ޑިޕްރެޝަން އަކީ ހަގީގަތެކެވެ. ޑިޕްރެޝަން އާއި ކުރިމަތިލާން ޖެހިފައިވާ މީހުންނަށް އެއީ ކިހާވަރެއްގެ ވޭންހުރި މުޖުތަމައުގެ އެހީތެރިކަން އިންތިހާއަށް ބޭނުންވާކަމެއްކަން ޔަގީންވެއެވެ. އެކަމަކު ހިތާމައަކީ ޑިޕްރެޝަނުގެ ވޭނުގައި އުޅޭ މީހުން މަދުންނަމަވެސް މުޖުތަމައުން ބާކީކޮށްލެވޭކަމެވެ. އެންމެ ގާތް މީހުންގެ އެހީތެރިކަން ބޭނުންވާއިރު އެއެހީތެރިކަން ނުލިބި އެކަނިވެރިވެއެވެ. އިއްޔެ އަޅުގަނޑުމެންނާއި ދާއިމަށް ވަކިވެގެންދިޔަ އާއިޝަތު މުހައްމަދު 30 އަހަރުގެ ވާހަކަ ވޭތުވެދިޔަ 24 ގަޑިއިރު މުޅި ސޯޝަލް މީޑިއާގައި ދެކެވުނެވެ. ދެކުދިންގެ މި ޒުވާން މަންމަ ނިޔާވީ ޑިޕްރެޝަން ބަލީގައި އެއްވެސް އެއްޗެއް ނުކެވި ބަލި އެނދުގައި ވޭނީ ދުވަސްތަކެއް ތަހައްމަލު ކުރަމުންދަނިކޮށެވެ.
އައިޝާގެ ގާތް އެކުވެރިއަކު ވަނީ އައިޝާ ނިޔާވުމުގެ އެންމެ 7 ދުވަސް ކުރިން އައިޝާ އާއި ދެކެވުނު ވާހަކަ ފޭސްބުކްގައި ހިއްސާކޮށްފައެވެ. އެ އަސަރުގަދަ މެސެޖުތަކުގައި ވެއެވެ. " މަރާ ހަނގުރާމަ ކުރަނީ ހަމަ. ޑޮކްޓަރަށް ދެއްކިއަސް ނުވޭ ރަނގަޅެއް. ނުކެވޭ. އެއްޗެއް ބުޔަސް ހޮޑު. ނިދެނީ ވަރަށް ކުޑަކޮށް ވަރަށް ހާލުން. ނިދިޖެހިލިއަސް ހުސް މީހުން މަރުވާތަން ފެންނަނީ. ދެން ދުނިޔޭގައި އުޅޭކަށް ހިއެއް ނުވޭ މާދުވަސް އޮތްހެން. އެކިކަހަލަ ވޭނުގައި އުޅެފިން. އެކަމަކު މިވަރުކަމެއް ނުދެކެން".
އައިޝާގެ މެސެޖުތައް ކިޔާލި ކޮންމެ މީހެއްގެ ހިތަށް އަސަރު ކުރާނެކަން ޔަގީނެވެ. އެކަމަކު ސުވާލަކީ އައިޝާ ދުނިޔޭގައި ހުރިއިރު އުޅުނު ހާލު ދަންނަ މީހުންގެ ތެރެއިން އައިޝާ އަށް އެހީތެރިކަން ފޯރުކޮށްދިނުމަށް މަސައްކަތްކުރީ ކިތައް މީހުން ހެއްޔެވެ؟ އެހީއަށް އެންމެ ބޭނުންވި ވަގުތު އެކަން މަޖަލަކަށް ހެދި މީހުން އުޅޭކަމަށް އައިޝާގެ ގާތް ބައެއް މީހުން ވަނީ ބުނެފައެވެ. އޭނާގެ ހާލަތު އަންގައިދޭން މަސައްކަތްކުރިއިރު ޖޯކު ޖެހިކަމަށް ތުހުމަތުކުރެވެއެވެ.
އަޅުގަނޑުމެންގެ ތެރޭގައި މިފަދަ އެތައް އައިޝާއެއް އެބައުޅެއެވެ. ޑިޕްރެޝަންގެ ބޮޑު ވޭނުގައެވެ. އެފަދަ މީހުން ޑިޕްރެޝަނަށް ދާން މަގުފަހިވާ ސަބަބު ހޯދަން ޖެހެއެވެ. އެފަދަ ކަންތައްތަކާއި ދުރުކޮށް ހިތްހަމަޖެހުން ހޯދައިދިނުމަށް މަސައްކަތް ކުރަންޖެހެއެވެ. ދުނިޔޭގައި ހުރި ދުވަހު ބޭނުންވަނީ އަޅާލުމާއި އެހީތެރިކަމެވެ. އެފަދަ މީހުން އަނބުރާ މުޖުތަމައަށް ގެނައުމަށް މަސައްކަތް ކުރުމަކީ އަޅުގަނޑުމެންގެ އެންމެން އަތުކުރި އޮޅާލައިގެން ކުރަންޖެހިފައިވާ ކަމެކެވެ.
ޑިޕްރެޝަން އަކީ ހަގީގަތެއްކަން ގަބޫލުކުރަން އެބަޖެހެއެވެ. އެއީ ވޭން ހުރި ބައްޔެކެވެ. އެބަލީގެ ވޭން އެންމެބޮޑަށް އެނގޭނީ ތިމާއަށް ނުވަތަ އާއިލާ މީހަކު އެފަދަ ކަމެއް ތަހައްމަލު ކުރަން ޖެހުމުންނެވެ.
އައިޝާގެ ފުރާނައަށް ސުވަރުގޭގެ މަތިވެރި ނިޢުމަތް މިންވަރު ކުރައްވާ ކުޑަކުޑަ ދެކުދިންނާއި އާއިލާއަށް ކެތްތެރިކަން މިންވަރު ކުރައްވާ ބާއްޖަވެރި ދުވަސްތަކެއް މިންވަރު ކުރައްވާށިއެވެ. އަދި ޑިޕްރެޝަންގެ ބަލީގައި ދުވަސްތައް ހޭދަކުރަމުން އަންނަ މީހުންނަށް އެބަލީގައި ލުއި ލިބި ފަސޭހަ ދުވަސްތަކެއް މިންވަރު ކުރައްވާށިއެވެ. އާމީން!
