އަރިއަތޮޅު ދެކުނުބުރީގެ މީހުން ދިރިއުޅޭ ރަށްރަށަށް ކުރައްވާ ދަތުރުފުޅެއްގައި ރައީސުލްޖުމްހޫރިއްޔާ ޑޮކްޓަރ މުހައްމަދު މުޢިއްޒު ފުރާވަޑައިގެންނެވީ މިއަދު އެވެ. މިދަތުރުފުޅުގައި، އަރިއަތޮޅު ދެކުނުބުރީގެ މީހުން ދިރިއުޅޭ 10 ރަށަކަށް ވަޑައިގަތުމަށް ވަނީ ހަމަޖެހިފައެވެ. މިގޮތުން، ދަނގެތި، ދިއްދޫ، އޮމަދޫ، ދިގުރަށް، މާމިގިލި، މަންދޫ، ފެންފުށި، ހަންޏާމީދޫ، މަހިބަދޫ، އަދި، ކުނބުރުދޫ އަށް ޒިޔާރަތްކުރެއްވުމަށް ވަނީ ހަމަޖެހިފައެވެ.
ދަނގެތި:
ދަނގެތި ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރައްވައި ރައްޔިތުންނަށް އެންމެ މުހިންމު ކަންކަމާ ގުޅޭގޮތުން ވަނީ މަޝްވަރާކުރައްވާފައެވެ. މިގޮތުން ކައުންސިލުން ވަނީ، ރަށު ބަނދަރުގެ މަސައްކަތް ކުރިއަށް ގެންދެވުމުގައި ރައްޔިތުން ބޭނުންވާގޮތަށް ދިގުމުއްދަތުގައި ބޭނުންކުރެވޭނެ ގޮތަށް އެ ބަނދަރު ހައްދަވައިދެއްވުމާއި ޞިއްޙީ މަރުކަޒުގެ އެކްސްޓެންޝަން އިމާރާތުގެ މަސައްކަތް އަވަސްކޮށްދިނުމުގެ އިތުރުން ރަށުން ބިން ހޯދުމަށް ރައްޔިތުން އެދޭކަމަށާއި ރަށުން ބިން ހިއްކަވައިދެއްވުމަށާއި، ރަށުގައި ބޭންކް އޮފް މޯލްޑިވްސްގެ ބްރާންޗެއް ގާއިމުކޮށްދެއްވައި، ރަށުގައި ޑޮލަރު އޭ.ޓީ.އެމް. އެއް ބަހައްޓަވައިދެއްވުމާއި، ރަށްގިރުން ހައްލުކޮށްދެއްވުމަށް އެދިވަޑައިގެންފައެވެ. އަދި ރަށުގެ ފުޓްބޯޅަ ދަނޑު ޒަމާނީ ފެންވަރަށް ތަރައްޤީކޮށްދެއްވުމަށްވެސް ކައުންސިލަރުން އެދިވަޑަގެންނެވިއެވެ. މީގެއިތުރުން ސްކޫލުގެ އިމާރާތުގެ ހާލަތު ރަނގަޅުކުރުމަށް، ސްކޫލަށް އިތުރު އިމާރާތާއި ކްލާސްރޫމްތައް ބޭނުންވާކަން ކައުންސިލްގެ ފަރާތުން ފާހަގަކުރެއްވިއެވެ.
ރައީސް ޑރ. މުޢިއްޒުގެ ވައުދުފުޅާ އެއްގޮތަށް އަރިއަތޮޅު ދެކުނުބުރީ އޮމަދޫގައި ފަތުރުވެރިކަން ހިމެނޭގޮތުން އިޤްތިޞާދީ ގޮތުން ރައްޔިތުންނަށް މަންފާވާނެފަދަ ތަރައްޤީގެ މަސައްކަތްތައް ހިންގުމަށްޓަކައި އަރިއަތޮޅު ދެކުނުބުރީގައި އޮންނަ ކުޑަދޫފަޅާއި އަރިއަތޮޅު ދެކުނުބުރި ކޯޑު ނަންބަރު RF1329 ފަޅާއި އަރިއަތޮޅު ދެކުނުބުރި ކޯޑު ނަންބަރު RF1330 ފަޅަކީ، އަރިއަތޮޅު ދެކުނުބުރީ އޮމަދޫ ގެ ބައެއް ކަމުގައި ރައީސް ވަނީ ހަމަޖައްސަވާފައެވެ.
ދިގުރަށް:
ދިގުރަށު ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރައްވައި ރައްޔިތުންނަށް އެންމެ މުހިންމު ކަންކަމާ ގުޅޭގޮތުން ވަނީ މަޝްވަރާކުރައްވާފައެވެ. މިގޮތުން ކައުންސިލުން ވަނީ ރަށު ބަނދަރު އަޕްގްރޭޑް ކުރުމުގެ މަސައްކަތް ހުއްޓިފައިވާތީ އެކަމުގެ ކަންބޮޑުވުން ފާޅުކުރައްވައި އެ މަސައްކަތް އަވަސްކުރެއްވުމަށް އެދިވަޑައިގެންފައެވެ. އަދި ރަށުގެ މަގުތައް ރައްޔިތުން ބޭނުންވާގޮތަށް ހަދައިދިނުމަށާއި ޒުވާނުންނަށް މިހާރު އެންމެ ބޮޑަށް ބޭނުންޖެހިފައިވާ ފުޓުބޯޅަ ދަނޑު ގާއިމުކޮށްދެއްވުމަށްވެސް ކައުންސިލްގެ ފަރާތުން އެދިވަޑައިގެންނެވިއެވެ. މި ބައްދަކުރެއްވުމުގައި މުއައްސަސާތަކުގެ އިސްވެރިން ވަނީ ސްކޫލުގެ ޖާގައިގެ ދަތިކަމަށް ހައްލެއް ގެނެސްދެއްވުމަށް އެދިވަޑައިގެންފައެވެ. މީގެ އިތުރުން މި ބައްދަލުކުރެއްވުމުގައި ކައުންސިލުން ވަނީ ރަށުގައި ޑޮލަރު އޭ.ޓީ.އެމެއް ބެހެއްޓުމަށާއި ކޮންވެންޝަންސް ސެންޓަރެއްގެ އިތުރުން ސްޕޯޓްސް ކަނދުފައްޗެއްގެ މުހިންމުކަން ފާހަގަކުރައްވާފައެވެ.
ދިއްދޫ:
ރަށު ކައުންސިލާއި، ރަށުގެ މުއައްސަސާތަކުގެ އިސް ވެރިންނާއި ރަށުގައި މިވަގުތު ދިރިއުޅެމުންދާ ރައްޔިތުންނާއެކު މިއަދު، ދިއްދޫ ބަނދަރު ސަރަހައްދުގައި ކުރިއަށް ގެންދެވި މަޝްވަރާ ބައްދަލުކުރެއްވުމުގައި، ދިއްދޫ ރައްޔިތުންގެ އާންމު އިޖުތިމާޢީ ތަރައްޤީއަށް ބޭނުންވެފައިވާ ކަންކަން ވަނީ ހިއްސާކުރައްވާފައެވެ. މި ބައްދަލުކުރެއްވުމުގައި ރަށު ކައުންސިލާއި ރައްޔިތުން ވަނީ ބަނދަރުގެ ނެރުފައިކަށި މިހާރު ހުރިތަނުގެ ގޮތުން ހުޅަނގު މޫސުމުގައި ބަނދަރު ބޭނުންކުރުމުގައި ދިމާވާ ދަތިތަކާއި އުނދަގޫތައް ހިއްސާކުރައްވާފައެވެ. މީގެ އިތުރުން ރަށުގެ ހުއްޓިފައިވާ ފެނާއި ނަރުދަމާގެ މަޝްރޫޢާއި ބެހޭގޮތުން ރައްޔިތުން ވަނީ މަޢުލޫމާތު ހިއްސާކުރައްވާފައެވެ.
ފެންފުށި
އަރިއަތޮޅު ދެކުނުބުރީ ފެންފުށީ ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރައްވައި ރައްޔިތުންނަށް އެންމެ މުހިންމު ކަންކަމާ ގުޅޭގޮތުން މަޝްވަރާކުރައްވައިފައެވެ. މި ބައްދަލުކުރެއްވުން ކުރިއަށްދިޔައީ މިއަދު އދ. ފެންފުށީ ކައުންސިލް އިދާރާގައެވެ. ކައުންސިލް މެންބަރުން ދެއްކެވި ވާހަކަފުޅުގައި ރަށުގެ ތަރައްޤީއަށް އެންމެ ބޭނުންވާ ކަންކަން ވަނީ ހިއްސާކުރައްވާފައެވެ. މިގޮތުން ކައުންސިލުން ވަނީ ފެނާނަރުދަމާގެ ނިޒާމު ގާއިމު ކުރުމުގެ މަސައްކަތް އަވަހަށް ނިންމަވައިދެއްވުމަށް އެދިވަޑައިގެންފައެވެ. މީގެ އިތުރުން ސްކޫލުގެ ހަތަރު ކްލާސްރޫމްގެ މަސައްކަތް ނުނިމި ގިނަ ދުވަސްތަކެއްވެފައިވާ ކަމަށާއި އެކަމުގެ ސަބަބުން ސްކޫލްގެ ކިޔެވުން އެއް ދަންފަޅިއަށް ބަދަލު ކުރުމަށް ހުރި ގޮންޖެހުންތައް ކައުންސިލް މެންބަރުން ހިއްސާކުރެއްވިއެވެ. މެންބަރުން ވަނީ، ރަށުގައި އަޅާ މިސްކިތުގެ މަސައްކަތުގެ ތެރެއަށް ހިނަވާގެއެއް އިތުރުކޮށް، ހިމަނައިދެއްވުމަށް އެދިވަޑައިގެންފައެވެ.
މާމިގިލި
މާމިގިލީ ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރައްވައި ރައްޔިތުންނަށް އެންމެ މުހިންމު ކަންކަމާ ގުޅޭގޮތުން ވަނީ މަޝްވަރާ ކުރައްވާފައެވެ. މި ބައްދަލުކުރެއްވުން ކުރިއަށްގެންދިޔައީ މިއަދު، މާމިގިލީ އިޖުތިމާއީ މަރުކަޒުގައެވެ. ކައުންސިލް މެންބަރުން ވަނީ، ރަށުގެ ތަރައްޤީއަށް އެންމެ ބޭނުންވާ ކަންކަން ހިއްސާކުރައްވާފައެވެ. މިގޮތުން، ރަށުގެ މަގުތަކުގައި ތާރު އެޅުމުގެ މަސައްކަތް ދިގުލައިގެންދިއުމުގެ ސަބަބުން ކުރިމަތިވާ ދަތިތަކާއި، ރަށުން ކުނި ބޭރުކުރުމަށް ހުރި ގޮންޖެހުންތަކާއި، ކުނި މެނޭޖުކުރުމަށް އެކަށޭނަ ގޮތެއް ހޯދުމުގެ މުހިންމުކަމާއި، ރަށުގެ ބަނދަރު ބޭނުންކުރުމުގައި މިހާރު ހުރި ދަތިތައްވެސް ކައުންސިލުން ހިއްސާކުރެއްވިއެވެ. މީގެ އިތުރުން، ޕާސްޕޯޓާއި އައި.ޑީ. ކާޑުގެ ޚިދުމަތް ރަށުގައި ފައްޓަވައިދެއްވުމަށާއި، ޒުވާނުންގެ ބޭނުމަށް ސްޕޯޓްސް ފިޝިންގ ބޮޔެއް އަޅައިދިނުމަށް ކައުންސިލުން އެދިވަޑައިގެންނެވިއެވެ. އަދި މާމިގިލީ ސިއްޙީ މަރުކަޒަށް އިތުރު މުވައްޒަފުން ބޭނުންވާކަމާއި، މާމިގިލީ ސްކޫލަށް އޮފީސް އިމާރާތަކާއި އެހެނިހެން ވަސީލަތްތައް ބޭނުންވާކަންވެސް ކައުންސިލު މެންބަރުން ފާހަގަކުރެއްވިއެވެ.
ރަށްރަށުގެ ކައުންސިލުތަކުން ފާހަގަކުރެއްވި ކަންކަން ބައްލަވާނެކަމުގައި ރައީސް ވިދާޅުވިއެވެ. އަދި ބައްދަލަކުރެއްވުމުގައި ބައިވެރިވެވަޑައިގެންނެވި ވަޒީރުންނާއި، ދައުލަތުގެ ކުންފުނިތަކުގެ ވެރިން މެދުވެރިކުރައްވައި އެމަނިކުފާނު ވަނީ، ރަށުގައި ކުރިއަށްދާ މަޝްރޫޢުތަކުގެ އަދާހަމަ މަޢުލޫމާތު ޙިއްޞާކުރައްވާފައެވެ.
