މޭކަޕް ކުރާއިރު ފޭކް އެސްފިޔަ ބޭނުންކުރާ ދިވެހީންވެސް އުޅެއެވެ. މިގޮތަށް އެސްފިޔަ ބޭނުންކުރާއިރު ލިބިދާނެ ގެއްލުމަށް ވިސްނަންޖެހެއެވެ.
ގުދުރަތީ ގޮތުން އެސްފިޔަތައް އުފެދިފައި ހުންނަނީ ދައުރުވާ ވައި ލޮލަށް އެޅޭ މިންވަރު ދަށްކޮދީ، ލޮލުގައި ފެންހެދުން ކުޑަކޮށްދޭ ގޮތަށެވެ. އަދި އަވިން ރައްކާތެރިކޮށްދޭ ގޮތަށެވެ.
ފޭކް އެސްފިޔައަކީ ތެރަހެއް ބޭނުންކޮށްގެން ގުދުރަތީ އެސްފިޔަތަކުގެ މަތީގައި ހަރުކޮށްލާ އެއްޗެކެވެ. މީގެ ސަބަބުން ލޯ އިތުރަށް ރީތިކަމަށް ދައްކައެވެ.
ފޭކް އެސްފިޔަ އެއްދުވަހުން އަނެއް ދުވަހަށް މަޝްހޫރުވަމުން އަންނައިރު އެފަދަ އެސްފިޔަ އަކީ ރައްކާތެރި އެއްޗެއްތޯއެވެ؟ މި ސުވާލުގެ ޖަވާބު އެހާ ފަސޭހައެއް ނޫނެވެ. އާންމުކޮށް ފޭކް އެސްފިޔަ ހަރުކުރާނަމަ އޭގެ ނޭދެވޭ އަސަރު ކުރުމުގެ ފުރުސަތު އެބައޮތެވެ. ލޮލަކީ ވަރަށް ނާޒުކު ގުނަވަނަކަށް ވެފައި ލޮލުގައި އެއްޗެއް ހަރުކުރާނަމަ ވަރަށް ފަރުވާތެރިވާން ޖެހެއެވެ. ފޭކް އެސްފިޔަ ހަރުކުރުމުގެ ސަބަބުން ލޯ ހިރުވުން، އެލާޖިކްވުން ނުވަތަ ލޮލުގެ އެހެނިހެން މައްސަލަތައް ދިމާވުމުގެ ފުރުސަތު އެބައޮތެވެ.
ފޭކް އެސްފިޔަ ބޭނުންކުރުމުން ލިބިދާނެ ބައެއް ގެއްލުން
- ތެރަހަށް އެލާޖިކްވުން
- އެސްފިޔަތަކުގެ ބުޑު ރަތްވެ ދުޅަވާގޮތްވުން
- ލޯ ހިރުވުމާއިއެކު އިންފެކްޓްވުން
- ގުދުރަތީ އެސްފިޔަތައް މަދުވާން ފެށުން
- ގުދުރަތީ އެސްފިޔަތައް އެލޭގޮތްވުން
ފޭކް އެސްފިޔަ ބޭނުންކުރާއިރު ސަމާލުވާންޖެހޭ ބައެއް ކަންކަން
ފޭކް އެސްފިޔަ ބޭނުން ކުރުމުގައި އެންމެ މުހިންމު ސަމާލުކަމެއް ދޭންވާނީ ސާފުތާހިރު ކަމަށެވެ. އެފަދަ އެސްފިޔަތައް ގަންނައިރު އޭގައި ހުންނަ އިރުޝާދުތައް ރަނގަޅަށް ކިޔާ އެއަށް އަމަލުކުރަން ވާނެއެވެ. އެހެންނޫންނަމަ ނުރައްކާތެރި ބެކްޓީރިއާ ނުވަތަ ފަންގަސް ޖަހާގޮތްވެއެވެ. އަދި ބޭނުންކުރަންޖެހޭ ގޮތަށް ރަނގަޅަށް ބޭނުން ނުކުރެވޭނަމަ ލޮލުގެ އިންފެކްޝަންތައް ޖެހުން އެކަށީގެންވެއެވެ.
އެކަކު ބޭނުން ކުރާ އެސްފިޔަ އެހެންމީހަކު ބޭނުން ނުކުރުން:
އެކަކު ބޭނުންކުރާ އެސްފިޔަތަކެއް އެހެންމީހަކު ބޭނުން ކޮށްލަން ދިނުމަކީ ރަނގަޅުކަމެއް ނޫނެވެ. އޭރުން އެކެއްގެ ލޮލުގައި ނުވަތަ ހަމުގައިވާ ޖަރާސީމުގެ އަސަރު އެހެން މީހުންނަށް ކުރުމުގެ ފުރުސަތު އޮވެއެވެ. މޭކަޕްސާމާނު ވިއްކާ ފިހާރައެއްގައި ފޭކް އެސްފިޔައިގެ ސާމްޕަލްއެއް ޗެކްކޮށްލަން ބޭނުންވި ކަމުގައިވިޔަސް ނޫނެކޭ ބުނާށެވެ. އެފަދަ ސާމްޕަލް އެސްފިޔަ ސެޓަކީ އެހެންމީހަކު ބޭނުންކޮށްފައިވާ އެއްޗަކަށްވެސް ވެދާނެއެވެ. ވީމާ އާ އެއްޗެއްކަން ކަށަވަރުނުވާނަމަ އެފަދަ އެއްޗެއް އަޖުމަ ބަލާލުމުގެ ގޮތުންވެސް ބޭނުން ނުކުރުން ބުއްދިވެރިއެވެ.
