ރާއްޖޭގެ އާބާދީގެ ނިސްބަތުން ބަލާއިރު ކެންސަރުފަދަ ބޮޑެތި ބަލިތަކަށް ފަރުވާ ހޯދާ މީހުން މަދުކަމަކަށް ނުދެންނެވޭނެ އެވެ. މިފަދަ ބަލިތަކުގެ ޝިކާރައަކަށްވެ ބަލިއެނދުގައި ދުވަސްތައް ހޭދަކުރާ މީހުންގެތެރޭގައި އެކި އުމުރުގެ މީހުން ހިމެނެއެވެ. 'ޒީޓައިމްސް' އިން މިހާތަނަށް ގިނަ އަދަދެއްގެ ބަލިމީހުންގެ ރިޕޯޓު ގެނެސްދިންއިރު މީގެތެރެއިން ބައެއް މީހުން ވަނީ ހިތްދަތިކަމާއެކު އެމީހުންގެ އިހުސާސްތައް ކިޔައިދީފައެވެ.
ބަލިއެނދުގައި އޮންނަން ޖެހުނު ދުވަހު އެންމެ ގާތް އެކުވެރިންނާއި އާއިލާގެ ބައެއް މެންބަރުންނާއި ދުރަށް ދާން ޖެހުނު ގޮތް އެއީ އެފަދަ މީހުންނަށް ހިތްދަތި އިހުސާސްތަކެއް ކުރުވާކަމެކެވެ.
" ބޮޑުބައްޔަކަށް ފަރުވާ ހޯދާކަން އެނގުނު ހިސާބުން ރައްޓެހިންނެއް ވެސް ނެތް. އާއިލާގެ ބައެއް މެންބަރުންވެސް ދިޔައީ ދުރަށް. ބުނާކަހަލަ އެމީހުންނަށް ދެން އަޅުގަނޑުގެ ބޭނުމެއް ނެތޭ. އެހީތެރިކަން ބޭނުންވި ވަގުތު ބާކީކޮށްލުމުން ވަރަށް ދެރަވޭ". ހިތްދަތިކަމާއެކު ބަލިމީހަކު ކިޔައިދިނެވެ.
ކެންސަރުބައްޔަށް ފަރުވާ ހޯދާ މަންމަ ގޮވައިގެން އިންޑިއާގައި ގިނަދުވަސްތަކެއްވަންދެން ހުންނަންޖެހުނު އަންހެންދަރިފުޅު ވަނީ އޭނަގެ ޝުޢޫރުވެސް ހިއްސާކޮށްފައެވެ.
" އަޅުގަނޑުގެ މަންމަ ބަލިވި ހިސާބުން އެންމެ ގާތް ރަހުމަތްތެރިންވެސް ގެއްލިއްޖެ. ހީވާކަހަލަ އެހީއަކަށް އެދުމުގެ ފުރުސަތު އެބައޮތޭ. މަންމަގެ ފަރުވާ ނިންމާފަ މާލެ އަންނަމުން އިސްވެ ގުޅާލިން. އަދި ބުނިން އެއްވެސް މީހެއްގެ އެހީތެރިކަމެއް ހޯދަން ނުޖެހި ފަރުވާ މިވަގުތަށް ނިމިއްޖޭ. ހުރިހާކަމެއްވެސް ރަނގަޅޭ. މިއީ ވަރަށް ދެރަވި ދުވަސްތަކެއް. ކުޑަމިނުން ހާލު ބަލާލަން ގުޅާލާނެ މީހެއްވެސް ނުވި".
ކެންސަރު ފަދަ ބޮޑެތި ބަލިތަކަށް ފަރުވާ ހޯދާ މީހުން އެ ހޭދަކުރަނީ ވަރަށް ހިތްދަތި ގޮންޖެހުން ބޮޑު ދުވަސްތަކެކެވެ. މިފަދަ ދުވަސްވަރެއްގައި ބަލިމީހުންނާއެކު ގިނަބަޔަކު ތިބިކަން އެމީހުންނަށް އިހުސާސް ކޮށްދިނުމަކީ ލިބޭނެ އިތުރު ހިތްވަރެކެވެ. ބަލީގެ ވޭނުގައި އެހޭދަކުރާ ދުވަސްވަރު އިތުރު ހިތްދަތިކަމެއް ނުދީ ވޭތޯ މަސައްކަތްކުރަންޖެހެއެވެ. ބައެއް ބަލިމީހުންނަށް ގިނަ ދުވަސްތަކަކަށް އެޑްމިޓްކޮށްގެން ފަރުވާދޭންޖެހޭއިރު ބަލިމީހާ ކައިރިއަށް ހޮސްޕިޓަލަށް ޒިޔާރަތްކޮށްލުމަކީވެސް ލިބޭނެ ހިތްހަމަޖެހުމެކެވެ.
އެހީތެރިކަމަކީ ހަމައެކަނި ފައިސާއިން ވެވޭކަމެއް ނޫނެވެ. ލޯތްބާއެކު ހިތްވަރުދިނުމަށް ބުނެލާ ބަހަކީވެސް ބަލިމީހާއަށް ވަރަށް މުހިންމު އެއްޗެކެވެ. ބަލިމީހާގެ އިތުރުން އެހީތެރިޔާވެސް މިމުއްދަތުގައި ހޭދަކުރާނީ ނަފްސާނީގޮތުން ގޮންޖެހުން ބޮޑު ދުވަސްތަކެކެވެ. ވެވުނު މިންވަރަކުން ބަލިމީހުންނަށް އެހީތެރިކަން ފޯރުކޮށްދެމާތޯއެވެ. އެބަލީގައި އެކަނިވެރިކަން އިހުސާސް ނުކުރެވޭވަރަށް ލޯތްބާއި އަޅާލުން ފޯރުކޮށްދެމާތޯއެވެ.
