" މާމަގެ ކަޅުޑައިރީ- 3 ނޮވެމްބަރ" މި ފޮތަކީ އަރާކުރި ސީރީޒުގެ 46 ވަނަ އަދަދެވެ. މި ފޮތަކީ 3 ނޮވެމްބަރ 1988 ވަނަ ދުވަހު ރާއްޖޭގައި ހިނގައިދިޔަ ނުރައްކާތެރި، އަދި ބިރުވެރި ހާދިސާގެ މައްޗަށް "މާމަގެ ކަޅު ޑައިރީ- 3 ނޮވެމްބަރ" ގެ ނަމުގައި ޙުސްނާ ފަހްމީ (ހުސްނާމިސް) ލިޔުއްވައި ނެރުއްވި ފޮތެކެވެ. މި ފޮތަކީ ކިޔަވާ ކުދިންނަށް އެންމެ ފަސޭހައިން 3 ނޮވެމްބަރގެ ހާދިސާގެ މައުލޫމާތު ހޯދައިލެވޭނެ ފަދަ ކުރު ގޮތަކަށް އެ ހާދިސާ ގެނެސްދެއްވުމުގެ މައްޗަށް ފިކުރުކުރެއްވުމަށް ފަހު، ތަފާތު ގޮތަކަށް ލިޔުއްވާފައިވާ ފޮތެކެވެ. ޙުސްނާ ވިދާޅުވަނީ ކިޔަވައިދެއްވުމުގައި ލިބިވަޑައިގަތް ތަޖުރިބާގެ އަލީގައި މި ފޮތް ލިޔުމުގައި ބޭނުންކުރެއްވީ ކުދިން ގަޔާވާނެ ގޮތެއްކަމަށެވެ.
މި ފޮތް ލިޔުއްވުމަށްޓަކައި ޙުސްނާ މައުލޫމާތު ހޯއްދަވާފައިވަނީ، ނޮވެމްބަރު 3 ޢުދުވާނީ ޙަމަލާ (1991) ރައީސުލް ޖުމްހޫރިއްޔާގެ އޮފީހުން ނެރުއްވި ފޮތާއި އަދި ނޮވެލްޓީ އަލްމަރްޙޫމް ޢަލީ ޙުސައިން ލިޔުއްވި "މިހާރު ދިވެހިން 3 ނޮވެމްބަރ 1988 ދަންނަނީ ކިހާވަރަކަށް؟" މި ފޮތްތަކުންނެވެ. އޭގެ އިތުރުން އެ ދުވަހު ލިޔުންތެރިޔާއަށް ތަޖުރިބާކުރެވުނު ބައެއް ކަންކަން ހިއްސާކުރައްވާފައިވެއެވެ. މި ފޮތުގައި އެ ދުވަހުގެ މަންޒަރުތައް ސިފަކޮށްދެއްވުމުގެ ގޮތުން އެ ހާދިސާގެ ކުލަ ފޮޓޯ ތަކާއި އޭގެ އިތުރުން، އެ ބިރުވެރި މަންޒަރު ސިފަކޮށްދެއްވުމަށްޓަކައި ޚިޔާލީ ކުލަ ކުރެހުންތައް ހިމަނުއްވާފައި ވެއެވެ.
މި ފޮތަކީ މާމަދަރިންނަށް މާމައާއެކު 3 ނޮވެމްބަރގެ ހާދިސާ ކިޔައިދިނުމަށް ބޭނުންކުރެވުނު އުސްލޫބެއްގެ މައްޗަށް ވާހަކައިގެ ބޮޑުބައި ޑައިލޮގު އުސޫލުން ގެނެސްދެވިފައިވާ ފޮތެކެވެ. އެހެންކަމުން މި ފޮތަކީ ޓީޗަރުންނަށް ފަސޭހަކަމާއެކު ކުލާސްތެރޭގައި ކުދިން ޝައުޤުވެރިވާނެ ގޮތަށް ބޭނުން ހިފޭނެ ފޮތެކެވެ. އެއީ ދިވެހި ޤައުމިއްޔަތާގުޅޭ ތާރީޚު ފިލާވަޅެއްގެ ގޮތުން 3 ނޮވެމްބަރގެ ހާދިސާ ކިޔައިދެއްވާއިރު ކުދިން ބައިވެރިކޮށްގެން ޑުރާމާ (ރޯލްޕުލޭ) ފަދަ ތަމްސީލުތައް ކުލާސްތެރޭގައި ގެންދިއުމަށް މި ފޮތުގެ ބޭނުން ވަރަށް ބޮޑަށް ހިފޭނެތީއެވެ. އެ ގޮތަށް ގެންދެވިއްޖެ ނަމަ، ކުދިން މާއްދާއާމެދު ޝައުޤުވެރިވުމާއެކު އެ ފިލާވަޅުގެ މަގުސަދު ހާސިލްވުން ފަސޭހަވެގެންދާނެކަމަށް ޙުސްނާ ވަނީ ފާހަގަކުރައްވާފައެވެ.
މި ފޮތުގައި 3 ނޮވެމްބަރ ގައި ހިނގައިދިޔަ މުހިންމު ކަންކަމާއި އެކަންކަން ހިނގައިދިޔަ ވަގުތުތަކާއި ކަންހިނގައި ދިޔަގޮތުގެ ތަފުސީލުތައް ކުރުކޮށް އެކަމަކު އެއްވެސް ބައެއް އުނިނުކޮށް ގެނެސްދެއްވާފައިވެއެވެ. ޖުމުލަކޮށް ދެންނެވޭނީ މި ފޮތަކީ 3 ނޮވެމްބަރ ހާދިސާގެ ޚުލާޞާއެއް ފެންނަގޮތަށް ކުރަހައިލާފައިވާ ތަސްވީރެއްކަމަށެވެ. މި ފޮތް ފާސްކުރެވިފައިވަނީ 1 ޖެނުވަރީ 2025 ގައެވެ. ނަމަވެސް އާންމުންނާ ހަމަޔަށް މި ފޮތް މި ގެނެސްދެވެނީ އެމް.އެން.ޔޫ ބުކްފެއަރ އިންނެވެ. މި ފެއަރ އޮންނާނީ މި މަހު 11 ން 13 އަށް އެމް.އެން.ޔޫ ޕީއީ ހޯލު (ތާޑް ފްލޯރ) ގައެވެ. ފެއާގައި ފޮތުގެ އަގަކީ 75 ރުފިޔާއެވެ.
"އަރާކުރި ސީރީޒް" ގެ މުޞައްނިފަކީ ޙުސްނާ ފަހްމީއެވެ. ވޭތުވެދިޔަ 7 އަހަރުތެރޭގައި އެކިއެކި އުމުރުފުރާތަކަށް އަމާޒުކުރައްވައިގެން ޙުސްނާ ވަނީ 46 ފޮތެއް މުޖުތަމަޢަށް ނެރެދެއްވާފައެވެ. އޭގެ ތެރޭގައި އަކުރު ދަސްކުރާ ފޮތްތަކުން ފެށިގެން ފިލިތަކާއި ސުކުންތަކުގެ ފޮތްތަކާއި ދޭހައިގެ ފޮތްތަކާއި މަޖާ އަދި ޢިބްރަތްތެރި ވާހަކަތަކާއި މަސައްކަތު ފޮތުގެ އިތުރުން އުފެއްދުންތެރި ލިޔުމުގެ ފޮތްތައް ނެރުއްވާފައިވެއެވެ.
ޙުސްނާ ފާހަގަކުރައްވާ ގޮތުގައި މިފަދަ ބުރަ މަސައްކަތެއް ކުރައްވާއިރު މި ކަމުގައި އެހީތެރިވެދެއްވާ ވަރަށް ގިނަ ފަރާތްތަކެއް ވެއެވެ.
"އަރާކުރި ފޮތްތަކުގެ ކުށްފިލުވުމުގެ ބުރަ އުފުއްލަވާ އަޅުގަނޑުގެ ލޮބުވެތި ފިރިމީހާ މުޙަންމަދު ނިޒާރަށާއި އަދި އަރާކުރި ސީރީޒް ހުރިހާ ފޮތެއްގެ ލޭއައުޓް ހައްދަވައިދެއްވާ ޢަބްދުﷲ ޒަޢީމަށް ފަށްފަށުން ޝުކުރު އަދާކުރަން. އަދި މިހާތަނަށް ނެރެވިފައިވާ އަރާކުރީގެ ހުރިހާ ފޮތެއްގެ ބަހުގެ ހަމަތައް ޗެކުކޮށްދެއްވި ބޭފުޅުންކަމަށްވާ ނ.ޢ،ޢ،ވ އަލްފާޟިލު ޢަބްދުﷲ ޞާދިގު (ސޯދުބޭ)، އަލްމަރުޙޫމް މަޑުލު މުޙައްމަދު ވަހީދާއި އަލްފާޟިލު ޙަސަން މޫސާއަށް ޝުކުރުދަންނަވަން. އަދި އަޅުގަނޑުގެ ލޯބިވާ ދަރިން މި ޝުކުރުގައި ޝާމިލް ކުރަން".
ޙުސްނާ ފަހްމީއަށް ވަނީ ދިވެހިބަހާއި އަދަބިއްޔާތުގެ ދާއިރާއިން، ދިވެހިބަހުން ފޮތް ލިޔެ އެކުލަވައިލުމާއި، ޝާއިޢުކުރުމުގެ ރޮނގުން މިއަހަރު (2025ގައި) ހިތްވަރުދިނުމުގެ ޤައުމީ އިނާމު ލިބިވަޑައިގެންފައެވެ. އަދި އިޖުތިމާޢީ ގޮތުން ބާރުވެރިކުރުމުގެ ރޮނގުން 2023 ވަނައަހަރު ރެހެންދި އެވޯޑް ލިބިވަޑައިގެންފައި ވާއިރު 2021 ވަނައަހަރު ދިވެހި ދައުލަތަށް ގިނަ ދުވަހު ޚިދުމަތްކުރުމުގެ އެވޯޑު ލިބިވަޑައިގެންފައިވެއެވެ.
