ސްޓެލްކޯގެ ވަޒީފާގެ މަސްއޫލިއްޔަތު އަދާކުރަމުންދަނިކޮށް މިދިޔަ ނޮވެންބަރު މަހުގެ 26 ވަނަ ދުވަހު ދިމާވި ހިތާމަވެރި އަލިފާނުގެ ހާދިސާގައި ވަރަށް ބޮޑަށް އަނިޔާވެގެން ބެންކޮކްގެ ހޮސްޕިޓަލުގައި ފަރުވާދެމުންދަނިކޮށް ނިޔާވީ އެކުންފުންޏަށް އިޚުލާސްތެރި ޚިދުމަތްތަކެއް ކޮށްދީފައިވާ އަހުމަދު އަޒްމީލް އެވެ.
އަޒްމީލް ވަނީ ސްޓެލްކޯއަށް 21 އަހަރަށްވުރެ ގިނަ ދުވަހު ޚިދުމަތް ކޮށްދީފައެވެ. ސްޕަވައިޒަރެއްގެ ގޮތުގައި މަސައްކަތްކުރި އުމުރުން 43 އަހަރުގެ އަޒްމީލް ނިޔާވުމާއި ގުޅިގެން ސްޓެލްކޯގެ ބޯޑު މެންބަރުންނާއި އިސްވެރިންނާއި މުވައްޒަފުންގެ ނަމުގައި މަރުހޫމްގެ އާއިލާއަށާއި ގާތް ފަރާތްތަކަށް ވަނީ ތަޢުޒިޔާ ދަންނަވާފައެވެ.
މި ހިތާމަވެރި ހާދިސާގެ ސަބަބުން އަޒްމީލް ނިޔާވުމާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ އެކްސްގައި ޕޯސްޓެއް ކުރައްވާފައެވެ.
" ވަޒީފާގެ ވާޖިބު އަދާކުރަމުން ދަނިކޮށް ހިނގި ހިތާމަވެރި ޙާދިސާއެއްގައި ބޮޑެތި އަނިޔާތަކެއް ލިބި، ރާއްޖެއިން ބޭރުގައި ފަރުވާ ދެމުން ދަނިކޮށް، ސްޓެލްކޯގެ ހީވާގި މުވައްޒަފެއް ކަމުގައިވާ އަޙްމަދު އަޒްމީލް ނިޔާވި ޚަބަރު އަޅުގަނޑު އަޑުއެހީ ނުހަނު އަސަރާއި ހިތާމައާއިއެކު. އެ ޢާއިލާއަށާއި ސްޓެލްކޯގެ ވެރީންނާއި މުވައްޒަފުންނަށް ތަޢުޒިޔާ ދަންނަވައި، ކެތްތެރިކަން ދެއްވުން އެދެން. އަދި މަރްޙޫމް އަޙްމަދު އަޒްމީލަށް ސުވަރުގޭގެ ދާއިމީ ނިޢުމަތް ދެއްވުން އެދި ދުޢާ ކުރަން". ރައީސްގެ މެސެޖުގައި ވިދާޅުވިއެވެ.
ހުޅުމާލެ ފޭސް 1 ގައި ހުންނަ ސްޓެލްކޯގެ ބައު އިންޖީނުގޭގައި ހިނގި އަލިފާނުގެ ހާދިސާގައި އަޒްމީލްގެ ހަށިގަނޑު ވަރަށް ބޮޑަށް ފިހިފައިވާއިރު ފުރަތަމަ ފަރުވާދިނީ ހުޅުމާލެ ހޮސްޕިޓަލުގައެވެ. އެއަށްފަހު އޭޑީކޭ ހޮސްޕިޓަލުގައި ފަރުވާދިނުމަށްފަހު ބެންކޮކް ހޮސްޕިޓަލުން ފަރުވާދޭން ފެށީ މި ޑިސެންބަރުމަހުގެ 1 ވަނަ ދުވަހުގައެވެ.
މިފަދަ ހާދިސާއެއް ތަކުރާރުވިޔަ ނުދިނުމަށް އަޅަންޖެހޭ އެންމެހައި ފިޔަވަޅުތައް އެޅުމުގެ މަސައްކަތް ކުރަމުން އަންނަ ކަމަށް ސްޓެލްކޯއިން ކުރިން ވަނީ ހާމަކޮށްފައެވެ. އަދި މިހާދިސާ ތަހުގީގު ކުރަމުން އަންނަ ކަމަށް ވަނީ ބުނެފައެވެ.
