މޯލްޑިވްސް ޕެންޝަން އެޑްމިނިސްޓްރޭޝަން އޮފީހާއި ސަރުކާރުން ކުރިއަށްގެންދަން އުޅޭ 2.4 ބިލިއަން ރުފިޔާގެ އިންވެސްޓްމަންޓުގެ މައްސަލަ މިވަނީ ބޮޑު ބަހުސަކަށްވެފައެވެ.
އެމްއެމްއޭ މެދުވެރިކޮށް މިމުއާމަލާތަށް ފައިސާ ހޯދުމަކީ އިޤްތިސާދަށް ގެއްލުން ބޮޑު ނިންމުމެއްކަމަށް ވިދާޅުވެ ޕެންޝަން އޮފީހުގެ ބޯޑުގެ ޗެއާޕާސަންކަމުގެ މަޤާމުން އަހުމަދު އިނާޒު ވަނީ މި ފެބުރުއަރީމަހުގެ 1 ވަނަ ދުވަހު އިސްތިއުފާ ދެއްވާފައެވެ.
ސަރުކާރުން ބޭނުންވާގޮތަށް އިންވެސްޓުކުރަން ޕެންޝަން ބޯޑުން ނިންމާފައިވަނިކޮށް ޕެންޝަން އޮފީހުގެ ސީއީއޯ ސުޖާތާ ހަލީމްވެސް މިއަދު ވަނީ އިސްތިއުފާދެއްވައިފައެވެ. އަދި އަމިއްލަ ވިޔަފާރިތައް ތަމްސީލުކުރާ މެމްބަރެއްގެ ގޮތުގައި ހުންނެވި ސަރުވަޝް އާދަމްގެ އިތުރުން ޕެންޝަން އޮފީހުގެ ސީއެފްއޯ ހައްވާ ފަޖުވާ ވެސް ވަނީ ކުރިން އިސްތިއުފާދެއްވައިފައެވެ.
ޕެންޝަން ފަންޑުގައި 2.4 ބިލިއަން ރުފިޔާ ނެތްއިރު އެމްއެމްއޭއިން ފައިސާ ހޯދައިގެން މިވަރުގެ އިންވެސްޓްމަންޓެއް ކުރިއަށްގެންދާނަމަ އެކަން ކުރެވޭނީ ފައިސާ ޗާޕުކޮށްގެންކަމަށް ޕެންޝަން ބޯޑުގެ ނިންމުމާއި ދެކޮޅުހައްދަވާ ފަރާތްތަކުން ދަނީ ވިދާޅުވަމުންނެވެ.
ޕެންޝަން އޮފީހުން ބުނަނީ ކީކޭ؟
ޕެންޝަން އޮފީހުން ވަނީ މިހަފްތާގެ ހޯމަ ދުވަހު ބޯޑުން ނިންމި ނިންމުން ދިފާޢުކޮށް އަންގާރަ ދުވަހު ބަޔާނެއް ނެރުއްވާފައެވެ.
" ފިނޭންސް މިނިސްޓްރީއިން ހުށަހަޅައިފައިވަނީ ޑުއަލް ކަރަންސީއިން (ދިވެހި ރުފިޔާ އަދި އެމެރިކާ ޑޮލަރުން) ރިޓަރން ލިބޭ 2.4 ބިލިއަން ރުފިޔާގެ ޓްރެޒަރީ ބޮންޑެއްގައި އިންވެސްޓު ކުރުމަށް. ޕެންޝަން ފަންޑުގެ ލިކުއިޑިޓީއަށް ބިނާކޮށް މި އިންވެސްޓުމަންޓަށް ފައިސާ ހޯދުމަށް ހުށަހަޅާފައިވަނީ ޕެންޝަން ސްކީމުން މިހާތަނަށް އިންވެސްޓު ކޮށްފައިވާ ޓްރެޒަރީ ބޮންޑުތަކުގެ ތެރެއިން 2.4 ބިލިއަން ރުފިޔާގެ ބޮންޑު ސެކަންޑަރީ މާކެޓުގައި ވިއްކާލުމަށްފަހު ލިބޭ ފައިސާއިން". ޕެންޝަން އޮފީހުގެ ބަޔާނުގައިވެއެވެ.
ޑުއަލް ކަރަންސީ ބޮންޑު ގަތުމަށް ފައިނޭންސް ކުރުމަށް ސެކަންޑަރީ މާކެޓުގައި ވިއްކާލަންޖެހޭ ބޮންޑުތައް ޕެންޝަން ފަންޑަށް އެއްވެސް ގެއްލުމެއް ނުވާނެ ފަދަ ގޮތަކަށް ވިއްކާލުމަށް ޕެންޝަން އޮފީހުގެ ބޯޑުގެ ނިންމުމުގައި ރިޢާޔަތްކޮށްފައިވާނެ ކަމަށްވެސް ބަޔާނުގައިވެއެވެ.
" މިމުއާމަލާތުގެ ސަބަބުން ބާޒާރުން ބޭރު ފައިސާ ގަންނަން ނުޖެހި އިންވެސްޓުމަންޓުގެ ތެރެއިން ޕެންޝަން ފަންޑުގައި ބޭރު ފައިސާގެ ރިޒާވެއް އުފެދިގެންދާނެ". ޕެންޝަން އޮފީހުގެ ބަޔާނުގައިވެއެވެ.
އިންވެސްޓުމަންޓުގެ ކަންބޮޑުވުން
'ޒީޓައިމްސް' އާއި މައުލޫމާތު ހިއްސާކުރެއްވި އިޤްތިސާދީ ތަޖުރިބާކާރު ބޭފުޅުން ވަނީ މި އިންވެސްޓުމަންޓުގައި އޮތް އެންމެ ބޮޑު ކަންބޮޑުވުމަކީ އެމްއެމްއޭ މެދުވެރިކޮށް މިމުއާމަލާތް ހިންގުމަށް ސަރުކާރުން މަސައްކަތްކުރާތީ ކަމަށް ވިދާޅުވެފައެވެ.
" މިއީ ފައިސާ ޗާޕުކުރުންފަދަ ކަމެއް. އެމްއެމްއޭ މެދުވެރިކޮށް މިމުއާމަލާތް ހިންގުމުން ދިވެހި ފައިސާ ދައުރުވާލެއް އިތުރުވެ އިންފްލޭޝަން މަތިވެ އިޤުތިސާދަށް އޭގެ ބޮޑު އަސަރެއް ކުރާނެ. ތަކެތީގެ އަގު ކުރިއަށްއޮތްތާގައި އިތުރަށް އުފުލިގެން ގޮސްދާނެ. ސަރުކާރުން އިތުރަށް ވިސްނަންޖެހޭ".
4 ބޭފުޅުންގެ އިސްތިއުފާއާއެކު އިތުރު ސުވާލުތަކެއް!
ޕެންޝަން އޮފީސް މެދުވެރިކޮށް މިވަރުގެ އިންވެސްޓުމަންޓެއް ކުރުމުގެ މަސައްކަތްކުރަނިކޮށް ޗެއާމަން، ސީއީއޯ އަދި ސީއެފްއޯގެ އިތުރުން ބޯޑު މެންބަރަކު އިސްތިއުފާދިނުން މިއީ އާދައިގެ ކަމެއް ނޫނެވެ. އާންމުންގެ ކަންބޮޑުވުން އިތުރުވެފައިވާއިރު ތިރީގައިވާ ސުވާލުތަކަށްވެސް ސަރުކާރުން ޖަވާބު ދިނުން މުހިންމެވެ.
1- އިޤްތިސާދު މިހާލަތުގައި އޮއްވާ މިފަދަ ބޮޑު ރިސްކެއް ސަރުކާރުން ނަގަން އުޅެނީ ކީއްވެ؟
2- ކީއްވެ ޕެންޝަން އޮފީސް މެދުވެރިކޮށް މިއިންވެސްޓްމަންޓު ކުރިއަށްގެންދަނީ؟
3- އިންވެސްޓުމަންޓުން ފައިދާ ނުވެއްޖެނަމަ ދެންވާނީ ކިހިނެއް؟ ޒިންމާނަގާނީ ކޮންބައެއް؟
4- ފާޅުގައި އިންވެސްޓްމަންޓާއި ދެކޮޅަށް ޕެންޝަން އޮފީހުގެ އިސްވެރިންތަކެއް ވަކާލާތުކުރާއިރު ސަރުކާރުން ދެވަނަ ވިސްނުމަކަށް ނުދަނީ ކީއްވެ؟
ރާއްޖޭގެ އާބާދީގެ ބޮޑުބައެއް ކޮންމެ މަހަކުވެސް ފައިސާ ޖަމާކުރަމުން އަންނަ ޕެންޝަން ފަންޑުން މިފަދަ އިންވެސްޓްމަންޓެއް ކުރިއަށްގެންގޮސްފިނަމަ އޭގެ ސަބަބުން އިޤްތިސާދަށް ނޭދެވޭ އަސަރު ކުރާނެކަމަށް ފާޅުގައި ބުނެ ޕެންޝަން ބޯޑުން ބައެއް ބޭފުޅުން އިސްތިއުފާދެއްވިއިރު މިއީ ވިސްނަންޖެހޭ ކަމެކެވެ. މިކަމުގެ ފަހަތުގައިވާ ކަންބޮޑުވުމަށް އިތުރަށް ވިސްނަންޖެހެއެވެ.
