ތަޤުވާވެރިވުމަކީ މާތް ﷲގެ އެންމެހައި އަމުރުފުޅުތަކަށް ކިޔަމަންވެ އެކަލާނގެ ނަހީކުރެއްވި އެންމެހައި ކަންކަމުން ދުރުހެލިވުންކަމުގައި ދަންނާށެވެ.
މައްސަރުތަކުގެ ތެރެއިން ރަމަޟާންމަސް އެތައް ގޮތަކުން މާތް ﷲ މާތްކުރައްވައި މަތިވެރިކުރެއްވިއެވެ. އޭގެ ތެރޭގައި އެމައްސަރުގައި ކީރިތި ޤުރުއާން ބާވައިލެއްވުމާއި ޚާއްސަ އަޅުކަމެއް އެމަހުގައި ފަރުޟު ކުރައްވައިފައިވުން ހިމެނެއެވެ. އަދި އެ މައްސަރުގައި ކުރާ ހެޔޮކަންކަމަށް މަތިވެރި ޖަޒާދެއްވުން ވެސް ހިމެނިފައިވެއެވެ.
ތަޢުބާވުމަކީ ކޮންމެ މީހަކު ވެސް އެމީހަކަށް ކުރެވިފައިވާ އެންމެހައި ފާފައިން އެއްކިބާވެ، އެ ކަންކަން ކުރެވުނު ކަމާމެދު ދެރަވެ ހިތާމަކޮށް، އެކަމަށް އަރައިނުގަތުމަށް ޢަޒުމު ކަނޑައަޅައި ފާފަފުއްސެވުން އެދި އިޚުލާސްތެރިކަމާއެކު މާތްﷲގެ ޙަޟުރަތުގައި ދުޢާ ދެންނެވުމެވެ. މީހެއްގެ ޙައްޤަކަށް އަރައިގަނެވިފައިޥާނަމަ އެ ޙައްޤު އަދާކުރުމާ އެކުގައެވެ. ކުރެވުނު ފާފައަކީ ކުޑަ ފާފައަކަށް ވިއަސް ނުވަތަ ބޮޑުފާފައަކަށް ވިއަސް އެ ފާފައަކަކުން ތައުބާވާންޖެހޭނެއެވެ.
ފާފައިން ތައުބާވުމަށް އިރުޝާދުދެއްވައި މާތްﷲ ވަހީކުރައްވައިފައިވެއެވެ. މާނައީ: "ކަލޭގެފާނު ވިދާޅުވާށެވެ. އެއުރެންގެ އަމިއްލަ ނަފްސުތަކުގެ މައްޗަށް ފާފައިން އިސްރާފުކޮށްފައިވާ ތިމަންރަސްކަލާންގެ އަޅުތަކުންނޭވެ. ތިޔަބައިމީހުން ﷲ ގެ ރަހުމަތުން އުންމީދު ކަނޑައިނުލާށެވެ. ހަމަކަށަވަރުން ﷲއީ އެންމެހައި ފާފަތައްފުއްސަވާ ރަސްކަލާނގެއެވެ. ހަމަކަށަވަރުން އެކަލާނގެއީ ގިނަގިނައިން ފާފަފުއްސަވާ ރަހީމްވަންތަ ރަސްކަލާނގެއެވެ".
ރަމަޟާންމަހަކީ ސުވަރުގެތަކުގެ ދޮރުކޮޅުތައް ހުޅުވިފައިވާ މައްސަރެވެ. އަދި ނަރަކައިގެ ދޮރުތައް ބަންދުވެފައިވާ މައްސަރެވެ. އެކަމަށް އިޝާރާތްކުރައްވައި ރަސޫލުﷲ ﷺ ހަދީޘްކުރައްވައިފައިވެއެވެ.
މާނައީ: " ރަމަޟާންމަހުގެ ފުރަތަމަ ރޭ ޝައިތާނުންނާއި ޖިންނީންގެތެރެއިން މާރިދުން ކަސްތަޅުއެޅުއްވޭނެތެވެ. އަދި ނަރަކައިގެ ދޮރުތައް ބަންދުކުރެއްވޭނެތެވެ. އޭގެ ތެރެއިން އެއްވެސް ދޮރެއް ނުހުޅުއްވޭނެތެވެ. އަދި ސުވަރުގޭގެ ދޮރުކޮޅުތައް ހުޅުއްވޭނެތެވެ. އޭގެތެރެއިން އެންމެ ދޮރުކޮޅެއްވެސް ބަންދެއްނުކުރެއްވޭނެތެވެ. އަދި ގޮވައިލާ ބޭކަލަކު ގޮވައިލައްވާނެތެވެ. އޭ ހެޔޮކަމަށް އެދޭ މީހާއެވެ. އެކަމަށް ކުރިމަތިލައި އަންނާށެވެ. އޭ ނުބައި ކަންތައްތަކަށް އެދޭ މީހާ އެވެ! ތިޔަ ކަންތައްތައް ހުއްޓައިލާށެވެ. މާތްﷲ ރޯދަމަހު އެކަލާނގެ އަޅުތަކުންގެ ތެރެއިން ނަރަކައިން މިންޖުކުރައްވާނެ ބަޔަކު ވާނެތެވެ. އެއީ ރޯދަމަހުގެ ކޮންމެ ރެއެއްގައެވެ".
މުސްލިމް އަޚުންނޭވެ. މާތް ﷲ މިމައްސަރުގައި ނަރަކައިން މިންޖުކުރައްވާ އަޅުންގެތެރެއިން ލެއްވުން އެދި ދުޢާކުރާށެވެ.
މައުލޫމާތު: ހުކުރު ޚުޠުބާ
