ދިޔާނާ އަފީފު (ޑައީ) އަކީ ކަސްޓަމަރ ސަރވިސް ދާއިރާގައި ފާހަގަކޮށްލެވޭ ޚިދުމަތްތެރިއެކެވެ. އުރީދޫ މޯލްޑިވްސްގެ ޑިރެކްޓަރ ކަސްޓަމަރ އެކްސްޕީރިއަންސް ގެ ވަޒީފާގައި ހުރި ޑައީ ފާހަގަކުރެވެނީ އެންމެ އާދައިގެ މުވައްޒަފަކުން ފެށިގެން ތަޖުރިބާ އާއި ތަޢުލީމު ހޯދަމުން ހަރުފަތަކަށްފަހު ހަރުފަތެއް ގިރާކުރަމުން އައިސްފައިވާ ފާހަގަކޮށްލެވޭ ޓީމް ލީޑަރެއްގެ ގޮތުގައެވެ.
ފުރަތަމަ ބޭނުންވީ މުދައްރިސަކަށް ވާން އެކަމަކު ގަދަކަމުން ވެއްދީ ސިފައިންގެއަށް
ޑައީ ފާހަގަކުރި ގޮތުގައި އޯލެވެލް ނިންމާފަ ބޭނުންވީ މުދައްރިސަކަށް ވާށެވެ. އެކަމަކު އުމުރުން އެންމެ 16 އަހަރުގައި ގަދަކަމުން އެއިރު ވެއްދީ ސިފައިންގެއަށެވެ.
" އެއިރު ސްކޫލު ނިމޭ ކުދިން ބޭނުންނުވިއަސް ގަދަކަމުންވެސް ވައްދާނީ ސިފައިންގެއަށް، ޕޮލިސް އާއި އެމްއެންޑީއެފް އެއްކޮށް ޚިދުމަތްދެމުން ދިޔައީ. އެމްއެންޑީއެފް 6 މަހުގެ ޓްރެއިނިންގ ހަދަން ޖެހުނު. އެކަމަކު ޓްރެއިނިނގް ނިމުނީ ވަރަށް ލަހުން. ވަރަށް ގިނަ ކަންތައްތަކެއް ދިމާވި ޓްރެއިނިންގ ތެރޭގައި. ކުއްޖަކު ކަރަންޓުގައި ޖެހި ނިޔާވެ 2 ކުދިން އައިސީޔޫގައި ބާއްވަންޖެހުނު. ގިރިފުށިން މާލެ ގެނެސް ދުވަސްކޮޅަކު މާލޭގައި ބައިތިއްބާފައި އަނެއްކާ އަނބުރާ ގެންދިޔައީ.. ޓްރެއިނިންގ ނިމުނީ 9 މަސް ދުވަސްވެފައި ހުއްޓާ". އެއީ ޒުވާން އުމުރުގައި ޑައީ އަށް ކުރެވުނު ތަފާތު ތަޖުރިބާއެކެވެ.
އެމްއެންޑީއެފް ޓްރެއިނިންގ ހެދި އެ ބެޗުން އެންމެ ރަނގަޅު 10 ކުދިންގެ ތެރޭގައި ޑައީ ހިމެނުނެވެ.
" ޓޮޕް 10 ގައި ހިމެނުނީމަ ފުރުސަތު ލިބުނު ބޭނުން ޑިޕާޓްމަންޓެއްގައި މަސައްކަތްކުރަން. އަޅުގަނޑު ބޭނުންވީ ޕޮލިސް ސީއަޑީ އެންޑް ފޮރެންސިކް ޑިޕާޓްމަންޓުގައި މަސައްކަތް ކުރަން. ބޮންޑު ހަމަވަންދެން 4 އަހަރު މަސައްކަތްކުރިން".
2000 ވަނަ އަހަރު އެމްއެންޑީއެފް/ޕޮލިސް ވަޒީފާއިން ވަކިވުމަށްފަހު ޑައީ މަސައްކަތްކުރަން ފެށީ ޓޫރިސްޓް ސަބްމެރިންސް މޯލްޑިވްސްގައެވެ.
" އެއީ ކުންފުނި އުފެއްދިއިރު. އެއިރު ސަބްމެރިން ނުވެސް ގެނޭ. ސެޓަޕް ކަންތައްތަކުގައި އުޅުނީ ފުރަތަމަ. އެކުންފުނީގެ އެކި ލެވެލްގެ އެކި ވަޒީފާތައް އަދާކުރުމަށްފަހު އުމަރު ނަސީރުގެ ޕީއޭ އަކަށްވެސް ހުރިން. އެކުންފުނީގައި ކުރިއަށް ދެވެން އޮތް އެންމެ ބޮޑަކަށް ދެވުނީމަ ދެން ހިތަށް އެރީ އެހެން ކުންފުންޏަކަށް ވަޒީފާ ބަދަލުކުރަން. އެދުވަސްކޮޅު ރާއްޖޭގައި ވަތަނިއްޔާ އުފެދުނީ ".
އުރީދޫގައި 20 އަހަރު
ކުރީގެ ވަތަނިއްޔާ މިހާރުގެ ނަމުންނަމަ އުރީދޫގެ ޚިދުމަތް ރާއްޖޭގައި ދޭން ފެށީ 2005 ވަނަ އަހަރުގައެވެ. ޑައީ އަކީ އެކުންފުންޏަށް އެންމެ ފުރަތަމަ ވަޒީފާއަށްދިޔަ މުވައްޒަފުންގެ ތެރޭގައި ހިމެނޭ މުވައްޒަފެކެވެ.
" ކަސްޓަމަރ ސަރވިސްގެ ކަސްޓަމަރ ކެއަރ ރެޕްރެޒެންޓޭޓިވް އަކަށް ފުރަތަމަވެސް ވަނީ. އެއަށްފަހު އެކިދިމަދިމާލުގައި މަސައްކަތްކުރަމުން ދިޔައީ. ޓީމް ކޯޗަކަށް، ސްޕަވައިޒަރ، ސީނިއަރ ސްޕަވައިޒަރ، އެސިސްޓެންޓް މެނޭޖަރ".
2016 އިން 2018 އަށް އުރީދޫގެ ކޮންޓެކްޓް ސެންޓަރ ގެ މެނޭޖަރުކަން ޑައީ އަދާކުރިއިރު އޭގެ ފަހުން ވަނީ ޕޯސްޓް ޕެއިޑް ބިޒްނަސްގެ މެނޭޖަރު މަގާމްވެސް އަދާކޮށްފައެވެ.
" ބިޒިނަސް ސައިޑްގައި ވެސް 2 އަހަރެއްހާ ދުވަހު މަސައްކަތްކުރިން. ޕޯސްޓްޕެއިޑް ބިޒްނަސް އަށް ވަރަށް ބޮޑު ކުރިއެރުމެއް ގެނެވުނު. ވަރަށް ގިނަ ކަންތައް ދަސްވި. އަދި ކުރިއަށް ކުރާނެ ގިނަ ކަންތައްތަކެއްގެ ޕްލޭނެއްވެސް ހެދިން. ވަރަށް ކުރާހިތުން މަސައްކަތްކުރީ".
2021 ވަނަ އަހަރުގެ ޖޫންމަހުން ފެށިގެން ޑައީ ދަނީ އުރީދޫގެ ހެޑް އޮފް ކަސްޓަމަރ ކެއަރ ގެ މަޤާމް އަދާކުރަމުންނެވެ. އަދި މިއަހަރު ވަނީ ޑައިރެކްޓަރ އެކްސްޕީރިއަންސްގެ މަޤާމަށް ޕްރޮމޯޓްވެސް ވެފައެވެ. ލިބޭ އެންމެ ބޮޑު ހިތްހަމަޖެހުމަކީ ރަނގަޅު ބަދަލުތަކެއް އޭނާ އާއި ޓީމުގެ މަސައްކަތުން ގެނެވުނީމައެވެ. ކަސްޓަމަރުން ހިންހަމަޖެހޭ ފެންވަރަށް ޑިޖިޓަލް ޚިދުމަތްތައް މިއަދު އުރީދޫއިން ލިބެން ހުރިއިރު ޑައީ އާއި މުޅި ޓީމުގެ އެންމެ ބޮޑު އަމާޒަކީ ކަސްޓަމަރުންގެ ޑިމާންޑާއި އެއްވަރަށް ޚިދުމަތް ފޯރުކޮށްދީ އެއްދުވަހުން އަނެއް ދުވަހަށް ޚިދުމަތުގެ ފެންވަރު ރަނގަޅުކުރުމެވެ.
ޑައީގެ ކުރިއެރުމަށް އުރީދޫގެ ހިއްސާ ބޮޑު!
20 އަހަރު އުރީދޫގައި މަސައްކަތްކޮށް އަދި ކުރިއަށްއޮތްތާގައި ވެސް އުރީދޫއާއެކު އިތުރު ހަރުފަތަކަށް ދިއުމަށް ބޭނުންވާ ޑައީ މަތީ ތަޢުލީމު ހާސިލު ކުރީ އުރީދޫގައި ވަޒީފާ އަދާކުރަމުންނެވެ. 2016 ވަނަ އަހަރު ބެޗްލަރސް ޑިގްރީ ނިންމިއިރު އެ ކޯސް ސްޕޮންސަރ ކުރީވެސް އުރީދޫއިންކަމަށް ވަނީ ފާހަގަކޮށްފައެވެ. އޮސްޓްރޭލިއަން އިންސްޓިޓިއުޓް އޮފް ބިޒްނަސް (އޭއައިބީ) ގެ ބެޗްލަރ އޮފް އެޑްމިނިސްޓްރޭޝަން ޑައީ ނިންމީ މެޕްސް ކޮލެޖުންނެވެ. ޑިގްރީއިން 1 ވަނަ ހޯދައި އޭގެ ފަހުން ވަނީ ޔޫކޭގެ މެޓްރީޕޮލިޓަން ޔުނިވަރސިޓީއިން ބިޒިނަސް ސައިކޮލޮޖީއިން މާސްޓަރސް ޑިގްރީ ވެސް ނިންމާފައެވެ.
" ވަރަށް ފާހަގަކުރެވޭ ހާރވަރޑް ޔުނިވަރސިޓީއިން ލިބުނު ލީޑަރޝިޕް ޑިވެލޮޕްމެންޓް ޕްރޮގްރާމް. އުރީދޫ ގުރޫޕުން ފުރުސަތު ދޭނެ ކޮންމެ އަހަރަކު 2 މުވައްޒަފަކަށް". ޑައީ
ލިބުނު ކާމިޔާބީ
އުރީދޫގެ މުވައްޒަފެއްގެ ގޮތުގައި ޑައީ އަށް ވަނީ ގިނަ ކާމިޔާބީތަކެއް ލިބިފައެވެ.
ސްޕެޝަލް ރިކޮގްނިޝަން އެވަރޑް ކުންފުނި ލެވެލްގައި ވަނީ އެތައްފަހަރަކު ލިބިފައެވެ. ބެސްޓް ޕީޕަލްސް މެނޭޖަރ އެވަރޑް ތަކުރާރުކޮށް ލިބިފައިވާއިރު އެކްސަލަންސް އެވަރޑް (ބެސްޓް އެމްޕްލޯޔަރ އޮފް ދަ އިޔަރ) ވެސް ވަނީ ލިބިފައެވެ. އަދި އޭގެ އިތުރުން އިންޓަރނޭޝަނަލް އެވަރޑްސް އަށް ބަލާއިރު ސްޓީވް ގޯލްޑް އެވަރޑް ފޮރ މޯސްޓް އިނޮވޭޓިވް ކަސްޓަމަރ ސަރވިސް އާއި ސްޓީވް ބްރޮންޒް އެވޯރޑް ފޮރ ފީމޭލް އެގްޒެކްޓިވް އޮފް ދަ އިޔަރ 2020 ވެސް ވަނީ ހޯދާފައެވެ. އަދި އެމްޕްލޯއިމެންޓް އޮފް ދަ އިޔަރ އެވޯޑުވެސް ވަނީ ޑައީ އަށް ލިބިފައެވެ.
'ޒީޓައިމްސް' އަށް ދިން ޚާއްސަ އިންޓަވިއު ނިންމާލަމުން ޑައީ ފާހަގަކުރިގޮތުގައި އަންހެނަކަށް ވީތީ ކުރިއަށްދިއުމަށް ކުންފުނީގައި އޭނާއަށް ގޮންޖެހުމެއް ނެތެވެ. ކުރިއަށް ދާން ބޭނުންވާ މުވައްޒަފުންނަށް އުރީދޫގައި ފުރުސަތު މަގުފަހިވެފައިވާކަމަށް ވަނީ އުފަލާއެކު ފާހަގަކޮށްފައެވެ. އަދި ކާމިޔާބީ އާއި ހަމައަށް ވާސިލުވުމަށް އެހީތެރިވެދިން ފަރާތްތަކަށް ވަނީ ޝުކުރު އަދާކޮށްފައެވެ.
