އުމުރުން އެންމެ 8 އަހަރުގެ ލުހާ މުހައްމަދު އަޝްރަފް (ހދ. ކުރިނބި/ ހުވަނދުމާގެ) އަކީ އާދައިގެ ދިރިއުޅުމެއް އުޅެމުންއައި ކުއްޖެކެވެ. ވާހަކަދެއްކުމުގައި ދަތިތަކެއް ހުރުމުން ލުހާ އަށް ދިޔައީ ފަރުވާ ދެމުންނެވެ. ހަށިގަނޑުގެ ބޭރުފުށުންވެސް އެއްވެސް މައްސަލައެއް ހުރިކަމަކަށް ކުރިން ނުފެނެއެވެ. އެހެންނަމަވެސް ލުހާގެ ހާލަތު ބަދަލުވީ ކުއްލިއަކަށެވެ. ލުހާގެ މަންމަ ޝިރުމީނާ އަބްދުﷲ ވަނީ 'ޒީޓައިމްސް' އަށް ވަރަށް ތަފްސީލުކޮށް ލުހާގެ ހާލަތު ކިޔައިދީފައެވެ.
" މިއަހަރު ރޯދަމަހުގެ ހަފްތާއެއްހާ ދުވަސްކުރިން ވަރަށް ބޮޑަށް ހުންއައީ. 3 ދުވަހު ހުންއައިސް ރަނގަޅުވިފަހުން އެއް ލޯ އިންނަނީ ބޭރަށް ނުކުމެފަ. ޑޮކްޓަރަށް ދެއްކުމަށްފަހު އެމްއާރުއައި ހެދީމަ އެނގުނީ ލޮލާއި ސިކުނޑިއާއި ދެމެދު ޓިއުމަރެއް އުފެދިފައި ހުރިކަން. ވަގުތުން އޮޕަރޭޝަން ކުރަން ޑޮކްޓަރު ލަފާދިނީ".
ޑޮކްޓަރު އެއިރު ފާހަގަކުރިގޮތުގައި އެއީ ވަރަށް ނުރައްކާތެރި ވައްތަރެއްގެ ޓިއުމަރެކެވެ. އާއިލާއިން ބެލީ ވީހާވެސް އަވަހަކަށް އޮޕަރޭޝަން ކުރެވޭތޯއެވެ.
" ރާއްޖެއިން ކުރެވެން އޮތް އޮޕަރޭޝަނެއްވީމަ އަޅުގަނޑުގެ ހާލަތު އެއިރު ހުރިގޮތުން ބެލީ ރާއްޖޭގައި އާއިލާ ކައިރީގައި ހުރެގެން އޮޕަރޭޝަން ކުރެވެންޏާ ކުރަން. އައިޖީއެމްއެޗްއިން ލަސްވާތީ ޓްރީޓޮޕްއަށް ދިޔައީ. 15 ގަޑިއިރުގެ އޮޕަރޭޝަނަށްފަހު ކުއްޖާ ނެރެފަ ޑޮކްޓަރު ވިދާޅުވީ ޓިއުމަރ އެއްކޮށް 'ކޮމްޕްލީޓެޑް'އޭ. އެކަމަކު ނަގާފައި ހުރި އެއްވެސް ބައެއް ނުދައްކާ. އޮޕަރޭޝަންގައި ޑޮކްޓަރ ޖަހާފައި ހުރި ނަރުތައް ނެއްޓި ދުވަހު ފިޓްޖެހުނީ ލުހާ. އޮޕަރޭޝަނަށްފަހު ހެދި އެމްއާރުއައިއިން ވެސް ދެއްކީ ކުރިން އޭޑީކޭއިން ހެދި އެމްއާރުއައިއާ އެއްވެސް ތަފާތެއް ނެތްކަމަށް. ޓިއުމަރ ހުރިކަމަށް. ޑޮކްޓަރާއި ސުވާލު ކުރީމަ ބުނީ އޮޕަރޭޝަންގެ ސަބަބުން ދުޅަވެފައި ހުރިކަމަށް. އެއީ ޓިއުމަރ އެއް ނޫންކަމަށް. ޑޮކްޓަރ ސާމްޕަލް އަށް ނެގި އެތިކޮޅު ހޮސްޕިޓަލުން ބޮމްބޭއަށް ފޮނުވައިގެން ހެދި ޓެސްޓުން އެނގުނީ ކެންސަރ އަށް ބަދަލުވެފައިއިންކަން. ޓްރީޓޮޕް ހޮސްޕިޓަލުން އަޅުގަނޑުމެން ކައިރީގައި ބުނީ ކެންސަރ އަށް ބަދަލުވެފައޭ ވަރަށް އެމަޖެންސީކޮށް އިންޑިއާއަށް ފުރައިގެންދާން". ލުހާގެ މަންމަ ކިޔައިދިނެވެ.
އާސަންދަ އެހީގައި ލުހާ ގޮވައިގެން އާއިލާއިން ދިޔައީ ކިމްސް ހޮސްޕިޓަލަށެވެ.
" ކިމްސް ހޮސްޕިޓަލުން ބުނީ ޓިއުމަރުގެ 50 އިންސައްތަވެސް ނަގާފައި ނެތްކަމަށް. ކުރިން އޮޕަރޭޝަން ކުރި ތަން ނޫން އެހެން ތަނަކުން އަލުން އޮޕަރޭޝަން ކުރުމަށް ކިމްސް އިން ބުނީ. ކުރިން ކޮށްފައި އިނީ ވަރަށް ބޮޑަށް ބޮލުގެ މަތިން ފަޅާލާފަ. ދެން ކުރަން ޖެހުނީ ބުމަމަތިން. ބުމައާއި ލޮލާ އެންމެ ކައިރިން އުފެދިފައި އިނީ. ލޮލުގެ ނާރުތަކުގައި ހިފާފައި ހުރުމުން ލޮލަށް ދެން ފެންނާނެކަމުގެ އެހާބޮޑު ޔަގީންކަމެއް ނެތް ޑޮކްޓަރަށް. ޓިއުމަރ ނެގުމަށްފަހު ޑޮކްޓަރ ވިދާޅުވީ އެ ހޮސްޕިޓަލުގައި ނެތޭ މިކުއްޖާއަށް ދެވޭނެ ތެރަޕީއެއް. އާދަޔާޚިލާފު ވައްތަރެއްގެ ޓިއުމަރއެއްވީމަ ޑޮކްޓަރ ވެސް ވިދާޅުވީ ޑޮކްޓަރ ހަޔާތުގައިވެސް ނުދެކޭކަމަށް މިވަރުގެ ނުރައްކާތެރި ޓިއުމަރެއް. އޭޝިއާގައިވެސް ހުރީ 2 ތަން މިފަރުވާ ދެވޭނެ".
އާއިލާއިން މައުލޫމާތު ދޭގޮތުގައި ބެލިބެލުމުން އެނގުނީ ލުހާއަށް ބޭނުންވާ 'ޕްރޮޓޮން' ތެރަޕީ ދެވެން ހުރީ ޗެންނާއީގެ އެޕޯލޯ ހޮސްޕިޓަލުންނާއި ބޮންބޭގެ ޓާޓާ މެމޯރިއަލް ހޮސްޕިޓަލުންނެވެ.
" ޑޮކްޓަރ ވިދާޅުވީ ބޮންބޭގެ ޓާޓާ ހޮސްޕިޓަލަށް ދާން. އާސަންދަ އެހީ ނުލިބޭތީ އެހާބޮޑު އަދަދެއް އަޅުގަނޑުމެންގެ މާލީ ހާލަތު ހުރިގޮތުން ދެއްކެން ނެތީމަ މިއައީ އެނބުރި ރާއްޖެ. ޑޮކްޓަރު ވިދާޅުވީ 36000 ޑޮލަރު ޚަރަދުވާނެ ކަމަށް. ދިވެހި ރުފިޔާއިން ފަސްލައްކައަށްވުރެ ގިނަ ރުފިޔާ. 2 މަސްދުވަސް ހޭދަވޭ މަދުވެގެން ފަރުވާއަށް އިންޑިއާގައި. ރައްޔިތުންގެ ކިބައިން މިއެދެނީ އެހީތެރިކަމަށް. ލުހާ އަށް ހެޔޮ ދުޢާ ކޮށްދިނުމަށް".
ޓިއުމަރ ނެގުމަށްފަހު ލުހާގެ އެއް ލޮލުން ނުފެނެއެވެ. އަމިއްލަ ޒާތުގައި އެ ލޯ ނުވެސް ހުޅުވެއެވެ. ކަޅިވެސް ހަރަކާތް ނުކުރެއެވެ. ރާއްޖެއިން ކުރި އޮޕަރޭޝަންގެ ކުރިންވެސް ކަޅި ހަރަކާތް ނުކުރަން ފެށިއިރު މިއީ އުފާވެރިކަމާއެކު ކުރިން ކުޅެ އުޅުނު ކުޑަކުޑަ ލުހާއަށް ލިބުނު ބޮޑު ހިތްދަތިކަމެކެވެ. ކެންސަރު ބަލިން ސަލާމަތްވުމަށް ފަރުވާ ފުރިހަމަކުރުމަށް އާއިލާއިން އެދެނީ ވީހާވެސް ގިނަ މީހުން ވެވުނުމިންވަރަކުން އެހީތެރިކަން ފޯރުކޮށްދިނުމަށެވެ. އާއިލާއިން ފަރުވާއަށް އިންޑިއާ އަށް ނުދެވި އެތިބީ ފައިސާގެ ތަނަވަސްކަން ނެތިގެންނެވެ.
ނޯޓް: މިއީ ޒީޓައިމްސްއިން ގެނެސްދޭ މިފަދަ އެހީގެ 52 ވަނަ ރިޕޯޓެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވަނީ ބަލިމީހާގެ އެކައުންޓަށެވެ. މި ޢާއިލާ އަށް އެހީ ލިބިފައިވާތީ، މިރިޕޯޓުގައި ކުރިން ހިމަނަައިފައިވާ އެކައުންޓުު ނަންބަރު ވާނީ އުނިކޮށްފައެވެ. ޝުކުރިއްޔާ!
