ޓީބީ އާއި ގުޅޭގޮތުން ހެލްތު ޕްރޮޓެކްޝަން އެޖެންސީއިން އާންމުކޮށްފައިވާ މައުލޫމާތަށް ބަލާއިރު ޓީބީ އަކީ ގަވާއިދުން ފަރުވާ ކުރެވިއްޖެނަމަ މުޅިން ފަސޭހަކުރެވޭނެ ބައްޔެކެވެ. ޓީބީ އަށް ދެވޭ ފަރުވާ އަކީ މަދުވެގެން 6 މަސް ދުވަހުގެ މުއްދަތަށް ދެވޭ ފަރުވާއެކެވެ. އެއްވެސް އަލާމާތެއް ނެތި ހަށިގަނޑުގައި ޓީބީގެ ޖަރާސީމު ހުންނަ ފަރާތްތަކަށް (ލޭޓަންޓް ޓީބީ) ވެސް ޓީޕީޓީ ނުވަތަ ބަލިޖެހުމުން ރައްކާތެރިވުމަށް މަދުވެގެން 3 މަހުގެ ފަރުވާ ދެވޭނެއެވެ.
ޓީބީ އަކީ ކޮބާ؟
ޓީބީ އަކީ މައިކޯބެކްޓީރިއަމް ޓިއުބަރކިއުލޯސިސް ކިޔާ ބެކްޓީރިއާއެއްގެ ސަބަބުން ޖެހޭ ބައްޔެކެވެ. މި ބަލި އެންމެ އާންމުކޮށް ޖެހެނީ ފުއްޕާމެއަށް ނަމަވެސް، ހަށިގަނޑުގެ އެހެން ގުނަވަންތަކަށްވެސް މި ބަލި ޖެހެއެވެ.
ޓީބީގެ އަލާމާތްތަކަކީ ކޮބާ؟
- ހުންއައުން
- ވަރުދެރަވުން
- ހީކެރުވުން އަދި ރޭގަނޑު އާދަޔާޚިލާފަށް ދާހިއްލުން
- މޭގައި ރިއްސުން އަދި ކެއްސާފައި އަންނަ ދަވާގައި ލޭ ހުރުން
- ކުއްލިއަކަށް ބަރުދަން ލުއިވުން
- 2 ހަފްތާއަށްވުރެ ގިނަ ދުވަސްވަންދެން ކެއްސުން
ޓީބީ ފެތުރެނީ ކިހިނެއް؟
ހަށިގަނޑުގެ އެހެން ގުނަވަންތަކަށް ޖެހޭ ޓީބީ ގައިންގަޔަށް ނާރައެވެ. ފުއްޕާމެއަށް ޖެހޭ ޓީބީ ގައިންގަޔަށް އަރައެވެ.
ޓީބީ ބަލި ގައިންގަޔަށް އަރަނީ ފުއްޕާމެއަށް ޓީބީ ބަލިޖެހި ކުޅުން ބެކްޓީރިއާ ފެންނަ ބަލި މީހުންގެ ފަރާތުން އެކަނިއެވެ. މިގޮތުން ފުއްޕާމޭގެ ބަލި ޖެހިފައިވާ މީހުން ކެއްސާ، ކިނބިހި އަޅާއިރު ވައިގެ ތެރެއަށް ބޭރުވާ ޓީބީ ބަލި ފަތުރާ ބެކްޓީރިއާ އެހެން މީހުންގެ ނޭވާލާ ނިޒާމުގެ ތެރެއަށް ވާސިލްވެގެންނެވެ.
ފަރުވާ ކުރާނީ ކިހިނެއް؟
ފުއްޕާމޭގެ ބަލި ޖެހިފައިވާ މީހަކު ގަވާއިދުން ބޭސް ކާން ފަށައިފިނަމަ 2-4 ހަފްތާ ތެރޭގައި ކުޅުން ފެންނަ ޓީބީ ބެކްޓީރިޔާ އެއްކޮށް މަދުކުރެވިދާނެއެވެ. އަދި މިފަދަ މީހެއްގެ ފަރާތުން އެހެން މީހުންނަށް ބަލި ފެތުރުމުގެ ފުރުސަތު ކުޑަވެއެވެ.
ޓީބީ ބޭސް ކާންވާނީ ސިއްހީ އެހީތެރިއެއްގެ ސީދާ ބެލުމުގެ ދަށުންނެވެ.
ބަލީގެ ފަރުވާ ކަނޑައެޅިފައިވާ ގޮތަށް ފުރިހަމަ ނުކުރެވިއްޖެނަމަ ބަލީގެ ނުރައްކާ ބޮޑުވެ ބޭހަށް ނުގުޑާ ޓީބީ ޖެހުމުގެ ފުރުސަތު އޮވެއެވެ.
ރައްކާތެރިވުމަށް ކުރެވިދާނެ ކަންތައް:
ޓީބީ ޖަރާސީމު ހުރިކަން ނުވަތަ ނޫންކަން ޔަގީން ކުރުމަށް ޓީބީއަށް ޓެސްޓުކޮށް ޓީބީ ބަލި ހުރިކަމުގައިވާނަމަ އަވަހަށް ފަރުވާ ފެށުން
ކެއްސާ ކިބިހި އަޅާއިރު އަނގަޔާއި ނޭފަތް ރަނގަޅަށް ނިވާކުރުން
ހާމަ ތަންތަނަށް ކުޅު ނުޖެހުން
ބަލި ޖެހިފައިވާ މީހަކު ގޭގައި ދިރިއުޅޭނަމަ ސާފު ވައި ދައުރުވާހެން ބެހެއްޓުން
