ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުގެ ފުރަތަމަ ބޯހިޔާވަހިކަމުގެ މަޝްރޫޢުގެ ދަށުން ދޫކުރާ ގޯއްޗާއި ފުލެޓަށް ކުރިމަތިލާން ފޯމު ހުށަހެޅުމުގެ ފުރުސަތު ހުޅުވާލީ މިއަދުއެވެ.
ގޯއްޗަށް އެދި ހުށަހެޅުމުގެ ސުންގަޑި އަކީ 4 މާރިޗް 2026 އެވެ.
ފުލެޓަށް އެދި ހުށަހެޅުމުގެ ސުންގަޑި އަކީ 17 އޭޕްރީލް 2026 އެވެ.
ސަރުކާރުގެ ބޯހިޔާވަހިކަން އެންމެނަށް ސިޔާސަތުގެ "އާއިލީ ބޯހިޔާވަހިކަން" ޕްރޮގްރާމްގެ ދަށުން މާލޭގައި ދިރިއުޅޭ ރައްޔިތުން މި މަޝްރޫޢަށް އެޕްލިކޭޝަން ހުށަހަޅަން ޖެހޭނީ 'ބޯހިޔާވަހިކަން ޕޯޓަލް' މެދުވެރިކޮށެވެ.
މާލޭގެ ރަށްވެހިންނަށް 4،000 ފްލެޓް
މާލޭގައި ރަށްވެހިވެފައިނުވާ މާލޭގައި ދިރިއުޅެމުންދާ ފަރާތްތަކަށް 1،500 ފްލެޓް
800 ފްލެޓް ކަނޑައަޅާފައިވަނީ ދައުލަތުގެ އެކި މުއައްސަސާތަކާއި ފުލުހުންނާއި ސިފައިންނަށެވެ. އަދި އެކަނިވެރި މައިންނާއި ބަފައިންގެ އިތުރުން މަސްވެރިންނާއި ޓޫރިޒަމް ދާއިރާގައި މަސައްކަތްކުރާ މީހުންނާއި ޓެކްސީ ޑްރައިވަރުންނަށް ވެސް ވަނީ ފްލެޓު ޚާއްސަކޮށްފައެވެ.
15،000 ގޯތި ދޫކުރުމަށް ހަމަޖެހިފައިވާއިރު މި ގޯތިތައް ދޫކުރަނީ ދެ ކެޓަގަރިއަކަށް ބަހާލައިގެންނެވެ.
"ކޮންމެ ބޭފުޅަކަށްވެސް އީފާސް އެކައުންޓުން ލޮގިން ކުރެއްވުމުން ބޭނުންވާ ސްކީމް އިހްތިޔާރު ކުރެވޭނެ. ސްކީމަށް ޝަރުތު ހަމަވޭތޯ ބެލޭނެ. އެހެންވުމުން ޝަރުތުހަމަވާ ފަރާތްތަކުން އެކަނި ކުރިމަތިލުމަށް އެދެނީ. އެޕްލިކޭޝަން ސަބްމިޓް ކުރުމުން ލިޔުމެއް އީމެއިލް އަދި ޕޯޓަލް މެދުވެރިކޮށް ލިބޭނެ. މި ލިޔުމުގައި ލިބުނު ޕޮއިންޓު ތަފްސީލް ހިމެނޭނެ. އެއްވެސް އެޕްލިކޭޝަނެއް ކެންސަލް ކުރުމުގެ ފުރުސަތެއް ނުދެން. ފޯމު ފުރިހަމައަށް ފުރާ ލިޔެކިޔުންތަކާއެކު ސަބްމިޓް ކުރުމަށް އިސްކަންދޭންވީ. އަވަހަށް ސަބްމިޓް ކުރުމަކުން އަވަހަށް ފޯމު ހުށަހެޅުމުން ލިބޭނެ ފައިދާއެއް ނޯންނާނެ" މިނިސްޓަރ އޮފް ކޮންސްޓްރަކްޝަން ހައުސިންގ އެންޑް އިންފްރާސްޓްރަކްޗަރ ޑރ. އަބްދުﷲ މުއްތަލިބު ވިދާޅުވިއެވެ.
