ރަޙްމާ ހައިރާންވެގެން އަޔާނަށް ބަލަން ހުއްޓެވެ. އޭނާގެ ދަރިފުޅު ހަރުދަނާވެފައިވާ މިންވަރު އެނގޭނީ އޭނާއަށެވެ. އެއީ އޭނާ އެއްވެސްކަމެއް ނުޖައްސާ ބަލާބޮޑުކުރި ތުއްތުތުއްތު އަޔާނެއް ނޫނެވެ. މިހާރު އެއީ ވިސްނުންތެރިކަމާއި ހަރުދަނާކަމުގެ ނަމޫނާއެކެވެ. ރަޙްމާ ފެންކަޅިވީ އަޔާން ފުރާތީ ދެރަވެގެންނެއް ނޫނެވެ. މަންމައަކު ދަރިއެއްގެ ފަރާތުން ދެކެން ބޭނުންވާ ހުރިހާ ރަނގަޅު ސިފަތަކެއް އަޔާންގެ ހުރުމުންނެވެ. ރަޙްމާ އެއްޗެއް ބުންނަން އުޅުނެވެ. ހެޔޮދުޢާއަށް ދޫ އުފުލާލިއެވެ. ނަމަވެސް..
" އަހަރެން ހީކުރީ ދެތިން އަހަރުވީމާ އަޔާން ތި ވަޒީފާ ދޫކޮށްލާނެކަމަށް. އެކަމަކު އެހެނެއް ނޫން. ހަމަ ހިތަށް އެރިއިރަށް ތި ދަނީ ހަ މަހަށް ފުރައިގެން. ތީ ދެން ކޮން ސަކަރާތެއް އަޔާނު." ވާހިދު ހަޅޭއް ލަވައިގަތެވެ.
ރަޙްމާއަކަށް އެއްޗެއް ނުބުނެވުނެވެ. އޭނާގެ ފުރާނަފަދަ ލޯބިވާ ދަރިފުޅާއި އޭނާގެ ޒަމާންވީ ހަޔާތުގެ ބައިވެރިޔާ ދެމެދު ކުރެވެމުންދާ ހަނގުރާމައިގާ އޭނާ ވަނީ ފިތި ބާރުވެފައެވެ. ގޮތް ހުސްވެފައެވެ. އަރާނެކޮޅެއް ނޭނގިފައެވެ.
"މަންމާ، ހެޔޮދުޢާއަށް އެދެން. ހިތްހެޔޮ ކުރާތި." އަޔާން މަންމައަށް ބުނެލިއެވެ.
އަޔާން އިތުރު އެއްވެސް އެއްޗެއް ނުބުނެ މަޑުމަޑުން ނިކުމެގެން ދިޔައީއެވެ. މިއީ މިއަދު އޭނާގެ ވަޒީފާއެވެ. ބައްޕަގެ ނުރުހުމުން އޭނާއަށް ހިތާމަތަކެއް ލިބުނަސް މި ވަޒީފާއަކީ އޭނާ ނުހަނު ބޭނުންވެގެން ކުރާހިތުން ކުރާކަމެކެވެ. މިވަޒީފާގައި އޭނާކުރާ ކޮންމެ ކަމެއް ކުރަނީ ފުރިހަމަ އީމާނާއި ޔަޤީންކަމާއެކުގައެވެ. ބޭއްވޭ ކޮންމެ މުބާރާތަކުން ހަދާ ކޮންމެ ތަމްރީނަކުން އޭނާ ކާމިޔާބީގެ ހަރުފަތްތައް ގިރާކުރަމުން ދިޔައެވެ. މިވީ ފަސް އަހަރުތެރޭގައި އޭނާ ވަނީ އޮސްޓްރޭލިޔާއިން ތަޢުލީމް ޙާޞިލްކޮށްފައެވެ. އޮފިސަރަކަށް ބަދަލުވީ އޭނާގެ ވިސްނުންތެރިކަމާއި ހުށިޔާރުކަމުންނެވެ. ކަމަށް ކަމޭހިތުމާއި ކުރާ ކޮންމެކަމެއްގައި އޮތް ޝައުގުވެރި ކަމަކުންނެވެ. އޭނާއަށް ނުލިބުނީ ހަމައެކަނި ބައްޕަގެ ރުހުމެވެ. ބައްޕަގެ އެއްބާރުލުމާއި އޯގާތެރި ކަމެވެ. އޭގެ ބަދަލުގައި ސިފައިންގެ އާއިލާއިން އޭނާއަށް ލޯތްބާއި އިޙްތިރާމް އޮހެމުން ދިޔައެވެ.
އިރުވައި މޫސުމުގެ ހިތްގައިމު ދުވަހެކެވެ. އުޑުމަތީގައި ވިލާ ރޮއްޖެއްވެސް ނެތެވެ. އަޔާންގެ ފްލައިޓް ލ. ކައްދޫ އެއާޕޯޓަށް މަޑުކޮށްލިއެވެ. އޭނާއާއި އެކު ޒަމީރު އާދެއެވެ. ދުވަސްތަކެއް ފަހުން ރާއްޖޭގެ ރަށަކަށް އާދެވުމުން އަޔާންގެ ސިކުނޑިއަށް ސުލްޙަވެރި ކަމުގެ އިޙުސާސެއް ވިއެވެ. ފްލައިޓުން ފޭބުމަށްފަހު ވަށައިގެން ބަލާލިއެވެ. އަމާންކަމާއި ޤުދުރަތީ ރީތި ކަމެވެ. އަޔާނަށް ފުން ނޭވާއެއް ލެވުނެވެ.
"ސަރ.. އަނެއްކާ.. ލާމުން ގޮޅަރިހަ ކައިގެން މާލެދާހިތް ނުވެއްޖެއްޔާޔޯ...؟ ޒަމީރު އަޔާނާއި ދިމާކޮށްލިއެވެ.
"ގެއްލުންވާނީ ޒަމީރަށް. އަހަންނަށް ބޭނުންވަރަކަށް ތިބުނާ އެއްޗެއް ކެވިދާނެ. އެކަމަކު ޒަމީރު ވަރަށް ހާލުގަ އުޅެންޖެހޭނީ.. ނިދަންވެސް ޖެހޭނީ މަގުމަތީގަ ކަންނޭނގެ." އަޔާން ފަސޭހަ ކަމާއެކު ޒަމީރަށް ރައްދު ދިނެވެ. ދެމީހުން މަޑުމަޑުން ކުރިއަށް ހިނގައިގަތެވެ. ކުއްލިއަކަށް ޒަމީރު އަޔާންގެ ކޮނޑުގައި ޖެހިގަތެވެ. އަދި އަޔާންގެ އިންތިޒާރުގައި ތިބި މީހުން ދައްކާލިއެވެ. އެއީ މިވަގުތު ލ. އަތޮޅުގައި އިސްކޮށް ތިއްބެވި ސިފައިންގެ ބޭކަލުންނެވެ. އެމީހުން އަޔާނާއި ސަލާންކުރިއެވެ.
"މަރުޙަބާ" މާބޮނޑި ދިއްކޮށްލި ގްރޭޑް އެކެއްގެ ދަރިވަރު މަންހާ ހިނިތުންވެލިއެވެ.
"ޝުކުރިއްޔާ." ހަމަ އެފަދަ ހިނތުންވުމަކާއިއެކު އަޔާން މާބޮނޑީގައި ހިފިއެވެ.
މަންހާގެ ފަހަތުގައި ހުރި އަންހެންކުއްޖާ މަންހާގެ އަތުގައި ހިފާލިއެވެ. އަޔާނަށް އެ އަންހެން ކުއްޖާއަށް ބަލާލެވުނެވެ. ޒުވާންކަމާއި ރީތިކަމުގެ އެންމެހާ ސިފަތަކުން ތަރުތީބު ކުރެވިފައިވާ ފަތްމިންޏެކެވެ. ތޫނު ކަޅިރަވައަކާއި ތާޒާ ތުންފަތެކެވެ. ދިގުއިސްތަށިގަނޑު ހާމަޔަށް ދޫކޮށްލާފައިވާއިރު ވައިރޯޅީގެ ލާނެއް ހަރަކާތްތަކުން ވިހުރެމުންދާ އިސްތަށިގަނޑު އިރުއިރުކޮޅާ ރަނގަޅުކޮށްލައެވެ. އަޔާނަކަށް ދުވަހަކުވެސް މިހާ ރީތި އަންހެން ކުއްޖެއް ފެނިފައެއް ނުވެއެވެ. އޭނާގެ ތޫނު ނަޒަރު އެ އަންހެންކުއްޖާއާއި ވަކިވާގޮތެއް ނުވިއެވެ.
އެންމެ ބޮޑަށް އަސަރު ކުރީ ޒަމީރަށެވެ. އަޔާނާއެކު ހިނގަމުން ދިޔައިރު ހުއްޓުމެއްނެތި އެ އަންހެން ކުއްޖާއަށް ބަލަމުން ދިޔައެވެ. އަޔާނަށް އެކަން ފާހަގަ ވިއެވެ. މޫނު އަންހެން ކުއްޖާ ހުރި ދިމާއަށް އަނބުރައިގެން ބަލަމުން ބަލަމުން ކުރިއަށް ދިޔަ ޒަމީރު ބިއްލޫރި ގަނޑުގައި މޫނުޖެހިއްޖެއެވެ. ބާރު އަޑަކާއިއެކު ޒަމީޒު ބިންމައްޗަށް ވެއްޓިއްޖެއެވެ.
"އެކަމަކުވާ ޒަމީރު.. އަދި ތަންކޮޅެއް އަވަހެއްނޫންތަ ގޮޅަރިހަކާން.!" އަޔާން ހިނިގަނޑެއް ޖަހާލިއެވެ.
"އެއީ.. އެއީ ހާދަ ރީތި ކުއްޖެކޭ.." ޒަމީރު ކަޑަ ނުވާން ބުންޏެވެ. ހަގީގަތަކީ ޒަމީރު ހުރީ ވަރަށް ލަދުގަނެފައެވެ. އެހެންކަމުން އޭނާ ނޫންކަމަށް ހެދެން އުޅުނެވެ. އެކަމާ އަޔާންގާތަށް އައީ ނުލަފާ ހިންޏެކެވެ.
"އައްސަލާމް އަލައިކުމް. ކާރު އޮތީ ރެޑީގަ. ދެދުވަހެއްތެރޭގައި ސަރގެ ވެހިކަލް ފޮނުވާނެ." ޖޫނިޔަރ އޮފިސަރު ބުންޏެވެ.
އަޔާން އެ އޮފިސަރާއެކު ހިނގައިގަތެވެ. އެ އަންހެން ކުއްޖާވެސް މަންހާ ގޮވައިގެން ހިނގައިގަތެވެ. ވެހިކަލް ދާންޖެހޭ ގެއަށް ދެވެންދެން އަޔާން އިނީ ހިމޭނުންނެވެ. ރަށުގެ ރީތި މަންޒަރުތަކުން އޭނާގެ ހަމަޖެހުމަކަށް އެހީއެއް ނުވިއެވެ. އޭނާގެ ހިތުގައި ޖަޒުބާތުގެ ކޮޅިގަނޑެއް އުފެދިފައިވެއެވެ. ހިތުގެ އެންމެ ފުނުގައި އެ އަންހެން ކުއްޖާ ބިންވަޅު ނެގިއްޖެއެވެ. ނަމަވެސް އެއްވެސް މީހެއްގާތު އެއީ ކާކުތޯ އަހާލާނެ ހިތްވަރެއް އޭނާގެ ނެތެވެ. އެއީ އަނެއްކާ އެ ކުޑަކުއްޖާގެ ދައްތަ ބާވައެވެ؟ ނޫނީ މަންމަ ބާވައެވެ؟ ނޫނެކެވެ. އެއީ އެއަށްވުރެ ޅަ ކުއްޖެކެވެ.
"މިކަހަލަ ދަތުރުތަކުގައި މިކަހަލަ ވިސްނުންތަކުން ދުރުވާންޖެހޭނެ." އަޔާންގެ އަމިއްލަ ނަފްސަށް ބުނެވުނެވެ.
އަޔާނަށް ޖެހުނީ އަލަށް ވަޒީފާއަށް ގުޅުނު ކުދިންގެ ލ. އަތޮޅުގައި ނިންމަން ހަމަޖެހިފައިވާ ތަމްރީންތަކުގެ އެންމެހާ ކަންކަން ބަލަހައްޓާށެވެ. ޤައުމީ ދިފާޢުގެ ޚިދުމަތަށް ގުޅުނު 300 އެއްހާކުދިންގެ ހުރިހާކަމެއް ބެލެހެއްޓުމަކީ ބުރަ މަސްއޫލިއްޔަތެކެވެ. މިކަމުގެ ތެރޭގައި ލ. އަތޮޅުގެ ބައެއް ސްކޫލްތަކާއި ކައުންސިލްތަކާއި ގުޅިގެން އެތައްކަމެއް ކުރަން ހަމަޖެހިފައިވެއެވެ.
ފަތިސް ނަމާދު ކޮށްލައިގެން އަޔާން ނިކުތީ ބޭރަށެވެ. އޭނާ ވަށައިގެން ބަލާލިއެވެ. ފަޒާގައިވަނީ އާދަޔާޚިލާފް ހިމޭންކަމެވެ. ތާޒާކަމާއި ހިތްގައިމުކަމެވެ. އޭނާ ހުރީ އެކްޓިވިޓީ ކިޓްގައެވެ. ފަތިހުގެ ދުވުމުގައި ބައިވެރިވުމަށްޓަކައި އެންމެންގާތަށް އޭނާ ދިޔައެވެ. ތެޅެމުން ފޮޅެމުން ޒަމީރުވެސް އައިސް އަޔާނާއި އަރާ ހަމަކޮށްފިއެވެ.
"ކުޑަކޮށް ލަސްވީ ވަރުގަދަ ލަނޑެއް ލިބިގެން. އޮޅިގެން ފަތިސްނަމާދަށް އެރުނީ އަންހެނުން ނަމާދުކުރާ ބަޔަށް." ޒަމީރު ލަސްވި ސަބަބު ބުނެދިނެވެ.
"ތިޔައީ އޮޅިގެން ވީކަމެއް ނޫން." އަޔާން ބުންޏެވެ.
"ކީއްވެ ތިހެން ތިބުނީ..؟" ޒަމީރު ހެދި ދޮގު އަޔާނަށް ފަޅާއެރީކަން އެނގުމުން ނުބައިފާޑަކަށް ހިނިއަތުވެއްޖެއެވެ.
"ޒަމީރު ފަތިސް ނަމާދު ނުކުރާކަން މަށަށް އެނގޭ." އަޔާން ބުންޏެވެ.
ސަމާސާ ވާހަކަތަކުގައި ދުވަމުން ދަނިކޮށް އަނބު ގަހެއް ކައިރީ ޒުވާން ތިން އަންހެން ކުދިން ތިއްބެވެ. ދިގު ދަނޑިއަކުން އަނބު ބިންނަމުން ވަށިގަނޑަކަށް އަޅަމުން ދިޔައެވެ. އެކުދިންގެ އުފާވެރިކަމާއި މިނިވަންކަން ރަށުގެ އުފާވެރި ދިރިއުޅުން ހާމަކޮށްދެއެވެ. ދޭތެރެ ދޭތެރެއިން ޖަހާލާ ހިނގަނޑުގެ އަޑު އެމީހުންނާ ހަމައަށްވެސް ފޯރަން ފަށައިފިއެވެ.
ނުނިމޭ
