ރ ދުވާފަރު، 'ހެޕީހޯމް' އުމުރުން 33 އަހަރުގެ ހައްވާ އަލީ އަކީ ދަރިފުޅާއި ފިރިމީހާ އަދި އާއިލާއާއެކު އާންމު ދިރިއުޅުމެއް ރަށުގައި ދިރިއުޅެމުން އައި މީހެކެވެ. އެހެންނަމަވެސް ކުރިން ހިނގައި އުޅުނު ހައްވާ އަލީ އަށް މިފަހުން ދިމާވި ސިއްހީ ހާލަތުގެ ސަބަބުން އަމިއްލައަށް ހިނގައި ނުއުޅެވޭކަމަށް ވަނީ ބުނެފައެވެ.
ހައްވާ އަލީ މައުލޫމާތު ދިންގޮތުގައި އެއީ 2025 ވަނަ އަހަރު ސެޕްޓެންބަރު މަހެވެ.
" ފައިގެ ތިރީގައި އެއްވެސް ބާރެއް ނުހުރޭ. ކަނައަތުފައި ބޮޑުވަރުވީ. އަޅުގަނޑު ނުކުތީ ބަޔަކާއެކީގައި އެހީއަކަށް ހިނގާލަން. ފައިވާނަށް އަރައިގެން ރަނގަޅަށް ނުހިނގޭ. އައްސިވެފަ ހުންނަވަރު ބޮޑުކަމުން ފައިވާން ބޭލޭއިރުވެސް ނޭނގޭ. އެހެންވެ ދެން ބޫޓަށް އަރައިގެން ދިޔައީ. ހިނގާފައި ދާއިރު ބޫޓުކޮޅުން ނައްޓާލަނީ.. ހީވަނީ ވެއްޓިދާނެހެން ހިނގާއިރު. އެހެންވެ ބޫޓު ބާލާފައި ހިނގީ. އެއީ ހަވީރު 5:30 ހާއިރު. ތާރު މަތީގައި ހިނގީ. ދެން ގެއަށް އަނބުރާ އައިސް އިހުސާސެއް ނުވޭ ފަޔަށް ތަދުވާކަމަކަށް. އޭގެ އަނެއް ދުވަހު ފިރިމީހާއަށް ފައި ފެނިގެން ބުނީ. ތިއޮތީ ފައިތިލަ އެއްކޮށް ގޮއްސަ ނޫންހޭ. ހަމަ ނޭނގޭހޭ؟ އަޅުގަނޑު ބުނިން ނޭނގޭ ވެފައި ހުރިގޮތެއް. ދެން ގެންދިޔައީ ދުވާފަރު ސިއްހީ މަރުކަޒަށް. އެތަނުން ބޭސްކޮށްގެން ރަނގަޅު ނުވާތީ އޮޕަރޭޝަން ޑޮކްޓަރަށް ދައްކަން ބުނީ ހަންތައް ބޯވެގެން ކަފަންޖެހޭތީ.." ހިތްދަތި ހާލަތު ދިމާވިގޮތް 'ޒީޓައިމްސް' އަށް ކިޔައިދެމުން ހައްވާ އަލީ ބުންޏެވެ.
ދުވާފަރުން އެކަށީގެންވާ ފަރުވާ ނުލިބޭތީ ދިޔައީ އުނގޫފާރު ހޮސްޕިޓަލަށެވެ.
" ހަންތައް ކަފާފަ އަނެއްކާ ދުވާފަރަށް ދިޔައީ. 2 މަސްދުވަސް ރާއްޖެއިން ބޭސްކުރިން ފައި ރަނގަޅުވޭތޯ. އެކަމަކު ރަނގަޅެއް ނުވި. އާއިލާގެ މީހުން ރާއްޖެއިން ބޭރަށް ދާތީ މަންމަ އާއި ބައްޕަ ހޯދައިދިނީ ދެކޮޅު ޓިކެޓާއި 200 ޑޮލަރު. އަމިއްލަ ކުންފުންޏަކުން ލިބުނު 4000 ރުފިޔާގެ އެހީއާއި އެކު އިންޑިއާ އަށް ދިޔައީ ޖުމްލަ 700 ޑޮލަރު ހިފައިގެން".
އިންޑިއާ އަށް ފަރުވާއަށް ދިއުމަށްފަހު ފުރަތަމަ 1 މަސްދުވަހު ފަރުވާ ހޯދީ އަމްރިތާ ހޮސްޕިޓަލުންނެވެ.
" އާސަންދަ ހަމަނުޖެހި ފުރަތަމަ ފަރުވާ ހޯދީ އަމިއްލައަށް. އަމްރިތާއިން ކަނައަތުފައިގެ އިނގިލި ބުރިކޮށްލީ ފައިގެ މަސްގަނޑާއެކު. އޭގެ 2 ދުވަސް ފަހުން ބޭސް ބަދަލުކުރަން އައިއްސަ ބުނީ ފައި ރަނގަޅެއް ނުވެއޭ. އެހެންހުރެފަ ބުނެފި ސާފުކުރަން. ސާފުކޮށްފަ 4 ދުވަސް ފަހުން ބަލާފަ ބުނީ ނާރު ބްލޮކްވެފައިކަމަށް. އެއިރު އިނގިލިތައް ދިޔައީ ކަޅުވަމުން. ދެން ބުނީ އަނެއްކާވެސް ހިނގާށޭ އިނގިލި ބުރިކުރަން. އަމްރިތާއިން ނާރުގެ ބްލޮކްވުން ރަނގަޅުކުރަން މަސައްކަތެއް ނުކުރޭ. ދެން ދިޔައީ ރާޖަގިރި ހޮސްޕިޓަލަށް. ނާރުގެ ބްލޮކްވުން ރަނގަޅުކޮށް ރާޖަގިރިން ފަރުވާއަށް ކުރިއެރުން ލިބުނު. އިންޑިއާގައި ދޮޅުމަހަށްވުރެ ގިނަ ދުވަސް ހޭދަވިއިރު އާސަންދަ ލިބުނީ 10 ދުވަހަށް".
ވަރަށް ހިތްދަތިކަމާއެކު 'ޒީޓައިމްސް' އަށް އިންޓަވިއުދެމުން ހައްވާ އަލީ ބުނީ މާލީ ހާލަތު ހުރިގޮތުން ފަރުވާ ފުރިހަމަނުކޮށް އިންޑިއާއިން އެނބުރި ރާއްޖެއަށް އަންނަންޖެހުނީ ކަމަށެވެ.
" ރާއްޖެއައީ އެކީގައި ފަރުވާ ނުނިމެނީސް. އެޑްމިޓްކޮށްގެން ފަރުވާދެމުން ދަނިކޮށް އަޅުގަނޑުމެން އެދުނީ ޑޮކްޓަރު ކައިރީގައި އަނބުރާ ރާއްޖެއަށް ފޮނުވުމަށް ހޮސްޕިޓަލުން ދޫކޮށްދިނުމަށް. އެހީ ހޯދައިގެން ފަރުވާއަށް އިންޑިއާއަށް ދާގޮތަށް. އިތުރު ފަރުވާއަށް އައުމަށް ޑޮކްޓަރު ވަނީ އެދިފައި. ޑިސެންބަރު 31 ވަނަ ދުވަހުގެ ރޭ ރާއްޖެއައިސް މިތިބީ ދުވާފަރުގައި. އެހީ ލިބޭއިރަށް ފަރުވާއަށް އިންޑިއާއަށް ދާން ބޭނުން".
ހައްވާ އަލީ މައުލޫމާތުދިންގޮތުގައި އާމްދަނީ ހޯދުމަށް މަސްވެރިކަން ކުރި ފިރިމީހާވެސް މަހަށް ނުދެވި 5 މަސްދުވަސް ހޭދަވީއެވެ.
" ދޯނިތެރެއަށް ފިރިމީހާ ވެއްޓިގެން އުނަގަނޑުގެ މަސްގަނޑު ފަޅައިގެން ގޮސް މަހަށް ނުގޮސް 3 މަސްދުވަހު ހުރެފަ އިންޑިއާއަށް އައީ އަޅުގަނޑުގެ އެހީތެރިއަކަށް. އެހެންވެ އަތްމަތި ވަރަށް ދަތިވީ. 5 ވަރަކަށް މަސްދުވަސްވީ މަސައްކަތް ނުކުރެވި އާމްދަނީއެއް ނުލިބި. ފަރުވާއަށްފަހު އަޅުގަނޑުގެ ދެފައިގައި އެއްވެސް ބާރެއް ނެތުމުން އަމިއްލައަށް ނުހިނގޭ. ޑޮކްޓަރު ބުނަނީ އަދި ހިނގޭނެ ކަމަށް. އެހެންވެ ގޮނޑިއެއްގައި އިންނަން މިޖެހެނީ. އެހީތެރިއަކާއި ނުލައި އުޅެވެންވެސް ނެތް". ހައްވާ އަލީ
ހައްވާ އަލީ އަށް ރާޖަގިރި ހޮސްޕިޓަލުން ދީފައިވާ ލިޔުމުގައިވެސް ވަނީ ވަރަށް ތަފްސީލުކޮށް އޭނާގެ ހާލަތު ބަޔާންކޮށްފައެވެ.
އިތުރު ފަރުވާއަށް އިންޑިއާ އަށް ދެވެން އޮތީ އާންމުންގެ އެހީތެރިކަން ލިބިގެންކަމުގައިވާތީ ހައްވާ އަލީ އަށް އެހީތެރިކަން ފޯރުކޮށްދިނުމަކީ އޭނާ އާއި އާއިލާގެ ވަރަށް ބޮޑު އެދުމެކެވެ.
އިތުރު މައުލޫމާތު ސާފުކުރުމަށް ގުޅާނީ: 7994278 ނުވަތަ 7994277
ހައްވާ އަލީގެ އެކައުންޓު ނަންބަރު: 7730000415100
ނޯޓް: މިއީ އާންމުންގެ އެހީތެރިކަމާއެކު 'ޒީޓައިމްސް' އިން ބޭސްފަރުވާއަށް އެހީވެދޭ 63 ވަނަ އާއިލާއެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވާނީ ބަލިމީހާގެ އެކައުންޓަށެވެ.
