ހެނދުނު އަޝްރަފަށް ހޭލެވުނުއިރު ހުރީ ކުޑަކޮށް ހުން އައިސްފައެވެ. އަމީނާ އަވަސް އަވަހަށް ބޭސްގުޅައެއް ގެނެސް އަޝްރަފްއަށް ދިންއިރު، އޭނާގެ މަންމަ ހުރީ ބަދިގޭގައި ސައި ތައްޔާރުކުރުމުގައެވެ. މިހާރު އަމީނާގެ މަންމަގެ ހާލުވެސް ދުވަހެއް ދުވަހަކަށް ދަނީ ރަނގަޅު ވަމުންނެވެ. އެކަމަށްޓަކައި އަމީނާގެ ހިތުގައި އޮތް ކަންބޮޑުވުން ކޮންމެވެސް ވަރަކަށް ވަނީ ލުއިވެފައެވެ.
"އަމީނާ. އަޝްރަފްއާއި ދެކުދިން އަވަހަށް އާދޭ ސައިބޯން" އަމީނާގެ މަންމަ ގޮވާލިއެވެ.
ސައިމޭޒު ކައިރީގައި އެމީހުން އިށީދެއްޖެއެވެ. ކިތަންމެ ހިތްފަސޭހަކޮށް ސައިބޯން އިށީނދެވުނު ނަމަވެސް، އެ ބިރުވެރިކަމުގެ ހިޔަނި އެމީހުންގެ މައްޗަށް އަބަދުވެސް ވެރިވެފައި ހުއްޓެވެ. ކޮންމެ ނޭވާއެއްގައިވެސް، ކޮންމެ ބަހެއްގައިވެސް އެ 'އަހަރެން އަދިވެސް މިހިރީ' ކިޔާ އަޑުގެ ރާޅުބާނި އިވެމުންދާ ކަހަލައެވެ. މިއީ ހަމައެކަނި އަޑެއް ނޫނެވެ. މިއީ އެމީހުންގެ ހިތާއި ސިކުނޑިއަށް ވަދެފައިވާ ހިޔަންޏެކެވެ. ދުވަހުގެ ކަންކަމުގައި މަޝްޣޫލުވެތިބޭއިރުވެސް، އެ ބިރުވެރިކަން ހަނދާނުން ފިލައި ނުދެއެވެ.
"އައްސަލާމް އަލައިކުމް" ބޭރުން މީހަކު ގޮވާލިއަޑަށް އަމީނާގެ މަންމަ ބޭރަށް ނިކުތެވެ.
"ކާކު. ކާކު މަންމާ" އަމީނާވެސް އޭނަގެ މަންމަގެ ފަހަތުން ބޭރަށް ނިކުތެވެ.
ބޭރުގައި ހުރީ ސިއްތިއެވެ. ސިއްތި މޫނުމަތިން ނުތަނަވަސް ކަމުގެ ކުލަވަރު ފެންނަމުން ދިޔައެވެ.
"ސިއްތި، ކިހިނެއްވީ؟ މޫނުމަތިން ކަންބޮޑުވެފައި ހުރިހެން ހީވަނީ؟" އަމީނާގެ މަންމަ ސިއްތި ކައިރިއަށް ޖެހިލަމުން އެހިއެވެ. އަމީނާވެސް ހައިރާންކަމާއެކު ސިއްތިގެ މޫނަށް ބަލަން ހުއްޓެވެ.
ސިއްތި މަޑުމަޑުން އެދެމީހުންނާއި ދިމާލަށް ބަލާލިއެވެ. އޭނާގެ ދެލޯ ފެންކަޅިވެފައި ހުއްޓެވެ. އަޑު ބޭރުކުރަން އުނދަގޫވެގެން އުޅޭހެން ހީވިއެވެ.
"ސަމަދު... ސަމަދު މިއަދު...." ސިއްތިގެ އަޑު ތުރުތުރުލާން ފެށިއެވެ. އޭނާއަށް އިތުރަށް ވާހަކަ ދެއްކޭގޮތެއް ނުވިއެވެ. ހިތްދަތިކަމުން އެ މޫނުމަތި ރަތްވެ، ކަރުނަ ފައިބައިގެން ދިޔައެވެ.
"ކިހިނެއްވީ ސިއްތި؟ ސަމަދުއަށް ކިހިނެއްވީ؟" އަމީނާގެ މަންމަ ސިއްތިގެ ކޮނޑުގައި ހިފާލަމުން އަހަލިއެވެ.
ސިއްތި ދެކޮޅަށް ބޯހޫރާލިއެވެ. "ސަމަދުވެސް... ސަމަދުވެސް މަރުވެއްޖެ" މިބަސްތައް އިވުމާއެކު އަމީނާގެ މަންމަގެ މޫނުމަތި ކުއްލިއަކަށް ހުދުވެ، ހަށިގަނޑު ގަޑުވިއެވެ.
އަމީނާގެ ދެލޮލުން ކަރުނަ އޮހޮރިގަތީ އޭނާއަށް އިޚްތިޔާރެއް ނެތިއެވެ. މިއީ އެ 'ހިޔަނި'ގެ އާ ޝިކާރައެއްކަން އެނގުމުން އެދެމައިންގެ ހިތްތަކުގައި ބިރުވެރިކަމުގެ އާ ރާޅެއް އުފެދިގެން ދިޔައެވެ.
"މިހުރިހާ ކަމެއް މެދުވެރިވީ ކަލޭގެ ދަރިފުޅަށް މޮޅުގޮތް ހޯދަން ކުރިމަސައްކަތުން" ސިއްތި ހަރުކަށިކަމާއި އެކު ވާހަކަ ދައްކަން ފެށިއެވެ.
"މިހުރިހާ ކަމެއް މެދުވެރިވީ ކަލޭގެ ދަރިފުޅަށް މޮޅުގޮތް ހޯދަން ކުރިމަސައްކަތުން" ސިއްތި ހަރުކަށިކަމާއި އެކު ވާހަކަ ދައްކަން ފެށިއެވެ.
"އެ ދުވަހުވެސް އަހަރެން ބުނިން ދޯ، އެއީ ރަނގަޅު ގޮތެއް ނޫނޭ" އަނެއްކާވެސް ސިއްތި ވާހަކަ ދައްކަން ފެށިއެވެ.
އަމީނާގެ މަންމަ ސިއްތީގެ ވާހަކަ އަޑުއަހާފައި ބޮލުގައި ދެއަތުން ހިފާލިއެވެ. ދަރިފުޅު އަމީނާއަށް ދިމާވި މައްސަލަޔަށް ހައްލެއް ހޯދަންވެގެން ކުރި މަސައްކަތުން، އޭނާގެ ދުނިޔެ މިވަނީ އަނދިރިކަމުގެ ވަޅުގަނޑަކަށް ވެފައެވެ. ސިއްތީގެ ހިތްދަތި ކުރުވަނިވި ބަސްތައް އޭނާގެ ހިތަށް އޮތް ބުރައެއް ފަދައެވެ.
"އަމީނާ ދަރިފުޅާ. މިއަދު މިކަން މިގޮތަށް ދިމާވީ ކޮންމެވެސް އެއްޗެއް ދޫކޮށްލެވުމުން ކަމަށްވޭ. އެކަމުގެ ސަބަބުން މިހާރު 'ހިޔަނި' މިހިރީ އަހަރެމެންގެ ހުރިހާ އުފަލެއް ފޭރިގަންނަން" އަމީނާގެ ބޮލުގައި ފިރުމާލަމުން އޭނަގެ މަންމަ ބުންޏެވެ.
އެ މަންމަގެ އަޑުގައިވަނީ ނިމުމެއް ނެތް ހިތާމައާއި މާޔޫސްކަމެވެ.
އަމީނާގެ މަންމަގެ ހިތުގައި ހިގަމުން ދިޔައީ ނުބައި ޚިޔާލުތަކެކެވެ. ދަރިފުޅަށް ކުރިމަތިވެފައިވާ ކަންތަކުން ސަލާމަތް ކުރުމަށްޓަކައި އެދުވަހު އޭނާ ކުރި މަސައްކަތްތައް ހަނދާންވިއެވެ.
"އެއީ ހަމަ އެއްގޮތަކަށްވެސް ރަނގަޅު ގޮތެއް ނޫން" ސިއްތި އޭރު ބުނި ބަސްތައް ކަންފަތުގައި ގުގުމާލިއެވެ.
އަމީނާގެ މަންމަގެ ހަނދާނަށް އައީ އަމީނާއަށް ކުރިމަތިވި ނޭނގޭ ބައްޔެވެ. ހިނިގަނޑެއް ނުޖަހާ، ކުޅޭހިތެއް ނުވެ، އަބަދުވެސް މާޔޫސްކަމުގެ ތެރޭގައި އަމީނާ އުޅެން ފެށީ އެ ބަލި ޖެހުނު ފަހުންނެވެ. އެ ބަލީގެ ސަބަބުން އަމީނާގެ އުފާވެރިކަން ގެއްލި، މުޅި ގެއަށް ވަނީ ހިތާމައިގެ ހިޔަނިއެއް އެޅިފައެވެ. އޭނަގެ ހިތްދަތިކަން ފެނިފައި، މަންމަ ވަނީ ކޮންމެ ގޮތަކުން ނަމަވެސް އޭނާ ރަނގަޅު ކުރުމަށްޓަކައި ހުރިހާ މަގެއް ހޯދާފައެވެ. އެހެންވެ، އެންމެ ފަހުން ޚަބަރުވީ ނުރަނގަޅު ފަރުވާއެއްގެ ވާހަކައެވެ. އެ ފަރުވާގެ ސަބަބުން ކޮންމެވެސް ނޭނގޭ ބާރަކަށް ޖާގަ ދެވި، އެއީ އޭރުއްސުރެން "ހިޔަނި" އާއި ގުޅިފައިވާ ކަމެއް ކަން އޭނާއަށް އެނގުނެވެ.
ސަމަދު އަކީ މި 'ހިޔަނި'ގެ ހަމައެކަނި ޝިކާރައެއް ނޫނެވެ. ދެތިން މީހަކު މިހާރު ވަނީ ނޭނގޭ ގޮތްގޮތަށް މަރުވެފައެވެ. އަދި މިކަންކަމަށް ފަހު، ރަށުގެ މީހުންގެ މެދުގައި ބިރުވެރިކަމާއި ނުތަނަވަސްކަން ވަނީ ފެތުރިފައެވެ.
އަމީނާގެ މަންމަ އަމީނާއަށް ބަލާލިއެވެ. ދަރިފުޅުގެ މޫނުމަތިން ފެންނަމުންދިޔައީ އުފާވެރިކަމެއް ނޫނެވެ. ބިރުވެރިކަމާއި ނުތަނަވަސްކަމެވެ. މިހާރު އެ ހިޔަންޏަށް އޮތީ ހަމައެކަނި އެ ދެމައިންގެ ހިތުގައި ބިރުވެރިކަން އުފެއްދުމުގެ ބާރެއް ނޫނެވެ. އެއީ މުޅި ރަށުގެ އުފާވެރިކަން ނައްތާލާނެ ބާރެކެވެ. މިވަގުތު އެ ދެމައިންނަށް އޮތީ ހަމައެކަނި މާޒީގައި ކުރެވުނު ކުށަށް ހިތާމަކުރުމެވެ.
"މިހާރު ތިއުޅެނީ އަޝްރަފްވެސް ޖަހައިގެނެގެން. މިރަށުން އަމީނާ އާއި އިންނާނެ މީހަކުވެސް ނުވީދޯ" ސިއްތި ވާހަކަ ދައްކަން ފެށިއެވެ.
"ސިއްތި ދެން ތިވާހަކަ ހުއްޓާލަމާދޯ. އެއީ މާޒީ" އަމީނާގެ މަންމަ ބޭނުންވީ އެވާހަކަ ހުއްޓުވާށެވެ. އެހެން ނޫނިއްޔާ މުޅި ރަށަށް އެވާހަކަ ފެތުރިދާނެއެވެ.
"މިއީ ކަލޭ ހެދި ސިހުރުގެ ނަތީޖާ. ކަލެއާއި ހެދި މުޅި ރަށަށް ބިރުވެރިކަން ފެތުރިއްޖެ" ސިއްތި ހުރީ ވަރަށް ރުޅި އައިސްފައެވެ. ދެން މިކަން ނިމޭނީ ކިހިނެއްބާ؟ މި ސުވާލުތައް އަމީނާގެ މަންމަގެ ހިތުގައި ހިނގަމުން ދިޔައެވެ.
އަހަރެން މިވާހަކަ މުޅި ރަށުތެރޭ ދައްކާނަން. އެއީ އެމީހުންގެ ރައްކަލަކަށް" ސިއްތި އެނބުރި ހިނގައިގަތެވެ. އޭނާގެ ބޭނުމަކަށްވީ ހަގީގަތް އެންމެނަށް ހާމަކުރުމެވެ.
"ސިއްތީ. ތިވާހަކަ ދައްކައިފިއްޔާ ދެން ކަލެއަށް ސިހުރު ހަދާނީ" އަމީނާގެ މަންމަގެ ރުޅިގަނޑު ކޮންޓްރޯލުން ނެއްޓުނެވެ.
"ސިހުރޭ. އަދިވެސް ފުއްޕަނީ ދޯ. އެއްވެސް ކަމެއް ނުކުރެވޭނެ. އަދި މިކަމުން ސަލާމަތްވެސް ވާނަން" ސިއްތި ވާހަކަ ދެއްކީ ވަރަށް ކެރިގެންނެވެ. އޭނާގެ ހިތުގައިވާ ހިތްހަމަ ނުޖެހުމާއި، މި ހިޔަނި ނައްތާލުމުގެ އާދަޔާ ހިލާފު ހިތްވަރެއް އޭނާއަށް ލިބިފައިވާ ފަދައެވެ. މުޅި ރަށުގެ މީހުންގެ އުފާވެރިކަން ހޯދުމަށް ސިއްތި ވަނީ އަޒުމް ކަނޑައަޅާފައެވެ.
އަމީނާގެ މަންމަގެ ލޮލުން ފެންނަމުންދިޔައީ ބިރުވެރިކަމާއި، ކުރިމަތިލާންޖެހިފައިވާ ހަގީގަތް ގަބޫލުކުރަން ނުކެރިފައިވާ ކަމެވެ. އަމީނާގެ މަންމަ އަނބުރާ ދަރިފުޅުގެ ގާތަށް އައެވެ. އަމީނާގެ ހަށިގަނޑު ތުރުތުރުލަމުންދިޔައީ، ހިޔަނީގެ ވަކިތަކުގެ ތެރޭގައި އޭނާ ތާށިވެފައިވާ ކަމުގެ ނިޝާނެއް ކަމަށް ވެދާނެއެވެ. މަންމަގެ ހިތް ފަޅައިގެންދާން ކައިރިވިއެވެ. ކޮށްފަ ހުރި ކުށެއްގެ ސަބަބުން މިހާރު މުޅި ރަށް ނުރައްކަލުގެ ތެރެއަށް ވެއްޓިއްޖެ ކަމުގެ އިހުސާސް އޭނާގެ ހިތުގައި ބޮޑުވެގެންދިޔައެވެ.
މުޅި ރަށަށް އޭގެ ނުރައްކާ ފެތުރިދާނެކަން އޭނާއަށް އެނގުނެވެ. މިވަގުތު މަންމަގެ ހިތުގައި އުފެދުނީ ދަރިފުޅަށްޓަކައި ކުރެވުނު މޮޔަ ކަންތަކުގެ ސަބަބުން މުޅި ރަށަށް ކުރިމަތިވެދާނެ ބިރުވެރިކަމުގެ ހިތާމައެވެ.
ސިއްތި ދިޔަތާ ގިނަ ވަގުތެއް ނުވެ، ރަށުތެރޭގައި ޚަބަރު ފެތުރެން ފެށިއެވެ. އަމީނާގެ މަންމަ ކުރި ކަމުގެ ސަބަބުން މުޅި ރަށަށް ނުރައްކާވެފައިވާ ކަމުގެ ވާހަކައެވެ. ރަށުގެ މީހުންގެ މޫނުމަތިން ފެންނަމުންދިޔައީ ބިރުވެރިކަމާއި، ރުޅިވެރިކަމެވެ. އެއްބަޔަކު އަނެއް ބަޔަކަށް އިޝާރާތް ކުރަމުން ދިޔައީ، މިކަމުން ސަލާމަތްވާނެ ގޮތެއް ހޯދުމަށެވެ. އެމީހުންގެ ހިތުގައި ބިރުވެރިކަމާއި ނުތަނަވަސްކަން އުތުރިއަރަމުން ދިޔައެވެ.
އެރޭ، ރަށަށް އިތުރު ބިރުވެރިކަމެއް ކުރިމަތިވިއެވެ. އިތުރު ދެ މީހަކު ނޭނގޭ ގޮތްގޮތަށް މަރުވިއެވެ. މިފަހަރު މަރުވެފައިވީ މީހުންގެ ހަށިގަނޑުން ފެނުނީ އާދަޔާ ހިލާފު އަސަރުތަކެވެ.
އަމީނާގެ މަންމަ މިހާރު ވަނީ އޭނާގެ ޢަމަލުތަކުގެ ނުރައްކާތެރިކަން ފުރިހަމައަށް ވިސްނިފައެވެ. އޭނާ ނިންމީ ރަށުގެ އިސްމީހުންނަށް ހުރިހާ ކަމެއް އޮޅުން ފިލުވައިދީ، އެހީތެރިކަމަށް އެދުމަށެވެ. އެހެންނަމަވެސް، އޭނާއަށް ކުރިމަތިވެދާނެ ނަތީޖާއަށް ބިރުން، މިކަން ކުރުމަށް ފަސްޖެހެމުން ދިޔައެވެ.
ރަށުގެ ޒުވާނުން ގްރޫޕްތަކަކަށް ބެހި، ރޭގަނޑު ވަގުތުތަކުގައި ރަށުތެރެ ބަލަހައްޓަން ފެށިއެވެ.
ރޭގަނޑުވުމުން ރަށުތެރޭގައި ހިމޭންކަމެއް ވެރިވިއެވެ. ޒުވާނުންގެ ގްރޫޕްތައް މަގުތަކުގައި ބެހިލައިގެން، ކޮންމެ އަޑަކަށް ކޮންމެ ހަރަކާތަކަށް ސަމާލުކަން ދެމުން ދިޔައެވެ. ކުއްލިއަކަށް ރަށުގެ ދެކުނުފަރާތުން ބިރުވެރިގޮތަކަށް އަންހެނެއްގެ ހަޅޭއްލެވުމުގެ އަޑު އިވުނެވެ. އެއަޑާއެކު ޒުވާނުން އެދިމާލަށް ދުއްވައިގަތެވެ. އެހިސާބަށް ދެވުނުއިރު އެތަނުން ފެނުނީ އެމީހުން ދުވަހަކުވެސް ދެކެފައިނުވާފަދަ ބިރުވެރި މަންޒަރެކެވެ. މަރުވެފައި އޮތް މީހާގެ ހަށިގަނޑުގައި ހުރި ނިޝާންތައް ފެނުމުން އެމީހުންގެ ބިރުވެރިކަން އުފެދުނެވެ.
= ނުނިމޭ =
