މެންދުރުގެ އެންމެ ހޫނުގަދަ ވަގުތެވެ. މާލޭގެ މަގުމަތި ހަލަބޮލި ވެފައިވާނީ ކޮންމެ މީހެއްގެވެސް އަވަސް ހަރަކާތްތަކުންނެވެ. ސްކޫލުތަކަށް ކުދިން ގެންދިއުމަށް އަވަދިނެތި އުޅޭ ބެލެނިވެރިންގެ ހަލުވިކަމުންނެވެ. މުދާ އުފުލަމުންދާ އުޅަނދުތަކުގެ ދޭތެރެއިން ދެމިގަނެގެންދާ ސައިކަލުތަކުންނެވެ. މި ހަލަބޮލި މާހައުލުން އަޔާންމެންނަކަށް މާބޮޑު އަސަރެއް ކުރާހެނެއް ހިޔެއް ނުވެއެވެ. މަޖީދިއްޔާގެ ގްރޭޑް 12 ގައި ކިޔަވަމުންދާ އަޔާން ބްރޭކް ނިންމާލުމަށްފަހު ސްކޫލާ ދިމާއަށް މިސްރާބު ޖަހާފައިވެއެވެ. އޭނާގެ އެންމެ ގާތް އެކުވެރިޔާ ފަޔާޒާއިއެކު ޚިޔާލެއް ފިކުރެއްނެތިއެވެ.

ކުއްލިއަކަށް އިވުނު ބާރު އަޑުފަށްގަނޑާއެކު އަޔާނުގެ ކަންފަތުގައި އަތްއެޅުނެވެ. މަގުމަތީގައި ތިބިމީހުންވެސް އެއަޑަށް ހުއްޓުން އެރިއެވެ. ދެންއައީ ބިރުވެރިކަމުގެ ސުކޫތު ކޮޅުތަކެކެވެ. ހީވީ އަޔާންގެ ހިތުގެ ތެޅުމުގެ އަޑު ޚުދު އޭނާއަށްވެސް އިވޭހެންނެވެ. މާހައުލަށް ވެރިވެފައިވަނީ އެހާމެ ފުން ހިމޭންކަމެކެވެ. އެންމެންވެސް ތިބީ ފާޑަކަށް ގަނޑުވެފައެވެ. އިވުނު އަޑުފަށްގަނޑުގެ ބާރުކަމުން ފާޑަކަށް ޝޮކެއްގައެވެ. އެންމެންވެސް އަޑުއައި ދިމާއިން އުޑާދިމާއަށް ބަލާލެވުނެވެ. ސަލްޓަން ޕާކާއިދިމާ މަތިން ކޮތަރުތައް އުދުހިގަތެވެ. ބޯ ދުންގަޑެއް އެދިމާ ތިރިން ޖައްވަށް ފެތުރެނީއެވެ.

"މިއީ އާދަޔާޚިލާފް ކަމެއް." މީހަކު ހަޅޭއްލަވައިގަތެވެ.

Advertisement

"ކޮންމެވެސް އެއްޗެއް ގޮވީ.." އެހެން މީހަކު ހަޅޭއްލަވައިގަތެވެ.

އެ އަޑަށް އަޔާނަށްވެސް ހޭވެރިކަން އައި ކަހަލައެވެ. މީހުންގަނޑު ކޮޅުކޮޅަށް ދުވަންފެށިއެވެ. އާދައިގެ މަތީން ވާނުވާ ބެލުމަށެވެ. އަޔާންވެސް މީހުން ދުވަމުންދާ ދިމާކަމަށްވާ ސަލްޓަންޕާކާއި ދިމާއަށް މިސްރާބު ޖެހިއެވެ. ފަޔާޒުވެސް ފަހަތުން ދުއްވައިގަތެވެ. އަލިފާނުގެ ހުޅުގަނޑު އެމީހުންނަށް ފެނުނީ ޕާކާއި ދިމާއިންނެވެ. އަނެއްކާވެސް ކުރިން އިވުނު ކަހަލަ ބާރު އަޑެއް އިވުނެވެ. މިފަހަރު އެއަށްވުރެ ބާރަށެވެ. ހީވީ ބިންގަޑު ގުޑައިގެން ދިޔަ ހެންނެވެ. ގޭގޭގެ ކުޑަދޮރުތައް ފުނޑުފުނޑުވެގެން ފޭބިއެވެ. އަޔާނަށް ކަންފަތުގައި އަތް އެޅުނެވެ. އޭނާ ބިމަށް ތިރިވެވުނީ ބޭ އިޚްތިޔާރުގައެވެ. ހީވީ އޭނާއާއި ނުހަނު ގާތުން އިވުނު އަޑެއްހެންނެވެ.

"ސަލްޓަން ޕާކުގައި ބޮން ގޮވަނީ.." މީހަކު ރޮއި ހޭރެމުން ދުވަމުން އަޔާންމެންނާ ދިމާއަށް އައެވެ.

"މުޅިތަނުގައި ލޭ އޮހޮރެނީ.." އަންހެނަކު ކުޑަކުއްޖެއްގެ އިނގިލީގައި ހިފަހައްޓައިގެން ދުވަމުން ދެއެވެ.

"ގިޔާމަތް ވަނީތަ؟" މުސްކުޅި ދައިތައަކު ރޮއިގަތެވެ.

އެންމެންވެސް ބިރުން ތެޅެނީއެވެ. މައިން އެމީހުންގެ ދަރިން ގަޔާލާ ބޮނޑިކޮށްގެން ރޮނީއެވެ. އެއްބަޔަކު ދުވަނީ ދުރަށެވެ. އަޔާން ބޭނުންވީ ވީގޮތް ބެލުމަށެވެ.

އަޔާންމެންނަށް ސެންޓްރަލް ޕާކާއި ހިސާބަށް ނުދެވެނީ ހުއްޓެން މަޖުބޫރުވިއެވެ. ދިވެހި ސިފައިން ޕާކުގައި ހަރަކާތްތެރިވަމުން ދަނީއެވެ. އަނދަމުންދާ އަލިފާންގަޑު އަޔާނަށް ފެނުނެވެ. އިސާހިތަކު ފުލުހުންގެ އަލިފާން ނިއްވާ ވެހިކަލުން އެ އަލިފާންގަނޑު ނިއްވާލިއެވެ. ހީވެސް ނުކުރާހާ އަވަހަށް މުޅި ސަރަހައްދު ފުލުހުންގެ ބެލުމުގެ ދަށަށް ގެނެސްފިއެވެ.

"ހާދަ އަވަހޭ ސިފައިން ހަރަކާތްތެރިވިލެއް..." އަޔާނަށް ހައިރާންކަމާއިއެކު ބުނެވުނެވެ.

އަޔާން ޝައުގުވެރިކަމާއެކު ސިފައިންގެ ހަރަކާތްތަކަށް ބަލަން ހުރެވުނެވެ. ލެއިން ކަޅިވެފައިވާ ދެ މީހަކު އެންބިއުލަންސަށް ލީތަނެވެ. އެ ދެމީހުންވެސް ވަނީ ވަރަށް ބޮޑަށް ޒަޚަމް ވެފައެވެ. އާދައިގެމަތީން ކަން ބެލުމަށްޓަކައި މީހުންތައް އެދިމާއަށް ޖަމާވަމުން ދެއެވެ. އަޔާން ކަޅިޖަހާނުލާ މީހުން ދުރަށް ޖައްސަމުން، ޖައްސަމުންދާ ސިފައިންނަށް ބަލަން ހުއްޓެވެ. އޭރު  އަވަސް ހަރަކާތްތަކާއިއެކު ފުލުހުންނާއި ގުޅިގެން ސިފައިން މުޅި ޕާކު ސަރަހައްދުގެ ކޮންޓުރޯލް ނަގަނީއެވެ. އިސާހިތަކު ފުލުހުން ބޭނުން ގޮތަކަށް މުޅިތަން ހިސޯރުކޮށްފިއެވެ. އަދި ފަރުވާތެރިކަމާއެކު މުޅިތަން ބަލަހައްޓަމުން ދިޔައެވެ. އަޔާނަށް އެންމެ ޝައުގުވެރިކަމެއް ދެވުނީ ދެމީހެއްގެ އަތުގައި ސިފައިން ބިޑިއަޅުވައިގެން ގެންދިޔަ މަންޒަރެވެ.  

"ވަރަށް ފައްކާ.. ދިވެހި ސިފައިން ހަމަ ވަރަށް ހުނަރުވެރި.. ފަޔާ ބަލަން ހުންނާތި! އަހަރެން އަދި އެ ޔުނީފޯމު ލާނަން."  އަޔާނަށް ބުނެވުނެވެ.

"އަހަރެން މިހުރީ ބަލަން. އަޔާންގެ ބައްޕަ ދުވަހެއްގެ ކޮޅުންވެސް އަޔާނަކަށް ތިކަން ވިޔަކަ ނުދޭނެ." ފަޔާޒު ޔަގީންކަމާއެކު ބުންޏެވެ.

**********

ފަތިހުގެ ފިނިރޯޅިން ޖައްވަށް ވެރިވެފައިވަނީ ތާޒާ ކަމެވެ. ދޭތެރެ ދޭތެރެއިން ދުއްވާ އެއްޗެއްގެ އަސަރެއް ވިޔަސް މުޅި މަގުމަތީގައި ވަނީ ހިމޭންކަމެވެ. މަޑިމަސް ވަކަރުގަހުގެ ފޮޅިފައިވާ މަޑު ދަނބުކުލައިގެ މާތަކުން ފަރިވެފައިވާ ހުޅުމާލޭގެ ރީތިކަމެވެ. މަގުގެ އަރިމަތީގައި ހުރި ކަނީރު ގަސްތަކުގެ ގަދަ ފިޔާތޮށި މާތަކާއި އެކުވެގެން ހުރި ގުލޭނޫރަންމާ ގަސްތަކުގެ ފޮޅިފައިވާ މާތަކުގެ މީރުވަހެވެ.

"ހުޅުމާލެ ހަމަ ތަފާތީ.." ދުވަމުން އަންނަ ޒުވާނާއަށް ބުނެލެވުނެވެ. 

ހުޅުމާލެ ކޯސްޓްގާރޑް ބިލްޑިންކައިރިއެވެ. ހެދިހުރި އިސްކޮޅާއި ރޫފަ ރަނގަޅު ޒުވާނެކެވެ. ތަނަވަސް ބައިމައްޗާއި ކަސްރަތީ ހަށިގަނޑެކެވެ. އެ ޒުވާނާ ދުވުން ނިންމާލިއެވެ. ގުދުވެލާފައި ބޫޓުގެ ނާޑުވާ އައްސާލިއެވެ. އޭނާ ލައިގެން ހުރީ ސިފައިންގެ ޔުނީފޯމެވެ. ކުރީގައި ދުވަމުން ދިޔަ ޖޫނިޔާ ސިފައިންނަށް އޭނާ ބަލާލިއެވެ. އަދި ހިނިތުންވެލިއެވެ. އޭނާ ތެދުވެ އަނެއްކާވެސް ދުވަން ފެށިއެވެ. ހަލުވި ދުވެލީގައި ދުވުން ނިންމާ ރޮނގަށް އެންމެ ފުރަތަމަ އެރުނީ އެޒުވާނާއަށެވެ.  

"މަރްޙަބާ ސަރ." ދުވުން ނިމުމާއެކު އެންމެންހެން އައިސް އެ ޒުވާނާއާއި ސަލާން ކޮށްލިއެވެ.

"ސަރ.. ފޯނެއް." ޖޫނިޔަރ ސިފައިންގެ ކުއްޖަކު އައިސްއެ ޒުވާނާއަށް ފޯނު ދިނެވެ. އޭނާ އެންމެންނާ ދުރަށް ޖެހިލިއެވެ. އަދި ފޯނު ނަގާ ޖަވާބުދިނެވެ.

"އަޔާން. މި އަންނަ ހަފްތާ ލ. އަތޮޅަށް ފުރަން ތައްޔާރުވޭ. މިފަހަރު އޮޕަރޭޝަން އޮތީ ލ. އަތޮޅުގައި. އިސްކޮށް ހުންނާނީ އަޔާން." އެޗް.ކިއުއިން ވާހަކަދެއްކި އޮފިސަރު ބުނުއްވިއެވެ.

"އާދެ. ސަރ" އަޔާން ފޯނު ބޭއްވިއެވެ.

އަޔާން ދަތުރުހެދުމަށްޓަކައި އަވަހަށް ގެއަށް ދިޔައެވެ. އޭނާ ހުރީ ވަރަށް އުފަލުންނެވެ. ނަމަވެސް އެއީ ހިނދުކޮޅެއްގެ އުފާވެރި ކަމެކެވެ. މޫނުމަތީގައި ހުރި އުފާވެރިކަން ގެއަށް ދެވުމާއެކުހެން ގެއްލިއްޖެއެވެ. ސިޓިންރޫމް ހުރަސް ކުރިއިރު ސޯފާގައިއިން ބައްޕަ ފެނުމުން އޭނާގެ ހިތް ހުއްޓުން ކަހަލައެވެ. ކުރިއަށް އެޅި ފިޔަވަޅު ހުއްޓި ދެފައި ގަނޑުވި ކަހަލައެވެ. ބައްޕަ އަޔާނާއި ވާހަކަ ނުދައްކާތާ އަމްދުން ބަލާނުލާތާވެސް ތިން އަހަރު ވީއެވެ. އެ ދެބަފައިންގެ މެދުގައި އުފެދެމުންދިޔަ ނުރުހުންތެރިކަން ނަފްރަތަށް ބަދަލުވެފައިވާ ކަހަލައެވެ.

ނުނިމޭ