ދުނިޔޭގައި އުޅޭއިރު އަންނާނީ އުފަލާއި ހިތާމައެވެ. ރ. ކިނޮޅަހަށް އުފަން ސަމިއްޔާ ހުސައިން އާއި ޢަބްދުލްހަމީދު ޔޫސުފަކީ 4 ދަރިންނާއެކު ހިތްހަމަޖެހުމާއެކު ދުވަސްތައް ވޭތުކުރަމުން އައި އާއިލާއެކެވެ. އެހެންނަމަވެސް ދޮށީ ދަރިފުޅުގެ އުމުރުން އެންމެ 26 އަހަރުގައި ކިޑްނީ ފެއިލްވެ ކިޑްނީ ބަދަލުކުރުމުގެ ބޮޑު އޮޕަރޭޝަން ކުރަން ޖެހުނީއެވެ. ފުރަތަމަ ކިޑްނީ ހަދިޔާ ކުރުމަށް ނިންމީ ދަރިފުޅުގެ ލޯބިވާ މަންމަ ސަމިއްޔާ އެވެ. އެހެންނަމަވެސް ސަމިއްޔާގެ ބަލިހާލަތު ހުރިގޮތުން ކިޑްނީ ހަދިޔާ ކުރީ ދަރިފުޅުގެ ބައްޕަ ހަމީދު އެވެ.

މިއާއިލާގެ ވާހަކަ 'ޒީޓައިމްސް' އަށް ކިޔައިދިނީ އަސަރާއިއެކުގައެވެ. ކިޑްނީ ބަލިން 'ދެބަފައިން' އަރައި ނުގަނެވިގެން އުޅެނިކޮށް އުމުރުން 48 އަހަރުގެ ސަމިއްޔާ އަށް މިވަނީ ހިތުގެ ވަރަށް ބޮޑު އޮޕަރޭޝަނެއް ކުރަންޖެހިފައެވެ.

" ވަރަށް ބަލި. ނިދިނާދޭ. ހުންނަނީ ވަރަށް ވަރުބަލިވެފަ. ތުރުތުރުއަޅާފަ. ރިއްސާތީ ހިނގަން އުދަގޫ، ކިޔައިދޭންވެސް ދަތި.." ސަމިއްޔާ އަށް ކިޔައިދެވުނީ އެވަރަށެވެ. ވާހަކަދައްކަން އުނދަގޫވެ ކެއްސާތީ އިތުރަށް ވާހަކަ ކުރިއަށްގެންދިޔައީ ފިރިމީހާ ހަމީދު އެވެ.

Advertisement

" ނިދަން އޮށޯތުމަށްފަހު ނިދަން އުނދަގޫވޭ. ފައި ފޮއްސިވެފަ ހުރީމަ ފައި ބާއްވަން އުނދަގޫވޭ. ރޭގަނޑުގެ ނިދިން މަހުރޫމްވުމުގެ އިތުރަށް ފަތިހު ތެދުވާއިރު ހުންނަނީ ވަރުބަލިވެފައި. ކުއްލިއަކަށް ކެއްސަން ފަށަނީ.. ހުންނަނީ ކަރުތެރޭގައި ދަވަ ހެދިފައި. އެއުނދަގުލުގައި އެކެއްސުން ކެއްސާތާ އެތައްއިރެއް ފަހުން ހެނދުނު 7، 8 ޖަހާއިރުވެސް އެކެއްސުމުގައި އުޅެމުން ގޭތެރޭގެ މަސައްކަތްތައްވެސް ކުރާތަން މިފެނުނީ،.. ކުޑަކޮށް ހިނގާލިއަސް ވަރުބަލިވޭ. އެވަރުބަލިކަން ތަކުރާރުވަމުން އައިސް ހިނގާވެސް ނުއުޅެވޭ ރަނގަޅަށް".

ސަމިއްޔާގެ ހިތުގެ ވޭލް ބަދަލުކުރުމަށް 'އޯޕަން ސާޖަރީ' އެއް ކުރުމަށް ވަނީ ހަމަޖެހިފައެވެ.

" ހިތުގެ ވޭލް ބަދަލުކުރަން ޖެހެނީ. ހިތުގެ އެއްފަޅި ހުންނަނީ ބޮޑުވެފައި. ދުޅަވެފަ. އެފަޅި އެކަށީގެންވާ ގޮތަކަށް މަސައްކަތް ނުކުރޭ. އެއޮޕަރޭޝަނަކީ ނާޒުކު ކާމިޔާބުވާނެކަމުގެ ޔަގީންކަން ކުޑަ އޮޕަރޭޝަނެއް. މިއީ މަދުން ނޫނީ ނުފެންނަ ވައްތަރެއްގެ ބައްޔެއް. މިބަލި ހުންނަ މީހަކު މިހާ ގިނަ ދުވަހު ދުނިޔޭގައި ހުރުން އެއީ ވެސް މަދުން ނޫނީ ނުފެންނަ ކޭސްއެއް ކަމަށް ޑޮކްޓަރުން ވިދާޅުވަނީ. އޮޕަރޭޝަން ކާމިޔާބު ވެދާނެ ކަމަށް އިންޑިއާގެ ޑޮކްޓަރުންވެސް ދިނީ 55 – 70 އިންސައްތަވަރު". އަސަރާއެކު ހަމީދު ފާހަގަކުރިއެވެ.

މި އާއިލާއިން ދިޔައީ 2022 ވަނަ އަހަރުން ފެށިގެން ކޮންމެ އަހަރަކު އިންޑިއާއިން ފަރުވާ ހޯދަމުންނެވެ.

" 2022 ވަނަ އަހަރު ޖެނުއަރީ މަހު ދިޔައީ ދޮށީ ދަރިފުޅަށް ކިޑްނީ ހަދިޔާ ކުރުމަށް. އެއޮޕަރޭޝަން ކުރެވުނީ އެޕްރީލް މަހު. 9 މަސްދުވަސް ހޭދަވި އިންޑިއާގައި ބޭސްފަރުވާއަށް. ކިޑްނީ އޮޕަރޭޝަނަށްފަހު ދަރިފުޅުވެސް އެއްކޮށް ރަނގަޅެއް ނުވޭ. ލޭގައި މައްސަލައެއް އުޅޭތީ އެކަމަށް ފަރުވާ ހޯދަން 6 މަހުން 6 މަހުން އިންޑިއާއަށް ދަރިފުޅު ދާންޖެހެނީ. އަޅުގަނޑުވެސް ކިޑްނީ ފަންކްޝަން އެހާ ރަނގަޅެއް ނޫން. 3 މަހުން 6 މަހުން ހަދަން ޖެހޭ ޓެސްޓްތައް ހަދަމުން ގޮސް އަހަރަކު އެއްފަހަރު މިދަނީ އިންޑިއާއަށް އަޅުގަނޑު. ދާ ކޮންމެ ފަހަރަކު އަންހެނުން ގޮވައިގެން ދަނީ. ކޮންމެ ފަހަރަކުވެސް ޑޮކްޓަރުން ބުނަނީ އޮޕަރޭޝަން ނުކޮށް ރަނގަޅު ނުވާނެކަމަށް. ބޭސްކައިގެން އޮޕަރޭޝަން ކުރެވެންދެން މިހުންނަނީ" ހަމީދު ފާހަގަކުރިއެވެ.

 ސަމިއްޔާގެ ބޭސްފަރުވާ ފުރިހަމަކުރުމަށް އާސަންދަ ހަމަނުޖެހޭތީ އަމިއްލައަށް ކުރަންޖެހޭ ޚަރަދު ވަރަށް ބޮޑެވެ. އާއިލާއިން ވަނީ ވަރަށް ތަފްސީލްކޮށް ހާލަތު ބަޔާންކޮށްދީފައެވެ.

" އިންޑިއާގައި ކުރިން ދެއްކި ހޮސްޕިޓަލެއްގެ ޑޮކްޓަރުގެ ލަފާގެ މަތިން ދެން ދެއްކީ ފޯޓިސް އަށް. ދެއްކިއިރު މި އޮޕަރޭޝަން ކޮށްދެވިދާނެ ކަމުގެ 90 އިންސައްތަ ވަނީ ދީފައި. މިވަރުގެ އުންމީދީ ޖަވާބެއް މިހާތަނަށް އައިއިރު އެހެން އެއްވެސް ހޮސްޕިޓަލަކުން ނުލިބޭ. 20،000 ޑޮލަރު (360،000 ވަރަކަށް ރުފިޔާ) އެއީ ހަމައެކަނި އޮޕަރޭޝަންގެ ޚަރަދު. އަޅުގަނޑުމެން ރާއްޖެ އައިސް އާންމުކޮށް ދައްކާ ޑޮކްޓަރު އަލީ ޝަފީޤަށް ދެއްކިން. އެކަމަކު އާސަންދަ އަށް ހުށަހަޅާ ލިޔުން ދޫކުރުމަށް ފުރުސަތު ނެތްކަން އެނގުނު. ޑޮކްޓަރުގެ ލަފައާއެކު އޭޑީކޭގެ ޑޮކްޓަރަށް ދެއްކީ. ޑޮކްޓަރު ވިދާޅުވީ މި އޮޕަރޭޝަން ކުރެވިދާނޭ. އެކަމަކު އޮތް އެންމެ ބޮޑު ރިސްކަކީ ޑޮކްޓަރު ވިދާޅުވީ އަދި މިފަދަ އޮޕަރޭޝަނެއް ނުކުރާކަމަށް. މިއީ އާކަމެކޭ. އެހެންވުމުން ރާއްޖެއިން މިހެން ބުނިކަމުގައިވިއަސް ބޭރު ޤައުމުތަކުގައި ޚާއްސަ ހޮސްޕިޓަލުތަކުން މިހާ ސީރިއަސް ކަމެއްގެ ގޮތުގައި ދައްކާއިރު ވަރަށް އުދަގޫކަމެއް ރާއްޖެއިން ކުޑަކުޑަ ޕަސެންޓެއްގައި އޮޕަރޭޝަނަށް ކުރިމަތިލާން. އާއިލާއާއި މަޝްވަރާކޮށް ނިންމީ މިވަރުގެ ރިސްކެއް ނުނެގުމަށް. އެހެންވެ މަސައްކަތް ފެށީ ފަންޑްރައިޒިން އިވެންޓްތައް ބާއްވާ ނޫސްތަކުގައި ރިޕޯޓް ހިއްސާކޮށް އެކި ގޮތްގޮތުން ފައިސާ އެއްކުރުމަށް". އާއިލާއިން މައުލޫމާތު ދީފައިވެއެވެ.

ސަމިއްޔާގެ ހިތުގެ އޮޕަރޭޝަން ކުރުމަށް ބޭނުންވާ އަދަދަށް މިހާތަނަށް ފައިސާ ހަމަވެފައެއް ނުވެއެވެ. އޮޕަރޭޝަނަށްފަހު އިންޑިއާގައި ހޭދަވާނެ މުއްދަތެއްވެސް އަދި ނޭނގެއެވެ. ކުރަންޖެހޭ ޚަރަދުތައް އިންތިހާއަށް ބޮޑެވެ. އެކަމަކު ބަލިހާލަތު އެއްދުވަހުން އަނެއް ދުވަހަށް ދަށަށް ދާތީ އާއިލާއިން މަސައްކަތް ކުރަނީ މި ޖޫން މަހުގެ 26 ވަނަ ދުވަހު ސަމިއްޔާ ގޮވައިގެން އިންޑިއާ އަށް ފުރުމަށެވެ.

.................................. 

.................................

ނޯޓް: މިއީ ޒީޓައިމްސްއިން ގެނެސްދޭ މިފަދަ އެހީގެ 50 ވަނަ ރިޕޯޓެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވަނީ ބަލިމީހާގެ އެކައުންޓަށެވެ. ޝުކުރިއްޔާ!