ރ. އިނގުރައިދޫ އަށް އުފަން އާމިނަތު ޝާވީ (28އ) ނިޔާވީ މި ފެބުރުއަރީމަހުގެ 6 ވަނަ ދުވަހުގައެވެ. ޝާވީ އަބަދުވެސް ފެނުނީ ކެތްތެރިކަމާއި އުފާވެރިކަމާއެކު ކުރިއަށްދިއުމަށް މަސައްކަތްކުރި މަންޒަރެވެ.
ހިތްވަރު ދޫނުކޮށް ގަދަ އަޒުމެއްގައި ކެންސަރު ބައްޔާއި ހަނގުރާމަ ކުރަމުންދިޔައިރުވެސް ފަނޑުކަމެއް ނެތި އެ މޫނުން ފެނުނު އުފާވެރިކަން ކޮންމެ މީހަކުވެސް ހަނދާން ހުންނާނެއެވެ. ސޯޝަލް މީޑިއާގައި ޝާވީ ހިއްސާކުރި ފޮޓޯ އާއި ލިޔުނު ސްޓޭޓަސްތަކުން ފެންނަން ހުރީ އޭނާގެ ހިތްވަރެވެ.
2025 ވަނަ އަހަރުގެ ފެބުރުއަރީ 2 ވަނަ ދުވަހު ޝާވީ ހިއްސާކުރި އަސަރުގަދަ ޕޯސްޓެއްގައި ބަޔާންކޮށްފައިވެއެވެ.
" 2020 ވަނަ އަހަރު އުމުރުން އެންމެ 22 އަހަރުގައި، އަހަރެންގެ ދިރިއުޅުމަށް ހީނުކުރާ ބަދަލެއް އައީ ކެންސަރު ބަލި ޖެހުމާއެކު. ކީމޯތެރަޕީ، އިންޖެކްޝަންތައް، އަދި ނުނިމޭ ފަރުވާތަކުން އަހަރެން ވަރަށް ބޮޑަށް ނަފްސާނީ ގޮތުން ހާސްކޮށްލާ ޖިސްމާނީ ގޮތުން ބަލިކަށިކޮށްލާ، އަމިއްލަ ނަފްސުގެ ބައިތަކެއް ގެއްލެމުންދާކަމުގެ އިހުސާސް ކުރެވުނު. މި ހުރިހާ ކަމެއްގައިވެސް އަހަރެންވަނީ އެކަނި ނޫންކަން ތާއަބަދު އިޙްސާސްކުރެވޭ. އަރެންގެ ޢާއިލާ، ޚާއްޞަކޮށް އަހަރެންގެ ފިރިމީހާ، މައިންބަފައިން، ފިރިމީހާގެ މަންމަ އާއި ދެފަރާތުގެ ޢާއިލާގެ އެއްބަނޑު އެއްބަފާ މީހުންނާއި ޢާއިލާ އެންމެން އަދި ރައްޓެހިން ކޮންމެ ފިޔަވަޅެއްގައިވެސް އަހަރެންނާއެކުވި. އެމީހުންގެ ލޯބި އަދި ދެމިހުރި އެހީތެރިކަމުން ކޮންމެ ދުވަހަކީވެސް ކުރިމަތިލާން ފަސޭހަ ދުވަހަކަށްވި. އެމީހުން އަހަރެންނަށް ކުދިކުދި ކަންކަމުގައި އެހީތެރިވެދީ، ފަރުވާތަކުގައި އަހަރެންގެ އަތުގައި ހިފަހައްޓައިދިން. އަދި އަހަރެންނަށް ނަފްސާނީ އަދި ރޫޙާނީ ގޮތުން ހަމަޖެހުން ގެނެސްދިނުމަށް އެތައް މަސައްކަތެއް ކުރި". ޝާވީ ހާމަކޮށްފައިވެއެވެ.
ކެންސަރުބައްޔަކީ ފަރުވާގެ މަރުހަލާގައި ހަށިގަނޑަށް ބޮޑެތި ބަދަލުތަކެއް އައިސް ގަދަ ހިތްވަރެއް ކުރަންޖެހޭ ހަނގުރާމައެއްފަދަ ބައްޔެކެވެ. މި ހިތްވަރުގައި އާއިލާ އާއި އެކުވެރިންގެ އެހީތެރިކަން އިންތިހާއަށް ބަލިމީހުންނަށް ބޭނުންވެއެވެ. ޝާވީ ފާހަގަކޮށްފައިއެވަނީ އޭނާއަށް ލިބުނު އެހީތެރިކަމެވެ.
" ޖިސްމާނީ ގޮތުން އަހަރެން ވަރުބަލިވަމުންދިޔައިރު، އަހަރެންގެ އީމާންތެރިކަން އިތުރުވަމުން ދިޔަ. ނަމާދާއި ދުޢާ އަކީ އަހަރެންގެ ހިޔާވަހިކަމަކަށް ވެއްޖެ. އަހަރެންނަށް އިހުސާސްވީ މި ބަލި ޖެހުމަކީ އަދަބެއް ނޫންކަމާއި، އެއީ އަހަރެންނަށް މާތް ﷲ އާ އިތުރަށް ގާތްވުމަށް ލިބުނު ފުރުޞަތެއްކަމާއި، ކުރެއްވި އިމްތިޙާނެއްކަން. ވުމާއެކު، އަހަރެން އެ ކެތްތެރިކަމުން ވާގި ހޯދީމު. އަހަރެންގެ ޢާއިލާއިން އަހަރެންނަށް ރޫޙާނީ ގޮތުން އެހީތެރިވެދިން. އަބަދުވެސް މާތް ﷲ ގެ ރަޙުމަތުގެ ވާހަކަ ހަނދާންކޮށްދީގެން. އެމީހުން އަހަރެންނަށް އެހީތެރިވެދިނީ ހަމައެކަނި ދިރި ހުރުމަކަށް ނޫން. އެމީހުން އަހަރެންނަށް އެހީތެރިވެދިނީ އީމާންކަމުގައި އިތުރަށް ވަރުގަދަވުމަށް. މި ދަތުރަކީ ހަމައެކަނި ކެންސަރާ ދެކޮޅަށް އަހަރެން ކުރި ހަނގުރާމައެއް ނޫން. މިއީ، މާތް ﷲ އާ އަދި އަހަރެންގެ ޢާއިލާއާ އޮތް ގުޅުން އިތުރަށް ބަދަހިކުރުމުގެ ދަތުރެއް. އެމީހުންގެ ލޯބިން އުނދަގޫ ވަގުތުތައް ތަޙައްމަލުކުރެވޭ ގޮތްވި. އަދި އަހަރެންނަށް ކޮންމެ ކަމެއްގައިވެސް އިމާންތެރިކަމާއި ކެތްތެރިކަން އިޚްތިޔާރުކުރަމަށް ދަސްވި". ޝާވީ
ޝާވީގެ ވާހަކަތައް އަޑުއިވުނު ކޮންމެ މީހަކުވެސް ބުނަމުންދަނީ ޝާވީގެ ހިތްވަރުގަދަ ވާހަކައެވެ. ކެންސަރުބަލީގައި 6 އަހަރު ހޭދަވިއިރުވެސް އެހިތްވަރަށް، އެއުފާވެރިކަމަށް ބަދަލެއް ނާދެއެވެ.
ޝާވީގެ ފުރާނައަށް ސުވަރުގޭގެ މަތިވެރި ނިޢުމަތް މިންވަރު ކުރައްވާށިއެވެ. އާއިލާއަށް ކެތްތެރިކަން މިންވަރު ކުރައްވާށިއެވެ. އާމީން!
