ޒީޓައިމްސް އުފެދިގެން އައީ އިޖުތިމާއީ ޚިދުމަތުގެ މުހިންމު ބައިވެރިއެއްގެ ގޮތުގައި 2021 ވަނަ އަހަރު ޖެނުއަރީ މަހުގެ 10 ވަނަ ދުވަހުގައެވެ. އެތައް ހާސް ފޮލޯވަރުންނާއި ހަމައަށް ޒީޓައިމްސް ގެނެސްދިނުމުގައި، ޒީޓައިމްސްގެ ފައުންޑަރ އަދި ޗީފް އެޑިޓަރ ޒީނާ ޒާހިރު އާއި ޒީޓައިމްސްގެ ލިޔުންތެރިންނެކޭ އެއްގޮތަށް ކިޔުންތެރިންގެ ހިއްސާ ނުހަނު ބޮޑެވެ. ޒީޓައިމްސްގެ ވެބްސައިޓާއި ސޯޝަލް މީޑިއާ އެކައުންޓުތަކަށް ވަނީ މިލިއަނުން ވިއުސް ލިބިފައެވެ.
އިޖްތިމާޢީ، ދީނީ، ސިއްހީ، ވިޔަފާރި އަދި ފަރުދުންނާއި ހަމައިން ނިންމާނުލާ ޖުމްލަ 12 ކެޓަގަރީ ހަދާ ޒީޓައިމްސްއިން ގެނެސްދެމުން އަންނަ ވީޑިއޯތަކަށްވެސް އާންމުންގެ ފަރާތުން ނުހަނު ބޮޑު ތަރުހީބެއް ލިބޭ ކަމީ ކުރިޔަށްދާން ލިބޭ އެންމެ ބޮޑު ހިތްވަރެވެ.
ޒީޓައިމްސްގެ 5 އަހަރުގެ ކާމިޔާބީގެ ތެރޭގައި ފާހަގަކޮށްލެވޭ އެންމެ މުހިންމު ކަމަކީ އެކިއެކި ބަލިތައް ތަހަންމަލުކުރާ ފަރާތްތަކުގެ ފަރުވާއަށް އިންސާނިއްޔަތަށްޓަކައި ވެދެވޭ އެހީތެރިކަމެވެ. މިހާތަނަށް ޒީޓައިމްސް ވެބްސައިޓު އަދި ސޯޝަލް މީޑިއާ އެކައުންޓުތަކުގައި އެހީގެ ރިޕޯޓާއި ވީޑިއޯ ގެނެސްދީގެން އާންމުންގެ އެހީތެރިކަމާއެކު 63 އާއިލާއަކަށް ވަނީ ބޭސްފަރުވާ ފުރިހަމަކޮށްދެވިފައެވެ. މީގެ ތެރެއިން ބައެއް އާއިލާތަކަށް ހަތަރު ލައްކަ ރުފިޔާވެސް ހަފްތާއެއްހާ ދުވަހުގެ ތެރޭގައި އެހީގެ ގޮތުގައި ލިބިފައިވާއިރު މިހުރިހާ ފައިސާއެއް ޖަމާވަމުންދަނީ ބަލިމީހާގެ އެކައުންޓަށެވެ. ޒީޓައިމްސްއިން އެހީގެ މަސައްކަތް ކުރަމުންދަނީ ހިލޭ ސާބަހަށެވެ.
މިހާތަނަށް ރާއްޖޭގެ 43 ރަށެއްގެ 63 މީހުންނަށް އެހީތެރިކަން ފޯރުކޮށްދެވުނުއިރު މީގެތެރޭގައި ކެންސަރު ބަލީގެ މީހުން ވަރަށް ގިނަކަން ހިތާމައާއެކު ފާހަގަކުރަންޖެހެއެވެ. ބޮޑެތި ބަލިތައް ތަހަންމަލުކުރާ މީހުންގެ ހިތްތަކަށް އުފާވެރިކަމާއި އާއިލާއަށް ނުހަނު ބޮޑު ތަސައްލީއެއް ގެނެސްދިނުމުގައި އާންމު ރައްޔިތުން ވެދެއްވާ އެހީތެރިކަމަށް ފަށްފަށުން ޝުކުރު ދަންނަވަމެވެ.
ޒީޓައިމްސްގެ ފާހަގަކުރެވޭ ކާމިޔާބީތަކުގެތެރޭގައި ފަރުދުން ކޮލަމުގައި ފީޗަރ ކުރި ޕްރޮފައިލް ރިޕޯޓުތައް ހިމެނެއެވެ. މީގެތެރޭގައި ޤައުމުގެ ރައީސުން ފެށިގެން އެކި ދާއިރާތަކުން ފާހަގަކުރެވޭ އެތައް ބޭފުޅުންގެ ރިޕޯޓުތައް ހިމެނެއެވެ. ޒީޓައިމްސްގެ ރިޕޯޓުތައް ހެކީގެ ގޮތުގައި ހުށަހަޅައިގެން ސަރުކާރުން ދޭ އިނާމާއި އަވަށްޓެރި ޤައުމުތަކުން ދޭ އިނާމު ބައެއް ފަރާތްތަކުން ހޯދާފައިވާކަން ފާހަގަކުރެވެއެވެ. އަދި އެފަދަ ފަރާތްތަކުން އުފަލާއެކު އެކަން ފާހަގަކޮށް ޒީޓައިމްސްގެ ފަރުދުން ކޮލަމްގެ ލިޔުންތެރިންނަށް ޝުކުރު އަދާކުރާކަމީ ޓީމަށް ލިބޭ ވަރަށް ބޮޑު ހިތްހަމަޖެހުމެކެވެ.
ކޮވިޑުގެ ދުވަސްވަރު ޒީޓައިމްސް ފަށައިގަތްއިރު ގޮންޖެހުންތައް ނުހަނު ގިނައެވެ. އެންމެ ބޮޑު ގޮންޖެހުމަކީ އެކަށީގެންވާ މިންވަރަށް އިސްތިހާރު ނުލިބުމެވެ. އެހެންނަމަވެސް އަޅުގަނޑުމެންގެ ކުޑަކުޑަ ޓީމު އެއްވާނެއްގައި ހިތްވަރު އެލުވާނުލާ ކުރަމުންދާ ބުރަ މަސައްކަތަށް އެއްބާރުލުން ދިން ދީލަތި ސްޕޮންސަރުންނަށް ޝުކުރު ހައްޤެވެ. ތިޔަވެދެއްވާ ކުޑަނަމަވެސް އެހީތެރިކަމަކީ ކުރިއަށްދިއުމަށް އެޅޭ އިތުރު ބާރެކެވެ.
ޒީޓައިމްސްގެ އުންމީދަކީ ސިޔާސީ ކުލަނުޖެހި އިންސާފާއި ހަމަހަމަކަމާއެކު މައުލޫމާތު ގެނެސްދިނުމެވެ. ބޭނުންތެރި މައުޟޫތަކަށް ތަޖުރިބާކާރު ޢިލްމުވެރިންގެ އެހީގައި ލިޔުންތައް ގެނެސްދޭ ޒީޓައިމްސް މެގަޒިންއަކީ ތަފާތު ކޮންސެޕްޓަކަށް ފުޅާދާއިރާއެއްގައި މެދުނުކެނޑި ހިންގަމުން އަންނަ ހަމައެކަނި މެގަޒިންއެވެ.
ޒީޓައިމްސްގެ އުންމީދަކީ ކުރިއަށްއޮތްތަނުގައި ރާއްޖެއާއި ރާއްޖެއިން ބޭރުގެ އެކި ހިސާބުތަކަށް ދަތުރުކޮށް ތަފާތު ކޮންޓެންޓުތައް އުފައްދައި އިތުރު ފުރިހަމަކަމެއް ގެނެސްދިނުމެވެ. ޒީޓައިމްސްގެ 5 ވަނަ އަހަރީ ދުވަހުގެ ހެޔޮއެދުމާއި ތަހުނިޔާ ޒީޓައިމްސް އާއިލާގެ އެންމެހާ މެންބަރުންނަށް ޝުކުރުވެރިކަމާއިއެކު އަރިސްކުރަމެވެ. ތިޔައިގެ ތެރެއިން ކޮންމެ ކިޔުންތެރިއަކީ އަދި ބެލުންތެރިޔަކީ ކުރިއެރުމުގައި ނުހަނު މުހިންމު ބައިވެރިއެކެވެ. ތިޔަ ލޮބުވެތި ފޭނުންގެ ބިނާކުރަނިވި ފާޑުކިއުންތަކާއި އެހީތެރިކަމާއެކު ޒީޓައިމްސްއަށް އަދަށްވުރެ ފަހި މާދަމާއެއް މިންވަރު ކުރައްވާށިއެވެ. އާމީން!
