ނަމާދަކީ އިސްލާމްދީނުގެ ދެވަނަ ރުކުނެވެ. އެއީ ދީނުގެ ތަނބެވެ. ނަމާދު ދޫކޮށްލައިފި މީހާ ދީނުން ބޭރުވެއްޖެއެވެ. ﷲ ސުބުހާނަހޫ ވަތަޢާލާ ވަޙީކުރެއްވިއެވެ. މާނައީ:" އަދި ތިޔަބައިމީހުން ނަމާދު ޤާއިމް ކުރާށެވެ. އަދި މުޝްރިކުންގެ ތެރެއިން ތިޔަބައިމީހުން ނުވާށެވެ!".
ނަމާދު ފަރުޟު ކުރެވުނީ އެންމެ މަތިވެރި ޝަރަފުވެރި މަޤާމަށް އެންމެ މަތިވެރި ސާހިބާ ގެންދެވުމަށްފަހުގައެވެ. އެއީ މަލާއިކަތުންނަށްވެސް ކުއްތަންނުވެވޭހާ ހިސާބެވެ. ހަތްއުޑުގެ ވެސް މައްޗަށެވެ. އަރުޝިކޮޅާ އަރިސްކުރެއްވުމަށްފަހު އެއްވެސް މެދުވެރިޔަކު ނެތި އެކަލޭގެފާނަށް ސީދާ ބަސްވަހީކުރައްވައިގެންނެވެ. ނަމާދަކީ އެންމެ ފުރަތަމަ ފަރުޟުކުރެވުނު އަޅުކަމަށްވެފައި އެއީ ނަބިއްޔާ ﷺ އުންމަތަށް ކުރެއްވި އެންމެފަހު ވަސިއްޔަތްޕުޅުވެސް މެއެވެ. އެކަލޭގެފާނު ސުވަރުގެ ވަޑައިގަތް އާލާސްކަންފުޅުގައި އޮންނެވި އިރު ހޭފުޅުނެތިފައި ހޭފުޅުއަރާ ކޮންމެ ފަހަރަކު ހަދީޘްކުރައްވަނީ މީސްތަކުން ނަމާދުކޮށްފިހެއްޔެވެ؟ ތިމަންކަލޭގެފާނު ހަށިކޮޅަށް ފެންއަޅާށެވެ. ކޮންމެ ފަހަރަކު ފެންއަޅުއްވައިގެން އެކަލޭގެފާނު ނަމާދުކުރެއްވުމަށް ތެދުވެވަޑައިގަންނަވާ ތަނުން ހޭފުޅުނެތެއެވެ. އެކަލޭގެފާނު ސުވަރުގެވަޑައިގަތް ދާންމަތިކޮޅުގައި އޮންނަވައި އުންމަތަށް އެންމެފަހުން ކުރެއްވި ވަސިއްޔަތަކީ މާނައީ:" ތިޔަބައިމީހުން ނަމާދަށް ރައްކާތެރިވާށެވެ! ތިޔަބައިމީހުން ނަމާދަށް ރައްކާތެރިވާށެވެ! އަދި ތިޔަބައިމީހުންގެ ބެލުމުގެދަށުގައިވާ ފަރާތްތަކާމެދު ﷲ އަށް ބިރުވެތިވާށެވެ!".
ﷲ ސުބުހާނަހޫ ވަތަޢާލާ ވަނީ ނަމާދު ޤާއިމުކޮށް އެ ނަމާދުތަކަށް ރައްކާތެރިވުމަށް އަހަރެމެންނަށް އަމުރުކުރައްވައިފައެވެ. ހަމަ އެފަދައިން އަހަރެމެންގެ ނަބިއްޔާ ﷺ ވެސް ވަނީ އެކަމަށް ބާރުއަޅުއްވައިފައެވެ.
ނަމާދުއަޅާ މީހުންނަށް ﷲ ސުބުހާނަހޫ ވަތަޢާލާ ވަނީ ވަޢީދުގެ ބަސްފުޅު ވަހީކުރައްވައިފައެވެ. އެކަލާނގެ ވަހީކުރައްވައިފައިވެއެވެ. މާނައީ "ފަހެ އެބޭކަލުންނަށްފަހު އެހެން ބަޔަކު އައޫއެވެ. އެއުރެން ނަމާދު ދޫކޮށްލޫއެވެ. އަދި ހަވާނަފުސުގެ އެދުންތަކަށް ތަބަޢަވޫއެވެ. ފަހެ ނިކަން ހުރެ އެއުރެން ހަލާކާ ކުރިމަތިލާހުއްޓެވެ!".
ޝަރުޢީ އެއްވެސް އުޛުރެއްނެތި ނަމާދު އޭގެ ވަގުތުން ފަސްކުރުމަކީ ނަމާދު އެޅުމުގެ ތެރޭގައި ހިމެނޭ ކަމެކެވެ. އަހަރެމެންގެ ތެރެއިން ބައެއް މީހުން ނަމާދު ފަސްކުރަމުން ފަސްކުރަމުން ގޮސް އެންމެ ފަހުން ނަމާދު ވަގުތު ފާއިތުވެދާއިރު ވެސް އެބައިމީހުންނަށް އެ ނަމާދެއް ނުކުރެވެއެވެ. މިއީ ނުހަނު ސަމާލުކަންދީ ރައްކާތެރިވާންޖެހޭނެ ކަމެކެވެ.
