އައްޑޫ ހައި ސްކޫލުގެ ކުލާސް ރޫމެއްގެ ތެރޭގައި ދަރިވަރެއްގެ ކަރުގައި ޓީޗަރަކު ހިފައި ވަރަށް ބޮޑަށް އަނިޔާކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި މިއަދު ވަނީ އާންމުވެފައެވެ. މި ވީޑިއޯއިން ފެންނަގޮތުގައި އެ ދަރިވަރުވެސް ވަނީ ޓީޗަރުގެ ގައިގައި ތަކުރާރުކޮށް ޖަހައިފައެވެ.
މި މާރާމާރީގެ މައްސަލަ ބަލައިދޭން ފުލުހުންނަށް ހުށަހަޅާފައިވާއިރު އަނިޔާކުރި ޓީޗަރު ސަސްޕެންޑްކޮށްފައިވާ ކަމަށް ވަނީ މައުލޫމާތު ލިބިފައެވެ.
ގްރޭޑް 12 ގެ ދަރިވަރުންގެ ބީޓެކް ކުލާހުގައި ހިންގި މިމާރާމާރީގައި ދަރިވަރުގެ އަޚުލާގު ފެނުނީ ވަރަށް ދަށުފެންވަރެއްގައެވެ. އެއްވެސް އަދަބެއް ނެތި ޓީޗަރާއި މުޚާތަބުކޮށް ޓީޗަރު ގައިގައި ޖެހި މަންޒަރު ވަނީ ފެނިފައެވެ.
މި ވީޑިއޯއާއެކު ސޯޝަލް މީޑިއާގައި ވަނީ ހޫނު ބަހުސެއް ފެށިފައެވެ. އެއްބަޔަކު މި ޓީޗަރަށް ހަރުކަށި އަދަބު ދިނުމަށް ގޮވާލަމުން އަންނައިރު އެ ދަރިވަރުގެ މައްސަލަ ބަލައި ދިނުމަށް ގޮވާލާ މީހުންގެ އަދަދު މަދެއް ނޫނެވެ.
ތެދެކެވެ. ޓީޗަރުވެސް ދަރިވަރަށް އަނިޔާކޮށްގެން ނުވާނެއެވެ. އެހާލަތު ކޮންޓްރޯލް ކުރަން ކުރެވޭނެ އިތުރު ކަންތައް ހުންނާނެއެވެ. އެކަމަކު ދަރިވަރުގެ ކިބައިން ފެނިގެންދިޔައީ ސްކޫލެއްގެ ކުލާސް ރޫމެއްގައި ފެންނަންޖެހޭފަދަ މަންޒަރެއް ނޫން ކަމަށް ގިނަބަޔަކު ދަނީ ބުނަމުންނެވެ.
އަދި މިހާހިސާބަށް ކުދިންގެ އަޚުލާގު ދާއިރު އެކަމުގެ ޒިންމާ ބެލެނިވެރިންނާއި ސްކޫލުގެ މެނޭޖްމަންޓުން ނަގަންޖެހޭނެ ކަމަށްވެސް ބައެއް މީހުން ވަނީ ފާހަގަކޮށްފައެވެ.
" ދަރިވަރު އަތުން ޓީޗަރު ފޯނު އަތުލީ ބަދުއަޚުލާގީ ވީޑިއޯ އެ ފޯނުން އެހެން ކުދިންނަށް އަޑުއިވޭވަރަށް ޖެއްސުމުން. އެހާލަތުގައި ފޯނު އަތުލެވޭނެ. މާރާމާރީ ފެށުނީ ފޯނު ނުދިނުމުންކަމަށް ބެލެވޭ". މިކަމާއި ގުޅޭގޮތުން ޚިޔާލު ފާޅުކުރި މީހަކު ބުނެފައިވެއެވެ.
ކޮންމެއަކަސް މިމައްސަލަ ތަހުގީގު ކުރަމުން އަންނައިރު ލީކުވެގެން އުޅެނީ މާރާމާރީ ހިންގިއިރު ދަރިވަރުންތަކެއް ނެގި ވީޑިއޯތަކެއްކަމަށް ވަނީ މައުލޫމާތު ލިބިފައެވެ.
ކުދިންނާއި މުދައްރިސުންގެ ސަލާމަތާއި ރައްކާތެރިކަމަށް ކޮންމެ ކުލާހެއްގައި ސީސީޓީވީ ކެމެރާ ހަރުކުރަންޖެހެއެވެ. މިފަދަ ކޮންމެ ހާލަތެއް މެދުވެރިވިއަސް ކުށެއް ކޮށްފިނަމަ ހައްގު އަދަބު ދޭންޖެހެއެވެ. އެހެންނޫނީ މި މަންޒަރު އިތުރު ސްކޫލުތަކުން ފެނުމަކީ ދުރުގައިވާކަމެއް ނޫނެވެ.
