ތޫފާން 'ދިތުވާ'ގެ ސަބަބުން ސްރީލަންކާ އަށް ދިމާވެފައިވާ ހިތާމަވެރި ހާލަތާއި ގުޅިގެން އެ ޤައުމަށް އެހީވުމަށް ޕީއެސްއެމާއި ރާއްޖޭގެ 37 މީޑިއާއެއް ގުޅިގެން ކުރިއަށްގެންދިޔަ ' ސިލޯނާއެކު ދިވެހީން' ޓެލެތޯން ނިންމާލިއިރު ވަނީ 12 މިލިއަނަށްވުރެ ގިނަ ރުފިޔާ ލިބިފައެވެ. އެއީ 11.4 މިލިއަން ރުފިޔާ އާއި 43000 ޑޮލަރެވެ.
ޓެލެތޯނަށް ޚާއްސަ އެކައުންޓެއް ހުޅުވައި ޓްރާންސްފަރ ކުރެވޭނެ ގޮތް ހެދުމުގެ އިތުރަށް މާލެ އާއި ހުޅުމާލެ އަދި ވިލިމާލޭގައި ފަންޑު ފޮށިތައް ބަހައްޓާފައިވެއެވެ.
މިނިވަން އޮޑިޓް ފާމެއް ކަމުގައިވާ ކްރޯ މޯލްޑިވްސްގެ ބެލުމުގެ ދަށުން ކުރިއަށްގެންދިޔަ މި ޓެލެތޯނަށް ލިބުނު ޖުމްލަ ފައިސާގެ ތަފްސީލް ޓެލެތޯނަށް ޚާއްސަ ކުރި އެކައުންޓު ބަންދު ކުރުމަށްފަހު ހާމަކުރުމަށް ވަނީ ހަމަޖެހިފައެވެ.
ނޮވެންބަރު 30 ވަނަ ދުވަހުގެ ހެނދުނު 9 އިން ޑިސެންބަރ 1 ވަނަ ދުވަހުގެ މެންދުރުފަހު 2 ޖަހަންދެން ކުރިއަށްގެންދިޔަ ޓެލެތޯނަށް ދިވެހި ރައްޔިތުންނާއި ސަރުކާރުގެ ވުޒާރާތަކާއި ކުންފުނިތަކާއި ޖަމްއިއްޔާތަކާއި މީޑިއާތަކުން ވަނީ އެހީތެރިކަން ފޯރުކޮށްދީފައެވެ.
މި ޓެލެތޯނަށް އެންމެ ބޮޑު އެހީތެރިކަމެއް ފޯރުކޮށްދިނީ 2.4 މިލިއަން ހަދިޔާ ކޮށްގެން ދިވެހި ފުލުހުންގެ މުއައްސަސާއިންނެވެ. އަދި ސިފައިންގެ ފަރާތުން 1 މިލިއަން ރުފިޔާ ވަނީ ހަދިޔާކޮށްފައެވެ.
ސްރީލަންކާ އަކީ ދިވެހިރާއްޖެއާއި ވަރަށް ގާތް ގުޅުމެއް އޮންނަ ޤައުމެކެވެ. އެ ޤައުމުގައި 2000 އެއްހާ ދިވެހީން ދިރިއުޅެމުން އަންނައިރު ރާއްޖޭގައި ވެސް ގިނަ އަދަދަކަށް ސްރީލަންކާ މީހުން ވަޒީފާ އަދާކުރެއެވެ.
ސްރިލަންކާގައި ފެންބޮޑުވެ 300 އަށްވުރެ ގިނަ މީހުން މަރުވެ 200 އަށްވުރެ ގިނަ މީހުން ވަނީ ގެއްލިފައެވެ. މިކާރިސާގެ އަސަރު އެޤައުމުގެ މިލިއަނެއްހާ މީހުންނަށް އެކި ގޮތްގޮތަށް ވަނީ ކޮށްފައެވެ. 180،000 އަށް ވުރެ ގިނަ މީހުން ވަނީ ވަގުތީ ހިޔާތަކަށް ބަދަލުކޮށްފައެވެ. ބިންގަނޑުކަނޑައިގެން ދިއުމުގެ އިތުރަށް ފެންބޮޑުވުމުން ބައެއް ސަރަހައްދުތަކަށް އެއްގަމު ދަތުރު ނުކުރެވޭ ހާލަތަށް ސްރީލަންކާ ވަނީ ގޮސްފައެވެ.
