ދިވެހި ރާއްޖޭގެ އާބާދީގެ ނިސްބަތުން ކެންސަރަށް ފަރުވާ ހޯދާ މީހުން ވަރަށް ގިނައެވެ. މީގެ ތެރޭގައި އެއްއާއިލާއެއްގައި އެތައްބަޔަކު އެބައުޅެއެވެ. ދާދިފަހުން އަޅުގަނޑު ނެގި އިންޓަވިއުއެއްގައި ބަލި މީހާގެ އާއިލާއިން މައުލޫމާތުދިނެވެ. ލ އަތޮޅަށް ނިސްބަތްވާ އަހުމަދު ނިޔާޒު (51) ގެ ބައްޕައާއި އެއްބަނޑު އެއްބަފާ 3 ބެއިންވެސް ނިޔާވީ ކެންސަރު ބަލީގައެވެ. ނިޔާޒު އެއީ އެއާއިލާގައި ކެންސަރުގެ ފަރުވާ ހޯދަން ޖެހުނު 5 މީހާއެވެ. އެންމެފަހުން ނިޔާޒު ވެސް ވަނީ މިއަހަރުގެ ޖޫންމަހު ކެންސަރު ބަލީގެ ވޭނުގައި ނިޔާވެފައެވެ.
މާލެސިޓީ އިން ކީމޯގެ ފަރުވާ ދެވުނަސް ކެންސަރާއި ގުޅުންހުރި ބައެއް ފަރުވާތައް ލިބެން ނުހުރެއެވެ. ބައެއް ޓެސްޓްތައް ހެދެން ނުހުރެއެވެ. ކެންސަރު ބަލި ތަހައްމަލު ކުރަމުންދާ މީހުން އިންޑިއާގައި ފަރުވާއަށް އެތައް ދުވަހެއް ހޭދަކުރަންޖެހުމަކީ ބަލިމީހާ އާއި އާއިލާއަށްވެސް ދަތިކަމެކެވެ. އާއިލާގެ ގިނަބަޔަކާއި ދުރުގައި މިފަދަ ބޮޑުބައްޔެއްގެ ވޭނުގައި އެހެން ޤައުމެއްގައި ގިނަދުވަސްތަކެއް ހޭދަކުރަންޖެހޭއިރު ނަފްސާނީގޮތުންވެސް އަސަރު ކުރެއެވެ. އަތްމަތި ދަތިވެ އާންމުންގެ އެހީތެރިކަމަށް އެދެންޖެހެއެވެ.
ފަރުވާ އާސަންދައިން ހަމަޖެހުނަސް ރާއްޖެއިން ބޭރުގައި ގިނަދުވަސްތަކަކަށް ހުރުމާއި ކެއުމާއި ދަތުރުތަކަށް ޚަރަދު ކުރަންޖެހޭ ވަރަށް އެންމެންގެ އަތްމަތި ތަނަވަސްއެއް ނޫނެވެ.
ފޭސްބުކްގައި ފާތިމަތު އާފިޔާ އޭނާގެ ކަންބޮޑުވުން ހާމަކޮށްފައިވެއެވެ.
" ކެންސަރު ބައްޔަށް ޝައްކުވެގެން އެންމެ ދުވަހަކަށް މަޑުކުރަން ޖެހުނަސް، އެމީހެއްގެ ފުރާނައަށް ނުރައްކާވޭ. ޚާއްސަކޮށް އެންމެ ނުރައްކާތެރި، އަވަހަށް ފެތުރޭ ކެންސަރުގެ ވައްތަރު. އެއް ގުނަވަނުން އަނެއް ގުނަވަނަށް ކެންސަރު ފެތުރޭ. އެއް ހިސާބުން އަނެއް ހިސާބަށް ކެންސަރު ފެތުރި، ކެންސަރު ދަރަޖަ 1 އަކުން 2 ނުވަތަ 3 އަކުން 4 ސްޓޭޖަށް ބަދަލުވޭ. ރާއްޖޭގައި ޓެސްޓުތައް ހައްދަން މަހެއް ވަރުވީ. އަވަހަށް ކެންސަރު ފާހަގަވުމުން، ފަރުވާ ހޯދަން ފަސޭހަވޭ. އެނގިގެން ރައްޓެހިންވެސް ކިޔުގައި އެބަ ތިބި. ނުރައްކާތެރި، އަވަހަށް ފެތުރޭ ކެންސަރު އުޅޭ މީހުންނަށް އަވަސް ޚިދުމަތް ބޭނުންވޭ. މިހެންވެ ރާއްޖޭގާ ކެންސަރުގެ ހޮސްޕިޓަލެއް އެޅުމަށް ވަކާލާތު ކުރަނީ. އެތައް ބަޔަކު ރާއްޖޭގައި ޓެސްޓުތައް ނުހެދި ތިބެން ޖެހުމުން ކެންސަރުގެ ވައްތަރު ފެތުރި އަދި ބަލި ބޮޑުވޭ. އަމިއްލައަށް މިކަން ތަޖުރިބާ ކުރަން ޖެހުނު" އާފިޔާ ލިޔެފައިވެއެވެ.
'ޒީޓައިމްސް' އިން މިއަހަރު ޖުލައިމަހު އެހީގެ ރިޕޯޓް ގެނެސްދިން އުމުރުން 35 އަހަރުގެ މަރްޔަމް ރައުނާގެ ކޭސްއަށް ބަލާލަމާ ހިނގާށެވެ. ކުޑަކުޑަ 2 ކުދިންގެ މަންމަ އެއިރުވެސް އޮތީ އައިޖީއެމްއެޗްގެ ކެންސަރު ބަލިމީހުންނަށް ޚާއްސަ ވޯޑުގައި އެޑްމިޓްކޮށްފައެވެ. ޕެޓްސްކޭން ހެދުމަށް އިންޑިއާއަށް ދާން އާސަންދަ ހަމަޖެހުނަސް ރައުނާ އާންމުންގެ އެހީތެރިކަމަށް އެދުނީ އިތުރަށް ބޭނުންވާ ޚަރަދުތަކަށް ފައިސާ ހޯދުމަށެވެ. އާންމުންގެ އެހީތެރިކަން ލިބުނަސް ރައުނާގެ ހާލަތު ހުރިގޮތުން އިތުރު ފަރުވާއަށް އިންޑިއާއަށް ދެވޭ ގޮތް ނުވެ ނިޔާވީއެވެ.
ފަރުވާއަށް ރާއްޖެއިން ބޭރަށް ދާން ބޭނުންވެ ނުދެވި ކިތައް މީހުން އެބައުޅޭހެއްޔެވެ؟ އާސަންދަ ލިބުނަސް ރާއްޖެއިން ބޭރުގައި އެކީގައި ގޮސް ހުންނާނެ އާއިލާ މީހެއް ނެތި ތިބީ ކިތައް މީހުން ހެއްޔެވެ؟ ސަރުކާރުން ރާއްޖެއިން ބޭރުގެ ހޮސްޕިޓަލުތަކަށް އެތައް މިލިއަނެއް ޚަރަދު ކުރާއިރު ރާއްޖޭގައި ކެންސަރަށް ޚާއްސަ ހޮސްޕިޓަލެއް ހަދާ ފަރުވާ ދިނުން ލަސްވަނީ ކީއްވެހެއްޔެވެ؟ އެއިރުން ސަރުކާރުން ކުރަންޖެހޭ ހޭދައަށްވެސް ލުޔެއް އަންނާނެއެވެ. ކެންސަރު ބަލީގެ ވޭނުގައި ދުވަސްތައް ހޭދަކުރާ ބަލިމީހުންނަށް ވެސް ކުޑަނަމަވެސް ހިތްހަމަޖެހުމެއް ލިބޭނެއެވެ.
އައު ސަރުކާރު ވެރިކަމުގެ ފުރަތަމަ އަހަރުގައި ކެންސަރު ހޮސްޕިޓަލުގެ ވާހަކަ އަޑުއިވުނެވެ. މާލޭގައި ތަރައްޤީކުރާ ކެންސަރު ހޮސްޕިޓަލު އިމާރާތްކުރާނީ ދަރުމަވަންތަ ހޮސްޕިޓަލު ކައިރީގައި އޮންނަ ހުސްބިމެއްގައި ކަމަށް އެއިރު ހާމަކޮށްފައިވެއެވެ. ކެންސަރު ހޮސްޕިޓަލުގެ ކޮންސަލްޓޭޝަން އަދި ފީސިބިލިޓީ މަސައްކަތްތައް ކޮށްދޭނެ ފަރާތެއް ހޯދަން ހެލްތު މިނިސްޓްރީން އެއިރު އިއުލާން ކުރިކަމަށް މައުލޫމާތު ލިބިފައިވެއެވެ. ކެންސަރު ހޮސްޕިޓަލުގެ މަޝްރޫއު ކުރިއަށްގެންދަން ނިމިދިޔަ ސަރުކާރުން ނިންމާފައި އޮތީ ލ. ގަމުގައެވެ. އެއިރު ސަރުކާރުން ކެންސަރު ހޮސްޕިޓަލު ތަރައްގީކުރަން އުޅުނީ އިންޑިއާގެ އެހީގައެވެ.
ކެންސަރު ހޮސްޕިޓަލު އިމާރާތް ކުރެވެންދެން މާލޭގައި ހުރި ސަރުކާރުގެ އެހެން ހޮސްޕިޓަލުތަކުންވެސް ކެންސަރުގެ ހުރިހާ ފަރުވާއެއް ލިބޭނެ އިންތިޒާމް ހަމަޖެހުމަކީ މިބަލީގެ ވޭނުގައި ދުވަސްތައް ހޭދަކުރާ އެތައްބައެއްގެ އާދޭހެކެވެ.
