މާތް ﷲގެ އަޅުތަކުންނަށް ޖެހޭ ބޭނުންތައް ފުއްދައިދީ އެއުރެންނަށް ޖެހޭ ބޮޑެތި ކަންކަމުގައި މިއަދު އެހީތެރިވުމަކީ މާދަމާ (އާޚިރަތްދުވަހުން) ތިޔަބައިމީހުން އުފުލާންޖެހޭ ބޮޑެތި މުސީބާތްތަކުން ދިންނަވާނޭކަމެކެވެ. ކޮންމެ މުސްލިމަކުވެސް މިއަދު އަވަސްވެގަންނާންވީ އެ ދުވަހުގެ ބިރުވެރިކަމާއި އަޒާބުން މިންޖުވާނޭ އަމަލެއް ކުރެވޭތޯއެވެ. އެކަން ކުރެވެން އޮތީ މިއަދުކަމަށް ވާތީއެވެ.
މާތް ނަބިއްޔާ ﷺ ހަދީޘްކުރައްވައިފައިވެއެވެ. މާނައީ: "ތިމާގެ އަޚާގެ ބޭނުންތައް ފުއްދައި ދިނުމުގައި ދެމިހުންނަ މީހާގެ ބޭނުންތައް ފުއްދައި ދެއްވުމުގައި ﷲ ދެމިވޮޑިގެންވެއެވެ. ދުނިޔޭގައި މުސްލިމެއްގެ ކިބައިން މުސީބާތެއް ދުރުކޮށްފި މީހަކަށް ޤިޔާމަތް ދުވަހުގެ މުސީބާތްތަކުގެ ތެރެއިން މުސީބާތެއް ﷲ ދުރުކޮށްދެއްވާނެއެވެ". މިއީ ކިހާ އުފާވެރި ޚަބަރެއްހެއްޔެވެ. މުސްލިމުން އަބަދުވެސް ކުރިއަށްދާންވީ އެބައިމީހުންގެ އަޚުންނަށް ދިމާވާ ދަތިތަކާއި މުސީބާތްތައް ކުޑަކޮށްދިނުމަށެވެ. މިދުނިޔޭގެ ދަންފަޅި ހަމަކުރާންވީ މިފަދަ އަމަލުތައް ކުރުމުގައެވެ.
ލޭ އަޅާން ބޭނުންވާ ހާލަތްތަކުގައި ބަލިމީހަކަށް އަޅާން ބޭނުންވާ ލޭ ހަދިޔާކޮށްދިނުމަކީ، އޭނާގެ ފުރާނަ ސަލާމަތްކޮށްދިނުން ފަދަ ކަމެކެވެ. ހަމަ އެންމެ އިންސާނެއްގެ ފުރާނަ ސަލާމަތްކޮށްދިނުމަކީ ކިހައި ވަރެއްގެ އަޖުރަކާއި ސަވާބެއް ހުރި ކަމެއްކަން ތިޔަބައިމީހުން ދަންނަމުހެއްޔެވެ؟ ޙައްޤަކާ ނުލައި އެންމެ މީހަކު މެރުމަކީ، ދުނިޔޭގައި ވާހައި ބަޔަކު މެރުން ފަދަ ނުބައިކަމެކެވެ. ހަމަ އެފަދައިން އެންމެ މީހެއްފެ ފުރާނަ ސަލާމަތްކޮށްދިނުމަކީ އެ އެންމެން ނުމަރައި ދިރިތިބޭން ދޫކޮށްލުން ފަދަ ހެޔޮކަމެކެވެ.
ބަލިމީހެއްގެ ހަށިގަނޑަށް އަޅާންޖެހޭ ލޭ ނުލިބުމަކީ އޭނާ ދުނިޔެ ދޫކޮށްފާނޭ ކަމެކެވެ. އަދި އޭނާގެ ހަށިގަނޑަށް އަޅާން ބޭނުންވާ ލޭ ހަދިޔާކުރުމަކީ އޭނާއަށް ދުނިޔޭގައި ދިރިހުރުމުގެ ފުރުސަތު ހޯދައިދިނުމަށްޓަކައި ކުރެވޭ ހެޔޮކަމަކަށް ނޫނީ ނުވާނެއެވެ.
މިއަދު ދިވެހިރާއްޖޭގެ ބުލަޑުބޭންކުތައް ވަނީ ލޭހަދިޔާކުރާނެ މީހުންނަށް ބޭނުންވެފައެވެ. ހަދިޔާކުރާ ލެއަކީ މީހެއްގެ ފުރާނަ ސަލާމަތްވުމުގެ ސަބަބަކަށްވެއްޖެނަމަ ލިބޭނޭ ސަވާބާއި ދަރުމައާމެދު ވިސްނާލާށެވެ.
