ގދ. ގައްދޫ ބަށިމާގެ އުމުރުން 38 އަހަރުގެ ޢާއިޝަތު ރިޝްމީ އަކީ ކުރިން ސަރުކާރުގެ ޒިންމާދާރު ވަޒީފާއެއްގައި މުރާލިކަމާއެކު މަސައްކަތް ކުރަމުން އައި ޒުވާން މަންމައެކެވެ. އެހެންނަމަވެސް 2024 ވަނަ އަހަރުގެ ޖުލައިމަސް ވެގެންދިޔައީ ރިޝްމީގެ ހަޔާތަށް ބޮޑު ބަދަލެއް ގެނުވި މަހަކަށެވެ.
އެއިރުގެ ހަނދާންތައް އާކުރަމުން ރިޝްމީ ވަނީ 'ޒީޓައިމްސް' އަށް އޭނާގެ ބަލިހާލަތު ކިޔައިދީފައެވެ.
" ބަލިވާން ފެށީ 2024 ވަނަ އަހަރު ޖުލައިމަހު. ހުންއައިއްސަ ހޮޑުލާން ފެށީމަ ޑޮކްޓަރަށް ދައްކައިގެން ޓެސްޓް ހެދީ. އެނގުނުއިރު ހުރީ 8 ޕަސެންޓް ކިޑްނީ ފަންކްޝަން. އެއިރު ދެއްކީ އައިޖީއެމްއެޗް އަށް. ޑޮކްޓަރު ބުނީ ޑައިލިސިސް އެއިރު އަދި ހަދަން ނުޖެހޭ ކަމަށް. އެހެން ހުއްޓާ ސެޕްޓެމްބަރުމަހު ފިޓު ޖެހުނީ. ދެން ގެންދިޔައީ ޓްރީޓޮޕް ހޮސްޕިޓަލަށް. ޑޮކްޓަރު ބުނީ ކިޑްނީ މަސައްކަތް ނުކުރާކަމަށް. 8 ޕަސެންޓްގައި ހުރިއިރުވެސް ޑައިލިސިސް ހަދަން ޖެހޭނެ ކަމަށް".
2024 ވަނަ އަހަރުގެ ސެޕްޓެމްބަރު 18 ވަނަ ދުވަހުން ފެށިގެން ހަފްތާއަކު 2 ދުވަހު ރިޝްމީ ދަނީ ޑައިލިސިސް ހަދަމުންނެވެ. 13 އަހަރާއި 4 އަހަރުގެ 2 އަންހެން ކުދިން ރިޝްމީމެންގެ ދެމަފިރިންގެ ތިބިއިރު ލޯބިވާ ފިރިމީހާ އަހުމަދު މުނީރު ވަނީ ރިޝްމީ އަށް ކިޑްނީ ހަދިޔާކުރަން ނިންމާފައެވެ.
ރިޝްމީގެ ކިޑްނީ ޓްރާންސްޕްލާންޓް ސާޖަރީ ކުރުމަށް މަސައްކަތް ކުރަމުންދަނީ އަންނަ އޮގަސްޓްމަހުގައެވެ. އޭގެ ކުރިން ވާންޖެހޭ ތައްޔާރީތައް ދަނީ ވަމުންނެވެ.
" ރާއްޖޭގެ ހެލްތް މިނިސްޓްރީ އަދި ފޮރިން މިނިސްޓްރީއިން ވެސް ވަނީ ލިޔުން ލިބިފައި. ލަންކާ ހޮސްޕިޓަލުން ލިޔުން ދޫކުރަނީ ބަލިމީހާ 'ފިޒިކަލީ' ބެލުމަށްފަހު. އެހެންވެ އާދީއްތަ ދުވަހު ފުރަން މިއުޅެނީ ލަންކާއަށް. ގޮއްސަ އަންނާނީ ލިޔުން ލިބުނީމަ. ދެން އެއަށްފަހު އާސަންދައަށް ލިޔުން ލެވޭނީވެސް". ރިޝްމީ މައުލޫމާތު ދިނެވެ.
ކިޑްނީ ހަދިޔާކުރުމަށްފަހު ފިރިމީހާވެސް ފަރުވާއަށް ލަންކާގައި މަޑުކުރަންޖެހޭނެ އެވެ. އަދި ރިޝްމީގެ ފަރުވާއަށް ވެސް 6 މަހާއި 8 މަހާއި ދެމެދުގެ މުއްދަތެއް މަޑުކުރަންޖެހޭނެ ކަމަށް ޑޮކްޓަރު ވަނީ ލަފާދީފައެވެ. ކިޑްނީ ބަލީގެ ފަރުވާއަށް ދެމަފިރިން އެކީގައި ގިނަ ދުވަހު ރާއްޖެއިން ބޭރުގައި މަޑުކުރުމަކީ ބޮޑު ޚަރަދެއް ހިނގާނެކަމެކެވެ.
ބަލިހާލަތު ހުރިގޮތުން ރިޝްމީ ވަނީ 17 އަހަރު އަދާކުރި ވަޒީފާއިންވެސް 2024 ވަނަ އަހަރު ޖުލައިމަހު ވަކިވެފައެވެ. އެއަށްފަހު އާއިލާ މާލޭގައި ދިރިއުޅެމުން އަންނަނީ ފިރިމީހާ އަށް ލިބޭ މުސާރައިން އެކަންޏެވެ.
ނޯޓް: މިއީ ޒީޓައިމްސްއިން ގެނެސްދޭ މިފަދަ އެހީގެ 51 ވަނަ ރިޕޯޓެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވަނީ ބަލިމީހާގެ އެކައުންޓަށެވެ. މި ޢާއިލާ އަށް އެހީ ލިބިފައިވާތީ، މިރިޕޯޓުގައި ކުރިން ހިމަނައިފައިވާ ފޯން ނަންބަރާއި އެކައުންޓު ނަންބަރު ވާނީ އުނިކޮށްފައެވެ. ޝުކުރިއްޔާ!
