ގިނަ ދުވަހަކަށް އިންތިޒާރު ކުރާކަށް ނުޖެހުނެވެ. އެމީހުން ބޭނުންވިހާ އަވަހަށް އެމަސައްކަތް ފަށަން ތައްޔާރުވިއެވެ. އަދި ރޭގަނޑުގެ ބިރުވެރި، އަދި މީހުން ނިދާ ވަގުތު، އަބްދުﷲ އާއި އެ ބޭރު މީހާ ހަކީމްބެ، ގަބުރުސްތާނާއި ދިމާލަށް ހިނގައިގަތެވެ. އެމީހުން ފިޔަވަޅު އަޅަމުންދިޔައިރު، ވަރަށް ހިމޭންކަން ބޮޑުކަމުން، އެމީހުންގެ ފިޔަވަޅުގެ އަޑުވެސް އިވެއެވެ. ގަބުރުސްތާނު ތެރެއިން ދުރުން އިވެމުންދިޔަ ހީނުކުރާ އަޑުތަކާއި، ކަޅު ހިޔަނިތަކުގެ ހިލަންތަކުން އަބްދުﷲގެ ހިތް ބިރުން ތެޅިގަތެވެ. ނަމަވެސް އޭނާގެ ހިތްވަރު އެލުވާނުލައެވެ.
އެމީހުން ގަބުރުސްތާނުގެ ކޮޅުގައި ހުރި ހަލާކުވެފައިވާ ވަޅުގެ ކައިރިއަށް ދިޔައެވެ. އެތަނުގެ ވަށައިގެން ހުރީ ވަރަށް ބޮޑެތި ގަސްގަހާގެއްޔެވެ. ވަޅުގެ ތެރެއިން ނުފެންނަ ކަޅުކަމެއްގެ އަސަރު ފެނުނެވެ. އެ ވަޅުގެ ކައިރީގައި ހުރި ބައެއް ގަސްތަކުން ހިމޭން އަޑުތައް އިވެއެވެ. އެ އަޑުތަކުން ހީވަނީ އެތަނުގައި ނުފެންނަ ބާރެއްވާހެންނެވެ.
"ފޮތުގައިވާ އަކުރުތައް ކިޔަވަން ފަށާ. އަދި ހިތްވަރުގަދަ ކުރާތި." ބޭރު މީހާ ކަމަށްވާ ހަކީމްބެ އަބްދުﷲ އަށް އިރުޝާދު ދިނެވެ.
އަބްދުﷲ ފޮތް ހުޅުވާލުމާއެކު، އޭނާގެ އަތްތިލަ ދޫވިހެން ހީވިއެވެ. ނަމަވެސް އޭނާ ހިތްވަރުކޮށްލައި، އަޑުގަދަކޮށް އަކުރުތައް ކިޔަން ފެށިއެވެ. އޭނާ ކިޔަވަމުންދިޔަ ވަރަކަށް، ވަޅުގެ ތެރެއިން ބިރުވެރި އަޑުތައް ގަދަވާން ފެށިއެވެ. އެއަޑުތައް ހީވަނީ އެތަނުގައި ތާށިވެފައިވާ ބާރެއް ދޫކޮށްލަން މަސައްކަތްކުރާ ހެންނެވެ. ބައެއް ގަސްތަކުގެ ފަތްތައްވެސް ހެލެމުން ދިޔައެވެ.
އެ ބިރުވެރި މަންޒަރު ފެނި އަބްދުﷲ އަށް ހީވީ އޭނާގެ ހިތް ހުއްޓިގެންދާހެންނެވެ. ނަމަވެސް އޭނާ ކިޔެވުން ހުއްޓާނުލިއެވެ. ކިޔެވުން ނިމިގެންދިޔަ ވަގުތު، ވަޅުގެ ތެރެއިން ބޮޑު އަލިކަމެއް ފެނި، އަލިކަމާއެކު އަޑެއް ގަދަވެ، ކޮންމެވެސް އެއްޗެއް ވައިގެ ތެރެއަށް ގެއްލިގެންދިޔައެވެ. އެއާއެކު ގަބުރުސްތާނު ތެރެއަށް ހަމަހިމޭންކަން ވެރިވިއެވެ. ކޮންމެވެސް ގަހެއްގައި އިން ކާޅެއްގެ އަޑު ފިޔަވައި އެއްވެސް އަޑެއް ނީވެއެވެ. ބިރުވެރިކަން ފިލައިގެންދިޔަ ހެން އަބްދުﷲ އަށް ހީވިއެވެ.
އޭނާ ނޭވާލާން އުނދަގޫވާވަރަށް ހާސްވެފައި ހުރުމަށްފަހު، އެއްފަހަރާ ގަދަޔަށް ނޭވާ ދޫކޮށްލިއެވެ. ހަކީމްބެ އަބްދުﷲ އަށް ބަލާލަމުން އިޝާރާތަކުން ހިނގައިގަތުމަށް ބުންޏެވެ. ދެމީހުންވެސް ވަޅުގެ ކައިރިން ދުރަށް ޖެހިލިއެވެ. މިހާރު ގަބުރުސްތާނުތެރެ ކުރިއަށްވުރެ އެތައް ގުނައެއް ހަމަހިމޭންކަން ބޮޑުކަމުން، އެމީހުންގެ ހިތަށް ކޮންމެވެސް ވަރެއްގެ ހަމަޖެހުމެއް ލިބުނެވެ.
ގަބުރުސްތާނުގެ ދޮރާ ހަމައަށް ދިޔައިރުވެސް އަބްދުﷲގެ ހިތުގެ ތެޅުން އަދިވެސް ގަދައެވެ. ނަމަވެސް އޭނާގެ ހިތުގައި އުފެދުނު ބިރުވެރިކަން ވަނީ ފިލައިފައެވެ.
"އަބްދުﷲ، މިއަދު އަހަރެމެން ކުރީ ވަރަށް ބޮޑު މަސައްކަތެއް. އެ ވަޅުގައި ހައްޔަރުވެފައިހުރި ބާރެއް ނުވަތަ އެއްޗެއް ވަނީ މިތަނުން ދޫކޮށްލެވިފަ" ހަކީމްބެގެ އަޑުގައި ހިމޭންކަމާއި، ވަރުބަލިކަމުގެ އަސަރު ހުއްޓެވެ.
"އެއީ ކޮން އެއްޗެއް؟" އަބްދުﷲ ސުވާލުކުރިއެވެ. އޭނާގެ އަޑުގައި ވަނީ ހައިރާންކަމާއި ބިރުވެރިކަމުގެ ނިޝާންތަކެވެ.
"އެއީ ޒަމާނުއްސުރެ މިތަނުގައި ހައްޔަރުވެފައިވާ، އެއްވެސް މީހަކަށް އެނގުމެއްނެތި އެތަކެއް ރޫހުތަކެއް އޭގެ ތެރެއަށް ދަމައިގަނެފައިވާ ބާރެއް. މިހާރު އެއަށް އެކަން ކުރެވޭނެކަމެއް ނެތް. މިރޭ އެއަށް މިނިވަންކަން ލިބި، މިތަނުން ނެތިގެން ހިނގައްޖެ" ހަކީމްބެ ދުރު ބަލަމުން ބުންޏެވެ.
އެރޭ އަބްދުﷲ އަށް ރަނގަޅަށް ނިދިފައެއް ނެތެވެ. ގަބުރުސްތާނު ތެރޭގައި ހިނގާދިޔަ ކަންތައްތައް އޭނާގެ ސިކުނޑީގައި ތަކުރާރުވަމުންދިޔައެވެ. ވަޅުގެ ތެރެއިން އިވުނު އަޑުތަކާއި، ހަކީމްބެ ބުނި ވާހަކަތައް އޭނާގެ ހިތަށް ބިރުވެރިކަން ގެނުވައެވެ. ހާއްސަކޮށް، "އެތަކެއް ރޫހުތަކެއް އޭގެ ތެރެއަށް ދަމައިގަނެފައިވާ ބާރެއް" މި ޖުމްލަ އޭނާގެ ހިތުގައި ހަރުލައިފިއެވެ. މިހާރު އެ ބާރު މިނިވަންވެއްޖެނަމަ، އެއަށް ކޮން ކަމެއް ކުރެވިދާނެބާވައޭ އަބްދުﷲ ހިތާހިތުން ސުވާލުކުރިއެވެ.
އެ ދުވަހުގެ ފަހުން، ރަށުގެ އެކި ކަންކޮޅުތަކުން އާދަޔާ ޚިލާފު ވާހަކަތައް އިވެން ފެށިއެވެ. ބައެއް މީހުންނަށް ރޭގަނޑު ބިރުވެރި ހުވަފެންތައް ފެންނަން ފެށިއެވެ. އަނެއް ބަޔަކަށް އިވެނީ ރޭގަނޑުގެ ވަގުތުގައްޔާއި، ދުވާލުގެ ވަގުތުގައިވެސް ކޮންމެވެސް ތަނަކުން ނިކުންނަ އާދަޔާ ޚިލާފު އަޑުތަކެވެ. މި އަޑުތަކަކީ އެއްވެސް އިރެއްގައި އެ ރަށުގެ މީހުން އިވިފައިވާ އަޑުތަކެއް ނޫނެވެ. ބައެއް ފަހަރު މި އަޑުތަކަކީ ގިސްލާ އަޑުތަކެކެވެ. އަނެއްބައި ފަހަރު މީހަކު އެއްޗެއް ދަމާފައި ގެންދާ އަޑުތަކެވެ. އަބްދުﷲ އަށް މި ވާހަކަތައް އިވުމުން، އޭނާގެ ހިތް އުނދަގޫވާން ފެށިއެވެ. މިއީ އެ ވަޅުން ދޫކޮށްލެވުނު އެއްޗެއްގެ އަސަރުތޯ އޭނާގެ ހިތުގައި ސުވާލު އުފެދުނެވެ.
ރޭގަނޑު، އަބްދުﷲ ހަމަހިމޭނުން ގޭގައި އިންދާ ކުއްލިއަކަށް ބޭރުން ވަޔަށް ވުރެ ބާރަށް އެނބުރޭ އަޑެއް އިވެން ފެށިއެވެ. އެއަޑާއެކު ފިނި ވަޔެއް ކޮޓަރިތެރެއަށް ވަދެގެން ދިޔަ ކަހަލައެވެ. އޭނާގެ މުޅި ހަށިގަނޑު ހީވީ ގަނޑުވިހެންނެވެ. ފެންކަޅިވެފައިވާ ލޮލަކުން ފާރުގައި ހުރި ގަޑިއަށް ބަލާލިއިރު ގަޑިން މެންދަމު ދޭއް ޖަހަނީއެވެ. ހަކީމްބެ ބުނީ އެއަށް މިނިވަންކަން ލިބުނީ މިރޭ ކަމަށެވެ. އެ ވަގުތު އަބްދުﷲގެ ހިތަށް ބިރުވެރިކަމެއް ވެރިވެގަތެވެ. އެއީ ހަމަ އެއްޗެއްބާއެވެ؟ އަހަރެމެން މިނިވަން ކުރީ ނުބައި އެއްޗެއްބާއެވެ؟ މި ވާހަކަތަކާއެކު، އޭނާގެ ހިތް ތެޅިގަނެ، ހަށިގަނޑުން ބާރު ދޫވާން ފެށިއެވެ.
އޭނާގެ ކޮޓަރީގެ ދޮރުމަތީގައި ހުރި ގޮނޑި، މަޑުމަޑުން ތެޅެމުން ދިޔައީ ކޮންމެވެސް ބާރެއް ކޮޓަރި ތެރޭގައި ހަރަކާތްތެރިވަމުން ދާކަން ހަނދާންކޮށްދެމުންނެވެ. އެހެންނަމަވެސް، ފަތިސްވުމާއި ހަމައަށްވެސް އެއްވެސް އިތުރު އަޑެއް އަބްދުﷲ އަކަށް އިވިފައެއް ނުވެއެވެ.
އެ ދުވަހުގެ ހެނދުނު އަބްދުﷲ ހޭލީ މުޅިން ވަރުބަލިވެފައެވެ. އޭނާ ނާސްތާ ކުރުމަށްފަހު އަވަހަށް ހަކީމްބެގެ ގާތަށް ދާން ނިންމިއެވެ. ހިތަށް އުނދަގޫތަކެއް ވެރިވެފައިވާތީ، ވާހަކަ ދައްކާލެވޭނެ އެކަކީ ހަކީމްބެ ކަމަށް އޭނާ ގަބޫލުކުރިއެވެ. ހަކީމްބެގެ ގޭގެ ދޮރުމަތިން އަބްދުﷲ އަށް ފެނުނީ ހަކީމްބެ ހުދުކުލައިގެ ދިގު ހެދުމެއްގައި ބޭރަށް ނުކުންނަން ތައްޔާރުވެގެން ހުއްޓައެވެ. ހަކީމްބެގެ މޫނުމަތިންވެސް ފެންނަމުންދިޔައީ ކޮންމެވެސް ކަމަކާ ހާސްވެފައިވާ ކަމުގެ އަސަރެވެ.
"ހަކީމްބެ" އޭނާގެ އަޑުގައި ހިތްހަމަނުޖެހުމުގެ އަސަރު ހުއްޓެވެ.
ހަކީމްބެ ހައިރާންވެފައި އަބްދުﷲ އަށް ބަލާލިއެވެ. "އަބްދުﷲ، ތިއައީ ރަނގަޅު ވަގުތެއްގައި. އަހަރެން މި ދަނީ އަބްދުﷲގެ ގާތަށް. އަހަރެންނަށް ރޭ ހީވި، އެއްވެސް އިރެއްގައި ނުވާވަރުގެ ކަންތައްތަކެއް ރަށުތެރޭގައި ހިނގަމުންދާ ކަމަށް" ހަކީމްބެގެ އަޑުގައި ވަނީ ކޮންމެވެސް ވަރެއްގެ ބިރުވެރިކަމެކެވެ.
"އަހަރެންނަށްވެސް ރޭ ދޭއް ޖެހިއިރު، އިވުނީ ބޮޑު އަޑެއް، ދޮރުތައް ތެޅިގަތް. އެއީ ހަމަ އެއްޗެއްބާ؟ އެއީ ނުބައި އެއްޗެއްބާ؟" އަބްދުﷲގެ ހިތް ތެޅިގަނެ، ހަކީމްބެ ކައިރީ ބަލާލިއެވެ.
"އަހަރެމެން އެ ދޫކޮށްލީ ވަރަށް ނުރައްކާތެރި ބާރެއް. އެއީ އެހާ ފަސޭހައިން ކޮންޓްރޯލް ކުރެވޭނެ އެއްޗެއް ނޫން. އޭގެ ނުރައްކާތެރިކަން މިހާރު ރަށަށް ފެތުރެން ފަށައިފި. މިހާރު ބައެއް މީހުންނަށް އާދަޔާ ޚިލާފު ގޮތްތައް ވަމުން ދާކަމުގެ ވާހަކަތައް އިވެމުންދަނީ" ހަކީމްބެ ފުން ނޭވައެއް ލަމުން، އަބްދުﷲގެ ކޮނޑުގައި ހިފާލަމުން ބުންޏެވެ.
"އެއީ ކޮންކަހަލަ ގޮތްތަކެއް ހަކީމްބެ؟" އަބްދުﷲ ހައިރާންވެފައި ހަކީމްބެއަށް ބަލާލިއެވެ.
"ރަށުތެރޭގައި ވަރަށް ބޮޑު ބިރުވެރިކަމެއް މިހާރުވަނީ އުފެދިފައި. ރޭ ރަށުގެ ދެ ކުއްޖަކު ވަނީ ގެއްލިފަ. އެއްވެސް ހަބަރެއް ނުވޭ. އަދި ބައެއް ގޭގޭގެ ބަދިގޭގައި ހުރި ތަކެތި، ތެޅި، ބިންދައިގެން ގޮސްފައިވާ ކަމަށްވެސް އެބަ އިވޭ. މިހާރު ރަށުގެ މީހުން އެބަބުނޭ، ރޭގަނޑު މީހުން ނިދާފައި ތިބޭ ވަގުތު، ގަބުރުސްތާނު ދިމާއިން، ވަރަށް ބިރުވެރި އަޑުތަކެއް އިވެމުންދާ ކަމަށް" ހަކީމްބެގެ އަޑުގައި ވަނީ ހާސްކަމާއި، މާޔޫސްކަމުގެ އަސަރެވެ.
އަބްދުﷲގެ މުޅި ހަށިގަނޑު ހީވީ ގަނޑުވިހެންނެވެ. އެއީ ހަމަ ކޮންއެއްޗެއްބާއޭ އޭނާ ހިތާހިތުން ސުވާލުކުރިއެވެ. ހަމަގައިމުވެސް އެއީ ރޫހެއް ނޫންކަން އޭނާއަށް އެނގެއެވެ. އެކަމަކު އެއީ ކޮން އެއްޗެއްކަމެއް އޭނާއަކަށް ނޭނގެއެވެ. ހަކީމްބެއަށް ބަލާލިއިރު، ހަކީމްބެވެސް ހީވަނީ ދުރަށް ބަލަން ހުރިހެންނެވެ. ހަކީމްބެގެ ހިތުގައިވެސް ކޮންމެވެސް ވަރެއްގެ ބިރުވެރިކަމެއް އެބައޮތްކަން އަބްދުﷲ އަށް އެނގުނެވެ.
"ދެން ކީއްކުރަނީ ހަކީމްބެ؟" އަބްދުﷲ އަށް އަހާލެވުނެވެ.
"އަހަރެމެންނަށް މިހާރު ކުރެވޭނެ އެއްވެސް ކަމެއް ނެތް. އެއަށް މިނިވަންކަން ލިބުމުން، އެތައް ރޫހެއް އޭގެ ތެރެއަށް ދަމައިގަނެ، އެހެން އެއްޗަކަށް ބަދަލުވެއްޖެ. މިހާރު އެއީ އިތުރު ބާރެއް. މި ރަށަށް ވަރަށް ބޮޑު ނުރައްކަލެއް މިހާރު ވަނީ ކުރިމަތިވެފަ" ހަކީމްބެ ދެބަސްވުމެއްނެތި އަބްދުﷲ އަށް ބަލާލަމުން ބުންޏެވެ.
ހަކީމްބެގެ ވާހަކަތަކުން އަބްދުﷲގެ ހިތް ފަޅައިގެންދިޔަ ކަހަލައެވެ. އެމީހުން ކުރި މަސައްކަތުގެ ނަތީޖާ އަކީ މިއީ ބާވައެވެ؟ އެނގިތިބި ހާލުގައި ރަށަށް ނުރައްކަލެއް ކުރިމަތިކުރުވީ ބާވައެވެ؟ މި ސުވާލުތައް އޭނާގެ ސިކުނޑީގައި ތަކުރާރުވަމުން ދިޔައެވެ. އަބްދުﷲގެ ނަޒަރު ހިނގައިގަތީ ރަށުގެ ހިމޭން މާހައުލަށެވެ. އެ ހިމޭންކަން ހީވަނީ، ކޮންމެވެސް ބިރުވެރި، ނުރައްކާތެރި ހަމަލާއަކަށް ތައްޔާރުވަމުންދާ ކަހަލައެވެ.
ރޭގަނޑުވުމާއެކު ގޭތެރޭގައި ތިބެން އެންމެން މަސައްކަތް ކުރިއެވެ. ބައެއް ގޭގޭގެ ބޭރުގައި ދިއްލާ ބޮކިތައް ނިވި، އެއްވެސް އަލިކަމެއް ނެތިގެން ދާން ފެށިއެވެ. ކުއްލިއަކަށް ބޭރުން އިވެނީ ބިރުވެރި ހަޅޭއްލެވުންތަކެވެ. އެ އަޑުތައް ރަށުގެ އެކި ދިމާތަކުން އިވެން ފެށުމުން، މީހުންގެ ހިތްތަކަށް އިތުރު ބިރުވެރިކަމެއް ވެރިވެގަތެވެ. ކޮންމެ ދުވަހަކު ހެނދުނު ހޭލާއިރު، އަބްދުﷲއަށް އިވެނީ ރަށުގެ އެކި ގޭގޭގެ ދޮރުމަތީގައި މީހުން އެއްވެފައިވާ ވާހަކަތަކެވެ. އޭގެ ތެރެއިން ގިނަ ވާހަކަތަކަކީ ރޭގަނޑު ދެމީހުން ގެއްލިފައިވާ ކަމުގެ ވާހަކައެވެ. ނުވަތަ އެއަށްވުރެ ބޮޑަށް ހިތްދަތި ކަންކަމެވެ. އެމީހުންގެ ސިކުނޑިއަށް ވަނީ ނުތަނަވަސްކަމެވެ.
= ނުނިމޭ =
