މާޒީގެ ހިތި ހަނދާންތައް މިއުފާވެރި ދުވަހުވެސް އޭނާގެ ހިތުގައި ބިންވަޅު ނެގިފައިވެއެވެ. އެއީ އަޔާނަށް ލިބުނު އެންމެ އުފާވެރި ދުވަހެވެ. ފަޚުރުވެރިކަމާއެކު ސިފައިންގެ ޔުނީފޯމް ލީ ދުވަހެވެ.  އެންމެ ފުރަތަމަ ދުވަހު އެ ޔުނީފޯމުގައި ޤައުމުގެ ހައްޤުގައި ހުވާ ކުރެވުނު ދުވަހެވެ. ޤައުމީ ޚިދުމަތަށް ނިކުތް ދުވަހެވެ. އޭނާ އެދުވަހު މަންމަ ކުރިމައްޗަށް އެރީ ނުހަނު ފަޚުރުވެރި ކަމާއެކުއެވެ. އުފަލާ އުންމީދާ އެކުގައެވެ. ނަމަވެސް...

"އަހަރެން ނުބުނަންތަ އަޔާން ސިފައިންގެ ޚިދުމަތާ ނުގުޅޭށޭ! ސިފައިންގެ ޚިދުމަތަށް އަޔާން ނުދިޔަޔަސް ތިކަންކުރަން މިޤައުމަކު މީހުން މަދެއް ނުވާނެ. މި ވިޔަފާރިއާއި މި މުދާގެ ވާރުތަވެރިޔަކީ އަޔާން. އަހަރެން އެކަނި މިމަސައްކަތް ނުކުރެވޭ ވަރަށް މިވަނީ މިހާރު ފުޅާވެފައި." އަޔާންގެ ބައްޕަގެ އަޑު ބާރު ހޮނު ގުގުރިއެއް ފަދައެވެ.

އަޔާނަށް ހީވީ ނުބައި މީހަކު އޭނާގެ މޫނުމަތީގައި ބާރު އެތިފަހަރެއް ޖެހި ހެންނެވެ. 

Advertisement

"މިއީ އަޅުގަނޑު އެންމެ ކުރަން ބޭނުންވާ މަސައްކަތް. ބައްޕަގެ ވިޔަފާރި ހިންގަން ބައިވަރު މީހުން އެބަތިއްބެއްނޫންތޯ؟" ފުރަތަމަ ފަހަރަށް ބައްޕަގެ ޝަކުވާތަކަށް އަޔާން ރައްދު ދިނެވެ.

"މި ވިޔަފާރިއަކީ އަޔާންގެވެސް ވިޔަފާރި. ޗައިނާއިން ގެނައި މުދާތައް އެހުރީ ކަސްޓަމްސްގަ އަދިވެސް ކުލިއަރ ނުވެ. ކުޅުދުއްފުށީގައި އިމާރާތްތައް ހަދާމީހުން އެތިބީ އެ މުދާތައް ނުގެންދެވިގެން މަސައްކަތް ހުއްޓިފަ. އެތާވެސް ފަންސާހަކަށް މުވައްޒަފުން އެބަތިބި. މަސައްކަތް ނުކުރެވި ދާ ކޮންމެ ދުވަހަކީވެސް ބޮޑެތި ގެއްލުންތަކެއް ވާ ދުވަހެއް. ތިޔަ ވަޒީފާއިން މިފެންވަރަށް އަނބިދަރީން ގެންގުޅެވޭނެތަ؟"  ބައްޕަ އަޑުދަނީ ފަހަރަކަށްވުރެ ފަހަރެއް ގަދަވަމުންނެވެ.

އެ މަންޒަރު ބަލަން ނުހަނު ގާތުގައި ހުރި ރަޙްމާ ފެންކަޅިވިއެވެ. ރަޙްމާގެ ހަނދާނަށް އައީ މީގެ ފަނަރަ އަހަރު ކުރިއެވެ. އަޔާން ފުލުހުންގެ ޔުނީފޯމް އަޅައިގެން ކުޑަކުދިންގެ ހަވީރެއްގައި ބައިވެރި ވަނީއެވެ. ފުލުހުންގެ ތަފާތު ވެހިކަލްތަކަށް ކުޑަކުދިން އަރަން ފުރުޞަތު ދެނީއެވެ. އަޔާން އަތުގައި އޭނާ އަބަދުވެސް ގެންގުޅޭ ކުޅޭކުޅޭ ބަޑި އޮތެވެ. ނަމަވެސް އޭނާ ބޭނުންވީ ސިފައިންގެ ޓޭންކަރުގައި ހުރި ފުލުސްމީހާގެ އަސްލު ބަޑީގައި އަތްލާށެވެ. އަޔާން ގަދަ ހަދާލާފައި ޓޭންކަށް އަރަން ދިޔައެވެ.

"ދަރިފުޅާ... މަޑުކުރޭ." ރަޙްމާ ގޮވާލިއެވެ.

އެވަގުތު ސިފައިންގެ މީހެއް އަޔާން ހިފެހެއްޓިއެވެ. އަދި އަޔާނާއި އެއްހަމައަށް ތިރިވިއެވެ.

"މަންމަ އެ ގޮވަނީ." އޭނާ ބުންޏެވެ.

"ކޮއްކޮ އަރަން ބޭނުން. އަސްލު ބަޑި ބަލާލަން." އަޔާން ޓޭންކާ ދިމާއަށް އަތްދިއްކުރަމުން ބުންޏެވެ. އޭނާ ހިނިތުންވެލާފައި އަޔާން އުރާލިއެވެ. އަދި ޓޭންކަށް ލާދިނެވެ. ކުޑަކުޑަ އަޔާން ސިފައިންގެ ފާޑުވެރިކަން ދައްކާލިއެވެ.

"މަންމާ.. ކޮއްކޮ ބޮޑުވެގެންވެސް ވާނީ ސިފައިންގެ މީހަކަށް." އަޔާން ގޮވާލިއެވެ.

އެ ހަނދާންތައް އަދިވެސް އިއްޔެ ވީކަމެއްހެން ރަޙްމާ ހަނދާނުގައި ހުރެއެވެ. އެއީ އޭނާއަށް އާކަމެއް ނޫނެވެ. އަޔާން އަބަދުވެސް ބޭނުންވަނީ ސިފައިންގެ މީހަކަށް ވާށެވެ. ވީއިރު އޭނާގެ ހިތްމަރާލާ އެހެން ކަމެއް ކުރަން މަޖުބޫރު ކުރަންވީ ކީއްވެ ހެއްޔެވެ؟

"މިއީ އެސޮރަށް ހިތްވަރު ދޭންވީދުވަސް. ވާހިދަށް މިއަދު އެއްޗެކޭ ނުބުނެ ނުހުރެވޭނެތަ؟" އަޔާން މަންމަ ފެންކަޅިވެފައި ބުންޏެވެ.

"މިއީ ހަމަ ރަޙްމާގެ ކަންތައް. އެންމެ ދަރިއެއް ހުރުމުން އެސޮރު ބޭނުންހާކަމެއް ކުރުމަށް ފުރުސަތު ދިނީމާ ވީގޮތް." ވާހިދު އަތުގައި ހުރި ފެންތަށި ބިންމައްޗަށް ހޫރާލިއެވެ.

ތަށި ތަޅައިގެންގޮސް ފުޅިތޮށިތައް ބުރަ ބުރައިގެން ދިޔައެވެ. އޭނާ ބާރުބާރަށް ކޮޓަރިއަށް ދިޔައެވެ. ރަޙްމާ ލޮލުން ފައިބަމުން ދިޔަ ކަރުނަތައް ފޮހޭކަށް ނޫޅެއެވެ. ދިރިއުޅުން މި ފުޅިތޮށިތައް ފަދައިން ފުނޑުފުނޑު ވެފައިވާތާ ކިތަންމެ ދުވަހެކެވެ. އޭނާ ސޯފާގައި އިށީނީއެވެ. އަދި ބުރުގާއިން މޫނު ނިވާކޮށްލާ ބާރަށް ރޯންފެށިއެވެ. ގޭގައި މަސައްކަތްކުރަން އުޅޭ މީހާ ބިރުންހުރެ ތަޅައިގެންގޮސް ކުނޑިކުނޑިވެފައިވާ ފުޅިތޮށިތައް ނަގަން ފެށިއެވެ. ކުރީގެ މި އުފާވެރި ބަދަހި އާއިލާގެ ކެނޑިފައިވާ ގުޅުން ރަނގަޅުކުރާނެ މީހަކަށް ބޭނުންވެފައިވާ ފަދައިންނެވެ.

އަޔާން ނިކުމެގެން ދިޔައީއެވެ. އޭނާގެ ބައްޕަގެ ކުރިމަތީގައި ހިތްވަރުކުރިޔަސް ބޭރަށް ނިކުތްއިރު އޭނާވަނީ ވަރަށް ދެރަވެފައެވެ. އޭނާގެ ލޮލަށް ޖަމާވަމުން ދިޔަ ކަރުނަތައް އަވަސް އަވަހަށް ފޮހެލިއެވެ.  އަދި ގަޑިއަށް ބަލާލުމަށްފަހު ސައިކަލަށް އަރާ ދުއްވާލިއެވެ.

އެދުވަސް ފަދައިން މިއަދުވެސް ރުހުމުގެ ބަހެއް ލިބޭނެކަމަކަށް އަޔާން އުންމީދެއް ނުކުރެއެވެ. އޭނާ މަޑުމަޑުން ސިޓިންރޫމް ހުރަސްކުރިއެވެ. ވާހިދު އަޔާނަށް ބަލާވެސް ނުލާއިނެވެ. އަޔާން މަޑުމަޑުން ކޮޓަރިއަށް ވަނެވެ. މިއަދު ބައްޕައާއި ކުރިމަތިލާ ޒުވާބުކުރާކަށް އޭނާ ބޭނުމެއް ނުވެއެވެ. އަދި މަންމަ ރޮއްވާކަށްވެސް އަމުދުން ބޭނުމެއް ނުވެއެވެ. އޭނާ އަވަސް އަވަހަށް ފޮށްޓަށް އެއްޗިހި އަޅާ ފުރަންދާން ތައްޔާރުވިއެވެ. ފޮށި ހިފައިގެން ސިޓިންރޫމަށް ނިކުމެ މަންމަ ކޮބައިތޯ ބަލާލިއެވެ. މަންމަ ސިޓިންރޫމަށް ވަންނަން އަންނާތީ އަޔާން ދުވެފައި ކަހަލަ ގޮތަކަށް ގޮސް މަންމަގެ ކޮނޑުގައި ހިފާ ގަޔާ ކައިރިކޮށްލިއެވެ.

"މަންމާ. މިދަނީ ލ. އަތޮޅުގައި އޮތް މިޝަންއަކަށް. ހަމަސް ވަރުވާނެ. މިކަމަށް ހަމަޖެހިފައިވާ އޮފިސަރަށް ދެވެން ނެތީމަ ކުއްލިއަކަށް އަޅުގަނޑަށް ދާންޖެހުނީ." އަޔާން ބުންޏެވެ. އޭނާގެ ލޮލުން ފެންނަނީ އުފާވެރިކަމުގެ ވިދުވަރެވެ.

ރަޙްމާ ހައިރާންވެގެން އަޔާނަށް ބަލަން ހުއްޓެވެ. އޭނާގެ ދަރިފުޅު ހަރުދަނާވެފައިވާ މިންވަރު އެނގޭނީ އޭނާއަށެވެ. އެއީ އޭނާ އެއްވެސްކަމެއް ނުޖައްސާ ބަލާބޮޑުކުރި ތުއްތުތުއްތު އަޔާނެއް ނޫނެވެ. ވިސްނުންތެރިކަމާއި ހަރުދަނާކަމުގެ ނަމޫނާއެކެވެ. ރަޙްމާ ފެންކަޅިވީ އަޔާން ފުރާތީ ދެރަވެގެންނެއް ނޫނެވެ. މަންމައަކު ދަރިއެއްގެ ފަރާތުން ދެކެން ބޭނުންވާ ހުރިހާ ސިފަތަކެއް އަޔާންގެ ހުރުމުންނެވެ. ރަޙްމާ އެއްޗެއް ބުނަން އުޅުނެވެ. ހެޔޮދުޢާއަށް ދޫ އުފުލާލިއެވެ. ނަމަވެސް..

ނުނިމޭ