ހިތުގެ ތަފާތު ބަލިތައް ތަހައްމަލު ކުރާ ގިނައަދަދެއްގެ މީހުން ރާއްޖޭގައިވެސް އުޅެއެވެ. މީގެތެރޭގައި ދާއިމީ ފަރުވާ ހޯދާ މީހުންނާއި އޮޕަރޭޝަންކޮށްގެން ހައްލު ހޯދަން މަޖުބޫރުވެފައިވާ މީހުންވެސް އުޅެއެވެ. ހާޓްއެޓޭކާއި، ސްޓްރޯކާއި ހިތުގެ ތަފާތު ބަލިތަކާއި ދުރުވުމަށް އަމިއްލައަށް ކުރެވިދާނެ ކަންތައްތައްވެސް ހުންނާނެއެވެ. ދުޅަހެޔޮ ސިއްހަތަކަށް އިސްކަންދީގެން އަމިއްލައަށް ކުރެވެންހުރި ކަންތައް އަމިއްލައަށް ކުރުމަށް އިސްކަންދެމާތޯއެވެ.
ދުޅަހެޔޮ ހިތެއް ހޯދުމަށް ކުރެވިދާނެ ކަންތައް:
1- ދުޅަހެޔޮ ހިތަކަށް އަދި ދުޅަހެޔޮ ސިއްހަތަކަށްވެސް އެންމެ ބޭނުންތެރި އެއް ކަމަކީ ކަސްރަތެވެ. މަދުވެގެން ހަފްތާގެ ފަސްދުވަހު ކަސްރަތަށް ހިނގާލަށް ނުވަތަ ދުވެލަން ދެވިދާނެއެވެ. އަދި މިފަދަ ކަސްރަތަކުން ހިތަށް ލިބޭ ފައިދާގެ އިތުރުން ނަފްސާނީ ގޮތުންނާއި ޖިސްމާނީ ގޮތުންވެސް މީހާ ތާޒާކޮށްލަދެއެވެ. ފިޒިކަލީ އެކްޓިވްކޮށް ހުރުމަށްޓަކައި ގަވާއިދުން 30-45 މިނިޓް ކޮންމެ ދުވަހަކުވެސް ކަސްރަތު ކުރާށެވެ.
2- ދުޅަހެޔޮ ހިތެއް ހޯދުމަށް ދުންފަތުގެ އިސްތިއުމާލު ކުރުން ހުއްޓާލަންޖެހެއެވެ. ސިނގިރޭޓް ބުއިމާއި ދުރުހެލިވެ މީހާ ހެލިފެލިވެ އުޅުން ގިނަ ކުރާށެވެ.
3- ހިތުގެ ބަލި ހުންނަ މީހެއްނަމަ ޑޮކްޓަރު ދީފައިވާ ބޭސް ގަވާއިދުން ކެއުން ވަރަށް މުހިންމެވެ. އަދި ހަކުރު ބައްޔާއި، ލޭމައްޗަށް ދިއުމާއި ކޮލެސްޓްރޯލަށް ބޭސްކާނަމަ ގަވާއިދުން ބޭސް ކެއުމަށްވެސް ސަމާލުކަންދޭން ވާނެއެވެ.
4- ޑޮކްޓަރެއްގެ އިރުޝާދާ ނުލައި އަމިއްލައަށް ބޭސްތައް ގަނެގެން ކެއުމަކީ ރަނގަޅުކަމެއް ނޫނެވެ. ހިތުގެ ބައްޔަކަށް ފަރުވާކުރާ މީހެއްނަމަ އެއްވެސް ބޭހެއް ބޭނުން ކުރަންވާނީ ޑޮކްޓަރަށް ދެއްކުމަށްފަހު ޑޮކްޓަރު ދެއްވާ އިރުޝާދާ އެއްގޮތަށެވެ. އެހެންނޫންނަމަ ހިތާމަވެރި ގޮތެއް މެދުވެރިވުންވެސް އެކަށީގެންވެއެވެ.
5- ސިއްޙަތަށް ފައިދާހުރި ކާނާ ކެއުމަކީ ދުޅަހެޔޮ ހިތެއް ހޯދަން އެދޭނަމަ ވަރަށް މުހިން ކަމެކެވެ. ތަރުކާރީ އާއި މޭވާ އަދި ސީރިއަލް އާއި ފައިބާރ އެކުލެވޭ ބާވަތްތައް ކެއުމުގައި ހިމެނުމަށް އިސްކަންދޭށެވެ. އަދި ލޮނު ކާމިންވަރު މަދުކޮށްލާށެވެ. ފެޓްސްގެ ބައި އެކުލެވޭ ތެލުލާފައި ހުންނަ ފާސްޓް ފުޑް ޕެކެޓްތަކުގައި ބަންދުކޮށްފައި ހުންނަ ތައްޔާރީ ކާނާ އާއި ދުރަށްދާން ޖެހެއެވެ.
6- ހިތުގެ ދުޅަހެޔޮކަމަށް ސައިކޮލޮޖިކަލް ސްޓްރެސް ހުރަސް އަޅައެވެ. ވަޒީފާ އަދާކުރާ މާހައުލުންނާއި ގޭތެރެއިން ކުރިމަތިވާ ސައިކޮލޮޖިކަލް ސްޓްރެސް ފިލުވާލުމަށް ކަސްރަތު ކުރެވިދާނެއެވެ.
ފަރުވާ ކުޑަނުކޮށް މިފަދަ ކަންތައްތަކަށް ސަމާލުކަންދޭ ފަރާތްތަކަށް ދުޅަހެޔޮ ހިތެއް ހޯދިދާނެއެވެ.
މަޢުލޫމާތު: އެކްސްޕްރެސް، ޑަބްލިއުއެޗްއޯ
