ނ. ވެލިދޫ އަށް އުފަން ފާތިމަތު އާދަމް ދިރިއުޅެމުން އައީ ޅ. ހިންނަވަރު މުހައްމަދު ހުސައިން އާއި ކައިވެނިކޮށްގެން ހިންނަވަރުގައެވެ. ކައިވެންޏަށް ގިނަ އަހަރުތަކެއް ވެފައިވާއިރު ފާތިމަތުގެ އުފަން ދަރިއެއް ނުހުރެއެވެ. އެހެންނަމަވެސް މުހައްމަދު ހުސައިންގެ 2 ކުދިން ތިބެއެވެ.
އުފާވެރިކަމާއި ލޯތްބާއެކު ދިރިއުޅެމުން އައި މި ދެމަފިރިންގެ ދިރިއުޅުން ހިތާމައަށް ބަދަލުވީ މިއަހަރުގެ އޮގަސްޓްމަހު ފާތިމަތުއަށް ކެންސަރު ބަލިޖެހުނުކަން އެނގުނު ހިސާބުންނެވެ. ހުޅުމާލެ ހޮސްޕިޓަލުގައި އެޑްމިޓްކޮށްގެން ފަރުވާ ދެމުން އަންނަ ފާތިމަތު ވަނީ ވަރަށް އަސަރާއެކު 'ޒީޓައިމްސް' އަށް އޭނާގެ ހާލަތު ކިޔައިދީފައެވެ.
" ކުރިންވެސް އައިން މާލެ އަށް ޑޮކްޓަރަށް ދެއްކުމަށް. އެއަށްފަހު ހިންނަވަރަށް ދިޔަތަނާ މާބޮޑަށް ބަލިވާން ފެށީމަ ރަށުގެ ޑޮކްޓަރަށް ދެއްކީމަ ނައިފަރު ހޮސްޕިޓަލަށް ދިއުމަށް ބުނީ.. ފުރަތަމަ 3 ފަހަރުވެސް ޑޮކްޓަރު ބަލާފައި ފޮނުވާލީ.. އެކަނި ތެދު ނުވެވޭވަރުވީމަ އަނެއްކާ ދިޔައީ.. ރަނގަޅަށް ޓެސްޓްތައް ހެދުމަށްފަހު ބޭރު އަންހެން ޑޮކްޓަރަކު ވަރަށް ރަނގަޅަށް އެކްސްރޭ އެއްޗެހި ބަލާފަ ބުނީ އަވަހަށް މާލެ ދިއުމަށް. ވަރަށް ބޮޑު މައްސަލައެއް އުޅޭކަމަށް ބުނި. ފިރިމީހާ އަށް ކިޔައިދިނީ. އެއިރު އަޅުގަނޑަކަށް އަދި ތަފްސީލެއް ނޭނގޭ. މާލެ އައިސް ޓްރީޓޮޕް އަށް ދެއްކީ. ދައްކައިގެން އެމްއާރުއައި އެއްޗެހި ހެދީމަ ކެންސަރކަން ޔަގީންވި". ފާތިމަތު ކިޔައިދިނެވެ.
ކެންސަރ ގެ 3 ވަނަ ސްޓޭޖްގައި ހުރިއިރު އިތުރު ފަރުވާއަށް އާސަންދައިގެ ދަށުން ފާތިމަތު ދިޔައީ އިންޑިއާގެ ކިމްސް ހޮސްޕިޓަލަށެވެ.
" ކީމޯ ދީފަ ރަނގަޅުނުވެއްޖިއްޔާ އޮޕަރޭޝަން ކުރަން ޑޮކްޓަރު ބުނީ. އެހެންވެ ކީމޯ ދެމުން މިދަނީ. 6 މަސްވަންދެން ކީމޯ ދޭންޖެހޭ. އިންޑިއާގައި 18 ވަރަކަށް ކީމޯ ދިނުމަށްފަހު އަތްމަތި ދަތިވީމަ މިއައީ އަނބުރާ މާލެ. އަޅުގަނޑުމެން އެބަޖެހޭ 500 ޑޮލަރުވެސް އިންޑިއާގައި ހުރި މީހަކަށް ދޭން. އަޅުގަނޑުވެސް ފިރިމީހާ ވެސް މުސާރަ ނުލިބޭގޮތަށް ޗުއްޓީގައި މިތިބީ".
ފާތިމަތުގެ ކަންބޮޑުވުމަކީ އިންޑިއާގައި ފަރުވާއަށް އެ ހޭދަވި 3 މަސްދުވަހު ދެމަފިރިންގެ އަތުގައި ހުރި ފައިސާކޮޅުވެސް ހުސްވުމެވެ. ކެންސަރ ވަނީ ހަށިގަނޑަށް ފެތުރިފައެވެ. އިންޑިއާ އަށް އިތުރަށް ފަރުވާ ހޯދުމަށް ދާންޖެހެއެވެ. އެކަމަކު ދެވެން އޮތީ އާންމުންގެ އެހީތެރިކަން ލިބިގެންކަން ހިތާމައާއެކު ފާތިމަތު ވަނީ ފާހަގަކޮށްފައެވެ.
" ކީމޯގެ 6 ސައިކަލް ހަމަކުރަންޖެހޭ. އިންޑިއާގައި މަޑުކުރުމަށް ބުނި. އެކަމަކު އަތްމަތި ދަތިވީމަ މިއައީ އިންޑިއާއިން ކީމޯގެ 3 ސައިކަލް ހަމަކޮށްފައި. އެއީ ޖަހަންޖެހޭ އިންޖެކްޝަން އާސަންދައިގެ ދަށުން ނުލިބޭ. އެއްވެސް ގޮތެއް ނެތިގެން އަންނަންޖެހުނީ ރާއްޖެ". ހިތްދަތިކަމާއެކު ކިޔައިދިނެވެ.
އާސަންދައިގެ ދަށުން އަލުން އިންޑިއާއަށް ފަރުވާއަށް ދިޔަކަމުގައިވިއަސް އެކޮޅުގައި މި ދެމަފިރިން ތިބެންޖެހެނީ އެޖެންޓެއްގެ އެހީތެރިކަން ހޯދައިގެންނެވެ.
" އަޅުގަނޑުގެ ނެތް ކުއްޖެއް. އެއްބަނޑުމީހެއްވެސް ނެތް. އެއްބަފާ މީހުން އެބަތިބި. ފިރިމީހާގެ އާއިލާއާއި 2 ކުދިން ވަރަށް ރަނގަޅު. އެކަމަކު އިންޑިއާގައި ގިނަ ދުވަހު އަޅުގަނޑުމެންނާއެކު މަޑުކުރެވޭނެ އާއިލާ މީހެއް ނެތް. އެހެންވުމުން ހުންނަ ތަނަށް ފައިސާ ދައްކާ އެޖެންޓަށް ފައިސާ ދައްކާ އަދި އިންޖެކްޝަނާއި ކެއުމާއި ޓްރާންސްޕޯޓަށް ހަރަދު ކުރަންޖެހޭތީ އަޅުގަނޑުމެން އަތުގައި ނެތް އެއްވެސް މިންވަރެއް. ހުޅުމާލޭގައި ވެސް ތިބެން ޖެހެނީ ކޮޓަރިއެއް ކުއްޔަށް ހިފައިގެން. އަޅުގަނޑު ބަލާނެ އިތުރު މީހެއް ނެތުމުން ފިރިމީހާވެސް އެހެރީ މުސާރަ ނުލިބޭ ގޮތަށް ޗުއްޓީގައި".
ދެމަފިރިންވެސް ވަޒީފާ އަދާކުރަމުން އައީ ފެލިވަރުގައެވެ. އޮގަސްޓް މަހުން ފެށިގެން ވަޒީފާއަށް ނުދެވޭތީ 22 އަހަރު އުޅުނު ވަޒީފާ ގެއްލިދާނެކަމުގެ ކަންބޮޑުވުން އިންތިހާއެވެ. ފުރަތަމަ 3 މަހު ފާތިމަތުއަށް މުސާރަ ލިބުނު ކަމުގައިވިއަސް އޭގެފަހުން ހުންނަނީ މުސާރަ ނުލިބޭ ގޮތަށެވެ.
ނޯޓް: ފާތިމަތު ވަނީ 2025 ވަނަ އަހަރުގެ ޑިސެންބަރު 31 ވަނަ ދުވަހު ނިޔާވެފައެވެ. މައްޔިތާއަށް ސުވަރުގޭގެ މަތިވެރި ނިޢުމަތް މިންވަރު ކުރައްވާށި. އާމީން!
ނޯޓް: މިއީ އާންމުންގެ އެހީތެރިކަމާއެކު 'ޒީޓައިމްސް' އިން ބޭސްފަރުވާއަށް އެހީވެދޭ 62 ވަނަ އާއިލާއެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވާނީ ބަލިމީހާގެ އެކައުންޓަށެވެ. މި ޢާއިލާ އަށް އެހީ ލިބިފައިވާތީ، ކުރިން ހިމަނަައިފައިވާ އެކައުންޓުު ނަންބަރު ވާނީ އުނިކޮށްފައެވެ. ޝުކުރިއްޔާ!
