މި ޖެނުއަރީ މަހުގެ 7 ވަނަ ދުވަހުން ފެށިގެން ކުރިއަށް އޮތް 5 ދުވަހުވެސް ރާއްޖޭގެ ސަރަހައްދަށް ވައި ނުސާފުވުން ނުވަތަ ދުންފުހުގެ އަސަރު ވަރަށް ބޮޑަށް ކުރަމުންދާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ހާމަކޮށްފައެވެ.
" މޯލްޑިވްސް މީޓިއޮރޮލޮޖިކަލް ސަރވިސަސްގެ ތަފާސް ހިސާބުތަކުން ދައްކާގޮތުން ރާއްޖޭގެ ސަރަހައްދުތަކަށް ޚާއްސަކޮށް މެދު ރާއްޖެތެރޭގެ އަތޮޅުތަކަށް ދުންފުހުގެ އަސަރު ވަރަށް ބޮޑަށް ކުރަމުންދޭ. ރައްކާތެރިކަމުގެ ފިޔަވަޅު އެޅުމަށް ޚާއްސަ ސަމާލުކަމެއް ދެއްވާ" އެޗްޕީއޭ އިން އިލްތިމާސްކޮށްފައިވެއެވެ.
ސިއްހަތަށް ނުރަނގަޅު މިންވަރަށް ވަރަށް ބޮޑަށް ވައި ނުސާފުވެފައިވާ ސަރަހައްދުތަކުގެ ތެރޭގައި ކ. ވިލިނގިލި، ދ. ކުޑަހުވަދޫ އަދި ލ. ގަން ހިމެނެއެވެ.
ރަތްކުލައިގެ އެލާޓް: ސިއްހަތަށް ނުރަނގަޅު މިންވަރު 200-151 US AQI
- ސިއްހީ ގޮތުން ނޭދެވޭ އަސަރުތައް ކުރުމާއި ފުއްޕާމެއާއި ހިތުގެ ބަލިތައް ބޮޑުވުމުގެ ނުރައްކާ ހުރިހާ އެންމެނަށްވެސް ބޮޑު
އޮރެންޖު އެލާޓް: ނާޒުކު ފަރާތްތަކުގެ ސިއްހަތަށް ނުރަނގަޅު 150-101 US AQI
- ނާޒުކު ހާލަތުގައިވާ ފަރާތްތަކަށާއި އެހެން މީހުންނަށްވެސް ނޭވާލާ ނިޒާމުގެ މައްސަލަތައް ޖެހުމުގެ ފުރުސަތު ބޮޑު
- އޮރެންޖު އެލާޓު ނެރެފައިވާ ސަރަހައްދުތަކުގެ ތެރޭގައި ހިމެނެނީ ށ. ފުނަދޫ، ކ. މާލެ، އަދި ފުވައްމުލަކެވެ.
ރީނދޫ އެލާޓް: މެދުމިންވަރު 100-51 US AQI
- ނޭވާލާ ނިޒާމުގެ މައްސަލަތައް ޖެހުމުގެ ފުރުސަތު ބޮޑު، ނާޒުކު ހާލަތުގައިވާ ފަރާތްތައް ބޭރުގައި އުޅުމުން ދުރުހެލިވާން ވަނީ އިލްތިމާސްކޮށްފައެވެ.
ސަމާލުކަންދޭންވީ ކަންތައްތައް:
- ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންތައްތައް މަޑުޖައްސާލުން
- ބޭރަށް ނުކުންނަންޖެހޭ ހާލަތްތަކުގައި މާސްކު އެޅުން
- ބޭރުގެ ނުސާފު ވައި ނުވަންނަހެން ގޭގެ ދޮރުތައް ލައްޕާފައި ބެހެއްޓުން
- އެއަރ ޕިއުރިފައިއަރ ބޭނުންކުރުން
