ހެލްތު އެކްސްޕޯ 2025 މިއަދު ހުޅުއްވައިދެއްވީ ރައީސުލްޖުމްހޫރިއްޔާގެ އަނބިކަނބަލުން، ސާޖިދާ މުޙައްމަދު އެވެ. ހުޅުމާލޭ ސެންޓްރަލް ޕާކުގައި ކުރިއަށްގެންދާ ހެލްތު އެކްސްޕޯ 2025 އަކީ، ދުޅަހެޔޮ ޖީލަކާއި މުޖުތަމަޢެއް ބިނާކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ސަރުކާރުން ގެންގުޅުއްވާ ސިޔާސަތުތަކުގައި ހިމެނިގެން، ސިއްޙީ ދާއިރާއިން ކުރަމުންދާ މަސައްކަތްތަކާއި ސިއްޙީ ގޮތުން ދުޅަހެޔޮ އާދަތަކަށް އާންމުން ހޭލުންތެރިކުރުމާއި ގުޅޭ މައުލޫމާތު ރައްޔިތުންނަށް ފޯރުކޮށްދިނުމަށް، ހެލްތު މިނިސްޓްރީއިން އިންތިޒާމު ކޮށްގެން ކުރިއަށްގެންދަވާ ހަރަކާތެކެވެ. ސިއްޙީ ކަންކަމާ ގުޅޭ ސައްޙަ މަޢުލޫމާތާއި، އެ ލިބޭ މަޢުލޫމާތުތަކަށް ފަހު ދެން ޢަމަލުތައް ބައްޓަންކުރަންވީ ގޮތާއި، ވަކީން ޚާއްސަކޮށް ބަލިޖެހުމުގެ ކުރީން ބަލިން ރައްކާތެރިވުމަށް އެޅިދާނެ ފިޔަވަޅުތައް ހިމެނޭހެން، ވަށާޖެހޭ ގޮތެއްގައި ފުރިހަމަ ނިޒާމެއްގެ ތެރެއިން ރައްޔިތުން ހޭލުންތެރިކުރުވުމަށް، މާލެއާއި އަތޮޅުތަކުގެ ހޮސްޕިޓަލުތައް ހިމެނޭހެން ދާއިރާގެ ކަމާ ގުޅުންހުރި، 50 އަށްވުރެ ގިނަ ޖަމުޢިއްޔާ، ޖަމާޢަތްތަކުން މި އަހަރުގެ އެކްސްޕޯގައި ބައިވެރިވެއެވެ. "ދުޅަހެޔޮ ޖީލަކަށް އެންމެން އެކުގައި" މި ޝިއާރުގެ ދަށުން، ހެލްތު އެކްސްޕޯ 2025 ކުރިއަށްގެންދެވުމަށް ހަމަޖެހިފައިވަނީ މިހިނގާ ނޮވެމްބަރު 13، 15 އަދި 16، މި 3 ދުވަހުއެވެ.
