ކުޑަކުދިންނަށް ޖިންސީ ގޯނާ ކުރުމުގެ މައްސަލަތައް ރާއްޖޭގައިވެސް ދަނީ ފެންމަތިވަމުންނެވެ. އާއިލާ އާއި ރަހުމަތްތެރިންގެ ފަރާތުން ޖިންސީ ޝިކާރައަކަށް ކުދިން ވާއިރު އެކުދިން ރައްކާތެރި ވެއްޓަކަށް ގެންދިއުމަށް ބައެއްފަހަރަށް ހުރަސްތައް ދިމާވާ އާއިލާތައްވެސް އުޅެއެވެ. އެކަމަކު މިއީ ކުށްކުރީ ކާކުތޯ ނުބަލާ ވަގުތުން ވަގުތަށް ފިޔަވަޅު އަޅަންޖެހޭ ކަމެކެވެ. އެހެންނޫނީ ކުއްޖާގެ ދިރިއުޅުން ހަލާކުގެތެރެއަށް ވައްޓާލެވެނީއެވެ. އަދި އެ ކުށްކުރި މީހާގެ ފަރާތުން އިތުރު ކުއްޖަކަށް އަނިޔާދިނުމުގެ ފުރުސަތުވެސް މަގުފަހިވީއެވެ.
ކުޑަކުދިންނަށް ކުރާ ޖިންސީ އަނިޔާއަށް އެކުދިން ހޭލުންތެރި ކުރާނީ ކިހިނެއް؟
ބައެއް ބެލެނިވެރިންނަށް މިއީ ދައްކަން ފަސޭހަ މައުޟޫއަކަށް ނުވެދާނެއެވެ. އެކަމަކު މިއީ ކުއްޖާގެ ސަލާމަތަށްޓަކައި ކޮންމެހެން ހޭލުންތެރި ކުރަންޖެހޭ ކަމެކެވެ.
ކުޑައިރުއްސުރެ ކުއްޖާއަށް ކިޔައިދޭން ފެށުން:
ކުއްޖާގެ ހަށިގަނޑުގައި އެހެން އެއްވެސް މީހަކަށް އަތް ނުޖެއްސޭނެ ތަންތަނަކީ ކޮބައިކަން ބުނެދެވިދާނެއެވެ. ބައެއްފަހަރަށް ސްކޫލު ނުވަތަ ޓިއުޝަން ކުލާހުގައި އަދި އަމިއްލަ ގޭގައިވެސް ކުއްޖާއަށް ނުރައްކަލާ ކުރިމަތިލާން ޖެހޭ ހާލަތު އަންނައިރު އެފަދަ ހާލަތެއްގައި އަމަލުކުރަންވީ ގޮތް ބުނެދެވިދާނެއެވެ.
މިސާލަކަށް 5 ނޫނީ 6 އަހަރުގެ ކުއްޖެއްނަމަ މީހަކު އެފަދަ ނޭދެވޭ ކަމެއް ކުރަން އުޅެފިނަމަ ބާރަށް ހަޅޭއްލަވައިގަންނަން ބުނުން، ނުވަތަ މަންމަ ނޫނީ ބައްޕަ ކައިރީގައި ބުނާނެކަމަށް ބުނެ އެތަނުން ދުރަށް ދެވޭތޯ މަސައްކަތް ކުރަން ބުނުން.
އާއިލާ މީހުންނަށްވެސް އިތުބާރުކުރަންވީ ވަކި މިންވަރެއް ގެންގުޅުން:
ކުޑަކުދިން ކޮންމެ ކޮންމެ މީހެއްގެ އަތްމައްޗަށް ދޫކޮށް ނުލާށެވެ. އިތުބާރު ކުރަންވެސް ވާނީ ވަކި މިންވަރަކަށެވެ. ދުވަހަކު އެފަދަ ކަމެއް މީހެއްގެ ކިބައިން ފެނިފައި ނެތުން އެއީ އަދި އެމީހަކު އެފަދަ ކަމެއް ނުކުރާނެ ކަމަށް ގަބޫލުކުރަންވީ ސަބަބެއް ނޫނެވެ. އެހާވެސް ޖިންސީ ގޯނާކުރުމުގެ މައްސަލަ މުޖުތަމައުގައި ވަނީ އާންމުވެފައެވެ.
ކުދިން އާއިލާގެ ގެއަކަށް ފޮނުވާއިރުވެސް ވިސްނާށެވެ. އެގޭގެ މާހައުލަކީ ކުއްޖާއަށް ރައްކާތެރި ތަނެއްތޯ ކަށަވަރު ކުރާށެވެ.
މި މައުޟޫއަށް ކުއްޖާއާއި ވާހަކަދައްކާނީ ކިހިނެއް؟
ކުޑަކުދިން ހޭލުންތެރި ކުރުވާއިރު އެހެން މީހުންނަށް އިތުބާރު ކުރަންވީ މިންވަރު ބުނެދެވިދާނެއެވެ. އަދި ކުއްޖާ ބޮޑުވަމުން އަންނަ ވަރަކަށް ތަފްސީލުކޮށް ކިޔައިދެމުން ގެންދެވިދާނެއެވެ. އެންމެ ފުރަތަމަ ރަނގަޅު މީހުން އުޅޭއިރު ގޯސްމީހަކުވެސް ހުރެދާނެކަން ބުނެދޭށެވެ. އެފަދަ މީހެއްގެ ފަރާތުން ކުއްޖާއަށް ގެއްލުމެއް ލިބިދާނެކަމާއި އެކަމަށް ވިސްނާނެ ގޮތްތަކަށް ކުދިން ހޭލުންތެރި ކުރެވިދާނެއެވެ.
މިމައުޟޫއަށް ވާހަކަ ދައްކަން ފަށާއިރު މިސާލެއްގެ ގޮތުގައި އެޅަސިކުނޑިއަށް ވިސްނޭނެ ގޮތަކަށް ވާހަކައެއްވެސް ކިޔައިދެވިދާނެއެވެ. އެވާހަކައިގައި އެފަދަ ކަމެއް ކުއްޖަކަށް ދިމާވުމުން އަމަލުކުރިގޮތް ބުނެދެވިދާނެއެވެ.
ކުއްޖާގެ މިޒާޖަށް ވިސްނާށެވެ. އަދި ވާހަކަދައްކަންވީ ރަނގަޅު ވަގުތު ވިސްނާށެވެ. އެކުދިންގެ ހިތުގައި ބައިވަރު ސުވާލު އުފެދޭނެކަން ވިސްނައި އެސުވާލުތަކަށް ޖަވާބުދޭން ތައްޔާރަށް ހުންނާށެވެ. އެހެންނޫނީ އެ ޅަސިކުނޑިތަކުން މާބޮޑަށް ވިސްނަން ފަށާނެއެވެ.
މަތީސާނަވީގައި އުޅޭ ކުދިންނަށް ވިސްނައިދޭނީ ކިހިނެއް؟
މިއުމުރުގެ ކުދިންނަށް މީހުންނަށް އިހުތިރާމް ކުރަންޖެހޭ ހާލަތްތަކާއި އިތުބާރު ކުރަންޖެހޭ ހާލަތްތައް ވަރަށް ރަނގަޅަށް ބުނެދޭންވާނެއެވެ. ގިނަ ފަހަރަށް ޖިންސީ ގޯނާއާއި އެންމެ ބޮޑަށް ކުރިމަތިވާ އެއް އުމުރުފުރައަކީ މިއީއެވެ. ރަހުމަތްތެރިންނާއެކު ކުދިން ކޮންމެތަނަކަށް ނުފޮނުވާށެވެ. ޕާޓީކުރުންވެސް މިއީ ރާއްޖޭގައި އާންމުވަމުުން އަންނަކަމެކެވެ.
ކުޑައިރުއްސުރެ ކިޔައިދެމުން އަންނަނަމަ މިއުމުރުގައި ތަފްސީލުކޮށް ކިޔައިދޭން އުނދަގޫ ނުވާނެއެވެ. އަދި ކުއްޖާއާއި ބެލެނިވެރިޔާއާއި ދެމެދު އޮންނަންޖެހޭ އިތުބާރު ގާއިމް ކުރެވިއްޖެނަމަ ކޮންމެފަދަ ކަމެއް ކުރިމަތިވިއަސް ކުއްޖާ އެވާހަކަ އެންމެ ފުރަތަމަ ހިއްސާ ކުރާނެ މީހަކަށް ބެލެނިވެރިޔާ ވާނެއެވެ.
މަތީސާނަވީގައި އުޅޭ ކުދިންނަށް އިސްލާމީ ނަޒަރިއްޔާއަކުން ބުނެދޭން މަސައްކަތްކުރާށެވެ. މިމައުޟޫއަށް އަމިއްލައަށް ބުނެދޭން ނޭނގޭނަމަ އިސްލާމީ ފޮތްތަކާއި ހަވާލާދެވިދާނެއެވެ. މިސާލަކަށް ކައިވެނި ކުރުމުގެ ކުރިން ނުކުރެވޭނެ ކަންތައްތައް ވަރަށް ރަނގަޅަށް ކުދިންނަށް ސާފުވާންވާނެއެވެ. އެފަދަ ކަމެއް ކޮށްފިނަމަ އެއީ ކިހާބޮޑު ގޯހެއް ކަމާއި މީހަކު އެފަދަ ކަމެއް ކުރަން އުޅެފިނަމަ އަމަލުކުރަންވީ ގޮތް ސާފުކޮށް ބުނެދޭންވާނެއެވެ. ނޭނގުމެއްގެ ތެރޭގައި ކުދިން ބެއިތިއްބުމަށްވުރެ ސާފުކޮށް އެކުދިންނަށް ވިސްނޭނެ ގޮތަކަށް ބުނެދިނުން ބުއްދިވެރިވާނެއެވެ.
ޖިންސީ އަނިޔާއެއް ކުރިމަތިވެއްޖެނަމަ އެހީތެރިވެދީ!
ޖިންސީ އަނިޔާއެއް ކުރިމަތިވެއްޖެނަމަ ކުއްޖާއަށް ވަރަށް ބޮޑަށް އެހީތެރިކަން ބޭނުންވާނެއެވެ. ޑޮކްޓަރަށް ދައްކާ ފަރުވާ ހޯދަން ޖެހިއްޖެނަމަ ފަސްނުޖެހޭށެވެ. ނަފްސާނީ ގޮތުން އެއަންނަ ބަދަލުތަކަށް ކައުންސިލިން ހޯދައިދޭށެވެ. ކުށްކުރި މީހާއަށް ހައްގު އަދަބު ލިބުނުތޯ ކަށަވަރު ކުރާށެވެ. އެއީ ކުއްޖާ އަށް ލިބޭނެ އެންމެ ބޮޑު ހިތްހަމަޖެހުމެވެ. އެހެންނޫނީ އެމީހެއްގެ ފަރާތުން އެފަދަ އަނިޔާއެއް އަނބުރާ ލިބިދާނެ ކަމުގެ ބިރު އެކުއްޖަކަށް އޮންނާނެއެވެ.
ޖިންސީ އަނިޔާއާއި ދެކޮޅަށް އެންމެން ތެދުވާން ޖެހެއެވެ. އެފަދަ އަނިޔާއެއް ކުއްޖާއަށް ލިބުނީ ކޮންމެ ފަދަ މީހެއްގެ ފަރާތުން ކަމުގައިވިއަސް ހައްގުބަސް ބުނާށެވެ. ކުށުގެ ވެށިން ކުދިން ސަލާމަތްކުރުމުގެ ހިތްވަރު ލިބިގަންނަން ޖެހެއެވެ.
