ވަގުތުގެ ބޭނުން ހިފާށެވެ!
1- ވަގުތަކީ ވަރަށް މުހިންމު އެއްޗެކެވެ. ފާއިތުވެއްޖެ ވަގުތަކީ، އަނބުރައި ގެނެވޭނެ އެއްޗެއް ނޫނެވެ. ވަގުތަށް ސަމާލުކަން ދިނުމަކީ އިސްލާމް ދީނުގައި ވަރަށް ބޮޑަށް ބާރުއަޅުއްވާފައިވާ ކަމެކެވެ. ތިމާގެ އުމުރުގެ އެންމެ ހިނދުކޮޅެއް ވެސް ފައިދާއެއް ނެތް ގޮތުގައި ނަގައިނުލުމަށް ކީރިތި ރަސޫލާ އިރުޝާދުދެއްވާފައި ވެއެވެ. އެހެންކަމުން އިސްލާމްދީނުގެ ރުކުންތަކާމެދު ވިސްނައިލިޔަސް މި ކަންތައް ރަނގަޅަށް ހާމަވާނެއެވެ. އިސްލާމް ދީނުގެ އެންމެ މުހިންމު އެއް ރުކުންކަމަށްވާ ފަރުޟު ފަސް ނަމާދާމެދު ވިސްނައިލި ނަމަވެސް އެކަން ހާމަވާނެއެވެ. އެ ނަމާދުތަކުގެ ފެށޭ ވަގުތާއި ނިމޭ ވަގުތު އޮންނަނީ ކަނޑައެޅިފައެވެ. ހަމަ އެފަދައިން އިސްލާމް ދީނުގެ އެއް ރުކުން ކަމުގައިވާ ރަމަޟާންމަހުގެ ރޯދައަކީ ވެސް ވަކި މައްސަރެއްގައި އޮންނަ ކޮންމެ ރެއަކު ފަޖުރުގެ އަލިކަން ފާޅުވީއްސުރެ އިރު އޮއްސިއްޖައުމަށް ދާންދެން، ވަގުތު ކަނޑައެޅި ބަޔާންވެގެންވާ އަޅުކަމެކެވެ. ހަމަ އެފަދައިން ޙައްޖުގެ އަޅުކަމަކީ ވެސް ވަކި މައްސަރެއްގައި، ވަކި ދުވަސް ތަކެއްގައި، މެނުވީ އަދާނުކުރެވޭނެ ގޮތަށް ވަގުތު ކަނޑައަޅުއްވާފައިވާ އަޅުކަމެކެވެ.
2- ނަމަވެސް އަދުގެ ދުނިޔެއަށް ވިސްނައިލާއިރު، ވަރަށް ގިނަ ޢަދަދެއްގެ މީހުން ވަގުތުގެ ބޭނުން ހެޔޮގޮތުގައި ނުހިފާކަން ފާހަގަކުރެވެއެވެ. ޚާއްޞަ ގޮތެއްގައި ޒުވާނުންނެވެ. މަގުމަތީގަޔާއި އެކިއެކި މައިދާންތަކުގައި އެއްވެސް ކަމެއް ނުކޮށް ގިނަ ވަގުތުތަކެއް ހޭދަކުރާ މީހުންނާއި، ކުޅިވަރުތައް ކުޅުމުގައި ގިނަވަގުތު ހޭދަކުރާ މީހުން ފެންނަލެއް މަދެއް ނޫނެވެ. މުސްލިމުންނަކީ ވަގުތުގެ ބޭނުން ހެޔޮގޮތުގައި ހިފާ މީހުންނަށް ވާން ޖެހެއެވެ. އެހެނީ ވަގުތަކީ އެއާ އެއްވަރަށް ތިމާ ފައި ހަމަ ނުކުރެވިއްޖެނަމަ، ތިމާއަށް ލިބެންވާ އެތައްއެތައް ފުރުސަތުތަކެއް ގެއްލިގެން ހިނގައިދާނެ އެއްޗެކެވެ. ވަގުތަކީ ފާއިތުވެ ދިއުމަށްފަހު އަލުން އަނބުރައި ގެނެވޭނެ އެއްޗެއް ނޫނެވެ.
3- ބައެއް މީހުންގެ ނަޒަރުގައި ވަގުތަކީ ދެމޭ ރަބަރެއް ކަހަލަ އެއްޗެކެވެ. އެހެން އެ ބުނަނީ ކުޑަ ވަގުތު ކޮޅެއްގެ ތެރޭގައި އެތައް އެތައް ކަމެއް ކުރެވޭތީއެވެ. ވަގުތުގެ މުހިންމުކަން އެތައްއެތައް ގޮތަކަށް ބޮޑުވެގެންވެއެވެ. ވަގުތުގެ މުހިއްމުކަން ބޮޑުވާ އެއް ސަބަބަކީ، އިސްވެ ބަޔާންވެ ދިޔަ ފަދައިން ފާއިތުވި ދުވަސްތަކެއް ތިމާ ކިތަންމެ ވަރަކަށް މަސައްކަތް ކުރިނަމަވެސް އަނބުރައި ނުގެނެވޭނެތީއެވެ. އެހެންކަމުން، ކޮންމެ ކުއްޖަކު ވެސް ތިމާގެ އުމުރާ މެދު ވިސްނާލާފައި، އުމުރުގެ ކޮންމެ ދުވަހަކީ ކޮންމެ ހަފްތާއަކީ އަދި ކޮންމެ މަހަކީ، ކޮންމެ އަހަރަކީ ވެސް ބޭނުންތެރި ގޮތެއްގައި ހޭދަ ކުރެވޭ އެއްޗަކަށް ހެދުމަކީ ވަރަށް ބުއްދިވެރި ކަމެކެވެ.
4- ކޮންމެ ދުވަހަކު ވެސް ތިމާ އެ ދުވަހެއްގެ ވަގުތުތައް ހޭދަ ކުރެވުނު ގޮތާމެދު ވިސްނާ ފިކުރުކޮށްލުމަކީ ވަރަށް މުހިންމުކަމެކެވެ. އެ ގޮތުން ކޮންމެ ދުވަހަކަށް އިރުއަރާ އިރުއޮއްސި ދާއިރު، ތިމާއަށް އެ ދުވަހަކު ކުރެވުނު ބޭނުންތެރި ހަރުދަނާ ކަންތައްތަކާއި އެއްވެސް ކަމަކަށް ނުވާ ކަހަލަ ބޭކާރު ކަންތައްތައް ހަނދާންކޮށްލުމަކީ ވަރަށް މުހިންމު ކަމެކެވެ. މިގޮތަށް ކަންތައް ކުރެވިއްޖެނަމަ، ވަގުތުގެ ބޭނުން އެ ކުއްޖަކަށް އެ ދުވަހަކު ކުރެވުނު ގޮތް އަމިއްލައަށް ވަޒަން ކޮށްލެވޭނެއެވެ. މިޒަމާނުގައި ތިޔަ ކުދިން އެ ދަސްކުރާ "ޓައިމް މެނޭޖްމަންޓް" އަކީ ވަގުތުގެ ބޭނުން ހެޔޮގޮތުގައި ހިފަން ދަސްކޮށްދޭ ޢިލްމެވެ.
5- އުމުރަކީ އަބަދު ވެސް ބަދަލުވަމުން ދާ އެއްޗެކެވެ. ތިޔަ ކުދިންގެ މިހާރުގެ އުމުރާ މެދުގައި ވެސް ތިޔަ ކުދިން ވިސްނައިލުމަކީ މުހިންމުކަމެކެވެ. އަބަދަކު އެއްވަރަކަށް ނުހުރެއެވެ. އެއް ދުވަހުން އަނެއް ދުވަހަށް މި ފެންނަނީ މާ ދޮށިވެ ދުވަސްވެ ބޮޑުވަމުން ދާ ތަނެވެ. ހީ ނުކުރާހާ އަވަހަށް ދުވަސްތައް މި ދަނީ ފާއިތުވަމުންނެވެ. އަދި ކުރަންޖެހޭ މަސައްކަތްތަކާއި ނަގަންޖެހޭ ޒިންމާތައް ދަނީ އެއް ދުވަހުން އަނެއް ދުވަހަށް އިތުރު ވަމުންނެވެ. އެހެންކަމުން ވަގުތުގެ ބޭނުން އޭގެ އެންމެ ފުރިހަމަ ގޮތުގައި ހިފާށެވެ. ގެއްލިއްޖެ ވަގުތަކީ އަނބުރައި ހޯދޭނެ އެއްޗެއް ވެސް ނޫނެވެ. މުސްކުޅިން ބުނެއުޅޭފަދައިން "ވަގުތަކީ ރަނަށްވުރެ ވެސް އަގުބޮޑު އެއްޗެކެވެ."
ސުވާލުތައް:
1- ވަގުތު މުހިންމުވާ 3 ސަބަބެއް ލިޔެދޭށެވެ!
ހ____________________________________________________________________
ށ____________________________________________________________________
ނ____________________________________________________________________
-2 ދީނުގައި ވަގުތު ކަނޑައެޅިފައިވާ ރުކުންތަކެއް ވާކަން އެބަ އެނގެއެވެ. އެއިން 2 ރުކުނެއް ލިޔާށެވެ!
ހ____________________________________________________________________
ށ____________________________________________________________________
3- ކޮންމެ ކުއްޖަކު ވެސް ތިމާގެ އުމުރާ މެދު ވިސްނަން ޖެހެނީ ކީއްވެކަން ދޭހައިގެ އަލީގައި ލިޔާށެވެ!
_______________________________________________________________________
________________________________________________________________________
4- ވަގުތުގެ ބޭނުން ހެޔޮގޮތުގައި ހިފަން ދަސްކޮށްދޭ ޢިލްމަށް ކިޔާ ނަމަކީ ކޮބައި ހެއްޔެވެ؟
________________________________________________________________________
5- ވަގުތުގެ ބޭނުން އެ ކުއްޖަކަށް އެ ދުވަހަކު ކުރެވުނު ގޮތް އަމިއްލައަށް ވަޒަން ކޮށްލެވޭނެ ގޮތަކީ ކޮބައި ހެއްޔެވެ؟
________________________________________________________________________
6- " ވަގުތަކީ ރަނަށްވުރެ އަގުބޮޑު އެއްޗެއް" މި ޢިބާރާތުން ދޭހަވާ މާނަ ލިޔާށެވެ؟
________________________________________________________________________
________________________________________________________________________
________________________________________________________________________
7- ދޭހައިގެ އަލީގައި ރަނގަޅު ޖުމުލާގައި ރަނގަޅު އަދި ނުބައި ޖުމުލާގައި ނުބައި ފާހަގަ ޖަހާށެވެ!
- މީހުން ވަގުތުގެ ބޭނުން ހެޔޮގޮތުގައި ނުހިފާކަން ފާހަގަކުރެވެއެވެ.
- އެ ކަމެއް ކުރަން އޮންނަ ވަގުތެއްގައި އެކަން ކުރުން އެއީ އެންމެ ބުއްދިވެރިގޮތެވެ.
- ޒުވާނުންނަށް ވަގުތަކީ އެހާ މުހިންމު އެއްޗެއް ނޫނެވެ.
- ރަނާ އަދި ވަގުތާ އަޅާ ބަލާއިރު އެންމެ މުހިންމު އެއްޗަކީ ރަނެވެ.
- ފަރުޟު ފަސްނަމާދަކީ ވަގުތު ކަނޑައެޅިގެންވާ ރުކުންތަކެކެވެ.
8- ދޭހައިގެ އަލީގައި ބަހާއި މާނަ ގުޅުވުމަށްޓަކައި ގޮޅީގައި ގުޅޭ އަކުރު ލިޔާށެވެ!
- މައްސަރު ހ- އުފަންބިން
- ފަޖުރު ށ- އުމުރުން ދުވަސްވުން
- ވަޒަން ނ- އަހަރުގެ ދުވަސްތައް ބައިކޮށްފައިވާ ގޮތް
- ޒިންމާ ރ- ކުރަން ޖެހޭ ކަންތައްތައް
- ދޮށިވުން ބ- ފަތިހުގެ އަލިކަން
| 1 | 2 | 3 | 4 | 5 |
ނޯޓް: ޙުސްނާ ފަހްމީ (ހުސްނާ މިސް) އަކީ، ރާއްޖޭގެ ތަޢުލީމީ ދާއިރާގައި 42 އަހަރަށް ވުރެ ގިނަ ދުވަހު އިޚުލާޞްތެރި ޚިދުމަތްތަކެއް ކުރައްވާފައިވާ ކަނބަލެކެވެ. އަދި މެދުނުކެނޑި 37 އަހަރަށް ވުރެ ގިނަ ދުވަހު ދިވެހި ދައުލަތައް ޚިދުމަތްކުރައްވާފައި ވާތީ، ރައިސުލްޖުމްހޫރިއްޔާ ދެއްވާ ދައުލަތަށް ގިނަ ދުވަހު ޚިދުމަތް ކުރުމުގެ އިނާމު 2021 ވަނަ ލިބިވަޑައިގަތުމާއެކު 2023 ވަނަ އަހަރު ރެހެންދި އެވޯޑް ލިބިވަޑައިގެންފައިވެއެވެ. ހިތްވަރު ދިނުމުގެ ޤައުމީ އިނާމު ހުސްނާއަށް ލިބިވަޑައިގެންނެވީ 2025 ވަނަ އަހަރު އެވެ. ޙުސްނާ ފަހްމީ "އަރާކުރި" ސީރީސް ގެ ނަމުގައި ދިވެހިބަހުގެ ހަތަރު ހުނަރަށް އަމާޒުކުރައްވައިގެން ނާސަރީ ކުދިންނަށް ޚާއްޞަ ދިވެހިބަހުގެ އަކުރުތަކާއި ފިލިތަކާއި ސުކުންތައް ދަސްކޮށްދޭ ފޮތްތަކުން ފެށިގެން ޕްރައިމަރީ އަދި މެދުމަދަރުސީ ގްރޭޑްތަކުގެ ކުދިންނަށް ޚާއްޞަކޮށްގެން ޢިބްރަތްތެރި އަދި މަޖާ ކުރު ވާހަކަތަކާއި، މަސައްކަތު ފޮތްތަކާއި، ވާހަކަ ދޭހައާއި ކިޔުމުގެ ދޭހައިގެ ފޮތްތަކުގެ އިތުރުން އުފެއްދުންތެރި ލިޔުމުގެ ފޮތްތައް ހިމެނޭނޭހެން 40 ފޮތެއް މިހާތަނަށް ނެރެ އާންމުކުރައްވާފައިވެއެވެ.
