2026 ވަނަ އަހަރުގެ ފުރަތަމަ މަސް ނިމުނުއިރު ރިޕޯޓުތަކުން ފާހަގަކޮށްފައިވާ އެންމެ އާންމު ބޮޑެތި ބަލިތައް ތިރީގައި މިވަނީ އެވެ.
ނަފްސާނީ މައްސަލަތައް
ދުނިޔޭގެ އެކިކަންކޮޅުތަކުގައި ނަފްސާނީ ބަލިތަކުގެ ވޭނުގައި ދިރިއުޅޭ 1 ބިލިއަން މީހުން އުޅޭ ކަމަށްވެއެވެ. މީގެތެރޭގައި އެންޒައިޓީ އާއި ޑިޕްރެޝަން ހިމެނެއެވެ. ރާއްޖޭގައިވެސް ނަފްސާނީ ބަލިތަކަށް ފަރުވާ ހޯދާ ގިނައަދަދެއްގެ މީހުން އުޅެއެވެ.
ހިތުގެ ބަލި އަދި ސްޓްރޯކް
ހިތުގެ ތަފާތު ބަލިތަކާއި ސްޓްރޯކް ޖެހިގެން ގިނަ އަދަދެއްގެ މީހުން ވަނީ މަރުވެފައެވެ. އަދި މިއީ ސިއްހީ މާހިރުންނަށްވެސް ހުރި ގޮންޖެހުމެކެވެ.
ކެންސަރ
ކެންސަރު ޖެހޭ މީހުންގެ އަދަދު ދުނިޔޭގެ އެކިކަންކޮޅުތަކުގައި ދަނީ ގިނަވަމުންނެވެ. މީގެ އެންމެ ބޮޑު އެއް ސަބަބުގެގޮތުގައި ދުންފަތުން އިސްތިއުމާލު ކުރުމާއި ކެއުމުގެ ވައްޓަފާޅި ގެންގުޅޭގޮތުންކަމަށް ފާހަގަކޮށްފައިވެއެވެ. ދިވެހި ރާއްޖޭގައިވެސް ކެންސަރު ބައްޔަށް ފަރުވާ ހޯދާ އެކި އުމުރުގެ މީހުން އެބައުޅެއެވެ. ކެންސަރު ބަލީގެ ވޭނުގައި އެތައްބަޔަކު ވަނީ މަރުވެފައެވެ.
ހަކުރުބަލި
ޓައިޕް 1 އަދި ޓައިޕް 2 ވެސް ދަނީ އާންމުވަމުންނެވެ. އެހެންވުމުން މިއީ ވިސްނަންޖެހިފައިވާ ކަމެކެވެ. ޚާއްސަކޮށް މާބަނޑު މީހުން ހަކުރުމަތިނުވެވޭތޯ ވަރަށް ބޮޑަށް ސަމާލުވާންޖެހެއެވެ.
އާންމުކޮށް ފެތުރޭ ރޯގާތައް
އާންމުކޮށް ފެތުރޭ ރޯގާތަކުގެ ތެރޭގައި އެންމެ ގިނަބަޔަކު ފަރުވާ ހޯދަމުންދަނީ އިންފްލުއެންޒާ އަދި ޑެންގޫ އަށެވެ.
މިއަހަރު ފެތުރިދާނެކަމަށް ބެލެވޭ ވައިރަސް؟
މިއަހަރުގެ ޖެނުއަރީމަހު އިންޑިއާގެ ވެސްޓު ބެންގޯލްއިން ނިޕާ ވައިރަހަށް ޕޮޒިޓިވްވި 3 މީހަކު ވަނީ ފެނިފައެވެ. ނިޕާގެ ކޭސްތަކެއް ކުރިން އެހެން ޤައުމުތަކުންވެސް ފެނިފައިވާއިރު މިއީ ފެތުރިދާނެ ވައިރަހެއް ކަމަށް ލަފާކޮށްފައިވެއެވެ. ނިޕާ ވައިރަސްއަކީ ޓެރޯޕަސް އާއިލާގެ ވާލުން (ފުރުޓް ބެޓް) އަދި އޫރުން އިންސާނުންނަށް ފެތުރޭ ބައްޔެކެވެ. މިބާވަތުގެ ވާ ކައިފައި ހުންނަ މޭވާ ނުވަތަ ވާލުގެ ކުޅު ނުވަތަ ކުޑަކަމުދާ އެއްޗެހި ޖެހިފައިވާ މޭވާއާއި ތަރުކާރީ ބޭނުންކުރުމުން އިންސާނުންނަށް ބަލި ފެތުރެއެވެ. އަދި ބަލިޖެހިފައިވާ މީހަކާއި ގާތްކޮށް އުޅޭނަމަވެސް ބަލި ޖެހުމުގެ ފުރުސަތު އޮވެއެވެ.
