ދުނިޔަވީ ހަޔާތަކީ ވަގުތީ ހަޔާތެކެވެ. ކޮންމެ އިންސާނަކީ ވެސް މަރުގެ ރަހަ ދެކޭނެ މީހެކެވެ. އެ ދުވަހަށް ތައްޔާރުވުމަކީ ކޮންމެ އިންސާނަކުމެ ކުރަންޖެހޭނެ ކަމެކެވެ.
މާތް ﷲ ވަހީކުރައްވާފައިވެއެވެ. މާނައީ: " ހަމަކަށަވަރުން ތިމަންރަސްކަލާނގެ ތިޔަބައިމީހުން ހެއްދެވީ، ބޭކާރު ގޮތުގައި، ކުޅިވަރަށްކަމަށާއި، ހަމަކަށަވަރުން ތިޔަބައިމީހުން ތިމަންރަސްކަލާނގެ ހަޟްރަތަށް ރުޖޫޢު ނުކުރައްވާނޭކަމަށް ތިޔަބައިމީހުން ފަހެ ހީކުޅައީހެއްޔެވެ؟".
އެހެން އާޔަތެއްގައި ވަހީކުރައްވައިފައިވެއެވެ. މާނައީ: " އޭ މީސްތަކުންނޭވެ. ތިޔަބައިމީހުންގެ ވެރިރަސްކަލާނގެއަށް ތިޔަބައިމީހުން ތަޤްވާވެރިވާށެވެ. އަދި އެ ދުވަހުގައި ބަފަޔަކަށް ދަރިއެއްގެ މަތިން ކަމެއް ފުއްދައެއް ނުދެވޭނޭ، އަދި ދަރިޔަކަށް ވެސް ބަފަޔަކަށް ކަމެއް ފުއްދައެއް ނުދެވޭނޭ ދުވަހަކަށް ތިޔަބައިމީހުން ބިރުވެތިވާށެވެ! ހަމަކަށަވަރުން ﷲ ގެ ވަޢުދުފުޅަކީ ހައްޤު ތެދެވެ. ފަހެ ދުނިޔޭގެ ދިރިއުޅުން ތިޔަބައިމީހުން ހޭލުންތެރި ކުރިޔަ ނުދޭހުށިކަމެވެ! އަދި މަކަރުވެރި ޝައިތާނާއާ ތިޔަބައިމީހުން ﷲ އާ މެދު ހޭލުންތެރި ކުރިޔަ ނުދޭހުށިކަމެވެ!".
ދުނިޔޭގެ މި އިމްތިހާނަށްވުރެ ބޮޑު އިމްތިހާނެއް ކުރިމަތީގައި އެބައޮތެވެ. އެއީ އާޚިރަތް ދުވަހުގެ އިމްތިހާނެވެ. މި އިމްތިހާނުގައި ދެވަނަ ފުރުސަތެއް ނޯންނާނެއެވެ. އެއީ ހުރިހައި އެންމެންވެސް ކުރިމަތިލާންޖެހޭނެ އިމްތިހާނެކެވެ. ފިރިހެނުންނާއި އަންހެނުންނެވެ. މުއްސަނދީންނާއި ފަޤީރުންނެވެ. ވެރީންނާއި ރައްޔިތުންނެވެ. ފަހެ އެދުވަހުގެ އިމްތިހާނަށްޓަކައި ތިބާ ތައްޔާރުވެއްޖައީމުހެއްޔެވެ؟ އެ އިމްތިހާނުގައި އެހީވެދޭނެ މީހަކުވެސް ނުހުންނާނެއެވެ. ބައްޕައަކު ދަރިއަކަށް، އަންބަކު ފިރިއަކަށް، ރަހުމަތްތެރިއަކު ރަހުމަތްތެރިއަކަށްވެސް އެހީއެއް ނުވެވޭނެއެވެ. ކޮންމެ މީހަކުވެސް އުޅޭނީ އެމީހެއްގެ އަމިއްލަ ނަފުސާމެދު ކަންބޮޑުވެ ސަލާމަތްނުވެވިގެންނެވެ.
މަރު އައިސް އަހަރެމެންނާ ބައްދަލުކުރުމުން ލަހެއް ފަހެއްނެތި އިޖާބަ ދޭން ޖެހޭނެއެވެ. އެއަށްފަހު ޤިޔާމަތާ ހަމަޔަށް އޭނާ އޮންނާނީ ކަށްވަޅުގައެވެ. އަލުން ދިރުއްވައި މަޙުޝަރުކުރެއްވުމާ ހަމަޔަށެވެ. މަޙުޝަރު ކުރައްވާ ދުވަހަކީ ބިރުވެރިކަމުން ފުރިގެންވާ ދުވަހެކެވެ. އެދުވަހުގެ ބިރުވެރިކަމުގައި އެ މައިދާނުގައި ފަންސާސް ހާސް އަހަރުގެ ދިގު މުއްދަތެއްގައި ތިބޭން ޖެހޭނެއެވެ. އެ ބިރުވެރި ދުވަހުގެ ހުއްޓި ހުރުމަކީ ލުއިފަސޭހަ ހުއްޓިހުރުމަކަށް ހެދުމާއި ނުހެދުން އޮތީ އަހަރެމެންގެ އަތްމަތީގައެވެ. ތަޤްވާވެރި ސާލިހް އަޅުންނަށް އެދުވަހުގެ ހުއްޓި ހުރުން އިހުސާސްކުރެވޭނީ ދުނިޔަވީ ހަޔާތުންނަމަ މެންދުރު ނަމާދާއި އަސްރު ނަމާދާ ދެމެދުގެ ވަގުތުކޮޅެއްގެ ގޮތުގައެވެ.
މާތް ﷲ އަށް އުރެދުނު މީހުންނާއި ފާފަކުރުމުގައި ދެމި ތިބެ މަރުވެ ދިޔަ އެންމެންނަށް އެ ދުވަހު އޮތީ ﷲ ގެ ވަހީބަސްފުޅުގައި ވާފަދައިން ކަންބޮޑުވުމާއި ހިތްދަތިކަމެވެ.
