ޝާއިރާގެ ދުނިޔެ ބަދަލުވެފައިވާކަމުގެ އިޙްސާސާއެކު، އަޝްރަފްގެ ލޯބި ގަބޫލުކުރެވުމަކީ އޭނަ އަމިއްލައަށް ވަޅުގަނޑަކަށް ވެއްޓިގަތުން ކަމުގައި އޭނަގެ ހިތް ބުނަމުން ދިޔައެވެ. އަޝްރަފްގެ ހިނިތުންވުން، އެރޭ އޭނަގެ ތުންފަތަށް ވެރިވި ޖާދޫގަރެއްގެ ހިނިތުންވުން، މިހާރު ހީވަނީ އޭނަގެ ރޫޙު ހިފެހެއްޓުމަށް އަޅުވާފައިވާ ނުބައި ސިހުރެއްހެންނެވެ.
"ޝާއިރާ، އަހަރެން ހަމައެކަނި ބޭނުންވަނީ ތި އުފަލުގައި ބައިވެރިވުމަށް. ދެން ދުވަހަކުވެސް އަހަރެން ދޫކޮށްފައި ނުދާނަން، ރަނގަޅުތަ؟" އަޝްރަފް ޝާއިރާގެ ކައިރީގައި އިށީނދެ، އޭނަގެ ލޮލަށް ފަރުވާތެރިކަމާއެކު ބަލާލިއެވެ.
އޭނަގެ އަޑުގައި އޮތީ މަޑުމައިތިރި ރާގެއް ނަމަވެސް، ޝާއިރާއަށް އެއަޑު އިވުނީ އޭނަގެ ކަންފަތުގައި ބިރުވެރި ބާރުގަދަ އަޑަކުން ގޮވައިލި ފަދައިންނެވެ.
ޝާއިރާ އަކީ ޖިންނިއެއްކަން އަޝްރަފްއަށް އެނގޭއިރުވެސް ކުރިއަށް ދާން ބޭނުންވިއެވެ. އެކަމަކީ ފަސޭހަ ކަމަކަށް ނުވާނެކަން އަޝްރަފްއަށް އެނގެއެވެ. އެހެންނަމަވެސް، އޭނަގެ ހިތުގައި އޮތް ޝައުޤުވެރިކަމާއި، ޝާއިރާގެ އާދަޔާ ޚިލާފު ރީތިކަމަށް އޭނަ ވަނީ ހެއްލިފައެވެ. އެކަމަކު، ޝާއިރާގެ ދުނިޔެއަށް ވަނުމަކީ އަޝްރަފްގެ އަމިއްލަ ނަފްސު ވެސް ގެއްލިގެން ދިއުން ކަމަށް ވެދާނެކަމުގެ ބިރުވެރި ޚިޔާލު ހިތަށް އަރަމުން ދިޔައެވެ.
"އަހަރެންނަށް އެނގޭ، ޝާއިރާ. އަހަރެންނަށް ހުރިހާ އެއްޗެއްވެސް އެނގޭ" އަޝްރަފް އިސްޖަހާލައި، ޝާއިރާގެ އަތުގައި ހިފަހައްޓާލިއެވެ. އެއީ އޭނަގެ ހަށިގަނޑުގެ ވަރުދެރަކޮށްލާ، އޭނަގެ ބާރުތައް ހިފަހައްޓާލާފަދަ ބާރެކެވެ.
"ތި ޖިންނީ ރޫޙު އަހަރެންނަށް އެނގޭ. އެކަމަކު، އަހަރެން ލޯބިވަނީ ޝާއިރާދެކެ" އަޝްރަފް ބުނެލިއެވެ.
ޝާއިރާގެ ހިތް އަނެއްކާވެސް ބިރުން ތެޅިގަތެވެ. އޭނަގެ ސިއްރު އަޝްރަފްއަށް އެނގޭކަން ގަބޫލުކުރަން އޭނަގެ ހިތް ބޭނުން ނުވިއެވެ.
"އަހަރެން ދުވަހަކުވެސް ދޫކޮށްފައި ނުދާނަން. ޝާއިރާއަކީ މިހާރު އަހަރެންގެ.... އަހަރެންގެ އުފަލުގައި ބައިވެރިވެ، ދެން ދުވަހަކުވެސް ވަކިނުވާނަން" އަޝްރަފް މަޑުމަޑުން ޝާއިރާގެ ކައިރިއަށް ޖެހިލިއެވެ. އޭނަގެ ނޭވާގެ ހޫނުކަން ޝާއިރާގެ ކަރުގައި ބީހިލިއެވެ.
ޝާއިރާގެ ހަށިގަނޑު ހީވީ ގަނޑުވެފައިވާހެންނެވެ. އޭނަގެ ދުނިޔެ ބަދަލުވެފައިވާކަން، މިހާރު ހަމަ ޔަޤީނެވެ. އެހެންނަމަވެސް، އޭނަގެ ބާރުތައް ހީވީ ނިކަމެތިވެފައިވާހެންނެވެ.
އަޝްރަފް އޭނަގެ އަތް ޝާއިރާގެ ކޮނޑަށް ލައި، މަޑުމަޑުން އޭނަގެ ހަށިގަނޑު އަޝްރަފްއާ ދިމާއަށް ދަމައިގަތެވެ. ޝާއިރާއަށް ހަޅޭއްލަވައިގަންނަންވެސް ނުކެރުނެވެ. އޭނަގެ އަނގަ ހީވީ މީހަކު ބަންދުކޮށްފައިވާ ހެންނެވެ.
"އަހަރެން ދުވަހަކުވެސް ތި ސިއްރު އެހެން މީހަކަށް ހާމައެއް ނުކުރާނަން" ޝާއިރާގެ ކަންފަތްދޮށަށް ޖެހިލަމުން އަޝްރަފް މަޑުމަޑުން ވައި އަޑަކުން ބުނެލިއެވެ.
ޝާއިރާގެ ނޭވާ އަވަސްވިއެވެ. އޭނަގެ ހާލަތަކީ މިހާރު އަޝްރަފްގެ ކުޅޭ ކުޅޭ އެއްޗެއްކަން އޭނައަށް އެނގުނެވެ.
"މީގެ ފަހުން، ތި ދިރިއުޅުމަކީ އަހަރެންގެ ދިރިއުޅުން. ޝާއިރާ ދެން ނިދާނީ އަހަރެންގެ ކައިރީގައި އަދި ތި ސިއްރުގެ ވާހަކަ އެހެން މީހަކަށް އެނގޭނެ ކަމަށް ހީވެސް ނުކުރާތި" އަޝްރަފް ވަރަށް ލޯބިން ބުނެލިއެވެ.
އަޝްރަފް ހީކުރި ކަހަލަ ބާރެއް އޭނަގެ އަތަކު ނެތެވެ. ޝާއިރާގެ ބާރު އަޝްރަފްގެ މައްޗަށް ބޮޑުވަމުން ދިޔައެވެ. އަޝްރަފްގެ ކޮންމެ ކަމެއްވެސް ނިންމެން އޮންނަނީ ޝާއިރާގެ ބޭނުންތަކާއި އެއްގޮތަށެވެ. ޝާއިރާގެ ލޮލުގެ އެންމެ އިޝާރާތަކުންވެސް އަޝްރަފް ތެޅިގަނެއެވެ.
ޝާއިރާ އަކީ އިންސާނަކަށް ނުވާތީ މީހުންގެ ތެރޭގައި އުޅެން އުނދަގުލެވެ. އޭނަގެ ހަގީގީ ސިފަ ފޮރުވައިގެން، އިންސާނެއްގެ ސިފައިގައި އުޅެންޖެހުމަކީ އޭނަ ދެކޭ އެންމެ ބޮޑު އަނިޔާއެވެ. ނަމަވެސް އަޝްރަފްގެ ގާތުގައި އެގޭގައި އަބަދުވެސް އުޅޭނެއެވެ. ސަބަބަކީ، އޭނަގެ ހަގީގަތް ރަށުގެ މީހުންނަށް އެނގިއްޖެއްޔާ ޝާއިރާ މަރާލާނެކަމުގެ ބިރު އަބަދުވެސް ހިތުގައި އޮތީމައެވެ. އަޝްރަފް އަކީ އޭނަގެ ހަގީގަތް ފޮރުވައިދޭ ހަމައެކަނި ފަރާތެވެ. އެހެންކަމުން، އެ ބިރުވެރި ސިއްރުގެ ހަވާލުގައި ދެ މީހުންގެ ދިރިއުޅުން އޮތީ ބަނދެވިފައެވެ. އެކަކު އަނެކަކަށް ބިރުވެރި ހާލަތެއްގައި ބަދެވިފައިވާ ބެދުމެކެވެ.
އަޝްރަފްގެ ދިރިއުޅުމުގެ ކޮންމެ ހެނދުނަކީ ބިރުވެރި ހުވަފެނަކުން ހޭލެވޭ ހެންނެވެ. އޭނަގެ ހިތުގެ ތެޅުން އަވަސްވެ، ކޮންމެ މަސައްކަތެއްވެސް ކުރަންޖެހެނީ ޝާއިރާގެ ހުއްދައާއި އެއްގޮތަށެވެ. އޭނައަށް އެއްވެސް ބާރެއް ނެތްކަން އެނގުނެވެ.
އަޝްރަފް ބަދިގެއަށް ގޮސް، ޝާއިރާ ބޭނުންވާ ކާނާ ތައްޔާރުކުރިއެވެ. ކޮންމެ ދުވަހަކުވެސް އޭނަ ތައްޔާރުކުރަނީ ޝާއިރާ ބޭނުންވާ ކާނާއެވެ. ޝާއިރާ އަކީ ކޮންމެ ދުވަހަކުވެސް ތަފާތު ކާއެއްޗެހި ބޭނުންވާ މީހެކެވެ. ޝާއިރާ އަކީ އިންސާނަކަށް ނުވާތީ، އޭނަގެ ބަނޑަށް ހެޔޮވާވަރުގެ ކާނާއެއް ހެދުމަކީ އަޝްރަފްއަށް ދިމާވާ އެންމެ ބޮޑު ގޮންޖެހުމެވެ. ބައެއްފަހަރު ޝާއިރާއަށް ހިތްހަމަ ނުޖެހިއްޖެނަމަ، އަޝްރަފްއަށް ކުރިމަތިލާންޖެހެނީ ބިރުވެރި ހާދިސާތަކަކާއެވެ.
ދިރިއުޅުން ކުރިއަށްދިޔައިރު، އަޝްރަފްގެ ހަށިގަނޑު ހިކި، އޭނަގެ ލޮލުގެ ކަޅު ކުލަ ފަނޑުވެއްޖެއެވެ. ރަށުގެ މީހުން އޭނަގެ ހާލަތާ ބެހޭގޮތުން ސުވާލުކުރަން ފެށުމުން، އަޝްރަފް ވަރަށް ބިރުގަނެއެވެ. އޭނަ ޝާއިރާގެ ވާހަކަ ސިއްރުކުރުމަށްޓަކައި، އެކިއެކި ބަހަނާތައް ދައްކަން ޖެހެއެވެ. ކޮންމެ ދުވަހަކުވެސް އޭނަ ބިރުގަންނަނީ ޝާއިރާގެ ސިއްރު ފަޅާއަރާފާނެތީއެވެ. އޭނަގެ ދުލުން ބޭރުވެދާނެ އެންމެ ލަފްޒެއްގެ ސަބަބުންވެސް ޝާއިރާގެ ހަގީގަތް އެނގިދާނެ ކަމުގެ ބިރު އޭނަގެ ހިތުގައި އަބަދުވެސް އޮވެއެވެ.
އެއްދުވަހެއްގެ ރެއެވެ. ވާރޭ ވެހޭ އަޑު ގަދައެވެ. ވައިރޯޅި ތެރެއިން ޝާއިރާގެ ހިމޭން އަޑު އިވެން ފެށިއެވެ. އަޝްރަފް ނިދިން ހޭލާ ކޮޅަށް ތެދުވެ، ސިޓިންގރޫމާ ދިމާއަށް ހިނގައިގަތެވެ. އަޝްރަފްއަށް ފެނުނީ ޝާއިރާގެ ހަގީގީ ސިފައެވެ. އޭނަގެ ހަށިގަނޑު ހީވީ ކުދިކުދިވެގެންދާ ހެންނެވެ.
"އަހަރެންގެ ސިއްރު ފަޅާއަރައިފި" ޝާއިރާގެ އަޑު އިވުނެވެ. އެއަޑުގައި ވަނީ ބިރުވެރި ހިނިގަނޑެކެވެ.
އަޝްރަފްއަށް އެއްވެސް އެއްޗެއް ނުބުނެވުނެވެ. ދެ ލޯ ބޮޑުކޮށްގެން ޝާއިރާގެ މޫނަށް ބަލަން ހުއްޓެވެ.
ވާރޭގެ އަޑުގަދަވީއެވެ. އަޝްރަފްގެ ހިތުގެ ތެޅުން އަވަސްވީއެވެ. ދެމީހުންގެ މެދުގައި އޮތް ބިރުވެރި ގުޅުމަށް އިތުރު ބާރެއް ލިބުނުހެންނެވެ. އެކަކު އަނެކަކުގެ ސިއްރު ހިފެހެއްޓިފައި، ދިރިއުޅުމުގެ ކޮންމެ ފިޔަވަޅެއްވެސް ބިރާއެކު ކުރިއަށް ގެންދެއެވެ.
ކޮޓަރީގެ ތެރެއަށް ވެރިވެފައިވާ އަނދިރީގައި، ޝާއިރާގެ ސިފަ ބަދަލުވަމުންދިޔަ މަންޒަރު އަޝްރަފްގެ ލޮލަށް ފެނުނެވެ. އޭނަގެ ހަށިގަނޑުން ނުބައި ވަހެއް ދުވިއެވެ. އޭނަގެ ދެ ލޯ ފުރާފައިވަނީ އަނދިރިކަމުންނެވެ. އެ މަންޒަރު ފެނުމުން އަޝްރަފްގެ ނޭވާ ހީވީ ހުއްޓިގެންދާ ހެންނެވެ.
އެ ވަގުތު އަޝްރަފްއަށް އެނގުނީ، ޝާއިރާގެ ސިއްރު ފަޅާއެރުމަކީ އޭނަގެ ހަޔާތުގެ ނިމުންކަމެވެ. އެހެންކަމުން، އެ ސިއްރު ފޮރުވައިގެން، އޭނަގެ ގައިގާ އެއްވެސް ބާރެއް ނެތްކަން ހަގީގަތުގައި ވެސް އެނގިގެންދިޔައެވެ. ޝާއިރާ އޭނަގެ މައްޗަށް ބާރު ހިންގާނީ ހަމައެކަނި ގައިގަ ބާރެއް ހުރެގެން ނޫނެވެ. އޭނަގެ ހިތުގެ ބާރުންނާއި، އޭނަގެ ސިކުނޑީގެ ބާރުންނެވެ.
އަޝްރަފް އެތަނުން ދާން ބޭނުންވިއެވެ. ނަމަވެސް އޭނަގެ ފައި ހީވީ ބިމުގައި ހަރުލާފައިވާ ހެންނެވެ. ހިނގައިވެސް ނުގަނެވުނެވެ.
"އަހަރެން ދޫކޮށްފައި ދާން ބޭނުންވަނީ ކީއްވެ؟ މިހާ ދުވަހު އަހަރެންގެ ސިއްރު ފޮރުވައިގެން ތި ދިރިއުޅުނު ގޮތަށް، ދެންވެސް ތި ދިރިއުޅުން ކުރިއަށް ގެންދާނީ" ޝާއިރާގެ އަޑު ކެނޑުނެވެ.
އަޝްރަފްގެ ދެލޮލުން ކަރުނަ އައެވެ. އޭނައަށް މިހާރު އެނގުނެވެ. އޭނައަށް މި ބިރުވެރި ބަނދެވުމުން ދުވަހަކުވެސް ސަލާމަތެއް ނުލިބޭނެކަމެވެ. ޝާއިރާގެ ބާރުގެ ދަށުގައި އޭނަގެ ދިރިއުޅުން އަބަދުވެސް އޮންނާނެކަމެވެ. އެކަމަށް އޭނައަށް ކުރެވޭނެ އެއްވެސް ކަމެއް ނެތެވެ. ރަށުގެ މީހުންނަށް ޝާއިރާގެ ސިއްރު އެނގިއްޖެނަމަ، ދެ މީހުންގެވެސް ހަޔާތަށް ނިމުމެއް އަންނާނެކަމުގެ އިހުސާސްވެއެވެ.
= ނުނިމޭ =
