ދުނިޔެ 21 ވަނަ ގަރުނުގެ ތައުލީމާއި  ހުނަރު ގުނަމުންދާއިރު މި ގައުމު މި ގުނަމުން ދަނީ އަދިވެސް 90ގެ އަހަރު ތަކެކޭ ބުންޏަސް ރަނގަޅުވާނެއެވެ. ތައުލީމީ މަންހަޖު ނުވަތަ ކިޔަވައިދޭން ބޭނުންކުރާ ތަރުބަވީ އުސޫލުތަކާއި މުޤައްރަރުތަކާއި މާއްދާތައް އަދިވެސް އޮތީ 90 ގެ އަހަރު ތަކެކޭ އެއްފަދައިންނެވެ. ޕުރައިމަރީ  ގުރޭޑު ތަކުގައި ރައިވަރާއި ބަންޖާއި ތާރީޚީ ފުލޯކު ވާހަކަތަކުގެ އިތުރަށް ދަރިވަރުންގެ ހުނަރު ކުރިއަރުވަން ކުރެވުނީ ކޮންކަމެއްހެއްޔެވެ؟

ކުއްޖާ އިސްކޫލު ނިމިގެން ދާއިރުވެސް ހަގީގީ ދިރިއުޅުމުގައި (އެތިކްސް) ކުރިމަތިލާންޖެހޭ އެއްޗެއް އެނގިފަ އެއް ނޯވެއެވެ. ގުނަމުން މިދާ ޒަމާނަކީ އަދި ކުރިއަށް އޮތް ޒަމާނަކީ ކޮމްޕިއުޓާ ސައިންސް (AI)، ރޮބޮޓިކް ޖެނެރޭޝަނެވެ. އެއްވެސް އުފެއްދުންތެރިކަމެއް އައު އީޖާދެއް، ފަންނުވެރިކަމެއް އެކުދިން ކިބަޔަކު ނެތެވެ.

މި ގައުމުގައި ކުއްޖާ އިސްކޫލު ނިމޭއިރުވެސް ތިމާގެ ފަންނަކީ ނުވަތަ ކުރިއަށްދާންވީ ރޮނގެއް ގިނަފަހަރަށް ނޭގެއެވެ. މިހެން ވުމުން ނުކުންނަ ނަތީޖާ ވަރަށް ބޮޑަށް ގޯހެވެ. ވަޒީފާތަކުގައި ހަރު ނުލައެވެ. ވަޒީފާއަށް ފޫހިވެ ފަރުވާކުޑަ ކުރެވެއެވެ. އަބަދު އާ އެހެން ވަޒީފާއެއް ހޯދުމުގައި އުޅެންޖެހެއެވެ. އިޖުތިމާއީ އެތައް މައްސަލަތަކެއް ދިމާވެ ޒަވާޖީ ހަޔާތް ރޫޅި، ދަރިން ބިކަވެ މިފަދަ އެތައް ކަމަކާ ދިމާވެ ޒުވާން އުމުރު ހަލާކުވެ ދެއެވެ.

Advertisement

އަޅުގަނޑު ދެކޭ ހައްލަކީ: ކުއްޖާގެ ޕުރައިމަރީ ގުރޭޑު (1،2،3) ގައި އެ ކުއްޖާގެ ހުނަރު ނުވަތަ ފީލްޑު ދަނެގަނެ ބޭނުންވާ ރޮނގަކުން ކިޔެވުން ބިނާކުރަންވީއެވެ.

އެއައްފަހު ގުރޭޑު 5،4 ގައި އެކުއްޖާ ބޭނުންވި ދާއިރާއަކުން ފަންޑަމެންޓަލް ނުވަތަ ބޭސިކް ކިޔަވާ ދޭންވީއެވެ. ދެން ސެކަންޑަރީ ގުރޭޑު 6،7،8،9،10، އަމަލީ މަސައްކަތާއިއެކު އިސްކޫލު ނިމޭއިރު އެކުއްޖާ ހުންނާނީ އެ ރޮނގަކުން ކުރިއަރައިފައެވެ.

މިސާލަކަށް ބަލާނަމަ: އާކްޓެކްޗަރަލް އިންޖިނިއަރިން، މެރިން ރިސާޗް، އެގްރިކަލްޗަރ، ކޮމްޕިއުޓާ ސައިންސް، ޕައިލެޓު، ޕޮލިޓިކަލް ސައިންސް، ފައިނޭސް އެންޑް އިކޮނޮމީ ފަދަ އެތައް ދާއިރާތަކުން އެތައް ސަތޭކަ ބަޔަކު ނިކުމެ ގައުމު ހިންގާ މެކުހަށް ޖަހާނެކަން ޔަގީނެވެ. ވަޒީފާ ދޭއިރުވެސް ތަޢުލީމާއި ހުނަރުވެރިންނަށް އިސްކަންދޭން ޖެހެއެވެ.

މިގޮތަށް މިގައުމުގެ ތައުލީމީ މަންހަޖު އެއްކޮށް ބަދަލުކޮށްގެން ނޫނީ، މިގައުމަށް ބިނާ ކުރަނިވި ކުރިމަގެއް ލިބޭނެކަމާމެދު ޝައްކެވެ.