި އަވަހާރަކޮށްލުމާއި ގުޅިގެން އީރާނުގައި ވަނީ ޤައުމީ ހިތާމައިގެ 40 ދުވަސް އިއުލާންކޮށްފައެވެ.
