ރަސޫލާ ﷺ ހަދީޘް ކުރެއްވިއެވެ. "އިސްލާމްކަމަކީ ހަމަކަށަވަރުން ﷲ މެނުވީ ހައްޤުވެގެން އަޅުކަމެއް ވެވޭ އެހެން އިލާހަކު ނުވާކަމަށާއި، މުހައްމަދުގެފާނީ ﷲ ގެ ރަސޫލާކަމަށް ތިބާ ހެކިވުމާއި ތިބާ (ފަރުޟު ފަސް) ނަމާދު ޤާއިމުކުރުމާއި، ތިބާ ޒަކާތްދިނުމާއި، ތިބާ ރަމަޟާންމަހު ރޯދަހިފުމާއި ތިބާއަށް އެކަމުގެ ކުޅަދާނަކަން ލިބިއްޖެނަމަ (ކައުބަތުﷲ) ގެފުޅަށް ޙައްޖުވުމެވެ".
"އީމާންކަމަކީ ހަމަކަށަވަރުން ﷲ އަށާއި އެކަލާނގެ މަލާއިކަތުންނަށާއި، އެކަލާނގެ ބާވައިލެއްވި ފޮތްތަކަށާއި، އެކަލާނގެ ރަސޫލުންނަށާއި، ޤިޔާމަތްދުވަހަށާއި، ހެޔޮ މިންވަރާއި ނުބައި މިންވަރަށް ތިބާ އީމާންވުމެވެ".
" އިޙުސާންކަމަކީ ތިބާ ﷲ އަށް އަޅުކަންކުރާއިރު އެކަލާނގެ ޛާތުފުޅު ތިބާ ދެކެދެކެ ހުރެ އަޅުކަންކުރާ ފަދައިން ތިބާ އަޅުކަންކުރުމެވެ. އެހެނީ، ތިބާއަށް އެކަލާނގެ ޛާތުފުޅު ފެންނަކަމުގައި ނުވިއަސް، އެކަލާނގެ ތިބާ ދެކެވޮޑިގެންވެއެވެ".
މާތް ނަބިއްޔާ ﷺ އެކަލޭގެފާނުގެ އަސްހާބުބޭކަލުން ތަރުބިއްޔަތު ކުރައްވައިފައިވަނީ އިސްލާމްކަމާއި އީމާންކަމާއި އިހުސާންކަމުގެ މަތީގައެވެ. އެހެންކަމުން އެބޭކަލުންގެ އަޚުލާޤާއި މުޢާމަލާތްކުރެއްވުން މާތްވެފައި ހެވެވެ. އެބޭކަލުންގެ މެދުގައި އެއް ބޭކަލަކާއި އަނެއް ބޭކަލަކާ ދެމެދު އޮންނަ ގުޅުން ވަރުގަދައެވެ. އިތުބާރުކުރުން ހަރުދަނާ އެވެ. އެބޭކަލުން ހިތްޕުޅުގައި އިހުސާންކަން ރަނގަޅަށް ހަރުލައިފައިވުމުން އެބޭކަލުންގެ މުޖުތަމަޢުގައި ހަމަޖެހުމާއި އެކުވެރިކަން އާންމުވެފައިވިއެވެ. މިއަދު މި މުޖުތަމަޢުގެ ތެރޭގައި ހިނގާ ނޭދެވޭ ކަންތައްތައް ހިނގަނީ އީމާންކަމާއި އިސްލާމްކަމާއި އިހުސާންކަމުގެ ބިންގާ ހަރުދަނާ ގޮތެއްގައި، ފަރުދުންގެ ހިތްތަކުގައި އެޅިފައި ނެތުމުންނެވެ. އަބަދާއި އަބަދު މާތް ﷲ ބައްލަވައިވޮޑިގެންވާކަމާއި، އަދި އޭގެ އިތުރަށް ދެމަލާއިކަތުން ތިމާގެ ގާތުގައި ތިމާގެ އަމަލުތަކާއި ބުނާ ބަސްތައް ލިޔުއްވަން ތިއްބަވާނޭކަން ކަށަވަރުކޮށްދެވިފައި ނުވާތީއެވެ. އެހެންކަމުން ޅަފަތުއްސުރެ މިކަންކަން ހިތުން ކެހިގެން ނުދާ ފަދަ ގޮތެއްގައި ހަރުލެވިއްޖެނަމަ މީސްތަކުންގެ އުޅުންތަކާއި ގުޅުންތަކަށް ހެއު ބަދަލު އަންނާނޭކަން ކަށަވަރެވެ.
މައުލޫމާތު ހުކުރު ޚުޠުބާ
